الصقر يبيك انت ولا يبي العلف الي عندك ؟ ....رايك يهمنا

[falcon 1]

بسم الله الرحمن الرحيم ...السلام عليكم ورحمة الله وبركاته ..اولا مبارك عليكم الشهر واسال الله ان يتقبل منا ومنكم الصيام والقيام.

سؤالي اليوم هو هل الصقر يبيك انت لانه يحبك ولا يبي العلف الي عندك ؟؟
انا كنت جالس مع واحد من الربع الله يذكر بالخير وقعدنه نسولف فقالي والله يا خوك الطير لابد ان يحب راعيه ولا ما يجيه ..وانا اقوله كلامك سليم مافيه شي لكن هالطير مو قطه او كلب او خيل (تكرمون النعمه والسامعين) هذا طير حر ...والشي الوحيد الي بينك وبينه العلف لا صار الطير جوعان يطيعك ويجيك لكن لو شبعان والله ما يعرفك ...قالي انزين شلون ؟ قلتله انا مرة علفت الطير زيادة ..وجيت ابدعيه اليوم الثاني (وعلما الطير كان معي سنه وشوي) ويوم طار ما جاء صوبي واصيح واصيح ولا هو بصوبي ..فانا اقول الطير ما يطيعك لانه يبيك ويحبك .. الطير يبي العلف الي عندك فقط لا غير!!

طبعا يالربع انا كلامي ممكن خطا وممكن كلام خويي صحيح ...فقلت اطرح الموضوع وان شاء الله تعطونه اراؤكم...والعلم عند الله .

جزاكم الله الف خير يالنشاما واشكركم شكرا جزيلا
تحياتي الطيبة اخوكم فالكن 1

[طرشون ليبيا]

السلام عليكم ورحمة الله
والله يا اخوى الطير يريد العلف وهذا اسمه (الارتباط الشرطي) فى علم النفس
يعنى ليش طيرك ايحبك لانك تعلف فيه وتهتم بيه وتحمي فيه
ولك الشكر على الموضوع القيم ويفيدونا الاخوان اكتر

[صقار مبتدئ]

اكيد الطير ما يبغى الا العلف

[falcon 1]

الله يجزاكم الف خير يالربع على مروركم الطيب ...وبيض الله وجيهكم ...اشكركم شكرا جزيلا
ننتظر ردود الاخرين ان شاء الله
اخوكم فالكن 1

[البآشآ]

وانا اقول : ان الطير مايحبك علشان عشره طويله ولا مسوي له معروف ولا رافع كرامته وحاميه لالالالالالالالا الطير يحبك ويجيك ويسمع لك ومايعارضك لآنه يدري ان بوسط يدك هالي ضامها فيه قطعة لحيمه يبيها!!!

انا بحط شرح وآتمنى يفهمونه الآخوآن كلهم

لو نلاحظ في فترة تدهيل الطير ... تجد كل الفكرة تدور على العلف!!
يعني: متى تعطيه العلف؟ وش كثر تعطيه العلف؟
اذا سوا الحاجه الفلانيه كثر له من العلف!!!
واذا ماسواها جوع الطير ويبي يسوي الي انت تبي!!
يعني السالفه كل ابوها ع العلف ان طعتني اعطيتك ماطعتني ماعطيتك

وللمعلوميه: اذا الدعوه [ وفـآء وإخـلآص ] مافيه اوفى من النآقـه والـكلب [ تكرموون ]

ولو نلاحظ ان الناقه تعلف بنفسها والكلب يعلف بنفسه ... يعني ماقدمت له شي علشان يغليك ومع ذلك صار لك وفي

آدري قضبت فيكم السكه .. سآآمحوني

[المزروعي]

السلام عليك ورحمة الله وبركاته ,
إذا الطير وصل مرحله أنه يجيك من غير علف و يدور حولك فاعلى الطير السلام و مامنه فايده لانه أصبح هو و الببغاء واحد . إذا الطير فقد شوي من وحاشته فسوف يكون بال الطير دائما عندك و في حالة الهدد و الطرد و خاصه إذا كان الطرد متعب شوي فسوف يفضل الطير الرجوع لصاحبه و هذا الشي شفناه مع الربع .

