الشعيـــــــــــــــــــــــــــــــــــر والذبائح

[ksa1ksa]

يأخوان ليه العالم تتكلم عن الشعير طلع ولا نزل زاد ولا نقص؟

هل إذا زاد سعر الشعير ولا نقص ترخص الذبائح كل يوم هي في زيادة

يوم كان الشعير غالي ويوم كان رخيص نفس الاسعار

لا يصير الواحد همه هم نفسه ويفكر كيف يتاجر بالغنم ولا يفكر في الناس المساكين اللي

مايقدر بعضهم يشتري ذبيحه له ولعياله

[بن نقا]

بالعكس يالغالي العلاقة بينهم عكسية وليست طردية بمعنى إذا زادت قيمة الأعلاف تنزل قيمة الأغنام لأنه في سبيل توفير الغذاء يظطر الراعي بيع بعض الأغنام وأنت بلا شك تعرف قاعدة الأسواق في مسألة العرض والطلب .
أتمنى أن أكون أفدتك والأخوان يبي يزيون على كلامي ونستفيد جميعاً

[ksa1ksa]

لا والله يالغالي ماشفنا الا زيادة اسعار الذبح ماشفناه رخص

[بتاع بر]

لو نطبق توجيه عمر رضي الله عنه كان رخصت الذبايح وصار ابو 1000 ب300

[ksa1ksa]

لا والله عمى قلوبنا الطمع والجشع

[قنااااص]

لا والله يالغالي ماشفنا الا زيادة اسعار الذبح ماشفناه رخص




فعلا كلام سليم..

[محمدالزبيدي]

الغلا مافيه خير والعياذ بالله منه في كل شيء

والغلاء يفضي إلى غلاء

لو توفرت المراعي والأعلاف لكثر الحلال وكلما زاد العرض قل الطلب وبالتالي ترخص أسعار الحلال عموما

لكن في الآونة الأخيرة برزت ظاهرة غير صحية غفل عنها الكثير مالها بالغلاء

ألا وهي الصنف والمزاين مما جعل أكثر المربين الجدد يتجهون لها سواء في ألاغنام أو الابل

وهذا على حساب تربية الحلال

وهنا تكون الطامة قلة المعروض من الحلال وكثرة الطلب عليه

وأكثر الناس متمسك بحلاله لأنه صنف يبي يبيعه بأسعار عالية طلبا للثراء السريع

ومنصب شيخ في أسرع وقت ممكن

أيضا هناك شريطية يعتمدون على انتاج المربين من البهم وصغار البل يجففون السوق دائما ثم يرفعون الاسعار

في الوقت المناسب

[abo..yasser]

اي والله الغلا مشكلة التيس اللباني كان بـ 250 ان غلا والحين بـ 600 و650 ريال ..
والخرفان توخذ اطيب ذبيحه قبل بـ 400 الحين بحدود 900 الله المستعان ..
اما البربري الطيب مره ذاك الوقت 180 ريال يارخصه :)

[ولد دوارد]

ارخصوه ويرخص

[كساب الطيب]

يا طويل العمر اذا رخص الشعير
المستفيد الشعب
لكن الشعب يبي الحلال يرخص بسرعه
اهل الحلال ما عوضوا فلوسهم يوم الشعير بخمسين مات بمراحه ولا باعه بتراب الفلوس
اذا رخص الشعير وصار تسعيره من الدوله ثابت
انا بربي وانت يمكن تربي وغيري وغيرك الكثير
ويكون المستفيد المواطن والدوله
لان الحلال بيرجع زي قديم ويكثر وبالتالي يرخص
وتنمي الثروه الحيوانيه لدينا
الى متى نستورد من استراليا ويوزلندا والسودان

الناس من 20 سنه تركوا الحلال لسببين
اولا : اتجهوا لحضاره وبناء مساكن بالمدن
ثانيا:غلاء الاعلاف

واعذرون على العاميه
توني جاي من سفر وصايم هههه

[راعي المقانيص]

