من أي بلد هذه الحبارى؟؟ جواب وأستلم الجائزة فورا... ياسلام

[المري]

السلام عليكم

أخواني الأعزاء

نبقى نحرك العقول أشوي ..

هذه صور لبعض انواع الحبارى وهي من مناطق شتى , ماعليكم اخواني الاعضاء الا ان تذكر بــلد

كل نوع من هذه الحباري .. ومن ثم تستلم لك جائزة طيبة .. الله يرزق الجميع.. امين..

الحبارى الأولى:

http://www.mekshat.com/pix/upload/images9/mk1168_2.jpg


الحبارى الثانية:

http://www.mekshat.com/pix/upload/images9/mk1168_1.jpg


الحبارى الثالثة:


http://www.mekshat.com/pix/upload/images9/mk1168_3.jpg

http://www.mekshat.com/pix/upload/images9/mk1168_33.jpg

http://www.mekshat.com/pix/upload/images9/mk1168_333.jpg



وسلامتكم

وفي أنتظار الحلول ..

أخوكم / المري

[أبو رداد]

السلام عليكم ورحمة الله وبركاته


هلا يابو معيض حياك الله ... طبعا اهم شي المشاركه ... انا شخصيا متنازل عن الهديه هههههه
اما الاولى جتنا بشكلل قليل جدا قبل اربع اوخمس سنين ... الله يلعنها تكرهك في طيورك
واما الثانيه اتحسبها طير ماء نسميه مليحي اذا شفتها
واما الثالثه والرابعه ما اتذكر وين شايفها
واما الخامسه لو تطير قدامي اتحسبها ارخمه
والي يحصل جائزتك والعلم عند الله سندباد (الفيتو)
اذا مايجي سرهيد قبله ويسوي رايت كلك عليها
وسلامتك

[المري]

أرحب يابو رداد وتسلم على المشاركة وماقصرت

وعلى فكرة ترى الثلاث صور الأخير تراها لحبارى وحده يعنى نوعها واحد ودولتها وحده..

اما قولك سرهيد الله ياستر عساه يعطي الشباب فرصة لانه اذا جاء جاب بلدانها كلها..

راحت فيها الجائزه!!!

طبعا بدون اقصور في الربع الباقيين

ومازلنا نتظر صاحب الحل الصحيح..

اخوك / المري

[سلطان سلطان]

أمريكا
افريقيا
السعودية ومأدري فين

[نايف الخالدي]

السلام عليكم يالربع ابومعيض كيف الحال الاولى اتوقع انها من اوروبا اقصد روسيا واوزباكستان وانت رايح اما الثانيه اتوقع انها الي يسمونها الحبارى العربيه واتوقع انها تستوطن افريقيا اما الاخيره اظن انها فاستراليا بس يابو معيض انا زعلان عليك ليه ماعطيتنا رايك في الموضوع الاخير ههههههههه

[الناصر888]

السلام عليكم ورحمة الله وبركاته
مساكم الله باالخير .اخوي المري مشكور على طرح المسابقه المفيده للجميع .وبصراحه ماني بخبير في الحبارى
كوني (فرخ صقار حساوي اصيل )(هههههه) من كثر ماقريت عنها بااجاوب وعلى الله.
الأولى اسيا (باكستان وايرن)
الثانيه من افريقيا
والاخيره جزر الكناري (ويسمونه حبارى الكناري).
والله اعلم.
ولكم مني التحيه والتقدير .اخوكم
النـــــــــــــــاصــــــــر888
:BUTT1: :alarm: :BUTT1:

[صياد الدبدبة]

اخوي المري ماشاء الله عليك دايم مواضيعك متميزه اما بالنسبه للصور فحسب اعتقادي انه كالتالي
1- من اوربا من دون تحديد
2- من انواع الحبرو الافريقي
3- هذي عاد متأكد منها روسيه

[الوافي السابع]

اخوي المري
مساك الله بالخير
عزيزي ...
الحباره الاولى ..من افريقيا وبالتحديد بالسودان...وهي تختلف بلون الريش ولون العين والحجم


الحباره الثانيه ...من النيجر...وهي تختلف عن الباقي بلون الريش ولون العين وتتميز بالحجم الكبير


الحباره الثالثة....فارسيه ...وهي تشابه الحبارى الباكستانيه والطاجكستانيه والافغانيه وهن اغلب الحباري اللتي تعبر الى منطقة الخليج.. :good:
ودمتم

