نويت بإذن الله السفر للإمارات برا مع طريق حرض ...هل من نصايح ؟ [الأرشيف]

ابو شكاع

02/07/2005, 03:47 AM

السلام عليكم ورحمة الله وبركاته

اخوتي قبل كل شي اقدم اعتذاري لموقع مكشات لعدم مشاركتي في الفترة السابقة ...ولكن يعلم الله ان لكم وحشة

للمشرفين ولللأعضاء اقدم اعتذاري الشديد << مير ما احد دري عنك :confused:

طلبي يا اخوان هو الظاهر في العنوان

باذن الله بعد ايام واذا ارد الله نوينا السفر لدبي على الطريق البري من القصيم الى الإمارات برا من عند طريق حرض

والرحلة عائلية ...

وسيارة وحدة

ابي منكم الله لايهينكم بعض النصائح والتوجيهات

واللي عنده اي شي لا يبخل به وله مني الدعاء بالجزاء بالخير من هالحين

انتظركم

الرحلة باذن الله بعد تقريبا 7 ايام وحوله

الطبيب

02/07/2005, 06:37 AM

المشكله الاساسيه هي بالبنزين

يعني الله لا يهينك اذا وصلت حرض عب موترك فل لسببين

الاول :- ان الطريق مقطعه وأقرب محطه بعد حرض على بعد 100 كيلو متر وتسمى الطويله

الثاني :- المحطات بين حرض والبطحا الله لا يحدك عليهم صندقه والنزين نصه تراب :)

وأتمنى لك رحله موفقه وسفرا سعيدا بأذن الله يا ابو شكاع

وترا الطريق ما هو اللي انت تبي لان الرمال المتحركه تدفنه من جهة الشمال مع الجهود لصيانة الطرق لازاحة الرمل وتثبيته ولكن المشكله مازالت قائمه

يعني بالله تخيل انك تمشي 140 وفجأه الا قدامك طعس صغير :)

تروح وترجع بالسلامه يا ابو المشاكيع

هذا والله اعلم

والسلام ختام

بركان

02/07/2005, 07:25 AM

الاخ ابو شكاع

عليك بالبكور فالبكور بركه.
حمل اغراضك قبل ان تنام
وصل الفجر وتوكل على الله ودق سلف
واللي فيه نوم من العيال يكمله في السياره

احذر من الرمال ومعدات ازالة الرمال من الطريق وايضا الجمال.
لا تستغرب اذا وجدت طعسا كاملا يربض في وسط الطريق ( عادي). وانتبه من السيارات القادمه فقد يكون مسارها مقفلا بسبب الرمال فيتحول خط السير الى مسارك .
وانصحك بحمل كمية كافية من مياه الشرب للطواريء.

وتروحون وترجعون بالسلامه.

ولا تنسانا من الهدايا ولو( سبحه.)

المنصف

02/07/2005, 09:16 AM

نصيحتي لك أن تخلي الأطفال إذا كانو مزعجين الله يخليهم لك ويخليك لهم يسهرون في الليل إلى صلاة الفجر
وأنت تنام بدري وتطلب منهم يحملون العفش في الليل ويصحونك الفجر وتفطر وتصلي وتمشون
بعد نصف ساعة الأطفال كلهم بينامون وأنت شبعان نوم وترتاح من الإزعاج
ولايدرون بإذن الله إلا وهم عند الحدود يعني كأنهم مسافرين بطائرة
طريقة أنا جربتها وشفت نتائجها
إلا إذاكان ماعندك أطفال فهذا شيئ ثاني
أنا مرة رحت للمدينة يعني مشوار 800 كيلو وقفت 7 مرات
مرة نتغدى ومرتين نعبي بنزين وأربع مرات أأدب وأفك هوشات الأطفال
تخيل أربعة أطفال محشورين بمساحة ماتجي 8 متر كيف يجلسون 10 ساعات بدون إزعاج
أحسن حل ينامون
ولا تنسى دعاء السفر والتوكل على الله
والتأكد من الكفرات إذا كانت قديمه غيرها حتى ولو كان شكلها زين فأطفالك أهم من المال
وأيضا افحص الأذرعة فمن أسباب الحوادث المجهولة إنطلاق احد الأذرعة
وغير سير المكينة وخذ معك عدة الطبخ بشنطة رحلات حتى توفر وتاكل زين ولو بغيت تطلع للبحر بالإمارات
تسوي لك كبسة وتعتبر كشته وبهذا توفر 70% من قيمة أكل المطاعم يعني الغداء تطبخ والعشا برا بالمطاعم ماعليش يالله
وعلى فكرة أكثر الناس مصاريفهم الباهضه تجي من أكل المطاعم يعني يعني إذا تبي تاكل بالمطاعم كل الوجبات فهي كثر قيمة السكن مرتين
ماعليش ثقلنا عليك بالوصايا بس مانعطى وجه 000 بس ماعلي منك أنت اللي طالب
تروح وترجع بالسلامه
ماعليش أنا ماأبي سبحه أبي جلابيه

