جمس 2005 مجهز للبر

[قناصه]

السلام عليكم ياشباب والعشر مباركة على الجميع ويجعلنا من قوامها وعتقائه من النار فيهن يحول واحد احد:

شباب انا عمري ماشريت جمس مكينه كبيره وتماتيك ولا اعرف اسعارهن ومعي مبلغ فوق الستين بشوي واباصل السبعين

المراد ماطول عليكم دورت على شاص تويوتا لقيت اسعارهن غريبه 2006 و2009 تقريبا نفس السعر كلهن في 80 وطالع

ولقيت لي واحد من الشباب معه جمس بيبيعه


2005 فضي داخلي ازرق

ماشي 150الف مكينه 6 لتر+قير تماتيك ودبل ارضي

مركب له شد حايل +ونش 4طن+تضمين وتدبيل المساعدات+تانكي 250 لتر ستيل
+طبق+دبل بطارية+دعامة اماميه+بعض الحركات

والسيارة يشرطها من الى؟؟؟

وحدها علي ب60 الف

السؤال استعمالها في البر وخراباتها وسعرها مناسب والا؟؟؟

والله يرحم والدين كل من مر على الموضوع ويجزى كل من رد ولا بخل بعلمة خير الجزاء

ووفقه وساقه له رزقه من كل جهه

والسلام

[مقطر نخل]

أخ قناصه :
إذاكان من حجم2500 hdعز الله إنه هو موتر البر ولايعرف للأعطال طريقا,
7سنوات وأنا استخدم شواص تويوتا للبر وربعي يستخدمون هذا النوع من الجموس, فأشاروا علي بتجربته فاستجبت للمشورة -وأقسم بالله- أني ندمت على تلك السنوات اللي أمضيتها على ظهور الشواص!
سعة,راحة,قوة, متانة,ومحركات جبارة.
قد يأتي من يقول : إن مشاكل الــ gmcكثيرة ومعروفة , أقول : نعم هذا في قطع 10(حجم 1500)فمحركاته تختلف تماما عن حجم 2500hd والسلام .

[طارد سحاب]

هلا اخوي قناصه
اتشرف فيك
ويزيدني شرف طلبك اني اعلق على موضوعك وانشالله راح انصحك مثل مانصح اخوي وانت حر

الموتر حليل في البر
بس انت لازم تعرف وين تبي تروح للبر
قصدي انت من اهل الربع الخالى او من اهل الامكان القريبه
اذا الاماكن القريب ينفع لك اي سياره بس ماهوب بسعر هذا 60 الف ترا كثثيره فكر فيها شوي
اذا انت راعي الربع الخالى وروحات بعيده الجمس ماينفع مافي زي الجيب

بس اذا مالك موتر ثاني تستخدمة في الديره ترا ماينفع الموتر كبير ولا يصلح

وبنسبه لسعره يعني لو ينزلك فيه ترا احسن تقل سعر غالى حتى لو انه مكمل بس ماياصل السعر هذا

وبعدين اخوي ليش تروح تدفع المبلغ هذا كلها بسيارة بر ولا تستخدمها الا في الشتاء
اخوي شف لك سياره اقل سعر
بعدين عندك الجيب النيسان الربع الى يسمونه السلقه هذا ياخي مووووتر حتى في البيع سهل مره

والجمس ترا في البيع ثقاااااااايل تابلش فيه
وانت حر تحياتي

[قناصه]

السلام عليكم

اخوي مقطر تخل الف شكر لك وجزاك الله خير

انا معي هدد 2006 للبران البعيدة والاهل ومعي ربع نيسان بس ما يشيل عزبتي ومحتاج حوض

قالو اطيبها التويوتا ودورت وخربت برمجتي من اسعارهن والله اني لاقي 2005 و2010 وكلهن محدودات ب100الف خذ اللي تبي وسمت لي هنا سيارة