[راعي مسكت]

المري الاولى على قولت ابورداد عوفتنا طيورنا والله انه صادق (في التركمان عيناها وثرها فوق الحفانه وقال الشايب خلو طيوركم ذي ماتجي الابالشوزن والا خلوها قلت افا هذي فالمخلاه عندي فرخ شاهين عراقي يسابق الريح قالي عجل حومه وخلنا نطيرها ونشوف قلت شورك وخوفني احسبه يمزح لكن حومت الشاهين وقالي صبر خله يرتفع شوي ويوم طيرناها عيونكم ماتشوف الا النور والله ثم والله اني اخفيتها والطير طرد شوي وعقب صف)
اما الحبارى الثانيه فظلم للحبارى انها تكون حبارى :)
والثالثه حباري استراليا وسلامتك

[تواق]

السلام عليكم


والله صور غريبه بس ابو معيض اضن اصورتين الاخيره لحباري اوربيه تحديدا المانيه اظن وهي مهوب خبره البركه في البرامج الوثاقيه

[الدكتور00]

السلام عليكم ورحمة الله وبركاته....

مساكم الله بالخير جميعا...

عز الله إن مواضيعك يا بو معيض توسع الخاطر ...وتحرك الشباب مع ها الصيف....

أما بالنسبة للحبارى صاحبة الصور أعلاه وأنواعها ... فشخصي الكريم ليس بأفضل ممن سبقوه ولا ممن

بيلحق ويجاوب..لكن قلت خلني أجرب مع الربع...فربما أصبت الإجابة الصحيحة في كبدها :good:

وألحق قبل ما ياتي الفيتو ولا سرهيد ولا .....؟؟؟؟ :no2:


أقول باسم الله وعلى بركة الله..

*الحبارة الأولى..

اسمها العلمي والله العالم..( little bustard ) أو ( Tetrax tetrax)...

وتعيش بأوروبا ...وبالضبط خلني أقول..ألمانيا (لكن للأسف انقرضت منها أول القرن التاسع عشر ميلادي :D )

وفرنسا وأسبانيا و البرتغال والسويد ....الخ.



* أماالحبارة الثانية..

فرايي فيها يخالف راي بعض العرب اللي سبقوني بالإجابة...فأنا أقول إنها تعيش في الهند...ومنهم من يقول

إفريقية!!

وهذي صور للنوعين ولاحظوا الفرق..


الهندية...
http://www.mekshat.com/pix/upload/images9/mk3525_391423473.jpg

http://www.mekshat.com/pix/upload/images9/mk3525_686741081.jpg



الإفريقية..وتعيش في كينيا وجنوب إفريقيا وغيرها..
http://www.mekshat.com/pix/upload/images9/mk3525_753551487.jpg

http://www.mekshat.com/pix/upload/images9/mk3525_1054493581.jpg





كما رأيتم الصورتين الأولى ...هي الهندية..ومثلهن المعروضة عند المري اعلى الصفحة ..




* الحبارة الثالثة _ سلمك الله ومن يقرا_...

فاسمها العلمي ( great bustard ) أو ( otis tarda ) ..

>تدري يا المري وأنا قاعد اكتب الاسم العلمي وذي الفلسفة.. تذكرت المثل اللي يقول ..كحامل التمر إلى

أهل هجر يبيعهم إياه وهم أهل التمر!!! لكن الله يهديك أجبرتني بذي المسابقة ومثلك غالي ما ودنا نتغلى عليه :D <

المهم ذي الحبارة الثالثة صاحبة الثلاث صور ..تعيش في أوروبا عموما ..وإن أردت التحديد ..فأقول على

سبيل المثال لا الحصر ..أسبانيا ... وللمعلومية فقد أعيد اكتشاف (rediscovered) هذا النوع من

الحبارى في اليونان قريبا ..

وهذي بعض صورها إهداء لصاحب الموضوع وقرائه الكرام..


http://www.mekshat.com/pix/upload/images9/mk3525_bustard.jpg

http://www.mekshat.com/pix/upload/images9/mk3525_otis_tarda.jpg



وفي ختام هذي المشاركة التي أرجو إن أكون قد وفقت فيها ولو إنها تدور حول الصواب..