1- لاحسيب ولا رقيب

2- من امن العقوبه أساء الادب

3- المساله فلتانه وكل واحد يحط تسعيرته من راسه خسران والا كسبان

4- الغلط من المستهلك وليس من الموزع او المستورد وين المشكله لو صبرنا شهر والا شهرين بدون ذبايح وخله يستانس بحلاله وشعيره ويمتع ناظريه قبل لايفارق حلاله ويوكلها ويشبعها ويلعب معها ....... الخ

5- يرخص الشعير تطير الاسعار ويقول راعي الحلال ابي اعوض خسارتي

6- ربعت الارض وجاء المطر والخير وتطير الاسعار دبل الدبل ويقول راعي الحلال هذي توها جايه من البر ومربعه ولا لك الا اللحم الطيب ................ الخ

في كلتا الحالتين اثبات للطمع والجشع واثبات ودليل قاطع لكل ماسبق ذكره من نقاط اعلاه

ولكن فيه خبريه حلوه منقوله عن وكالة الانباء السعودية لعل وعسا انها تأدب النصابين في هالبلد الله لايوفقه وين ماراح ووين ماجاء


إخضاع السلعة لأحكام التنظيم التمويني في الأحوال غير العادية

50 ألف ريال غرامة والحرمان من الإعانات والتشهير للمتلاعبين بأسعار "الشعير"


واس - الرياض: أصدر وزير التجارة والصناعة عبد الله زينـل، قراراً بإخضاع "الشعير" لأحكام التنظيم التمويني في الأحوال غير العادية، فيما اعتبر من تجاوز من المستوردين نسبة هامش ربح مقدارها (5 %) من تكلفة الاستيراد بعد خصم مقدار الإعانة ورسوم التفريغ في الموانئ، إضافة إلى من باع كيس الشعير وزن (50) كجم من الموزعين أو التجار بزيادة عن هامش الربح المحدد ضمن قرار مجلس الوزراء رقم (135) وتاريخ 27 /4 /1431هـ وهو (4) ريالات للكيس، وكذلك من امتنع عن البيع أو خزن الشعير أو لم يضع لوحة توضح أسعار البيع في محله من المستوردين والموزعين وتجار الشعير، مخالفاً للقرار، وتطبق بحقه العقوبات المنصوص عليها في قراري مجلس الوزراء رقم (855) وتاريخ 26 /5 /1396هـ ورقم (135) وتاريـــخ 27 /4 /1431هـ حيال المخالف، وأبرزها ما يلي: غرامة مالية على المخالف تصل إلى خمسين ألف ريال، ومصادرة فرق السعر، وإغلاق المحل لمدة تصل إلى شهر، أما إذا كانت المخالفة من المستورد فيعاقب بالحرمان من كامل الإعانات المستحقة له، و يتم إيقافه عن الاستيراد مدة لا تقل عن ستة أشهر مع أخذ التعهد الشديد بعدم معاودة المخالفة، وإلا يمنع من مزاولة نشاطه نهائياً، وفي حال كانت المخالفة من الموزع فيمنع من ممارسة نشاطه لمدة لا تقل عن ستة أشهر مع أخذ التعهد الشديد بعدم معاودة المخالفة، وإلا يمنع من مزاولة نشاطه نهائياً، والتشهير بمرتكب المخالفة على نفقته بعد اكتساب القرار الصادر ضده صفة القطعية، في ثلاث صحف محلية في مناطق مختلفة، على أن تكون إحداهن في المنطقة التي وقعت فيها المخالفة أو قريبة منها.

كما تضمن القرار أن تتولى ضبط وإثبات المخالفات لجان تشكل من وزير التجارة والصناعة وترفع محاضر الضبط من وزارة التجارة والصناعة لصاحب السمو الملكي الأمير نايف بن عبد العزيز النائب الثاني لرئيس مجلس الوزراء وزير الداخلية أو من يراه سموه لإصدار القرار بتوقيع العقوبة.