وزعل علي راعيها قلت النيسان قالو انحش الجمس اطيب وكان معنا 2006 قطع عشره وغثنا وهذا ابيه استعمال يومي وللبران

اخوي الكبير طارد سحاب

يعلم الله اني ماعرفك ولكن من ردودك واسلوبك قلت ياولد هذا الخلاوي حق مكشات

وصرت عند ضني واطيب وجاوبت الجواب الشافي اللي يبرد الصدر

الحاله ميسوره ياله لك الحمد ومعي هدد 2006 وعندنا صالون 2010 للمشاوير ومكه

بس ابي شي للعب واستخدام يومي ومعي من 60 الى 75الف ومابي شي اقعد في الورشة

انت كريم وعطيتني جمل كامل ان كان ماهو ذود وانا:

لااملك لك الا الدعاء الله يبارك لك بعلمك ومالك وعيالك ويجعل لك في كل خطوة تمشيها رزق في الدنيا والاخرة

وبيض الله وجهك

اخوك ابونوره من القويعية ان بدا لك حاجه منها اومر بس

[آل زايد502]

هلا اخوي قناصه
اتشرف فيك
ويزيدني شرف طلبك اني اعلق على موضوعك وانشالله راح انصحك مثل مانصح اخوي وانت حر

الموتر حليل في البر
بس انت لازم تعرف وين تبي تروح للبر
قصدي انت من اهل الربع الخالى او من اهل الامكان القريبه
اذا الاماكن القريب ينفع لك اي سياره بس ماهوب بسعر هذا 60 الف ترا كثثيره فكر فيها شوي
اذا انت راعي الربع الخالى وروحات بعيده الجمس ماينفع مافي زي الجيب

بس اذا مالك موتر ثاني تستخدمة في الديره ترا ماينفع الموتر كبير ولا يصلح

وبنسبه لسعره يعني لو ينزلك فيه ترا احسن تقل سعر غالى حتى لو انه مكمل بس ماياصل السعر هذا

وبعدين اخوي ليش تروح تدفع المبلغ هذا كلها بسيارة بر ولا تستخدمها الا في الشتاء
اخوي شف لك سياره اقل سعر
بعدين عندك الجيب النيسان الربع الى يسمونه السلقه هذا ياخي مووووتر حتى في البيع سهل مره

والجمس ترا في البيع ثقاااااااايل تابلش فيه
وانت حر تحياتي

عندي تعليق ياخوي على كلامك تقول الجمس مايمشي فالربع الخالي والله انه يمشي ممشى الجيوب واكثر ولا تنسى دبله اقوى من تيوتا ونيسان كلها ولاتنسى ارامكو وش ياخذون للاستكشاف وماحولها؟؟؟ جمس حوض واغلبها 2500
انا عندي 1500 والله ممشاه ممشى الجيوب لاكن انصح 2500 وبقوه وخاصه ددبل ارضي دبل ارضي حط تحتها خط لاتدور غير الارضي الازرار بيبلشك فالحساس وترا اخوي هذاهي اسعارها بس انت حاول تخليه ينزلك من سعره وشف كم ساموه منه وافحصه زييييين
والله يرزقك ويرزقنا
وعلى فكره ناوي ابيع اللي عندي ان جاب سعر واخذ 2500

[ماء السحاب]

حيا الله اخوي قناصه راعي القويعيه
والله ياخوي نخدمك من عيونا وخاصة ان كنت اعرف بالشي
والله ياخوي معرفتي بالجموس ميسورة ولاهيب ذيك الزود لكن بفيدك باللي اعرف مدامك طلبت مني الشور
بس هي تتعمد على الشخص اللي بيستخدم تفرق من شخص لشخص
ان كانك راعي خطوط وجواد وطرق خطوط طويله فعز الله انه يشفي الخاطر ويبرد الكبد وان كانك راعي تمشي بالنفود وجلد على خفيف فعز الله انه ولد عموما الموتر ماعليه كلام
وان بغيت سحب وتحميل فما في موتر يصف جنبه
وان بغيت الراحه فهو مريح جدا جدا
الصندوق كبير جدا حمل لين تمل كل عفش البيت خذه في الكشته هههه
بس والله ياعليه عزم لااله الا الله (محترم)