أشكر لأخي المري هذه البادرة الطيبة في تفعيل الخيمة وتجديد الجو ..ولا أنسى جميع المشاركين وتفاعلهم الرائع

من شكري الخاص.




أخـــــــــــــــوكم

(( الـــدكـــتـــــــــــور ))،،،،،،،،،

[fhd97]

السلام عليكم ورحمة الله وبركاته
دايم مشاركات بو معيض متميزه ومتجدده عسى الله يسلمه

الاولى والله اعلم انها فى دول اوروبا والبارده منها

الثانيه هى الحبرو الذكر منه وهى من انواعه

اما الثالثه اذا ما خانتنى الذاكره هى الحبارى الهنديه وهى منقرضه تقريبا ما بقى منها الا ثلاثميه زوج فى العالم

هههههههههه اما الاجابات شكلها ثقه شكلهااا بس اما صحتها فهى عند بو معيض

[الفيتو]

بسم الله الرحمن الرحيم
السلام عليكم ورحمة الله وبركاته

مساء الخير يا جماعه

1 - من بالتىلتغقلا ليلاراغفقاق
2 - من هقاتبغفتباثىياسلاسلاؤاىاي
3 -من تيبتايبتنابنياىغقفثلستص
4- من غاعتقفيرسثسلااينمنب
5 - من مينةرالاقلثغؤىرهثميىب
........
........
.........
..............
...................

كنت من اول لاماعرفت اجاوب ما عندي حل إلا اكتب في ورقة الأجابه بطريقه ما يقدر يقرأها الأستاد
وأحرجه بين امرين 1_ يرسبني ويتحسف............................ 2_ والا يكتفي بدرجة النجاح
ودايم كنت انجح بتقدير مقبول وعلشان ما احرج مدرسيني إكتفيت بشهادة الأبتدايه
لكن صارت عاده في وعسا ني انجح يالمري لو مقبول وأبيض
وجه أ بو رداد ونفوز بالجايزه

والسلام
الفيتو
الحجاز
12 - جماد - 1426هـ

[الجروووح]

مشكورين على إثرائنا بهالمعلومات الي أنا أو من يجهلها .


مانعرف الا حبارنا حقت العاده .

وهذا عائد الى الخبرة والممارسه القصيرة .


تقبلوووا جميعا تحياتي وشكري .

[المري]

السلام عليكم

خلاااااص انتهى الموضوع اذا حضر الماء بطل التيمم!!!

أشكر كل من شارك في هذا الموضوع

وكلكم ماقصرتوا شاركتوا باللي تعرفون ولكن للأسف مافيه أحد جاوب أجابة صحيحة

كلكم بعيد من الحروه ولكن في شخص حاسني حوس وصار كنه صاحب الموضوع

اللي هو أخونا (( الدكتور )) بيض الله وجهك يالدكتور وعزالله انك جبتها ..

وتستاهل الجائزة بل الجائزة اللي تستاهلك..

خوووووش دكتور من غير اقصور في باقي الدكاتره الاعضاء الباقيين..

اه ياموضوعي اللي اصبح من صيد امس..

تسلمون جميعا ..

أخوكم / المري

[أبو رداد]

ياجماعة الخير
فيتو فيتو فيتو
ماقصد الفيتو خوينا
الاخ الدكتور يقول ان هذه الحباره الاولى منقرضه من القرن التاسع عشر
وانا قبل اربع او ثلاث سنين هديت طيري عليها .. قفعت من تحت الويل وسلمت على طيري ومشت
وفي نفس السنه ... اشتريت حبار من ناس يصيدوه بالمخداجه في الليل ... وكانت وحده من ضمنها اخت الي في الصوره رقم واحد ... والحمد لله وصورتها موجوده ... واخذتها من راعيها بنصف قيمة غيرها من الحبار ...
واظن والله اعلم انها لازالت موجوده في الامارات لان الجهه التي اوردتها الحبار تهتم بالحياة الفطريه والمحميات
والكثير من الصيادين العراقين شاهدوها تخلط مع جول الحبار ويوم يقفع الجول يسبقن الجول بعيد
واليوم ان شاء الله ابحث عن الصوره وانزلها
وسلامتكم

[المري]

مرحبا اخوي ابورداد وتسلم على التعليق

اما بخصوص انها انقطعت فصحيح انها انقطعت بشكل كبير علشانك لقيت وحده ولا ثنتين في ذا لسنين تقول انها ماأنقطعت!!

