مبتدئ في الحداق

[بسيط]

ياشباب، أنا مبتدئ في الحداق وجربت عدة مرات في الدمام و منيفه و رأس الزور. ولله الحمد توفقت في بعض الطلعات وهذا شجعني أكثر في هذه الرياضة الممتعة. بس الي لاحظته أن الصيد على السيف يتأثر كثير بالمد والجزر ومنطقة الحداق.

عندي بعض الأسئلة وأرجو من إخواني المساعدة:

1- هل شراء قارب يجعل فرصة الصيد أفضل؟
2- هل استخدام القارب يقلل الاعتماد على المد و الجزر؟
3- هل استخدام الفش فايندر( Fishfinder) يجدي في منطقة الدمام؟
4- إذا كانت ميزانيتي 15-20 ألف ، ماذا تنصحون بشرائه لمنطقة الدمام؟


ارجوا أن لا أكون كثرت عليكم بالأسئلة في أول مشاركة لي.


أخوكم البسيط


هذه نتاج تجربة الصيد قبل اسبوع في راس الزور
http://www.mekshat.com/pix/upload/images9/mk16502_fish01.jpg

[hadag3]

السلام عليكم ورحمة الله وبركاتة
انا اقدر اجاوبك علي الاسئلة بحكم تجربتي بحداق الاسياف وداخل البحر واقولك اول شي انا من الكويت وانا ما اعرف اشلون اتنزلون الطراريد من الدمام هل عن طريق المسنات او النوادي البحرية وهل هية برسوم ام مجانا المهم الطراد له اكيد ميزة عن حداق السيف وانا الربع بالكويت دائما يزورونكم زيارة حداق بالسفانية او المشرحات ويستعملون طراد المنيوم 12 قدم مع ماكينة 15 حصان وينزلونه بالبحر شخصين فقط لخفة وزنه بس هذا الطراد يتسع لشخصين هذا الطراد يصلح يعني اتنزلة من الاسياف علي طول من غير نادي او مسنه بس عليك تنطر الماية اخر السجي او بعد السجي بساعة تقريبا وتحدق لغاية نصف السجي الثاني يعني راح تقعد تقريبا 8 ساعات بالبحر بس عندكم تسوي القعدة عشان الصيد حلالي وتقعد لي السجي الثاني علي شان تكون الماية فوق وتقدر اتصعد الطراد وتكون انت ابقعدتك هذي صدت وقفتين للماية وقفة الثبر والسجي وصدت الثبر كله يعني احسن وقت للصيد . ودير بالك علي روحك اذا انت غشيم بمجري البحر راح تتاذي لان علي ما اعتقد وسمعت من الربع ان في ارقوق واجد عندكم يعني صخور كبيرة وكثيرة تطلع عندما تثبر ( تروح ) الماية اسئل اهل الخبرة بالمنطقة عن كيفية ان تتحاشي هذي الاماكن وركب بلاد 0 جهاز قياس العمق

[hadag3]

انشاءالله الربع ما يقصرون وياك

[بسيط]

شكرا اخوي هداج على هذه الإجابة السريعة والمفيدة.

انا سمعت من بعض لإخوان ان الطراد الصغير متعب في البحر وبعض الناس ينصحوا ب 18 - 24 قدم.

اشكرك اخي على المساعدة وارجو من اخواني المساعدة في الرد على بقية الأسئلة

أخوكم البسيط

[SRDAL]

السلام عليكم ورحمة الله وبركاته

حياك الله اخوي بسيط .

شوف اخوي انا بقولك نصيحه اذا انت اول مره تشتري فيها طراد وتبي تبحر من بحر الدمام حاول تشتري

طراد لايقل حجمه عن 18 قدم وحاول انه يكون نضيف حتى لو سعره غالي شوي البحر مايبيله خربطه .

ويفضل انه يكون عندك جي بي اس وفيش فايندر علشان تخزن مواقع الصيد عندك وتعرف نوع القوع الي انت

تحدقه .

وعلى فكره حتى حداق الطراد يعتمد على المايه سقي ولاثبر .

وبالتوفيق انشاء الله .

تحياتي لك .

srdal

[gulfhunter]

السلام عليكم ورحمة الله وبركاته

حياك الله أخوي بسيط ....... ماشاء الله الشباب ماقصرو عطوك اللي تبي......... وهذي تكمله .....

1. طبعاً فرصة شرائك للقارب يعطيك فرصه اكبر للصيد ....... لأن اماكن الحداق تكثر.... وتنوع طرق الصيد

2. شوف تأثير المد والجزر مهم للحداق سواءً على السيف او داخل البحر ........ لأن كثير من الناس يفكر ان داخل البحر مايتأثر بحركة المد والجزر...........

3. نعم مهم وجود الفشفايندر ... لمعرفة القوعه اللي تنوي تصيد فيها

4. ممكن تكون كافيه وممكن لا...........يعتمد عليك ......... وزي ماذكرلك اخوي ابونواف (سردال) انك لا تاخذ اقل من 18 ....ويفضل 22 هامور ...... وانتبه للمكينه اهم شي تكون ممتازه ولاتغامر في شي هذا بحر.........