ابو فالح

02/07/2005, 12:47 PM

حياك الله اخوي أبو شكاع
الا وش رايك نتماشى في الخط انا بروح بعد اسبوعين من اليوم.والرحلة عائلية وبسيارة وحدة :D
وبطلع من الرياض وعن طريق الدمام ثم من مفرق الحساء الامارات، اتوقع هذا افضل من طريق حرض بس يا ليت
أحد يعلمنا كم تفرق المسافة بين الخطين(طريق حرض-طريق الدمام السريع).
اذا كانت تسوى نعيد التفكير فالوقت لا زال فيه متسع.
وفيه سؤال بعد اذا بغيت اخذ معي سلاح مصرح الحمل وش يقول النظام عند الحدود.
شكلي دخلت عليك يا ابو شكاع في الخط الا حدتك بعد بس السموحة يا خوي :rolleyes:

ولك مني هذا الموقع فيه معلومات بتفيدك :
ارعص هنا (http://www.sharjah-welcome.com/index_ar.php)

الجيب الربع

02/07/2005, 02:04 PM

وعليكم السلام ورحمة الله وبركاته

الله يستر عليكم يابوصالح وابوفالح

بالنسبة للفرق من الرياض حوالي 130 كلم حرض أقل واذا سلم من الرمال فهو أفضل كثير من الحساء وان حصل تمرح بالخرج وتطلع من هناك بعد صلاة الفجر يكون احسن تمشي اغلب المسافة بالبراد وعلى هونك وهنا موضوع عن الخط فيه خريطة رائعة للطريق وضعها الاخ ganderone وهي ملف للتنزيل بصيغة اكروبات والخريطة تبين الطريق من الرياض الى البطحاء وجميع الخدمات على الطريق

مشاركة: سوال عن طريق الخرج منفذ البطحاء (http://www.mekshat.com/vb/showthread.php?t=31550)

وبعد البطحاء الطريق جميل ويوسع الصدر بالنسبة للي بيسكن بالشارقه هناك شقق نظيفة ورخيصه وهاديه اسمها بسمه رزدنس بشارع الملك فيصل خلف سوبرماكت شويترام وقريبة من جميع الخدمات ولكن المشكلة الرئيسية طريق الشارقة دبي دائما مزحوم لدرجة لاتطاق وبالذات باتجاه الشارقة وعموما دبي اصبحت مزحومة جدا وقضيت اسبوع في دورة تدريب قبل شهرين هناك اغلب الوقت ما اطلع الا بعد 8 بالليل

الله يحفظكم في حلكم وترحالكم

بن نويشر

02/07/2005, 02:24 PM

ابو شكاع ..
نتمنى لك سفر سعيد ورحلة موفقة ،، ونصيحتي لك كتالي :-
1 . السفر مبكراً بعد صلاة الفجر مباشرة .
2 . أفحص السيارة جيداً (الإطارات ، السير ، ماء الرديتر ، الزيوت ، الاستبنه لا تكون نايمة ، ماء المساحات + المساحات الامامية ، المكيف ، عدة السيارة ، مثلث السلامة ، طفاية حريق صغيرة ، كشاف صغير ، حبل ، جيك صغير للطوارئ )
3 . قم بتضليل السيارة أو وضع ستائر للوقاية من حرارة الخارجية وللحفاظ على البرودة الداخلية .
4 . تزود لسفرك وخير الزاد التقوى وعليك بالإشرطة المفيدة والممتعة لك ولأسرتك ولا تنسى الأدعية المؤثورة .
5 . إذا كنت ترغب بالإقامة في الشارقة فعليك بفندق المنتجع الشاطئ الذهبي (لا يفوتك) بـ 200 درهم عبارة عن شاليه تحتوى على غرفة نوم ومطبخ وصالة طعام وبلكونة وحمام والبحر أمامك وخذ السفلى علشان تلبق سيارتك عند باب الشالية .