السلبيات
ان كنت راعي تفجير وتدعيس فما انصحك فيه لانه يبدا يعذرب معك
وان كانك راعي مراقا وسيوف كذالك مايصلح لانه طويل وثقيل شوي
وطوله متعب شوي للي ماتعود عليه لكن ان تعودت عليه عادي جدا



عموما السياره انصح فيها جدا ان كانك ماتفجر بقوه ولا مراقا وسيوف
بتدعيلي ان شاء الله


لكن احذر احذر لاتشتري الا نظيف انتبه من الملعوب فيه وان كان تبي معلومات زود اتصل بي وما نقصر معك ان شاء الله


لكن الموتر اللي قلته تو مالي فيه اي تعليق اترك التعليق للشباب

ارجو اني افدتك
تحياتي

[احمدالصالح]

اخوي استخر (الله) في شراء الموتر . والله يكتبلك اللي فيه الخير

[قناصه]

اخوي ال زايد بيض الله وجهك وماقصرت

اخوي احمدالصالح الاستخارة لاتوصي ان شاء الله بس اللي حولي مامن علم بالجموس قلت ادور الشور عند الشباب واشارك الناس بعقولها وتعطيك خبرتها واعلومها والاولين يقولون النصيحه بجمل وهنا ربع جعلهم يسلمون يعطونك النصيحة ببلاش وودهه من زود طيبه وكرمه انه يقدر يوصلك ويعطيك العلم من راس
وجعلك تسلم وبيض الله وجهك

اخوي الكبير ماء السحاب

والله يانا ضحكت من تفجير وتطعيس >>>>>تراني عود في 45يالله تويسك والا صيدك وامسك الدركسون لين توصل شجرة على جال مسيله والا طعيس ممطور وفل عزبتك وتقهو مهيلتك

وبيض الله وجهك وان بدا لك لزوم من الديره ارسل لي على الخاص وابشر يوصلك وفوقه حبت خشم

والله بقدرني ارد لك ولو شي يسير من دعاء من القلب في ها العشر المباركه

[راع العوجاء]

2005 فضي داخلي ازرق

ماشي 150الف مكينه 6 لتر+قير تماتيك ودبل ارضي

مركب له شد حايل +ونش 4طن+تضمين وتدبيل المساعدات+تانكي 250 لتر ستيل
+طبق+دبل بطارية+دعامة اماميه+بعض الحركات


ما شاء الله تبارك الله

وش خليت يا خوي الله يكتب لك الخيرة وتوكل على الله بعد ما تستخير

والسعر حليو :good2: اذا كان نظيف لانه مكمل ;)


اخوك
ابو سعد

[ولاعة]

الله يوفقكم افدتو الرجال وافدوني ما قصرتوا

[أبو رشاء]

أخوي الجمس مافيه كلام لايبرد عزمه فنفود ولا شي وسأل مجرب

ماشاءالله تبارك الله حتا الطلعات القويه ترقاها زي السلام عليكم

والله يدلك على الي فيه الخير

[تيتشر]

من وجهة نظري في حال سلامة المحركات والبدي ... والله الله انصحك بفحص الموتر عند البريدي

بالنسبه لموضوع انك احتديت على الجمس بعد اسعار الشاص

فيسعدني أن أنقل أو بالأصح اقتبس رد فيه مقارنه بسيطه بين الشاص والجمس2500

طبعا هالمقارنه هي رد كتبه الأخ عاشقz71 في نادي عشاق وملاك الجمس والشفر الحوض لشخص طلب المقارنه بينمها



شف طال عمرك لكل منه ميزات وعيوب ولكن ميزات الجمس افضل بكثير

ولكن تظل ميزه للشاص وهي الاهم وهو الاعتماديه

القصد ان نسبة احتمال عطل الموتر فالشاص ضئيله جدا بعكس الجمس

ولكن بالبر معليش الي جرب بيعرف ان الجمس افضل

وكثير ناس ماخذ فكرة ان الشاص على اسمه بالتحميل افضل !!

