شي غريب !! طرمبة الجمس بعد الفك ، وقبل التركيب .

[ملوسن]

السلام عليكم ورحمة الله وبركاته ..


حي الله جميع الزوار والأعضاء والمشرفين ..


.
.
.
.

اليوم الظهر ( لاحظ - رمضان ويوم جمعة ، وبعد صلاة الجمعة ) ..

مسّكت معي أفك تانكي البنزين حق الجمس 2004 ، لأن فيه مشكلة خروج الهواء الكثير إللي يوقف لي محطات التعبئة ويأخذ وقت كبير في التعبئة ..

المهم نزلت التانكي في البيت ، وفكيت الطرمبة ، ولاحظت أنها جايها فك قبلي (مع إن الموتر مع الوالد من وكالته ! ) آثار فك وليست آثار تركيب ، وإللي جرب يفك الطرمبة يعرف قصدي بالضبط ..

ويوم طلعت الطرمبة إلا شكلها غير شكل الطرمبات الموجودة في مواضيع الأخوان هنا ، وعليها بخة بوية سوداء !

ملاتلاحظون إني راعي طويلة ؟

لاحظ الصورة :

http://www.arabiclenses.com/uploaded/7918_1282928980.jpg


فلتر الطرمبة داخلي ، ولو تلاحظ ، فيه جرمين داخل الطرمبة ، واحد منهم راكب فيه فلتر من تحت ..



الزبدة وش تتوقعون جايه ، مفكوكة قبلنا ؟

ولو بغيت أغيرها بطرمبة فكسار ، وش المطلوب بالضبط ؟

الله لايحرمنا من هالوجيه الطيبة - قولوا آمين ..

[سوبر VTC]

غالبا السبب انسداد لي خروج الهواء اثناء التعبئة
او
يوجد باب او رداد عليه سبرنق يكون معلق و مايفتح
و بالتالي يطلع البنزين برا

اما اثار الفك فاين هي ؟ هل هي على الافياش الذكر و الانثى
اما على اطار الطرمبة

[ملوسن]

هلا والله وغلا بمشرفنا العزيز ..



بالنسبة للي حق الهواء ، قد فكيته قبل ونظفته ومافيه فايدة ، بس لاحظت أنه أثناء التعبئة البنزين يطلع برا ، وهذا اللي خلاني أشك في السبرنق إللي تقول عنه ، ( أقصد السبرنق إللي في التانكي مهوب إلي في فتحة التعبئة ) بس ما لاحظت عليه إنه معلق أو شي بالعكس يفتح معي بكل سلاسة وأشوف داخله فتحة على تحت حقت دخول البنزين .



والمشكلة ماعرفت أفك السبرنق ، وأظنه ماينفك لأنه مكبوس كبس حراري والله أعلم ..

بالنسبة لآثار الفك ، صدقت والله حصلتها على الإطار إللي يكبس الطرمبة ، على ماذا يدل؟

بالمناسبة إذا تحتاج صور لأي شي من موقع الحدث ، لايهمك ،، أخبرك ماتقصر مع الشباب وقد تحتاج صور للتوضيح ، تستخدمها في مواضيعك ومشاركاتك لإفادة الأعضاء

تسلم على ردك الكريم ، والله يجزاك الخير

[ملوسن]

للرفع بارك الله فيكم ..

[ملوسن]

فور آب ,,

فور آب ,,

[قصيمي شمالي]

بسم الله الرحمن الرحيم

اذا بغيت تغير طرمبة البنزين يبيلك فيش طرمبة vxr عشان نفس الفيش مايركب

بس تبي شوري لا تركب حقت vxr لاني توي مغيره وصار الجمس ما يشتغل من اول دقه اذا كان محتمي وسألت الشباب يارب احد يعطين وجه ولا احد رد

[ملوسن]

والله أنا لاحظت إن فيه ناس تشتكي من هالمشكلة بالتحديد ، وأيضاً مشكلة طفية السيارة إذا ضغطت فرامل بقوة والتانكي فيه أقل من الربع ..

إذا كان هالكلام صحيح ، على كذا أفكر ألف مرة قبل لا أغيرها ، خصوصاً أنها ماتعاني من أي مشكلة ولله الحمد ..

جزاك الله خير على التنبيه ..

[abu_sultan]

ماشاء الله عليك فكيتها وزنلتها


الله يقدم لك الخير

[بنزرت]

نفس المشكله كانت عندي (خروج الهواء عند تعبئه البنزين ) وعمليه التعبئه تاخذ وقت
ببساطه انا غيرت غطاء التانكي وضبط معي
ثم صار مره ثانيه وغيرته وضبط معي
على فكره غطاء الموديل 2004 وطالع مافيه سنه مجرد كبس وربع دوره بس

[hp2005]

ياخوي لا تغير الطرمبة
ليش تغيرها وهي شغالة مضبوط
ويكون في علمك مشاكل طرمبة الجمس في موديل 2000و2001و2002
اما 2003 وانت طالع ماعليها مشاكل

هل في كل المحطات تتأخر في التعبية لان بعض الاحيان تكون من يد مكينة المحطة
وهل تعبي التانكي عند وصول الربع ولا غير ذلك

[ملوسن]

أبو سلطان ..