المصدر / وكالة الأنباء السعودية ( واس )

[dark]

1/الشعير متجه الي 60 ريال للكيس
2/ البدائل البر والذره والخبز
3/ البر راح يرتفع بعد الشعير
4/ الصوامع راح تستغل الوضع لصالحها كما في المرات الفائته
( يعطون نص العمال بالمصنع اجازه مما يسبب تكسد الشاحنات عند التحميل

[باحث خفايا]

بارك الله فيكم جميعا واشكر من بدا برأيه

ووجهة نظره

بما انني .. صاحب حلال .. وليس لي في عرووض التجاره مراد

الارتفاع في الاسعار فيه اذى للمسلمين ايا كانت السلعه ..( حيوانات .. نباتات .. الخ )

( لو وقفنا لحظة تامل وبعقلانيه .. والبعد عن التعصب وبعد نظر ::

نجد ان صاحب الحلال يتعب من الفجر .. حتى المغيب .. يشتغل في حلاله .. يعمل هذا ويدير هذا

.. لندخل في حسابات بسيطه

فمثلا :

رجل عنده 1500 راس :
العلف يكون من الشعير 40 كيس باليوم على حد ادنى ... في 40 ريال الناتج = 1600 ريال باليوم في الشهر يكون الناتج = 48000 الف ريال ..
البرسيم : إذا كان عنده رغايث ونقول ثمان مائة راس يكون العلف
على حد ادني 40 ربطه في 13 ريال رغم ان السوق الان تخطى العشرين لشد الطيب في الشهر يكون الناتج = 15600 ريال

التبن ولا هو بوجيهكم .. يعلف 70 ربطه لأن يكون لديه ( بهم .. رغث وجلد ) وسعرها 7 ريالات في الشهر يكون ..الناتج في الشهر يكون = 14700

على حد ادني يكون لديه اربع رعيان .. من غير السواق ... والرعيان الان غاليين 1400 ريال لكل راعي على حد ادنى

الناتج بالشهر 78300 + 5600 = 83900 ريال بالشهر علف ورواتب الرعيان على حد ادنى

.. ناهيك عن . كسوة الرعيان وطعامهم
وعن خرابات السيارات الكبيره والصغيره

أن شخصيا اذهب كل يوم بـ 100 ريال بانزين خبز دجاج معلبات.ثلج ...الخ

في الشهر اكون صرفت مبلغ 3000 ريال
والرعيان ولله الحمد واجد وكل يوم الله يعزكم جزمات ..( لا وبعد بساطير الحرس ) الواحد مية ريال ..

خل اقول بالطايح مصروفهم للملابس 600 ريال بالشهر

الوايت إذا نزل لصناعية اعرف انك تبي تدفع قيمه اقل شيء 5000 ريال

وناهيك عن الددسن الي كل يوم جايبنها بقلص من البر للمدينه

والله يالربع خلها على ربك



المجموع النهائي لتكليف شهر واحد ..92500 ريال


اقول عندي من البهم 500 راس وابيعهم جمله واحده على 800 ريال لراس الواحد

المجموع النهائي 400 الف ريال

اقسمها على 6 شهور ..علف .. هذا اذا عندك هذه الكميه من البهم .. لاتنسى الموت والضياع


يتطلب عليك دفع مبلغ 555 الف ريال

بينما سعر البهم 400 الف ريال

ينقص لديك 155 الف ريال


منين توفر هذه القيمه

فحتما القروض والسيارات


............. يا جماعة الخير يجب علينا ان نكون واعين بصدر الاحكام على اهل الحلال

..والحلال يبيله صبر

الكثيرين يتكلمون عن اصحاب الحلال ووهو جالس على المكيف بالصيف وعلى النار في الشتاء

النوم ما يحصل عند الأهل إذا الجو عجاج .. رحت للغنم وإذا مطر رحت للغنم

يتصل عليك الراعي الساعة 2 في الليل يقولك الغنم ضاعت

وترووح تدور والناس نايمين

الحلال دوخت راس ويبيله صبر وما احد يصبر عليه إلا من اخذ هذه عن اب وجد

خلونا نتكلم بوضوح


وراعي الحلال بايع بايع لونه بريال

يوم وصل الشعير 50 ريال في الشتاء الحلال موت قمنا ما نعلف منين نجيب علف والحلال رخيص

حتى جت تعويضات من الحكومه بارك الله فيها


أعرف واحد نفق عنده 350 راس .. بالله مو حرام حلاله مات تعب سنينه راح بلحظت ارتفاع السوق

وارتفاع الذبايح : انا ابيع 800 ريال طلي طيب ويجي الشريط ويفرد على 900 او 950 ريال ..