وفي الختام نتمنى لكم سفراً سعيداً وإجازة موفقة وترجعون بالسلامة ..

ابو شكاع

02/07/2005, 05:50 PM

الله لايحرمن منكم ...ويلومونن بعد بمكشات ..

الطبيب ياللي تحب الحربثه ....

تسلم ولاهنت على هالمعلومات ...

والبانزين نبي ناخذ بتوجيهاتك بخصوصه

والطريق باذن الله تبي تكون المشية نهارا

لاعدمتك عمي

ابو شكاع

02/07/2005, 06:00 PM

بركان

جزاك الله خير على هالنصيحة

وبارك الله فيك

وسدد للخير خطاك

ابو شكاع

02/07/2005, 06:21 PM

المنصف

الله يحرم عن وجهك لهيب النار قل آمين

جزاك الله خير على هالناصيح يالغالي

بالنسبة للعيال ....هم اثنين لكن الحمد لله مامن ازعاج .... يعني صح شقاوة شوي ....لكن وش نسوي ..... وهم من النوع اللي ينام بالسيارة خصوصا لو المشية الفجر ينامون اكيد

بالنسبة للاكل طال عمرك انا ناوي باذن الله على اني آخذ معنا العزبة ....ونبي نوفر ان شاء الله بعض المصاريف بالطبخ الذاتي <<حلوه الطبخ الذاتي :)

الله ييسر امرنا وامركم قولوا آمين

ابو شكاع

02/07/2005, 06:25 PM

هلا والله ابو فالح ...

[/quote]حياك الله اخوي أبو شكاع
الا وش رايك نتماشى في الخط انا بروح بعد اسبوعين من اليوم.والرحلة عائلية وبسيارة وحدة [quote]

الوعد قداااااااااااااااام :)

اجل غدينا نلاقيك هناك

الصراحة الرابط افادن كثير وراسلتهم

خبيتهم اللي يشوفن يقول يبي يجي بوفد كامل ههههههههههه

ازين ودك الواحد عاد يحرص وينشد عن كل شي

جزاك الله خير

بالنسبة للطريق يقولون الأخوان انه يطيح منه 250 كلم

والله اذا هالرقم صحيح ...اجل يساعد جدا على ان الواحد يفكر به

وانا باذن الله رايح معه الله يوفقنا واياكم

ابو شكاع

02/07/2005, 06:33 PM

هلاوالله وغلا الجيب الربع

ربي محييك يابعدي

مشكووور جدا على الكلام الطيب

اعتقد ان الطريق يختصر اكثر من الرقم اللي قلت

كثير قالوا انه يختصر 250 كلم

بالنسبة للشقق ....ما قصر ابو فالح حط لنا رابط يستاهل ان الواحد يشوفه اذا بغى يسافر للامارات

لكن تبقى مشكلة الازدحام !

وش حلها ؟!

فعلا يبي يصير الخط ممل بين دبي والشارقة ...

الا قل لي وش اخبار الشباب

امانة بلغهم سلامي تكفى ... واحد واحد

اما العارض فبيني وبينه اتصالات ما انقطع عنه

دمت بخير يالغالي

ابو شكاع

02/07/2005, 06:38 PM

سنيدي

الله يجزاك الجنة ووالديك على هذي النصايح

وبإذن الله نطبقها

وبالنسبة للمنتجع ... نبي نسجل اسمه بورقه :)

الله يثيبك ياخوي وما قصرت

ابو شكاع

02/07/2005, 06:45 PM

السؤال الحين يا اخوان

انا رحت اليوم افصل شراع للسلة

اللي يجي له سحاب

وش رايكم فيه.؟

وهل فيه حلول أخرى ؟

انتظر كرمكم

ايه نسيت اقول لكم

موتري يوكون 2002

ابو فالح

03/07/2005, 10:20 AM

أن شاء الله أني نويت أمشي مع الخط المذكور اذا كان بطيح منه كل هالمسافة.
وفيه سؤال اذا أمكن أحد يفيدنا فيه وهو اذا بغيت اخذ شريحة جوال من الامارات هل عندهم خدمة الانترنت بالجوال
(gprs).

وشكراً للجميع وتروح يا أبو شكاع وترجع بالسلامة وكل مسافر.
تحياتي...................