آمين وإياك يالغالي ..

[ملوسن]

بنزرت ..

والله غريبة المشكلة من الغطاء ..

لأن المشكلة ماتكون موجودة إلا إذا فكيت الغطاء علشان أعبي ..

عموماً بأجرب وأشوف ، وإن شاء الله إن المشكلة منها بس ..

وتسلم على طلتك الرائعة ..

[ملوسن]

hp2005

هلا بك .

أنا منيب مغير الطرمبة ..

بس فكيتها على الطريق يوم نزلت التانكي ، قلت خل نشوف وش علم هالطرمبة ، ولا الحمد لله ماتشكي من شي ..

مشكلة التعبئة في كل المحطات ، والتانكي مايعبأ إلا إذا ولعت اللمبة ( للأسف ) ..

شاكر لك تواجدك الرائع ..

[بنزرت]

المشكله مو لما تفتح الغطاء عشان تعبي ....المشكله صايره من اول ... قبل ما تفتح الغطياء
عموما الغطاء موجود عند التقوى اذكر قيمته من 45 الى 65 بس لما تركب الغطاء الجديد لازم تمشئ بالسياره على الاقل 30 كيلو قبل ما تحاول تعبي
موفق اخوي

[ملوسن]

جزاك الله خير ..

بإذن الله أطبق الموتر باتسر ، وطوالي على الصناعية ، أطق لي غطا جديد ..

بس هاه ، ترى إذا ماضبط ، عليك الحساب ..

أمزح ,,

الله يبارك فيك ويخليك لعين ترجيك ..

[الدوسري دت كم]

ياملوسن شكله اسم على مسمى . تقبل مروري بدون زعل
السلام عليكم ..
الموترحقك مكينته 6 لترصح يعني يا انه صالون كفراته 8 مسامير اوانه ونيت حجم 25 صح؟؟؟
من شكل الطرمبه واضح هالشي .
ترا هالسياره مافيهافلترخارجي صح ؟
لازم تعودنفسك على انك تعبي بنزين يوم يبداينتصف التانكي عشان تبقى الطرمبه دايم مغرقه بالبنزين ,
ثاني شي لازم تعودنفسك تطفي السياره يوم تجي تعبي بنزين عشان البنزين الي بالمحطه تختلف درجة حرارته عن الي بالتانكي عندك يسبب خلل في الطرمبه اثناء دورانها.
ثالث شي الطمرمبه الي عندافضل طرمبه بنزين عندالجنرال موتراهنيك .
رابع شي فيه شي بجانب التانكي اسمه (كونسستر) هذايسبب المشكله الي انت تقول في المحطه يعني يخلي الي حق المحطه يقفل كل شوي كن التانكي مليان هوا. بعدتلقاك اذاجيت من مشوارلوقريب تحصل ريحة البنزين فايحه خصوصا من الجهه الخلفيه .( هوعباره عن فحم حجري زي قربة ماء المساحات )
ارجوانهاوصلت الفكره والله اعلم واحكم والسلام...

[alwssam6]

جزاك الله خير موضوع جميل للنقاش

[مغلي]

بسم الله الرحمن الرحيم

اذا بغيت تغير طرمبة البنزين يبيلك فيش طرمبة vxr عشان نفس الفيش مايركب

بس تبي شوري لا تركب حقت vxr لاني توي مغيره وصار الجمس ما يشتغل من اول دقه اذا كان محتمي وسألت الشباب يارب احد يعطين وجه ولا احد رد



طرمبة الفكسار علاج ممتاز للجموس

بس ماهو كل فني يضبط تركيبها 100%

اذا انت بالرياض

مر على الباكستاني الدكتور رشيد بمدخل معارض الشفا :good2::good2::good2:

[ملوسن]

أبشركم ,,

صلح الموتر ، وطلعت المشكلة زي ما قال الأخ الكريم ( بنزرت) ..


جزاه الله خير ..

وسعر الغطاء أبو سنة بـ 40 ريال ، وأبو ربع لفة ( بدون سنة ) بـ 55 ريال من عند التقوى ..

[تناهيت]

أبشركم ,,

صلح الموتر ، وطلعت المشكلة زي ما قال الأخ الكريم ( بنزرت) ..


جزاه الله خير ..

وسعر الغطاء أبو سنة بـ 40 ريال ، وأبو ربع لفة ( بدون سنة ) بـ 55 ريال من عند التقوى ..


الحمد لله على ونا اخوك تيسرت امورك

لاكن وش معنى بيزرت وش سالفته ووين موقعه وياليت صورة للفائده بارك الله فيك