(( خلاصت القول ...

الارتفاع اذى للمسلمين وأنا صاحب حلال ارفض هذا الارتفاع لكن مقابل يكون الشعير 18 ريال خلني ابيع الطيب 500 ريال لكن الشعير 18

ولو تحسبون الدعوة هي هي لصاحب الحلال ما تفرق معه

لكن الضحية من يا خذ ذبيحه من الشريطيه

اسأل الله أن يكفينا شر الغلا ويعيننا والمسلمين عليه

[saas-des]

سوق ماينعرف له يرتفع ماينزل
وقس على ذلك اي شي فيه عرض وطلب عندنا

[خالد1العتيبي]

^^^^
باحث خفاايا.. بيض الله وجهك عز الله انك قلت الصدق

المشكله تتعب على الحلال في الصيف والشتاء وتلقى هنا من يسبك لاحول ولاقوة الا بالله

واتمنى التوفيق للجميع وان يبعد عنا الغلا.

[abofaisal333]

غلااااااااااااااا والا رخص

ما فيه فرق

[راعي المقانيص]

اخي الفاضل والكريم باحث خفايا

اقدم لك شكري وتقديري وفائق احترامي لحسن اسلوبك واحترامك للراي الاخر والتعبير عن وجهة نظرك باسلوب راقي بارك الله فيك

واذا سمحت لي اخي الكريم بان ادخل معك بمداخله بسيطه تعبر عن وجهة نظري

غيرك مكذب وانت صادق وانا اخوك لكن لو مشينا على حسبتك انك تصرف شهريا 92 الف ريال والمبلغ قارب المية الف ريال راح نجد اهل الحلال في وحده من ثنتين مالها ثالثه

الحاله الاولى - راح يكون اغنى رجل بالعالم ومتحكم بسوق المواشي وتبي تقفل شركات المواشي والميناء ماعاد راح يستقبل المواشي ولا راح تنزل من البواخر لان عندنا تضخم

الحاله الثانيه - راح يكون مديون وعليه من الملايين لايعد ولا يحصى وطلابته كل يوم من شرطه لمحكمه وحالته حاله والكل يدعي له ويقول الله يفرج سجنه ويصبر اهله

حاله ثالثه مافيه طبعا لان محد مغربل عمره بثلثين راس والا ستين راس ومطارد في هالبران وحالته حاله

اخي الفاضل

قبل فتره نزل كيس الشعير وارتفعت الذبائح بمعدل 40 % والسبب ان اهل الحلال يقولون نبي نعوض خسارتنا

نقول مايخالف الله يرقنا واياكم الرزق الحلال المبارك ويبارك لنا فيما رزقنا يارب العالمين ويعوض على كل اهل الحلال

طيب سؤال بسيط

اسعار الشعير من قرابة عشر سنوات وهي تطير وتوقع وسعر الكيس وصل الخمسينات والستينات ومع ذلك اسعار البهايم ماتغير

لكن ليش تغيرت اسعار البهايم من ثلاث سنين وطرتوا بالعجه مع العالم الي رفعت الاسعار بسبب زيادة الرواتب وحطيتي اللوم على الشعير وغلا الشعير وخسايرنا ..................... الخ

الحين الي راتبه 3000 ريال وجته الزياده 15 بالميه حقت 3 سنوات كم صار الراتب ؟ ؟ ؟
صار 3450 ريال

هذا وش يبدي ايجار بيته والا فواتيره والا سيارته والا اكله وشربه والا ملابسه وملابس عياله واجي انا وانت ياراعي الحلال او تاجر مواد غذائيه ونفرك خشمه بالارض ونقول نبي ناخذ منك فرحة هالزيادة غصب عنك ؟ ؟ ؟