واتمنى اني قدرت اعطيك ولو شي بسيط من اللي تبيه....


ارجوا أن لا أكون كثرت عليكم بالأسئلة في أول مشاركة لي.

ابداً خذ راحت وانت تامر

[قاصد خير]

اخوي سمعت المثل الي يقول

ايش لك في البحر واهواله ورزق الله على السيف

واذا حبيت تروح البحر لازم معاك واحد خبره تتعلم منه

والله يوفقك

[بسيط]

اشكركم اخواني سردال و جلفهنتر على هذي المساعدة القيمة والإجابة الوافيه.

كرمكم في المساعده شجعني على الإستفادة من خبرتكم و طرح مزيد من الأسئله:

1- قبل ان احصل على رخصة هل احتاج تدريب؟
2- وهل هناك مراكز تدريب في الدمام؟
3- وين محلات بيع الطرادات؟

شكرا لكم يا شباب واتمنى يجي اليوم الي استطيع فيه مساعدة الآخرين في هذا المنتدى الطيب.

بسيط

[راعي حداق]

السلام عليكم ورحمة الله وبركاته
الاخ بسيط انا رايي ان تطلع مع جماعه عندهم طراد وتروح معهم مره وثنتين وثلاث .
منها انك توسع صدرك وتستانس بالحداق معهم ومنها تكتسب بعض الخبره وستجد الاجوبه على جميع استفساراتك
تلقائيا .
ولا يهونون عمالقة الحداق (سردال . جولف هنتر . وحداق 3 )
لاكن انا هذا رايي

[hadag3]

صحيح كلام راعي حداق 100% لان دخول البحر شي مو عادي بتاتا ولا شيء يدرس بالكتب فقط بل يحتاج الي التعليم الفعلي والعملي وهذا الشي ما يتحقق الا بالخروج الي البحر بالطراد مع اهل الخبرة وتشوف اشلون يتعاملون مع فن الملاحة بركوب الطراد وعليك ان تتعلم

1 . المعرفة في الاحوال الجوية ومدي حجم الموج بالبحر وحالة البحر والممرات البحرية
2 . معرفة كيفية استعمال الطراد بالموج يعني اباي موجه تهدي السرعة وباي موجة تسرع بالطراد وكيفية اتزان الطراد[b].
3 . التعرف علي اجزاء المكينة الرئيسية وكيف تعمل وماهي الاعطال الشائعة للمكينة مثل اتساخ فلتر البانزين+ أرتفاع حرارة
المكينة + تنظيف البلاكات + تغيير فيوزات المكينة ......الخ
4 . كيف تستعمل الباورة أو السن ( الخطاف ) في البحر .
5 . ماذا تاخذ من عدة تصليح وعدة انقاذ وادوية .
6 . ماهي الاغراض التي يحتاجها الطراد للملاحة ( الليت + النزافة + النوخذة + البلاد ( جهاز قياس الاعماق ) الخ
ولو اشرح لك بالتفصيل تقول اخوي حداق3 ما يحب يخليني اطلع البحر بالطراد وكاني قاعد اخوفك من البحر بس لو تطلع مع اهل
الخبرة بالبحر لمدة عشر طلعات تلقي الامور سهلة وراح اتعرف فن ركوب الطراد بنسبة تقريبا 60% والباقي عليك انت وشطارتك

[بسيط]

الأخ حداق 3 و الأخ رعي حداق،

اشكركم شكر جزيل على هذه النصيحة ،

ما اخفي عيكم اني صرت اخاف شوي من البحر الآن ومانا مشتري طراد حتى اجرب دخول البحر مع اشخاص اصحاب خبره و تجربه.

لكم و لجميع الإخوان جزيل الشكر.

بسيط

[hadag3]

اخوي بسيط من خاف سلم ......

[graywhiteshar]

مرحبا بك اخوي بسيط ونورت منتدانا الرائع
على فكره البحر ما يخوف بس يبي لك تتعامل معاه بحذر وتكون مستعد له مو اكثر وبالنسبه للطراد الشباب ما خلو شي ينقال كفو ووفو بس انا بنصحك بالنسبه للمكينه خذ فور ستروك احسن واعطالها اقل وصفيتها للبنزين اقل
واتمنى لك التوفيق

[بسيط]

شكرا لك اخوي graywhiteshar على هذا التحية الطيبه
وانا اشهد ان النواخذه مثلك وشرواك منورين المنتدى و انا جاي استفيد واتعلم منكم.

بسيط

[عذاب السيف]

اخواني النواخذه ودي اطلع البحر مع ذوالخبره ومعرفة مواقع الصيد وتكون اطلعه على احسابي انا عندي طراد بس المواق الي في الخبر مااعرفه من فتره وانا ابحث عن شخص وفي وصادق ( وانا شاكر لكل محبين الحداق ) (( اخوكم سامي ))