تسلم اخوي ابو رداد وماقصرت يالغالي..

ملاحظة: ابو رداد انت ماترقد ان جيت المنتدى بالليل لقيتك وان جيته بالصبح لقيتك !! ماشاء الله عليك..

الله يستر عليك

اخوك / المري

[الدكتور00]

السلام عليكم ورحمة الله وبركاته....

صبحتم بالخير يا الربع...........


أخوي المري ما أدري وش أقول ...!!!!!!!!!!

والله إن لساني وقف مبهوتا...وعجزت أناملي عن تسطير بعض من أحرف مستقيمة المعنى....

فيما كتبته من مدح لشخصي ....لعلمي بأحقية من هو أجدر بهذا من رواد هذه الخيمة وصقاقيرها

الجهابذة....

وما أنا كما أسلفت بأفضل من رد ..ولا أطولهم باعا في الصقارة...ولا أكثرهم خبرة ولا دراية....



عالعموم أخوي الغالي أبو معيض ....كلماتك كانت بالنسبة لي أكبر جائزة كونها صدرت من صقار قدير

أفخر بمتابعة مواضيعه منذ بدايات هذه الخيمة...


فبيض الله وجهك و وجه من هو على درب المرجلة منشيك.........

وما أقول إلا ...

على المرقب العالي بنى وكره القرناس ****ولو جار الوقت ما نزل من مراقيبه....


وسلااااااااااااااااااااااااامتك يا الذييييييييييييب



أخــــــــــــــــــوك (( الـــدكـــتـــــــــــــــور ))،،،،،،،،،،،،،،،،،

[أبو رداد]

هلا صباح الخير يابو معيض
انقطعت غير وانقرضت غير
الانقراض يعني انتهى مثل الديناصورات وماشابهها... هذا الذي فهمته
وعلى كل حال ان توافقوني الراي ان منها بقيه ومهدده في الانقراض
فسوف اسحب حق النقض ههههههههه
ومبروك الجائز على اخونا الدكتور

اما عن فترة النوم فصادق وبعد ساعه تبدأ

[الدكتور00]

السلام عليكم ورحمة الله وبركاته.........

أخوي الغالي أبو رداد.............

صبحك الله بالخير يا راعي الذيب..................



وسلامة الأسفار ....ولا تعبت يا الغالي....



و بخصوص النوع الأول من الحبارى اللي تقول إنكم شفتم مثله ....تراني ما أكذبك>>>محشوووووووم<<<

لكن ارجع لردي واقراه زين وعلى مهلك ....ودقق على الأقواس ...ولاحظ وين أنا قلت إنه قد انقرض ...

وترى بيني وبينك من غير قصور بالمري ....كلام أهل الديرة ذياك وهم أدرى مني ومنك بديارهم..


ولا تنسى تراني أنتظر ردك .........



أخــــــــــــــــوك (( الـــدكـــتـــــــــــــــــور )) ،،،،،،،،،،،،،،،،،،،،،،،،،


أبـــــهــــــــــــــــــا الــــــبـــــهـــــــــــــــاء

[سرهيد1]

السلام عليكم

الدكتور كفى ووفى
لكن ترى فيه ملاحظة صغيرة يالربع الطيرين التاليات من انواع الحبرو مي حبارى الاول اسيوي والثاني اوروبي

والسلام ختام

[سرهيد1]

وبما أني لم أتمكن من المشاركة بشكل سريع فوجب على أن اراضيكم بهذه الهدية نوع من تطيب الخاطر

هذه هي خارطة جميع أنواع الحبارى والحبرو التي تندرج تحت فصيلة (bustard) وهي أشكال تم ربطها علمياً بدراسة خصائصها الجينية . أسئل الله ان ينفع بها .


الرجاء الضغظ على الصورة حتى تراها بشكلها الكبير
http://www.eyelash.ps/upload/pic/bustardmap.jpg

[الدكتور00]

السلام عليكم ورحمة الله وبركاته....

مساك الله بالخير...أخوي سرهيد...

وعساك عالقوة ...ولا هنت على ها الملاحظة ....والخارطة التصنيفية لفصيلة هذا الطائر ...

جدا نافعة ..وما بها أي قصور ........


