سمكة سامة

[النوخذة]

السلام عليكم ورحمة الله وبركاته
هاذي صور لرحلة قديمة شوي بس حبييت انزلها للفايدة
قبل اسبوعين كنا في رحلة لشاطئ ارامكو في القرية وماكان االغرض من الرحلة الصيد
لاكن مادمنا رايحين اكيد بنشيل العدة
طبعا كنت انا مع MARINE والصيد كان قليل مرة سواءا غوص او حداق
في الحداق ماجات معنا الا ظلعتين اما الغوص كان فيه ثلاث حبات شعوم
الجزء المهم من السالفة اني يوم اني صغير بالسن(تقريبا تسع سنوات) اذكر اني انقرصت من السمكة اللي بالصورة
وكان حجمها مايتعدى 2سم لاكنها ورمت يدي صح
انا الى الان ماعرف السمكة هاذي وكل اللي اعرفه انها غالبا تصير في مجموعات وتلقاهم يدورون على بعض بشكل مرة رهيب وهي ماتكابر , اكبر شئ شفته يتعدى الكف بشئ بسيط وراسها يشبه راس الشم
انا ابغى اي واحد يعرف اي معلومة عن هالسمكة (لو قد السفطة)يعلمنا عنها
اليكم الصور


هذا يوسف اخو مارين كاشخ بالظلعة ( اصبر لين يكبر ويفقع وجهي علشان صورته بظلعة :D )
http://www.mekshat.com/pix/upload/images9/mk5291_yossef.jpg
الله يخليه لأهله

وهاذي هي السمكة المعنية
http://www.mekshat.com/pix/upload/images9/mk5291_fish.jpg
معليش الصورة مش واضحة لاكن هذا اللي قدرت عليه

وهاذي السمكة نفسها مقارنة بحجم العريضي
http://www.mekshat.com/pix/upload/images9/mk5291_said.jpg

في انتظار الردود

[riffe]

هذى السمجه اسمها فى الامارات عقام وهيه سامه ولها شووك مثل الجم وهيه تمشى اكثر شى مجموعات وتسكن فى الخيران وانا شفت كم نووع وهيه اكل مفضل لطيور اللوه ( نفس البط اسود ) اكيد الكل يعرفه واذا شفت اللوه يغوص فى مكان اعرف انه موجود اميه بلميه وهيه تعيش على الحول( الرمل ) وهذا كل اللى عندى ينوخذه ونشا ءالله يكون كلامى صح

[( برى بحرى)]

هذا اسمه بالكويت (عى )

يوجد له ثلاث شوكات مثل الجم وحده بالظهر وثنتين بالجانب

وسلامتك يا الغالى

[SRDAL]

السلام عليكم ورحمة الله وبركاته

حياك الله اخوي بوعتيق .

كيف اصبحت اليوم وكيف كان الطريق معاك بهالحر .

اول شي سلامتك وماتشوف شر مع ان توقعاتي تقول انها هي الي تعورت مو انت :D .

هاذي ياطويل العمر يسمونها عندنا بعد العي زي مايسمونها اخوانا في الكويت .

واكثر الناس الي ينلدغون منها اهل الربيان خاصه لم يطلعون الكوفه من البحر تكون موجوده داخل الكوفه و البحار

مومنتبه لها ويقوم يحط يده على الكوفه علشان يرفعها من البحر علشان ينزلها داخل الطراد او البانوش زتقوم

تلدغه .

اتمنى اني قدرت اوصل المعلومه بالشكل السليم .

تحياتي لك يابوعتيق .

srdal

[النوخذة]

السلام عليكم ورحمة الله وبركاته
اشكر الجميع على المرور والتعقيب
كلامك مظبوط اخوي riffe انا دايما اشوفها مجموعات وان شاء الله باصورها وهي تسبح علشان تشوف ابداع الخالق في خلقه
اخوي بري بحري ماشاء الله عليك قاعد تعد الشوك بالسمك :D
شكرا للمرور
جاء دورك ياسردال
اولا الله يسلمك من كل شر وبعدين ذاك اليوم الحر قشر وجهي
اخيرا مين تتوقع تعور :rolleyes: ؟؟ ابغى اجابة دقيقة لأن اهدافي زايدة هاليومين:D
عموما شكرا للجميع على التعقيب وماشاء الله عليك اخوي سردال عندك شهادة دكتوراه في الصيد البحري وانا كنت احسبك تغوص بس , الله يوفقك ان شاء
فيه شئ ابغى اعرفه هل لدغة العي مضرة الى درجة كبيرة ؟؟

[SRDAL]

السلام عليكم ورحمة الله وبركاته

حياك الله اخوي بوعتيق .