هذا متى يبي يشتري له بيت ؟ ؟ ؟

في نهاية حديثي اخي الفاضل احب اقولك سر يمكن انك تعرفه ويمكن انك راعي حلال ولا تعرف سوق الشعير ومن ورا سوق الشعير واقسم لك برب البيت والذي رفع سبع ونزل سبع ان الحثاله الي تلعب بسوق الشعير وبالسنتهم قالوا

مارفعنا ولا خزننا الشعير الا يوم التجار واهل الحلال رفعوا اسعار حلالهم دام انهم يرفعون حنا ليش مانرفع ؟ ؟ ؟

وانتم يا اهل الحلال تقولون مارفعنا الا يوم رفعوا حقين الشعير ولكن الحقيقه ان اهل الحلا هم من بدا بالرمي ويمكن تكون هذي عقوبة من رب العالمين انزلها عليهم نسئل الله العافية والسلامه ولكن نقول الله يصلح الامر يارب العاليمن

والمستهلك الغبي صار بينكم مثل المسمار بين لوح ومطرقة

هذا وتقبل فائق احترامي وتقديري اخي الكريم

[ksa1ksa]

ياجماعة الخير
انا عيال عمي من تجار الحلال ماشاء الله عليهم
تدرون يقولون لي ادخل وخذ اللي تبي من الحلال على 500 لي انا مهو لأي احد
قلت ياولد انتم ترخصون الحلال ولا جبتو راس المال والحلال غالي
قالوا هذا سعره اصلا وهم يبيعون الناس على كيفهم
هذا وش معناه يعني انه فيه تلاعب وراعي الحلال مثل راعي الشعير كلهم سوا
وش ذنب الضعوف والمساكين

[ابوحمد 2009]

لا والله من ثلااث سنين ماشفنااا شي نزل سعره لا شعير ولا ذباايح كل ماالهن بزوود

الا الاسهم نزلن>>:d

[باحث خفايا]

حياك الله اخي راعي المقانيص :

لو تمعنت في كلامي .. تجد انني قلت اني لست تاجر بل هذه اخذتها من ابائي واجدادي لو ما يطلع لي ولا قرش منها ..

هواية تربية الاغنام ولست تاجر


........ بارك الله فيك على هذا الاطراء .. لكن لدي تعليق بسيط لو تكرمت


القيمة من البيع 100 الف ريال .. ما احطها في جيبي إلا إذا بعت الغنم كامله ولم يبقى لدي ولا راس ..(( هذا كلام ثاني .))

.. الغنم تحتاج علف وعلفها مكلف شهريا 92 الف ريال ..

هل الغنم تبي تنتج كل شهر 500 طلي ( خروف ـ فطيمه ) طبعا لا

انا اعلف البهم علشان يكبر ويتساوا في الطيب .. وهذه بعد 5 شهور او ستة شهور

.. كل 5 شهور يصير عندي 500 طلي واحتاج 5 شهور حتى ابيعه


ومنين اجيب علف ...!!


.. اخي الغالي نحن نكسب بحالة وحده إذا جبت تاجر وشراها كلها بهم وغنم مع الله يعزك ويعز من يقرأ حمارها وكلابها

اتفق معك بأني اصبحت غني وثري ولدي في الرصيد .. 1500000 ريال

(( ... أتمنى منكم التفريق بين التاجر وصاحب الحلال ..))


اخواني في الله ..

إن شاء الله جميع السلع ترخص حتى الحلال .. لأن الغلا نوع من اذى المسلمين كما قلت سابقا


........... وحنا اهل الحلال ما تفرق معانا إذا كان الشعير هابط ادنى سعر له والحلال رخيص

لأنك لو تعيد الحسابات تجدها هي هي ما لي مردود منها ..!

إلا إذا ربعت الدنيا وجاء ربيع طيب اكثر من ثلاث شهور تكون وفرت 90 في ثلاث شهور الناتج 270 ألف
ريال


يمكن تبي منزل دور واحد ..!!


(( نحن نستفيد في الربيع فقط .. ولنا ان نستفيد لأننا نتعب ونرهق ارواحنا في سنه كامله الحر والشتاء في ظهورنا ..))