***لكن وانا أخوك....عندي تعليق على شكل استفسار ......

يوم إنك تقول هذي من انواع الحبرو ومهيب حبارى...؟؟؟؟؟ تعني الطيرين التاليين..
طيب أنا في اعتقادي ...إن هذه التسمية (الحبرو) عربية ..صح ولا لأ..وما أظن لها أي ترجمة عند
الإنقليز...طبعا على حد علمي القاصر...لأني مانيب biologist يا الطيب ...فكل ما أرجوه منك...
إن تعطينا فكرة عن التصنيف العلمي لهذه الفصيلة bustard علما أن الترجمة الحرفية لهذا المصطلح هو
الحبارى أو دجاج البر!!!!!!!!!!!!!!!
لا تبخل علينا بما عندك ...فخلنا نفيد ونستفيد ...صح إني مانيب veterinarian (( وجه مبتسم )) .....
لكن ما بها خلاف إن توسعنا شوي .........


وفوق كل ذي علم عليم..................





أخـــــــــــــــوك (( الــــدكــــتــــــــــــــــور )) ،،،،،،،،،،،،،،،،،

[ولد وايل]

السلام عليكم ورحمة الله وبركاته


سألت شغالتنا قالت من سايبيرا

ثم قالت من الستراليا

ملاحظه


شغالتنا تقنص بشرق اسيا تحب الصفارى

[أبو رداد]

وعليكم السلام ورحمة الله وبركاته

الاخ العزيز الدكتور
العتب على النظر ... تقصد انها منقرضه في المانيا فقط !!
وموجوده في باقي اوربا
بيني وبينك جعلها بالقطع .. لان لو كثرت من وين نجيب طيور تلحق
هههههههه
ومبروك عليك الجائزه
ومن جد وجد ... بس علمونا وين تذاكرون هههههههه

[اعقاب]

السلام عليكم ورحمة الله وبركاته

الاخوه الاعزاء

الاخ العزيز المري

وش فيك على الفيتو

نبغي لنا مقطع حق عشان تعطيه حقه

االجواب اللي قاله الفيتو صحيح

ماعليك الا ترتب الحروف

بس

لانه ماخلى حرف الا وكتبه

ولا انا غلطان

[سرهيد1]

بسم الله الرحمن الرحيم

أخوي الدكتور الله يطول عمرك شكراً على استفسارك ولو اني ما أمتلك معلومات تبيض الوجه بس على قدر اللى عندي أهرج ولا أزكي نفسي ولا معلوماتي أنما أنا مجتهد أن اصبت فمن الله وأن أخطاءت فمن نفسي والشيطان .

أقول ياخوي يا دكتور .... حنا ماعرفنا علوم الدخاتر والعلماء غير من تالي واللا أول ماغير علوم نتوارثها من شيبانا الله لا يحرمنا منهم ويجزاهم عنا خير الجزاء .

وفهمونا الله يرحمهم حيين ميتين أن هالصغيرة اللى جناحها ابرق يقالها حبارى ....أنظر بالاسفل

http://www.fuerteventura-infos.de/foto-galerien-fuerteventura/fauna/hubara9.jpg

حتى الخواجه راعي الموقع اللى فيه الصورة يسميها ( هوبارا باسترد ) hubara bustard


وقالو لنا شيباننا الله يرحمهم حيين ميتين أن هالمصيبة ذا أبو دميجة يقاله حبرو.....أنظر بالاسفل

http://thebirdzoo.com/BirdZoo-images/xr-Kori-Bustard-web.jpg

حتى الخواجة راعي الموقع اللي فيه الصوره مسميه ( كوري بسترد ) Kori Bustard

من هنا يتضح لنا أنه قد أتفق شيباننا والخواجات أن النوعين يختلفون عن بعضهم بعض وليس الحبرو كالحبارى بالاسماء كما أن من يدقق النظر بالصور قد يتضح له بعض الفروقات قد تتعدى السبعه.... ومن المؤكد أن من قد شاهدها على الطبيعة لن يجد بينها سوى الفرق الشاسع ....

من هنا وجب علينا أن نفرق بين الحبارى والحبرو أخي الدكتور جزاك الله خير .....

وقبل الختام يتوجب علي أن أبين معلومة عندي لعلها تكون ذات فائده ....