انا متأكد انها هي الى تعورت العي .

وترا اهدافك اعرف انها ماتضرني اتضر غيري ماتضرني لأنه مايدعيك قلبك تضر خويك في الطريق . واحد عيار .

واحد حسب ما اعرف ان لدغة العي مؤلمه مره مره بس انها موضره ماتوقع .

تحياتي لك .

srdal

[النوخذة]

السلام عليكم ورحمة الله وبركاته
مسكتني من الجنب اللي يعورني اخوي سردال
انا انصبغ بسرعة واصدق روحي ;)
انا اقول احسن طريقة علشان نعرف كان سمها قوي او لا , نصيد وحده ونحطها في سطل مع شوي ماي
ونطير فيها المستشفى واول مانوصل وقبل ماتموت السمكة نرقعها في يد اقرب متطوع ( مثلا MARINE )
وان كان حسينا انه راح فيها وجسمه قبع , ندخله المستشفى , اما اذا كانت الدعوة مجرد انتفاخات , ذيك الساعة نخلي MARINE يدبسها فينا (يعني ينتقم ) :D
فيه سؤال من جديد : وش هي الفريالة ؟؟
انا عندي معلومات بسيطة جدا لاكن ابغى اشوف اللي عندكم
:D تراني امزح يامارين :D

[alkuwaity]

مساكم الله بالخير جميعا ................ والله اعلم ..... السمكة هذى فيها شبة من الفريال(كما نسمية بالكويت ) بس فيها شوية فروقات بالزعانف والفم ..... وسلامتكم .

[MARINE]

السلام عليكم ورحمة الله وبركاته

حياك الله اخوي ابوعتيق كيف الصحة

الظاهر اني بصير حقل تجارب وانا مادري :mad:

بعدين انا ويش دخلني تجرب فيني ياخي عندك اللي كسر الباب برجله :D

وانا خلني بعيد لاتدخلني في السالفه :D تحياتي لك

ترى نمزح ok

MARINE

[رسلان]

الله يعطيكم العافية على الموضوع والمعلومات المفيدة ...
شكرا لكم ...

[النوخذة]

السلام عليكم ورحمة الله وبركاته
الاخوان رسلان , الكويتي ,MARINE شكرا على التعقيب
اخوي الكويتي انا كل اللي اعرفه عن الفريالة انها سامة جدا وان سمها يؤثر في الاعصاب وانا مش متأكد من المعلومات اللي عندي وياريت اذا تقدر تجيب صورتها, لاني دايما اسمع فيها بس اني ماشفتها مشكور
MARINE والله شكلي غيرت رأيي بخصوص غرز السمكة في جسمك ومشكور لانك نبهتني على الشخص المناسب ماشاء الله عليه ثلم زاوية الباب ولاحتى قال اااححححح :j

[Keynes]

مشكور اخوي النوخذة على المعلومات المفيدة ..
لا تلمس او تمسك ما تجهله فقد يكون خطرا...
شوفوا هالموضوع قصتي مع لدغة السمكه السامه (http://mekshat.com/vb/showthread.php?t=14099)

[gulfhunter]

السلام عليكم ورحمة الله وبركاته

حياك الله أخوي ابوعتيق .......... ماشاء الله الشباب ماقصرو ..... لكن انتبه يابوعتيق على نفسكhttp://www.asmilies.com/smiliespic/crazy/038.gif ................... وشوي شوي على خوينا............ بس ليش ابوخالد حقل تجارب http://www.asmilies.com/smiliespic/psmilie/024.gif.......

والله يعطيك العافيه

[مشتاق البحر]

السلام عليكم ورحمة الله وبركاته

اكثر من مره اشوف هذه السمكه ان لم اكن غلطان انها هي ,,تعمل حركات غريبه على سطح الماء وتتظاهر انها ميته :rolleyes: .. وفي واحد من اصحابي كان يحاول يمسكها على شان يعملها طعم :D لكن الحمد لله ما قدر يمسكها ..

