** البرطام **

[SRDAL]

السلام عليكم ورحمة الله وبركاته

اخواني نواخذة الخيمه البحريه .

اليوم حاب اطرح موضوع عن سمكة البرطام هذا النوع من السمك الى تقريباً شبه انقرض واتكلم عن البرطام

بأحجامه الكبيره وليس السبيتي وعن اسباب اختفائه وقلة صيده .

يعني لم الشباب في الخيمه او على الأسياف او حتى اهل القوارب تلقى الواحد فيهم يقول انه صايد هوامير او الكنعد

او السبيطي او الشعري او الشعم او او او ... ونادر الي تلقاه رايح لصيد البرطام او الي يقول انه صايد برطام .

يعني لما تجلس مع نواخذة الأول الشياب الله يطول بعمرهم تلقا الواحد فيهم يقول انه لم يقعد في المحدق اول تلقاه

يصيد الشعري والهامور والبرطام كله من نفس المحدق وبكميات واحجام لايستهان بها .

ودي اطرح عليكم اليوم تساؤل عن سبب انقراض هذه السمكه .

وودنا نشوف ردود نواخذتنا العمالقه في هذه الخيمه .

تحياتي للجميع .

srdal

[gulfhunter]

السلام عليكم ورحمة الله وبركاته

حياك الله أخوي ابونواف....... اقول مبدع وان دل .... فأنما يدل على انك نوخذه كبير بعد أذن اخوي ابوعتيق......

أنا معاك في الموضوع .......... البرطام صار عندنا الحداقه نادر ولو اقولك ان اخر كم سنه ماصدنا الأ كم وحده .......... وبالنسبه إلى الصيادين والله يطلعون منها بالقراقير .........اما اخوياك ابداً قطين بماي حلو.......

أنا اتوقع ان المشكله تكمن في تكاثرها ....... يعني بطيئ نوع ما...... لايقارن بالأسماك الأخره.......

وبعدين يمكن مايغريها اي شي إذا ماتجيب محاياه (صافي) او (قبقب) ولا ماتضرب..... دلع

والله يجزاك خير

[النوخذة الأحسائي]

أولا /أشكرك أخي سردال عالموضوع الذي سيعطينا معلومات جديده .. وكذلك مشرفنا العزيز

ثانيا/ أنا أسمع عن البرطام ولا شفته أبد بالشكل الواضح اللي ينصاد عندما فلو تعطونا صورة ياجماعة عشان نستفيد لأني ضعت في الطوشة مثل مايقولون ..

سابعا :(:) / هل نصيده على السيف وهل له أسماء أخرى عندنا في الخليج لأني ماسمعته إلا في المنتديات فقط..

وشكرا
أبو فهد

[MARINE]

السلام عليكم ورحمة الله وبركاته

هذه صورة للبرطام للي مايعرفه

http://www.mekshat.com/pix/upload/images9/mk9190_231.jpg

اولا اشكرك اخوي ابونواف على طرح هذا الموضوع المهم

ثانيا اعتقد ان قلة صيده بسبب المنطقه اللتي يتواجد فيها يعني البرطام يتواجد عند المرجان اكثر من غيره

وقلة الصيد اتوقع بسبب قلة التزاوج والتكاثر بطيئ او انه مجرد ما يفقس من البيض يكون فريسه سهلة

للاسماك الاخرى ، انا ما شفته الا في جزيرة جنا والنوخذة ابوعتيق شافه في جزيرة كران

والصيد الجائر سبب في قلة صيده حتى في سوق السمك نادرا ماتشوفه ليش الله اعلم

هذا اللي عندي واقدر افيدكم فيه

مع تحياتي وخالص احترامي

MARINE

[hadag3]

والله هم احنا بالكويت نعاني من نفس المشكلة نادر ما نشوف البرطام علما بالثمانينات كانت توجد بأعداد كبيرة وحاليا اعتقد السبب في عدم وجودها كثرة القراقير وباعداد هائلة بواسطة الجنسيات الهندية والسيلانية ولاني كنت اصيد سابقا بالقراقير فاعرف بان البرطام يعشق دخول القرقور .

[Keynes]

موضوع جميل للنقاش ..
استفسار:
هل في مسمى اخر للبرطام

[Abu_Mahmoud]

السلام عليكم ورحمة الله وبركاته

الاخ مارين مشكور على الصورة لتوضيح البرطام حيث سمعت جماعة من قبل يسمونه الهامور الصخري وقد لاحظت كميات جيده منه في بعض شعاب راس تنورة البحريه ولكن بأحجام صغيره غير ذلك فهو متوفر كما تفضلتم في جزيرة جنا

[النوخذة]

