بآتـرول 99 ...! عقدني تعقيـد....؟ أبي حل

[راعي الخرماء]

السلآم عليكم ورحمة الله وبركآته
أسعد الله مساءكم / صباحكم / بكل خيـر

ياجمـاعة الخير أنا عندي بآترول 4 أبواب 99 بخاخ عقدنـي تعقيـد ..
مآ غير يقطـع وتقطيعـه من فتره تقريباا شهـر .. المشكله بعض الاحيآن اروح عليه مشوار مافيـه أحلى منه واذا وقفت ورجعت مره ثانيه قام يقطع ..

غيرت الخرطوش اللي رايح للقربه .. غيرت اسلآك البـواجي ..

ملآحـظه بسيطـه .< اذا عشقته بواحد عزمه ضعيف لدرجة الشاحنات تطوفني يعني مايطيرر الا اذا وصل 110 أو 120 صار طياره بس اذا قومته بواحد الين اوصل 100 ضعيف مره

تكفـون يالربع أبي حـل لـ هالمشكلـه

ودمتـم بـود ..

[saif2009]

مرحبابك يالذيب
موترك يا غالي يبيله تصفية مكينة يعني تغيير بواجي مع اسلاك بواجي مع فلتر بنزين والاهم والسبب الرئيس البخاخات تتنظف او تتغير عند اللزوم كلها مع بعض ويضبط ان شاء الله ....وسلامتك

[المماتوس]

أخوي تأكد من البواجي أصلية ومطابقة للسيارة وأن العامل غيرها كلها فعلا وأنت عنده
نظف فلتر البنزين ولا تغير شي مكلف الإ إنك متأكد يعني مر أكثر من كذا ورشة والله يعينك أحيانا العطل بسيط

صار معي نفس مشكلتك بكابريس تقطيع فريت كل علماء الصناعية ماقدروا يعرفون السبب جيت لواحد سوري قال اترك السيارة لين تبرد غبت نصف ساعة ورجعت قال السيارة جاهزة وحقي 100 ريال رفض يقول المشكلة يقول سر مهنتي عطيته حقه وقلت تستاهل والسيارة زي الحلاوة
وإن شاء الله إنك ماتكلف وتخبرنا لكي نستفيد

[omar 3]

ركب هدرز وفلآتر رياضيه وتبي تطير :redcar::good:


غير البواجي وأسلآكهن وحطل أصليات مطابقة للموتر وفلتر البنزين والبخاخات نضفهن او غيرهن وفالك قومت ربع أن شاء الله

[مقلع الرمث]

غير الدفرنس خخخخخخخخخخخخ امزح معاك

توقعاتي من منظم الهواء اللي بالقربه شيك عليه

وشيك على صفاي البنزيم مع اسلاك البواجي والبواجي

وشيك علىه احسن لك بالكمبيوتر ب 100 ريال تعرف كل شي عنه

بالتوفيق

[عاشق السيل]

أنصحك تشيك عليه بالكمبيوتر علشان يطلع لك كل مشكلة لأن مشكلة التقطيع وضعف العزم لها أكثر من سبب !!

ممكن يكون من طرنبة البنزين أو حساس الهواء وهذي كلها غالية ،، وممكن يكون من صفاية البنزين أو البواجي أو أسلاك البواجي أو .. أو .. أو ....

الله يوفقك لكل خير ...

[راعي سنار]

شيك على دبة الشكمان ربما تكون مسكره لئنها تسبب ضعف في عزم الموتر

[سوبر VTC]

حياك

اذا كانت قومة الموتر ب1 ضعيفة
فاحتمال كبير تحتاج وزن الدزق و الكلتش او الكلتش مخلص قاضي
او ضعف بطرمبة البنزين
او من خرطوش القربة

ادخل الرابط التالي

http://www.mekshat.com/vb/images/misc/subscribed.gif نيسان سوبر سفاري 2001 (http://www.mekshat.com/vb/showthread.php?t=314900)

[شمالات نجد]

الميكانيكا
غير الصفاية إذا كنت من زمان ما غيرتها
نظف فلتر الهوا أو غيره أفضل إذا هو قديم
نظف البخاخات

الكهرب
وزن الديلكو
غير الشاكوش (داخل الديلكو)
تأكد من منظم الهوا

وفقك الله

سلام

[bn_501]

غير الطرمبه حقت البانزين والصفاي

وشيك على الدزق والكلتش

[كريم الطباع]

يفيدونك الاخوان ان شاء الله

[راعي الخرماء]

والله ياجماعة الخير ماقصرتوا ،
انا شيكت على القربه واسلاك البواجي والخرطوش اللي طالع للقربه يعني كل شي ضبطته
بس تصدقون راح عني تشييك الكمبيـوتر

إن شاء الله بطلع بعد شوي وابي اشيك عليه وبإذن الله اقولكم وش المشكله

[سوبر VTC]

الله يسهل امرك
افضل من يبخص اعطال و كهرب الموتر
العثيم بصناعية الرواف في بريدة
او يوسف الخضير بتشاليح بريدة

[fof6666]

شيك على طرمبة البنزين
كان معي 99 وفيه نفس المشكلة وقالو لي غير طرمبة البنزين
لكني ماصلحته وبعته بخرابه

[شيخ الرعوجي]

يالذيب خل الخرابيط عنك واسمع اذا انت تعبي بنزين 91 غيرررررررررررررره لايهمك حط 95 وامسك بالموتر خط واذا ماظبط شف رقم البواجي هو للموتر والا لا واذا ماتعرفه راسلني واعطيك الرقم بالتوفيق مع العلم ان لدي جيب مثله يعني مااقول شي من راسي

[الطوقي555]

اخوي قصيمي كويتي اذا شيكت بالكمبيوتر بيقول لك الحساس حق الهواء بس لا تغيره شيك على خرطوش الهواء الربل الي بعد الحساس تلقى فيه تهريب فكه وشيك عليه مضبوط تلقى الشق بين الحزوز حقاته
تقبل تحياتي

[فارس البريدي]

سبحان الله

نفس المشكلة عندي بالضبط باترول 4 أبواب 98

ضعف في العزم و خاصة عند بداية التحرك مع تنتيع وأحيانا يختفي ويكون تمام

بصراحة رفع ضغطي وكنت ناوي أنزل استفسار هنا لكن قلت أبدور يمكن أحصل موضوع مشابه والحمد لله وجدته وردود الإخوان ممتازة

لكن ننتظر رد أخونا قصيمي كويتي هل انحلت المشكلة أو لا

وقبل قليل اتصلت على أحد الإخوان سياراته دائماً باترول وقلت يمكن مرت عليه هالمشكلة وقال لي نعم مرت علي حيث كنت استخدم بنزين أخضر وأغيره إلى أحمر لين يجرد ثم أرجع على الأخضر واستمر عليه فترة وهكذا

[راعي الخرماء]

مـآ قصصرتوا يآجمـآعة الخيـرر على الردود ، واعذروني ان طولت عليكم لآني كنت متواجد بالكويت
ونآدرا ادخل الانترنت ولا يسمح لي وقتي اخذ عليه اكثر من 5 دقايق والحمدلله وصلت الديرره قبل امس الفجر
والموتر من يوم رحت للكويت وهو ضآبط لاتقطيـع ولا حآجـه وجيت عليه لا يقـطع ولا شي
واذا رجعت المشكله ابي اقطع الشك باليقين انه من البنزين ،، انتـظروني ،، واعذروني