والله ثم والله .. أثناء العجاج والمطر .. تحس انك ولا شيء .. وتنوي على بيعتها لأن الناس نايمين وانت تقطع البران تبحث عنها


هذا ما احببت ان اقوله

والله اعلم

[باحث خفايا]

^^^^
باحث خفاايا.. بيض الله وجهك عز الله انك قلت الصدق

المشكله تتعب على الحلال في الصيف والشتاء وتلقى هنا من يسبك لاحول ولاقوة الا بالله

واتمنى التوفيق للجميع وان يبعد عنا الغلا.



ووجهك ابيض يا الغالي


المشكله ان اخواننا في الله لا يعرفون قيمة التعب والله لو ما نصبر حنا عليها ما تلقا اللي يصبر على الغنم خاصة في الوقت الحالي



يكفي انها تجيب الضغط والسكري والربو .. وضربات الشمس


واللي يده بالماء ماهو مثل اللي يد في النار


تمنياتي للجميع بالتوفيق والسداد

[بيضا القاع]

اخوي باحث خفايا والله اني اعرف معاناتك انا الحلال ليس مجرد هوايه او تربيه من اجدادي انا بالتسعينات قدر الله علينا بضروف عصيبه والله اخبر ان يمر يوم كامل بدون ما ناكل ويمر شهر بدون ما نذوق اللحم لاكن الوالد حفضه الله ما كان عنده الي الحلال يبيع ويشري فيه لاين ما تعدلت احوالنا

وكمربي وصاحب حلال انا اقول ان حنا في قطر الشعير 16 ريال ابو 40 كيلو تقول رخيص لاكن الرودس والجت الي عندكم ب 10 و 11 عندنا امس بالسوق وصلت 50 وشهريا لازم نصرف 200 حبه يعني 10000 ريال + 100 حبيه شعير يعني 1600 ريال + شوار 1000 كله 12600 ومع مصاريف الرعيان 900 للواحد بيطلع 14000 مع الادويه ومصاريف السيارات والملح والبنزين وغير تعبك بالحر ناس تحت المكيف وانت تروش علي البهم ماء لا تموت وبشتاء ايام المطر الناس تسامر على الدفاء وانت فوق الطبيله طق الطربال والهوء يذري عليك يعني كله يطلع بحدود ال 20000 زين انت تنتضر 4 شهور دفاع و4 او 5 للتيس يطلع 9 اشهر 9ضرب 20000 بيطلع 180000 وانت تبيع التيس ب500 ريال واذا سمين نقول 600 خلاص نحسب على 600 واحنا عندنا 200 تيس بيطلع 120000 ناهيك عن الي يموت والهزيل وادويتها ومصاريف يعني تكون خسران 60000 الف ريال
وفي الاخير يضحك الشريطي السوداني يروح يبيع ويكسب فيها وهو ما خسر شي ويجيون يحطون الذنب علينا يقولون انتم مغلين الاسعار هو بكيفنا نغليها

[يالاقي خير]

ياجماعة الخير



انا عيال عمي من تجار الحلال ماشاء الله عليهم
تدرون يقولون لي ادخل وخذ اللي تبي من الحلال على 500 لي انا مهو لأي احد
قلت ياولد انتم ترخصون الحلال ولا جبتو راس المال والحلال غالي
قالوا هذا سعره اصلا وهم يبيعون الناس على كيفهم
هذا وش معناه يعني انه فيه تلاعب وراعي الحلال مثل راعي الشعير كلهم سوا
وش ذنب الضعوف والمساكين




وانت صادق اخوي الله يعزك خل عنك الناس الجشعه هذي
وباحث خفايا يقولي يصرف دم قلبه ومدري وش

عيال عمك ويبون يبرون بك بـ 500 ريال والله يخليكم لبعض
لكن
هذي 550 ريال والشحن علي قل لعيال عمك يبيعونن 100 راس
وش قلت ؟

;)

[راع القنص]

يعطيك العافيه ياباحث خفايا والله إنك صادق