العكس صحيح

الشاص يكون افضل من الجمس اذا قارناه بحجم جمس 1500

ولكن نجي نقارنه بسته لتر 2500 لا

الجمس افضل بمراحل


رح املا حوض الجمس وحوض الشاص بوزن ثقيل وحاول تدخل البر خاصه الطعوس او النفود

الشاص بصعوبه يتنقل بينما الجمس عادي جدا


مقارنتي هذي بالشاص ابو مكينه 4500 فما بالك بالمكينه السيئه الجديده 4000 لان توركها اقل من الاوله

بالخط بعد املا الشاص بوز هائل وحاول تجيب سرعة معينه مثل 160 مثلا

تلاقي الشاص بالقوة يجيبها وان جابها وحب يتجاوز او لاي سبب حب يزود سرعته راح يواجه صعوبه


لكن الجمس كل الي عليك مد رجلينك شوي للدعسه }} واستمتع بأمبير عداد الطبلون وهو مطلق ساقيه للرياح متجه نحو الــ 200 بكل سهوله !!



اما بالنسبه للبنزين معليش اخالف كل من يقول ان الشاص اوفر

هذا الكلام سابقا الجموس كانت تصرف

لكن من بعد موديل 2000 الجمس اوفر بكثير


الجمس تعبي تانكيه بنزين 91 باقل من 60 ريال يمشيك بالخطوط 800 كيلو بالراحه بحدود سرعة 130

بينما الشاص تعبي التوانك الثنين ومايمشيك هالمسافه

هذا وهو فاضي بدزن تحميل وثق تمام الثقه لو مليان الحوض راح تزيد الصرفيه اما الجمس مايتاثر بالوزن بشكل قوي


نجي للراحه }} باختصار مافي مقارنه الجمس افضل ومافي اثنين يختلفون على هالنقطه

نجي للدفرنس مثلا

دفرنس الجمس 2500 قوي جدا مايقارن بالشاص ابد }} ولو في واحد عنده ورشه راح يقولك ان دفرنسات الجيوب التايوتا بشكل عام سيئه جدا

يكفيك الحجم بالدفرنس الجمس يوصل الى 10 ونص انش !
والشاص ماعتقد وصل لتسعه انش حتى !


نجي للتسارع :

الجمس شد بلد يجيب الميه بحدود 8 ثواني }} والمواتر النشيطه تجيبها باقل بعد


بينما الشاص مع تزويد المكينه فلتر هدرز ومراوح ممكن يصل لتسارع 8 ثواني !!


اما التوازن وكلنا نعرف ان التوازن بالبر مطلوب جدا

ان قلنا بالنفود فهو مطلوب لكثرة ميلان الموتر المفاجئ

وان قلنا بالبر شعبان وجلد وغيره فالتوزان مطلوب اكثر لكثرة مفاجأة الطريق مثل جرف او ردميه معارضه لخطك او او


فكلنا ندري ان الشاص صنف من اسرع المواتر انقلاب والكل بشهد بالشي هذا

لكن الجمس ثقل وزنه ينفعك بالمواقف الي كذا

ومعروف الموتر كل مازاد وزنه كل ماتحسن توازن السياره بشكل واظح



بالتطعيس مثلا :