السلام عليكم ورحمة الله وبركاته
يابو عبد الله انتم راعيين الاوله وانا ماصرت نوخذة للحين تراني توني فرخ :j
والله بالنسبة لي , انا ما اعرف وش السبب !! لاكن الحداقة القدامى يجمعون على ان السمك قل بشكل كبير وخصوصا عقب ماهد التعبان صدام الزيت في الخليج ايام الازمة
عموما في الجبيل وفي الخفجي و في بعض المناطق انا اشوفه بكميات كبيرة خصوصا في المناطق الممنوعة وهاذي بشرى طيبة لانه ممكن بعد كم سنة الاوضاع تزين بالنسبة لهالسمكة
موضوع مسكت اخوي سردال مشكور على هذا الجهد

[gulfhunter]

السلام عليكم ورحمة الله وبركاته

حياك الله اخوي ابوعتيق....... كل فرخ ومارده ويكبر ...........لكن انت فرخ كبيره........ يمكن فرخ ديناصور http://www.asmilies.com/smiliespic/happy/011.gif

الله يوفقك ويبارك فيك

[النوخذه]

:j 144273]بسم الله الرحمن الرحيم
اخواني الاعزاء ابي اضيف معلومه صغيره لو سمحتوا
البرطام من الاسماك النادره وهي من فصيله الهامور وانا لما كنت اغوص حصلت برطامين
واحد طول الذراع والثاني نص الذراع وكل ما اغوص ما احصل الا نادر
واتوقع انه يتواجد بالبحر الاحمر بكثره لانه السمك الموجود في الخليج العربي موجود بالبحر الاحمر
وزياده
والهامور له اكثر من 28 شكل ولون........ وشكرا
واسفين على الاطاله[/size]

[SRDAL]

السلام عليكم ورحمة الله وبركاته

صبحكم الله بالخير جميعاً

اشكر كل من شارك معنا في هذا الموضوع واعطانا رئيه في قله صيد البرطام .

الأخ المشرف الغالي على قلوبنا اخوي بوعبدالله ومشكور على معلوماتك الطيبه .

الأخ العزيز الحساوي100% تحياتي لك .

الأخ العزيز بوخالد الحبيب واقوله مشكور على التوضيح وماقصرت .

الأخ العزيز hadag3 تحياتي لك .

الأخ العزيز Keynes تحياتي لك .

الأخ العزيز Abu_Mahmoud تحياتي لك .

الأخ العزيز النوخذة بو عتيق صغير بالعمر بس كبير بالخبره والأخلاق الطيبه تحياتي لك .

الأخ العزيز النوخذه تحياتي لك .

والشكر كل الشكر لمن ساهم في احياء هذا الموضوع .

تحياتي للجميع

srdal

[ابو مشك]

السلام عليكم ورحمة الله وبركاته

بالنسبه للبرطام عندنا في الغربيه نقوله كشر ما حصلته بكثره إلا في منطقة الرايس على البحر الأحمر قبل ينبع بحوالي 70 كيلو المنطقه توها الناس عرفتها ولا قبل على السيف ننزل احجام منه كبيره بس الحين ما نطلعه الا بالقوارب وبدأ فعلاً بتناقص و هو من الاسماك المرغوبه بشده لدي ولو تلاحضوا في مواضيعي السابقه اغلب صيدي برطام(كشر) وفي الاخير ما نكب السمك عندنا الا العماله الاجنبية تصيد كل شي ما تخلي لا أخضر ولا يابس كبير صغير كلش تصيده المشكله ان الصغير من السمك يرمونه وهم راجعين في الطريق يا ليتهم استفادوا منه مدري لي متى بيستمر هالحال

[ki ng marlin]

اذا كان الكلام هذا صحيح

انه نادر

فلا يجب على الشباب صيده خاصة في الاماكن التي يندر فيها

واذا لاحظتو ان فيه مكان ناقص ومكان زايد شلو منه شوي وحطوه في الناقص علشان يتكاثر

كيف

نقول والله واحد طالع بطراد الى الجبيل ينزل القراقير ويدهر فيها يطلع مثلا 10 حبات

يحط له بطريقة معينه 6 حبات صغار في مكان ماي علشان ما تموت وهو راد يحطها في المكان الي فيه نقص وانشاء الله تتكاثر برالحتها

[النوخذة الأحسائي]

أشكر الأخ سردال عالموضوع الذي أضاف إلى معلوماتي الشي الكثير وكذلك أبو خالد عالتوضيح والجميع جزاهم الله الجنة ..

وفكرة أخوي ki ng marlin جدا جميلة بس من يفكر كذا ويفعل الفكرة؟؟!!!

تحياتي بو فهد

[Keynes]

هل البرطام نفسه السُوَد

[khald]

السلام عليكم
اشوفها أكثر شئ في القراقير

أما بخصوص سؤال أخوناKeynes
استفسار:
هل في مسمى اخر للبرطام

فعندنا من يسميها هامور خور
وخاصة اذا جاك صغير اتشوف النقط البيضاء
واضحه على جوانبه
كثيراً ما أراه عند الغوص لكن بأحجام صغيرة

موضوع جميل وهادف
جزاكم الله خير