وهي كالتالي :

نوع الحبرو الاخير اللذي موضح بالصورة في الاسفل يسمى ( قريت بسترد ) Great Bustard على حسب تسمية الخواجات فقط

http://www.boletas.org/Great-Bustard1.jpg

حيث أن شيباننا الله يرحمهم حيين ميتين لم يسبق لهم مشاهدته في جزيرتنا الغالية والله أعلم

والسلام عليكم ورحمة الله وبركاته

[ابو عايد]

السلام عليكم ورحمة الله وبركاته

تسلم يالمري على هذا الموضوع ... ويسامون الاعضاء على هذا النقاش الطيب الذي يعد للفائده

ومبروك يا الدكتور ... ومن كريم الى مستحق

http://www.eyelash.ps/upload/pic/bustardmap.jpg

تقبل تحيات // العاشق الولهان

[المري]

تسلم اخوي سرهيد وماقصرت وترانا منك والله نستفيد وتراك دكتور الجميع من غير أقصور

في اخونا (( الدكتور))..

**

ابو عايد مرحبا بك يابو فايز وحياك الله .. يالغالي..

**

هذي الجائزة التي نالها اخونا الدكتور وتراها يستاهل اكثر...

وهي عبارة عن ساعة سويسري مكتوب عليها (( أرامكــو السعودية )) sadui aramco

واليكم الصورة:

http://www.mekshat.com/pix/upload/images9/mk1168_gift to dr..jpg


وسلامتكم

أخوكم / المري

[ابو عايد]

السلام عليكم ورحمة الله وبركاته

لا شلت يمينك على الجائزة يالغالي وبيض الله وجهك يالمري

وتقبل تحياتي // العاشق الولهان

[اعقاب]

السلام عليكم ورحمة الله وبركاته
يستاهل الجائزه
وانت ماقصرت

[سرهيد1]

السلام عليكم ورحمة الله وبكاته

ماشاء الله تبارك الله ................. يستاهل الدكتور من حصل شي يستاهله وهو بصراحه وضح الاجابة مفصلة ومدعومه بالصور والادلة ....

عساه على القوة ..

وبيض الله وجهك يابو معيض على الهدية

[الدكتور00]

السلام عليكم ورحمة الله وبركاته.............


أخوي (( سرهيد )) ....اررررررررررررررحب يا الذيب ...ومرحبا ألووووووووووف يا الغالي....



اسمح لي أخوي ..أن أحيي فيك تواضعك الجم...وأشيد بغزارة معلوماتك ..وسعة اطلاعك...
عسى الله يزيدنا وياك من فضله وينفع بك.... هذا ابتداء..


وبخصوص إجابتك..فانا أشهد إنك كفيت ووفيت ..و ما أقول إلا بيض الله وجهك ...
والله يعطيك ألف ألف عافية يا السنايدي ...


ونرجع لموضوعنا :cool: :cool: ...وبالمناسبة ..ترى يوم إني مريت الصور اللي وضع عليها المري
المسابقة...وشفت الصورة الثانية ..عرفت إنه هو اللي نسميه ( الحبرو )..والتقارب في الشكل والتميز في مظهره
قريب جدا مع الحبرو اللي يعرفه جميع الصقارقير اللي قنصوا السودان وغيرها من بلاد إفريقيا >>>ومنهم أخونا
الفيتو في موضوعه مع خويهم راعي الجبلية شلفا <<<.......لكني قلت في خاطري خلني أجاوب على قدر المسابقة المطلوب ..ولا عندي زود معرفة حتى أقوم أناقش المري ..........

وعلشان كذا كان سؤالي اللي وجهته لك..من جهة مغايرة ، وهي من ناحية العلم التنظيري ، وعز الله إنك جبت العلم الغانم أوله وتاليه ...
ما شاء الله عليك الله يزيدك من فضله.......

وعلى طاري الشيبان ....الله يطول باعمارهم، ويرحم من أقدم منهم على ربه...تراهم وأنا أخوك_ولا يهون السامعين_(( أقصد القارين :p ))...هم المنهل الصافي والنبع المعين......حتى آراء العلماء بالطيور من الخواجات توافقت مع علم شيباننا الأول..بل بعض الآراء هم من يقوم بتصويبها ..مثل الشايب اللي بالكويت وذكرت
قصته مع ذاك الألماني....ومن الصقارة العرب قلة من جمع هذين المشعلين..ونت ما شاء الله عليك وكثير من صقاقير هذا المنتدى ( من غير ما أسمي أحد :no2: ) بشهادة الكثيرين ، من خيرة هذا الصنف .........