[falcon 1]

اخوي الباشا ....ابد اخذ راحتك وانا اخوك ونقطتك صحيحه ..وبيض الله وجهك على التوضيح والله يعطيك العافيه ..اخوي المزروعي مرحبا بك ..وفعلا شفايدة الطير اذا فقد وحاشيته ..وصحيح يصبح نفس الببغاء ..اشكرك على هذه المعلومة القيمة وبيض الله وجهك ويعطيك الف عافيه

اخوكم فالكن 1

[حوران نجد]

افادوك الاخوان

[راعي براك]

لاهنت على الطرح وهذا شي اكيد اخوي( الطير مايصيد لك يصيد لنفسه)

[falcon 1]

اشكركم يالربع على مروركم الطيب ..والله يعطيكم العافيه
اخوكم فالكن 1

[ابوناصر السهلي]

عطوك العلم

[falcon 1]

جزاك الله خير اخوي المهذري على مرورك الطيب
اخوك فالكن 1

[@قرناص@]

وعليكم السلام ورحمة الله وبركااته

حيااك الله يافالكون ....

الطير بينك وبينه العلف ان جوعته طاعك وطربك بالهدد وان شبعته عطاااك حووم

[سندهم]

والله صراحتاً لا أزيد عن كلام الأخوان الأفاضل

وقل لخويك أعلف طيرك وشف كانه ماشق السماء ؟هههههههههه

خله يجرب يمكن يحبه!!!!::d

ما قد خبرنا الطير يزهد بمرباه= الا اذا ماهو له الجور رايق

[falcon 1]

بارك الله فيكم يالنشاما ...كلامك 100 100 اخوي قرناص ...واخوي سندهم بيض الله وجهك على ردك الطيب ...جزاكم الله الف خير

اخوكم فالكن 1

[VXR2000]

الطير مايصيد الا لنفسة ويعطيك العافية

[falcon 1]

اشكرك اخوي فكسار على مرورك الطيب ..الله يعطيك العافيه
اخوك فالكن 1

[ALAMIR]

شكرا على الموضوع



والطير يبي العلف أكثر من يبي راعيه

[yasser1389]

ما يحتاج كلام جوع يتبع

[الشقاوي22]

افاادوك الاخوان
الطير يصيد لنفسه مايصيد لك
انت لو تسحب منه العلف مره ومرتين وهو يحس فيك قام الطير ينقل العلف السبب
هوسحبك للعلف وممكن بعض الطيور ماتقدر تمسكه الا بشبك
وجهة نظر
تحياتي لك

[الرووقي511]

شوارى الطيب في غنام شايفها0000والطير خوان لوالناس يغلووونه 0000 اخوى الطير يبا العلف لكن انا قريت قصه فالجريده قبل كم شهر لقو شايب متوفى وطيره موقع جنبه على مااعتقد فالشمال

[نهاش502]

ماقصرو الربع

[بو هاشم]

مايبي لها كلام عشان العلفه اللي بيدك وهذا سر محبته لك

[راع الطيب]

افادوك الاخوان ولا عندي ازود من ماقالوا
الطير يصيد لنفسه مايصيد لك

[قنيص غير]

افادوك الاخوان

[abu saud]

السلام عليكم ورحمة الله وبركاته
والله ياخوي أكثر الطيور تجي عشان العلف بس فيه حالات يختلف الوضع
مثلا أحد أخوياي كان عنده وكريه طراد قرناس تاسع وكثير من اهل الساحل يعرفون هالوكريه وهي وكريه ل(سامر الليل)
المهم نوى في يوم من الايام انه يطلق سراحها فعلفها الين قالت بس وفك مسابيقها وأطلقها حامت حامت حامت ثمن رجعت ووقعت على كبوت السياره
ويقولي قصص عنها كانت اذا حست بالجوع جرت وكرها لين باب شايبهم لأنه كان يغليها وما يقصر معها
ومن شجاعتها كانوا الشباب ملقبينها ب(سبعان) كان الطير الحر اللي ترجع عنه الطرادات ما ترجع عنه بس للأسف دعسها أحد الشباب بسيارته وهي على وكرها وماتت
فالطيور ماهي سوى مثل ما الصقارين ماهم سوى

[الحركساب]

مافى شك بالعلف يالغالى

[حمد العذبي]