الجيب الربع

03/07/2005, 10:23 AM

أبو فالح

انا سمعت ان موبايلي يوفرون هالخدمه على شرايحهم حتى وانت خارج المملكه

اسألهم يمكن يفيدونك وتاخذ شريحه من هنا

مع الف سلامه

المموه

03/07/2005, 11:32 AM

]بسم الله الرحمن الرحيم
اولاً ـ لا اضيف شيئا على ما نصحوك به الشباب فكلامهم في مكانه ( الذهاب نهارا والعوده نهارا .تشييك السياره .عدم السرعه . ولكن فيه شي مهم وهو انك قبل تدخل ابوظبي وانت في الحدود فيه اماكن على اليسار تأمين على السياره وحجز شقق وفنادق ويمكنونك من مشاهدة الشقق والغرف بالكمبيوتر والحجز من هنا افضل من البحث والدوران وانت معك عائله . وحاول يكون الموقع في شارع الرقه او حوله لتكون قريب من كل شي .
ولا اوصيك بالبعد عن الاماكن المشبوهه مع تمنياتي لك برحله سعيده واقترح انك تمر (مكه المكرمه) تأخذ عمره ومن هناك مع الطائف للخرج ثم الامارات . اخوك المموه .

LAND CRUSER

03/07/2005, 12:37 PM

جزاك الله الف خير ابووشكااع وجزى الجميع خير الجزااء وانا الباارح مافيه احد ماسالته عن طريق حرض وبالصدفه لقيت المووضووع هناا بمكشاات كفيتوو وفيتووجزيل الشكر لجميع الاخووان والسلاام0

ابو شكاع

06/07/2005, 07:18 AM

ابو فالح هلابك

بالسلامة يالغالي

وخل النت ياخوك وش تباه به

الواحد ودك يتفرغ لعياله بهالرحلة

<<< علم روحك !

ابو شكاع

06/07/2005, 07:20 AM

المموه

الله يجزاك الجنة ووالديك

شكرا لك

ابو شكاع

06/07/2005, 07:22 AM

لاند كروزر

اهلا وسهلا بك

واذا عندك استفسارات هاتها خل نستفيد كلنا

ع.ف.الدرويش

06/07/2005, 07:53 AM

السؤال الحين يا اخوان

انا رحت اليوم افصل شراع للسلة

اللي يجي له سحاب

وش رايكم فيه.؟

وهل فيه حلول أخرى ؟

انتظر كرمكم

ايه نسيت اقول لكم

موتري يوكون 2002

السلام عليكم ورحمة الله وبركاته

أبو شكاع.. صبحك الله بالخير

بداية.. درب السلامة إن شاء الله
وتروح وترجع بالسلامة

يليه.. النصائح ما شاء الله تبارك الله
الشباب كفوا ووفوا..
وما أقول إلا الله يبارك فيكم جميعاً

أصل للزبده.. بالنسبة للسلة.. قبل فترة سافرت للطائف ومكة و جده
بموتري باترول ربع
وقبل أمشي بدربي ركبت سلة للعفش
و إشتريت شنطة للسلة نفسها
وما شاء الله ريحتني واجد واجد..
وفرت علي الحوسة وكذلك الحبال وشد ولا تشد
يميزها إنها سهلة التركيب
سهلة التثبيت
سهلة الربط
لذلك توكل على الله واشترها
وإن شاء الله إنها بتريحك
طبعاً الخامات اللي بالسوق كثيرة لكن انت احرص على كونها خامة قاسية ما تتاثر بالحرارة
ولا تتشرب الماء في حال وجود أمطار يعني فترة الشتاء
والظاهر مقاس سلة اليوكن.. هو 120 سم في 150 سم
لان الشنطة اللي عندي هذا مقاسها
وسعرها ما يتجاوز الـ 150 ريال
بالمكاسر ووووو شلته 130 ريال
هذه هي ملاحظاتي.. وارجو إني ما اكون طولت عليك

مرة ثانيه.. تروح وترجع بالسلامة إن شاء الله

عبدالرحمن :p

ابو شكاع

07/07/2005, 02:35 AM

اخوي عبدالرحمن

اليوم رحت استلمت الحقيبة او الشراع

الا هو وش يسمى ؟

المهم شراع فوق على شكل شنطة ولها سحاب :)