عالعموم مسابقة أبو معيض أحرجتني معك لأن ودي إني أبطيت بالإجابة ، وتقدمت علي وجاوبت ونت تستاهل
الخير...ونت أولى بالجائزة.......لأن مثلي كمبتدي ، ما يتقدم عليك ...ولا يهون الربع جميع ...
والعين ما تعلى على الحاجب وأنا أخوك..........

ولاااااااااااااااااهنت على هالمشاركة والمداخلة اللي أضافت لمعلوماتي الكثير مما أؤمن بفائدته ونفعه.....


........




أخـــــــــــــوك (( الـــــــدكــــــتـــــــــــــــــــــور )) ،،،،،،،،،،،،،،،،،،،،،،،،،

[الدكتور00]

أخوي (( أبو رداد )) ....ياهلا ومسهلا بالغالي ...والله يحييك ...

عالعموم الحمدلله إنك تراجعت وسحبت الفيتو >>>موب خوينا :p <<< أقصد اعتراضك اللي
قدمته للمري ، وقمت وقتها تبغى تحجب عني الجايزة :D ولا ما أدري وش سالفتك بالضبط ;) ......
لكن عدت بخير هذي السحابة ..وانقشعت الغمة ...لا وجاك اعقاب يطلب إن الجائزة تكون بيني وبين الفيتو
بحكم إنه المركز الأول مكرر :eek: يا زمان العجايب :D


أخوي لا يجي بخاطرك شي تراني أمزح من ذا اليوم معك........


وعلى مباركتك لي الجائزة ...أقول الله يبارك في عمرك والله يحفظ ذا الوجه.......



ولااااااااااااااااهنت يا الغالي...

أخـــــــــــــــوك
(( الـــدكـــتـــــــــــور ))،،،،،،،،،

[سرهيد1]

وعليكم السلام ورحمة الله وبركاته

أخوي الدكتور حياك وبياك وجعل الجنة مثوانا ومثواك

اشكر لك الاطراء ولكن اخوي الدكتور انا ما ني بالشكل اللى تهقاه ........... دورني بقوقل وبس أقراء واحط لكم بالمنتدى وبس هههههههههه هذا اللى انا جيد فيه وان كان ماني بأجهلكم ترا مانيب أعلمك الله يديمكم لنا انت والربع وترى العلم وزعه الله على الخلق والحكيم اللي ياخذه من صغير وكبير ويدور العلم لو بالصين ....

هذا ما وددت أن اهديك اياه وبالنسبة للمسابقة حتى لو كنت جاوبت قبلك ..... ما أتوقع اني كان بجاوب بنفس اسلوبك الجميل الله لا يهينك ومن يقراء ...

والسلام عليكم

[الدكتور00]

أخوي (( اعقاب ))....

مرحبتين يا الذيب ..الله يحييك...............


على طاري الفيتو ...وعلى كلامك ، تراني مثلك أشوف إن حقه ما وصله ...وقله يراسلني عالخاص ...علشان
نقتسم الجائزة بيني وبينه.......لأني أشوف تصحيح المري كان شديد شوي ، والفيتو الله يعطيه العافية ما ترك حرف
إلا وضرب به ..عالعموم عسى الله يرزقه مدرسين حليلين في تحضيره لماجستير المتوسطة منازل :D ..يمكن تنعدل سطور الكتابة في مشاركاته ;) :mad: محد يدري الله الهادي!!!!!!!!!


ولااااااااهنت أخوي اعقاب ...جعلك تسلم عالمشاركة.....وتستاهل العافية.....

والله يستر لا يمر الفيتو من هنا .....




.................................................. ...........

مشرفنا أبو عايد ،،،

مرحبا 1000بالغالي....

والله يبارك في أيامك يا الذيب ، والمري وعد وكان عند وعده ،فبيض الله وجهه...
لكن عسى الله يسامحه ، لأنه تكلف بالجايزة وحنا ربع ما بيننا ذي الكلافة........
ولو أدري إن كذا بتكون الجايزة ما شاركت من البداية >>واحد واثق من فوزه <<.

لكن بيني وبينه علم وهوأخبر إن شاء الله............


وسلاااااااااااااااااااااااااااااااامتكم جميييييييييييييييييييعا



أخــــــــــــــــوكــــم (( الـــــدكــــــتــــــــــــــــور ))،،،،،،،،،،،،،،،،،