شكر لك ياخي النوخذه على طرح هذا الموضوع الذي من خلاله تعرفنا على هذه السمكه :good:

[النوخذة]

السلام عليكم ورحمة الله وبركاته
Keynes
مشكور على وضع العنوان (قصتي مع لدغة السمكه السامه ) وانا اتمنى لو كان ابو راشد يقرأ الموضوع يعطينا رايه بحكم انه تصوب
انصح الجميع بالمرور على الرابط اللي حطه الاخ Keynes

gulfhunter
خويك في الحفظ والصون مشرفنا ابو عبد الله, وترا حتا حنا مانقدر فيه
اما ابو خالد , وبحكم الميانة فأنا رشحته علشان يمثلنا في هالتجربة لاكنه جزاه الله خير رشح ابو نواف وانا اشوف ابو نواف رجال ونعم ولاتهونون لاكن نبغى رأيه أول ;)

مشتاق البحر
الحمد لله على السلامة وان شاء الله المرة الجاية ماتقربون شغلات ماتعرفونها

[gamal]

هذه السمكة فى مصر تسمى شلباية والله عز وجل جعل لها ثلاث شوكات للدفاع عن نفسها واول شىء تفعله اول مايد تلمسها تلدغ على طول وتكون هذه اللدغة شديدة الالم جدا ويوجد منها اكبر من هذه وانى اتلدغت منها وهى ليست سامة ولكنها تسبب الم شديد جدا

[بو راشـد]

السلام عليكم ورحمة الله وبركاته
سلامي الى كل الأخوة وأخص بلذكر أخوي النوخذة واقول له مثل ماقالوا الأخوة هذي السمكة تسمى بسمكة العي وتكون دائما في جماعات وهي سمكة سامة ولاكن خطورتها لاتكون مثل سمكة الديك أو الفريالة مجرد ألم ومن ثم يزول أنشاء الله ولاكن دائما انصح بذهاب للطبيب في مثل هذه الحالات لكي لاتصبح مضاعفات وانشاء الله محد اصيرلة هل موقف. انا انصح بزيارت الموضوع الذي كتبته عن لدغات الأسماك ولقد وضعت فيه موقع لأسماك الخليج ويوجد فيه صورة الفريالة التي سألت عنها في صفحه 8 وجليب الدو ألي سأل عنها بعض الأخوة وتوجد في الصفحة 10 .
وتمنياتي للجميع بلسلامة والعافية

[وعر]

السلام عليكم ورحمة الله وبركاته

اخوي النوخذه اسمحلي افيدك بمعلوماتي المتواضعه عن اسئلتك

بالنسنه للسمكه الاولى احنا في قطر نسميها عي وهي تتواجد في المياه الساحليه الضحله ولها اربع ازواج من اللوامس (الشوارب) واشواكها موجوده في الزعنفه الظهريه الاولى والزعنفه الصدريه , يصل طولها الى 30 سم ويجب الحذر عند اصطيادها لان اشواكها تؤدي الى جروح مؤلمه خطيره وسامه

اما بانسبه للفرياله

فهي بطيئه الحركه تنتشر في المياه الضحله ودايما تلقاها متخفيه بين الفشوت هي تعتبر من اخطر اسماك العالم السامه على الاطلاق ويمكن لاشواكها السامه (في نوعين من انواعها) قتل الانسان ويجب التعامل معها بحذر
اما باقي الانواع فهي تحدث جروح مؤلمه وخطيره وفي كل الحالات يجب الاسراع لاقرب مستشفى


واسمحو لي على الاطاله

واتمنى انكم تستفيدون

وتقبلو تحياتي

[حاقد على لخمه]

يعطيك العافيه اخوى النوخذه هذى السمك الى تتكلم عنها نسميها فى الدوحه داب البحر وتتواجد بكثر فى المنطق الجنوبيه من قطر (دخان _راس جمل _ بروق .............)

[سعيد 1412]

أتمنى ما أكون بالمستشفى في هذا اليوم ؟؟ لكن أتمنى أسماء و صور السمك السام