10000 ريال وش تجيب موتر يرقى الطعوس ؟؟

[riyadhali]

السلام عليكم ورحمه الله
يااخوان عندي 10000 ريال قابلة للزيادة تكتين او ثلاث تكات بالقوة والواسطة :D
وش أفضل سيارة للطعوس وتبيض الوجة
تكفون يااخوان وتكون مريحة شوي ولاتبهذلني في الاعطال
ابيــها للدوام والطعوس فقط
لأن عندي موتر للعيال وللسفر والحمد والفضل لله عزوجل
والله يوفقكم جميع

[الجني العبد]

تكفون يااخوان وتكون مريحة شوي ولاتبهذلني في الاعطال
لازم تضحي بالشي ذا إن كانك هاوي الطعوس ...
شوف لك باترول ربع ولا بليزر من الموديلات القديمه
والله يوفقك بالسيارة اللي تملا عينك ..

[كبسولة2]

تويوتا ربع مصندق موديل 84 أو 85

ممتاااااااز جداً للطعوس وللدوام

[تمياط]

فيه باترول باب واحد لون كوحلي موديل 96 مكركات نظيفه مركب هدرز والدبل شغال ومضبوط على 19000 ريال اذا تبيه ردلي مكان الجيب ببريده والجيب ديزل وشكرا

[خوي الشاص]

السلام عليكم مافيه مثل دباب البانشي

[ابوعلي.]

شف يا الطيب مالك الا ربع تايوتا في الزفلت وفي البر وفي النفود وفيوالقوه ولا حراره ولا يحزنون ولا صرفيه بنزين خذلك ربع تايوتا ولا تشوار حتا في البيع مسك قيمته

[اليكي]

السلام عليكم مافيه مثل دباب البانشي


هههههههههههههههههههههههههههههههههههههه حلوة



وانا اقول الله يرزقك ويرزقنا بزود صفر

[عميد سامودة]

التطعيس مخاطر ويعدم السياره ,, واذا كنت صامل خذ ربع نيسان ميتين على ميه

[لاتكب البيالة]

خذ جيب سوزوكي ما مثله بالطعوس واذا غرز اشقله وحطه على الجادة لكن ما يركب الا اثنين وبالقوة

[ابو العز بلس]

وعليكم السلام ورحمة الله وبركاته
عندي لك جيب تويوتا مصندق موديل 81 حق طعوس ومايقصر

[اشهب .]

خذلك سزوكي جيمني 2004 مايتعدا 15 الف

وممتاز بالنفود مايرده شي ابد

لاكن دورلك واحد نظيف عشان مايتعبك بالخرابات وهذي بكل موتر تأكد من نظافته

وماجاه لعب بزران

[ولد وايل..]

سزوكي ساموراي ولا جيمني

[terke mekshat]

باثفندر 94 أو 96 خفيف وخراباته قليله وقطع غياره مثل الددسن رخيصه.

[م.عمر]

جيب سزوكي موديل 98 خفيف وقطع غياره رخيصه وترهيمه سهل ولا يصرف بنزين ...

[fof6666]

ربع باترول 91 وتراي مجربه موتر مايحتاج جلس معي سنتين وكنت ماخذه ب12 (الكلام هذا عام 1426)
يعني الحين تلقى أجدد منه بهالسعر

[طعيميس]

يارجال ريح نفسك ولاتشتري
بتشري ب 10000 ريال وبتصلح ب 10000
ومشاوير وين رايح للورشة منين جاي من الورشة
اشتر كمرة كانون وصور الطعوس احسن لك

[1231]

اشتر لك ونيت جمس اي موديل واطرب عمرك.

[z.r111]

عليك بجيب العشه بس نضيف او البترول والبترول احسن
بعدين سيارة دوام وسيارة تطعيس والله ياخيي ما تجي لسبب
ترى سيارة الطعوس دايم ماهي امينه وكثيرة اعطال وكل يوم عن يوم تبهذل الواحد من الجور الى يجيها
او انك بتخليها ترقى الطعس بالخامس يعتي
نصيحه للجميع لا تحط سيارت الطعوس وكرف البر رسمال لك في السفر الطويل وخاصه الي معه عوايل تراها ما تبعد فيك كثير احياناً
تقبلوا ردي مع فائق التحيه تراه من حرصي عليكم
اخوكم Z.R111

[جبل راف]

مثل ماقالوا الربع
شف لك جيب عشة 84 او 85
وخل معك 2000 للتظبيطات الاخرى مثل مساعدات كشافات صيانة عامة دبل وغيره

[التعـ King ـديل]

باترول 88 تلاقيه حليل

او باثفيندر من 90 وفوق

ولا سزوكي

وابعد عن التويوتا بتلاقيه مجلود وقالب عداده

[ساحووق]

دوورلك شرووكي بالتسعينات نضيف يخدمك بكل شي

[الكايد8]

يا ملا الغنيمه اشر ددسن ترقى الطعوس والوانيت الجمس يرقى والهايلكس ترقى بس عليك تنزل هوا الكفرات تخليهن عشره وترقا لو تبي اللي تبي ترقاه من طعس0 تقبل مروري ودمت بكل احترام0

[الكايد8]

اذا انت من اهل الرياض راسلني وانا انزل معك للسوق وتشري انشالله موتر يقضي لزومك تقبل مروري اخوك الكايد8

[vtc30]

باترول باب وحد من موديل 91 الا 97

[riyadhali]

اقسم بالله ردود تثلج الصدر الله يوفقكم جميع ويفتح عليكم
وعد ان شاء الله اذا خذيتة اني لانزل صورتة قريب بحول ربي وقوتة