لآهنتم يارجال ، كم سؤال عابر سبيل ..

[Abu Sary]

السلام عليكم ورحمة الله وبركاته ..

كيف حالكم أخواني عساكم بألف خير وصحة وسلامة ..

حبيت أستفيد من خبرتـكم ، باسألة شبه عشوائية ، لكن أجهل الاجوبة الدقيقة عنها ..

واللي عنده أفادة يفيدني لآهنتـم ..

سـ1.. وش الفرارات .. وطريقة استخدامها وفايدتها ..؟
سـ1.. وش الفلتر.. والهدرز.. وطريقة استخدامها وفايدتها ..؟
سـ2..وبالنسبة للجيوب الربع.. أشوف بعضها صداماتها طويله قدام وبعضها قصيره وش المعنى ؟
سـ3..عنـدكم وظائف ..؟ :D



وشكراً مقدماً للجميع ..


بالتوفيق للجميع ..














( اللهم حسن الخاتمة )

[ابن عكاش]

الفرارات تخلي الكفرات الأماميه ما تحرك الدفرنس وعمود الدبل يعني تريح الموتر وهذا ينفع مع الجيوب اللي مافيها رباعي مستمر
ولو كان فيه رجه في عمود الدبل تريحك منها اتمنى اني افدتك وباقي الأسأله لعل الشباب يفيدونك فيها

[فهد الميهوبي]

الفرارات حلوه ترريح المووتر انا مجربها ميتين بالميه ركبها وراح تدعيلي تحس المووتر اخف من اول واريح ولطلعت للبر معاليك الا تفرها

[احترت]

بالنسبه للفلتر يدخل هوا اكثر للمكينه والهدرز اللي هو تغيير القزوز البلد ودبة البلد بأخرى اوسع منها لخروج هوا اكبر
((و دخول هوا اكثر ومن ثم خروج هوا اكثر النتيجه عزم افضل بشكل خيالي))


وبالنسبه لصدامات الربع
اللي يجي قصير هذا حق شد بلد واللي يجيك طويل هذا حق جيب شاص يركبونه للربع
كأجمل شكل ويحمي الوجهيه من الحوادث لا سمح الله

اتمنى اني قد افدتك

وبالنسبه للوظيفه مالظاهر:(

[؟؟؟شادي نجد؟؟]

السلام عليكم ورحمة الله وبركاته

بالنسبة للفرارات هي تقول بفصل الحركة عن الدفرنس الامامي وعمود الدبل ويصير الموتر دفع خلفي وخفيف وتريح المكينه والجير من حمل حركة الدفرنس الامامي وكذلك تقلل من صرف البنزين ويخلي الموتر عزمه خفيف

والدبل يصير ارضي وتشبكه من الكفرات اولا ثم من داخل تشبك الدبل عادي

اقضل شي هي الاسترالي اللي عند السليماني وقيمتها 550 ريال وتركيبها تقريبا 50 ريال والافضل منها نو عند تويوتا وقيمته من 800 الى 900 ريال وهو حق الشاص القديم

وبالنسبة للهدرز / فهو اقزوز كامل من المكينه الى الدبه الاخيرة
وافضل شي هو المونايز البحريني وقيمته تقريبا من 1800 الى 2500 حسب العرض كم بوصه وحسب نوع الصوت ونوع الدبه اللي بالنص هي اللي يحكم على الصوت وفايدته هو انه يقوي عزم الموتر 30% بس حط ببالك انه لو كثرت بالدعس ينقص زيت المكينه عندك واذا مسكت عمرك فموترك بيطلع عزم ويعجبك بالنفود لأنه يسهل خروج هواء المكينه ويقلل من كتمها للهواء اللي فيها ويصير الموتر يمد معك بالعزم اكثر وافضل محل هو اقزوز مارك بالبحرين

والفلتر هو بعد يفيد المكينه بأنه يزيد دخول الهواء للمكينه ويزيد من عزم المكينه 15% تقريبا واثره مثل الهدرز انه لو ما مسكت نفسك بينقص الزيت عندك

والصدام اللي هو حق الوكالة قصير وحق الشاص هو الطويل والبعض يبدله للمنظر فقط

اتمنى افدتك

[Abu Sary]

ابن عكاش .. الله لآيهينك يعطيك العافيه وتسـلم على المرور والمعـلومة وجزاك ربي الجنـة
فهد الميهوبي .. الله لآيهينك يعطيـك ربي العافيه وماقصرت على هالمعلومات وجزاك ربي الجنة
أحترت .. الله لآيهينك يعطيك العافية وتسـلم على المرور والمعلـومات وجزاك ربي الجنة
شادي نجد .. الله لآيهينك " كفيت ووفيت " ولآ خليـت شيء ينقـال بعدك وعلى قولهم ختاماً مسك ..
اشهـد بالله إنك ماقصرت الله يعطيك العافية ويجزيك ربي الجـنة ..


رحـم الله والدينكم ولآ قصرتوا على المرور والمعـلومات القيـمة ..

بالتوفيق للجميع ..












( اللهم حسن الخاتمة )