وكلامك صحيح ....الاطوال 120 ب 150

وهي تفصيل وبسعر 110 بعد المكاسر

وباذن الله تبي تفيدنا

والله يجزاك خير وما قصرت

ابو شكاع

30/07/2005, 07:40 AM

الحمد لله رب العالمين
ابشركم ياجماعة اني سافرت ورجعت عن طريق حرض ...
الحمد لله الأمور متيسرة
ولي عودة لأي واحد يبي يسأل عن شي
وجزاكم الله خير

الجيب الربع

30/07/2005, 09:45 AM

الحمدلله على السلامة يا ابوصالح من طول الغيبات جاب الغنايم
سبحان الله البارح انا ومشرفنا صقر ( ابو احمد) بسيرتك واليوم جت أخبارك

بشر عسى الرحله زينه وبزرانك استانسوا؟

حياك الله يابو صالح

جمران

30/07/2005, 02:02 PM

الحمد لله على السلامة وعودة حميدة
وموفقه يابوصالح
عفوا لدي سؤال وش أخبار (الباترول الديزل)
في الامارات سمعت من بعض الاخوان ان موديل
2005sglمتوفر هل هذا صحيح
والحمدلله على سلامة الوصول مرة أخرى
اخوك جمران

عبدالله العمير

30/07/2005, 02:53 PM

حمد لله على سلامك يابوشكاااااااع

هاه من ورانا امرات وحركات وقريات عالميااااات

ولا حس ولا خبر والمشكلة انك داري ان لي اغرض ابيهن من هناك

لكن هين هين يالضبان

طلعت على حقيقتك <<نغر منه وراه يروح وانا لا

حمد لله على سلامة الوصول وعساك عبيت من محطاتهم الكشخة :)

الـ ع ـارض

30/07/2005, 05:48 PM

الحمدلله على السلامه يا حووووووووبي

ها اعرست هناك ؟؟؟؟

ابو شكاع

31/07/2005, 02:12 AM

الجيب الربع (ابوعبدالله)
الله يسلمك ويطول بعمرك يالغالي ... انت وابو احمد لكم كل الود في قلبي وكل المعزة ويشهد الله ...وياليت نجتمع بكم قريب ... لو بس يهديك الله وتزرقنا لك كم يوم ...
ابشرك ... وناسه ما بعدها وناسة يالله لك الحمد ...
بس عاد هالرطوبة لعبت بنا لعب .... خبرت حرق بالأباط ؟
بسبب هالرطوبة العالية ....
تركب الموتر ...وتاصل لك مشوار ...همن لازم تفك المرتبة حقت السواق وتخليه بالشمس يومين ... يعني ايام اروح مشاوير على السبرنقات حقات المرتبة حقت السواق لأني أكون ناشره بالشمس
<< ماتخلي عنك يالتهولي
سلمت لمن يحبك
شكرا لك

ابو شكاع

31/07/2005, 02:15 AM

الغالي جمران
اعتذر لك يالحبيب ... والله ما ادري عن الباترول ....لأني مارحت لمعارض ولا شي .... تبي تنشد عن ملاهي البزارين خذ رجل
والله يسلمك من كل شر

ابو شكاع

31/07/2005, 02:18 AM

الأزرقني حبيب قلبي
الله يسلمك من كل شر ... واذا حولك روحات رح هالومين ترى الحر على كيفك << الله من زين النصيحة ...
بعدين انت داري اني ابروح معلمك ... لا هالحين تطلعن جحود ...همن ما ترجعن مرة ثانية
حمد لله على سلامة الوصول وعساك عبيت من محطاتهم الكشخة
انت شفت بس ... هالمحطات .... والله ياهي شي .... فغيت راس ام شكاع وانا اقول له شوفي العالم شوفي كيف التنظيم والنظافة والتنسيق <<ماعمره شاف العالم ابد

ابو شكاع

31/07/2005, 02:20 AM

هلا ابو فيصل ... الله يسلمك يالغالي
عاد خبرت احد يعرس وياخذ معه مرته ...مايصير << وجه يضحك
تسلم ياعمي

جنون رفحاوووي

15/06/2012, 04:15 PM

السلام اخوي البلاد امان ولله الحمد لاكن الحضر واجب خذ سلاح
واحسن سلاح http://http://www.mekshat.com/pix/upload06/images/2012/06/mk248296_يلبببى.jpg هذا طير شلوى

فياض الربيع

28/06/2012, 04:14 AM