كثير يقول ان الشاص هو حق التطعيس وبس


ولكن : ونا متاكد من كلامي

تعال للشاص او حتى الربع الكبسوله وقفه تحت خشم الطعس وادعسله


اتحداك ثم اتحداك اذا قدر يكمل طلوعه وان طلعه فهو بشكل بطيء

وبالذات هالنقطه هذي وعن تجربه

ونا اتحدا اي شاص يوقف تحت الطعس بالظبط ويقدر يطلعه او ع الاقل يقدر يطلعه باريحيه

واتحده هالمره موب حجم 2500 لا

بــ 1500

بالعربي

الشاص اذا جا يرقى طعس قدامه لازم ياطلعه بالنمره الثانيه يعني لازم يجي شاد


بعكس الجمس وقفه تحت الطعس وامش مايرده شي


وتاكد ان هاالنقطه بالذات عن تجربه


معلومه اخيره كل المقارنات الي فوق قارنته انا بجمس موديلات 2006 وتحت

فما بالك بــ 2008 وطالع صاحب المكينه الاقوى والاقل صرفيه والاريح والاقوى قير !!!



اضافه الى اني ماجبت طاري 8100 صاحب المهمات الصعبه



اخيرا لو لا اختلاف الاذواق لبارت السلع


واسف جدا على الاطاله


الـ 2005 لقيته محدود بالمعارض لونه فضي بتقريبا 52000 وما فحصته بس وقفته كانت زينه
فمع التكميلات اللي ذكرتها انت خصوصا ان كنت محتاجها اعتقد ان السعر معقول ومنطقي

والله يكتب لك اللي فيه الخير

لا تنسى لو كان دف لوك بيكون أفضل اللي يجي G80

[قناصه]

بارك الله فيكم جميع وماقصرتو وبيض الله وجيهكم

اخوي تيتشر عزا الله انك تيتشر حتى في المواتر ماهو في المنطوق الطيب والكلام الموزون

بيض الله وجهك وماقصرت كفيت ووفيت من منطوقك ومنقولك لكلام الاخ عاشق اللي بين انه ن تجربه وبخص والله يزيدكم الثنين علم وسعة في الرزق

[GMC 4EVR]

والله انا اضم كلامي مع اخوي تيتشر بيض الله وجهه انا كان معي 2001 1500دبل قير عايدي قسم بالله ان فيه قوه غير طبيعيه ويجي عليه تفجير مو صاحي وولما يكون مع الوالد ياخده للبر ويسحب عليه غرف وتريلات ومشيناه في اقل من 8شهور اكثر من 40 الف كيلو والموتر مايشتكي من شي وماخدينه من ارامكو واني كل مااوقف في اي مكان يجيني ناس الي تبيع والا الي يشوف وعزمه ويوقفوني ويستفسرون وهو افضل من الشاص وغيره بمليوووون مره واسال مجرب ونفسه طويل وانا انصحك فيه ولاتفكر في السعر ادا انت ناوي تاخد سياره مزبوطه

[التميمي عنيزة]

عندي لك واحد
عنده جموس ارامكو
فيه واحد موديل 2005 قطع عشرة تماتيك
ماشي 75000
سعرهـ 56000
لونه فضي وداخلي بيج الظاهر
المهم السيارة شرط بدي ومحركات
اذا لك رغبة
هذا رقمي اتصل واعطيك رقمه
0594439999

على فكرة شاور لأني ما اعرف اسعارهن صراحة
لكن اللياعرف ان التماتيك افضل من العايدي
لان العايدي كثير خرابة على كلام واحد من الربع عنده واحد
والله اعلم

[ذيب العيالي]

انا انصحك بالسيارة الي استخدامها سعودي
لاتاخذ امريكيه

[عرق رملان]

الله يوفقك ويرزقك لما هو فيه خير لك

واستخر وشاور والله يوفقك

وانا من وجه نظري المتواضعه
انا افضل الجمس بشكل كبير
ولكن احرص على النظيف

[Abdulmajeed71]

السلام عليكم

اخوي قناصه ارسلي رقم جوالك على الخاص للتواصل معك

وشكرا

[حفرآآوي]

ياخوي اذا جاك الجمس مكينته 8100 ودبل

اضحك على اللاندكروزر ووالفتك وادفنهم