يـا ذيـب فـداك طيـر ٍ حــام وأخـفـاه السـحـاب وراح
.. طلـع عقـب الظهـر وقناصتـي عقـب الظهـر زلّــه
بديت أعلى الضلوع أرمي حمـام وفـي يـدي ملـواح
.. ومن كثـر الدعـي مـات الحمـام اللـي معـي كلـه !!
أهيـم بـذا الصحـاري مــن صــلاة الفـجـر للـمـرواح
.. وانـا اشـرّف وادربـل هاجسـي يالله عسـى وعلّـه
سهـرت اللـيـل واتعـبـت الــدلال ولا هـجـدت مــراح
.. أشــــب الــنــار واثــنــي فــــواح الــبــن وآزلّـــــه
يقولـون اخويـاي الطـيـر غـيـره طـيـر نــم وارتــاح
.. وانــا اقــول الـخـسـاره شـرهــة الـبــرّاد والـدلّــه
أحـبــه طـيــري الـطـلـع الـفـتـون الـلاحــق الـذبّــاح
.. ينمـومـس ناقـلـه لــو قرنـسـه عشـريـن مــا مـلّـه
ومدامـك جـزت منـي واشتـريـت العـتـق يــا جــرّاح
.. عزايـه طيـر ,, حفنـة ريـش ,, لا مذهـب ولا مـلّـه
الا يـا ذيـب .. يـا ذيــب المـسـاري مبـعـد المصـبـاح
.. امـانـه لــو لقـيـت الطـيـر الاشـقـر تاكـلـه كـلّــه !!

[بواردي0مكشات]

كلام سليم لاتكرموه
تراه اذا اسطنع قال السلام عليكم
واحد كاتب المثل اكرمو الطير او اتركوه
لا تضلمونه ياجداد الصقاره
نكرمه اكرم طيرك وهده على حبارى

[عزوتي وايل]

لا والله وأنا أخوك العلف والا مادرا عنك حتى لو دعاه حد غيرك جاه

وأن كانه عديد قالك باي باااي وشانت نفسه عليك وسلامتكم

[رفيق الأمل]

تسلم يدك ياخوي بس تذكر الطير مايصيد إلا لنفسه مش لراعيه

[محمد الفهيد]

الطير مايجيب راسه الا الجوع

وبعض الطيور تعرف راعيها ، بس ماتجيه الا عشان الجوع
يعن يلو مر راعي الطير من قدامه يصيح له الطير وصارت كم مره واذا مر شخص ثاني مايصيح

سبحان الله لها قلب
بس مايطيح راس الطير الا الجوع والعلف

[القرناس المهاجر]

لو دعيته مره ومرتين بدون علف
ماراح يجيك بعدها .. لان مافيه مصلحه له
والطير مايجي على الدعوا إلا لمصلحة نفسه
وكل صقار لجل يصيد يقوم بتجويع طيره
وكلما جاع كلما صمل وفعل اكثر حتى في اكبر منه حجماً
قصدي بالجوع تقليل العشا او حرمانه منه
مجرد وجهة نظر لاتعمم .. وشكراً :)

[THE SNIPER H]

الصقر ليس له عندك إلا الطعام ولا يريد سواه كما قال كل الاعضاء كمرمهم الله وحفظ لهم صقورهم
ولاحظ انه عندما يكون الصقر جائع وتدعوه إليك فإنه ياتي علي الفور وإذا كان ليس جائع وتدعوه فلن يأتي لك ابدا

[falcon 1]

احسنتم يا اخواني ...بيض الله وجيهكم جميعا ..واشكركم على مروركم الطيب جميعا
تقبلو اطيب تحياتي اخوكم فالكن 1

[شعلة الحجاز]

افادوك الاخوان وانا افضل الطير ان تكون فيه وحاشه لانه لاطرد معاد يلتفت وخاصه الشياهين وهاذا الكلام من واقع تجربه

[falcon 1]

صدقت اخوي شعلة صدقت..وبيض الله وجهك على مرورك الطيب
اخوك فالكن 1

[وشــــام]

لو الطير وفي كان ماضاعت الطيور ترجع لاهله على طول اول ماتفلس او من باكر ماتستنكر اذا امرح خلاوي...

تحياتي...

[falcon 1]

جزاك الله خير اخوي وشام ..كلامك صحيح
اخوك فالكن 1

[شنوان]

مافيه شك اكيد يبغا العلف

[قرناس شماالي]

وعليكم السلام ورحمة الله وبركااته



حيااك الله يافالكون ....


الطير بينك وبينه العلف ان جوعته طاعك وطربك بالهدد وان شبعته عطاااك حووم


:good2::good2::good2:

[falcon 1]

جزاكم الله الف خير اخواني شنوان وصياد سكاكا ...كلام صحيح يالربع
اخوكم فالكن 1