شورتكم يا اصحاب المعرفه لاهنتو

[kh23]

السلام عليكم


لاهنتو يا اخوان بغيت مشورتكم


حصلت لي نيسان صالون موديل 98
آس جي آي آل
قير عادي مكيف مركزي تانكين بنزين وبدون ثلاجه وانتم ادرى بباقي مواصفاته الـ98
ماطقه الشاكوش ابد وبويته سليمه الف بالميه ولونه الزيتي بذهبي لون الموديل المعروف


الجيب مكرج للسفر بس وواقف بالكراج مايطلع ولا يشتغل الا للسفر ومن اسبوع كمل 105000


العداد ما انفصل ابد والسياره على يد شايب ولده ما يلف طارته ابد


وحده علي بـ55


وتكفون ابي اشوف هالسعر مناسب له او لا انا لفيت المعارض شفت اسعارهن بالـ42 والـ43 وهالحدود لكن ماهن خوش


وتكفون يا راعين النياسين افيدوني والله مالي خبره فيهن ابد


دمتم بكل خير

[Abu Sary]

شوف السعر غالي ، لكن إذا أنت مستخدم ولآ عندك نية تبيع ،

انا نظريتي إني اشتري شيء نظيف لو زايد سعره شوي ، ولآ أخذ شيء يشقيني وأحط فيه كثر مأحط بشيء نظيف ..



والاستخـارة فوق كل شيء ، والله يقدم لك اللي فيه الخيرر..





وبالتوفيق للجميع ،




















( اللهم حسن الخاتمة )

[kh23]

والله انا مستخدم والف شكر اخوي على ردك

وعلى فكره المبلغ اكيشه له 50 وخمس اعطيه اقساط بحكم قدرتي

[أبن المدينة]

أخوي يقولون خذلك شيء مكلف ولا تتكلف

يعني لو كان غالي بس نظيف وإنت بتستخدم مو مشكلة

لكن البلا وربي يبعدك عنه إنك تاخذلك موتر بقيمة رخيصة ويطفشك بالخرابات وتكثر تكاليفه

والله يكتبلك مافيه الخير

[أبو الذيابه]

اشوف إنه مغليه بزيادة .. رغم مدحك للموتر بنظافته واهتمامه فيه ولكن اخوي تاخذه بها السعر وانت مكيش خمسين مرة وحده اشوفها قويه .. اذا صامل انت على المشترى وهو صامل على البيع اعرض عليه وفاوضه بتكييش اكثر شيء 35 أو 40 الف وقسط شهري للباقي 2000 ريال أو 1500 ..

واذا كنت قادر وعاشق للموتر ومهتويه ومتحسفه الله يطرح لك فيه البركة استخر الله وشف وش يامرك عليه.

[راعي الطلعات]

على وصفك له اعطيه من 45 الى 50

خويي محصل 2006 تانكيين مكيف واحد قزاز عادي في بحر الـ60 الف

{ ما ندم من استخار الخالق، وشاور المخلوقين المؤمنين وثبت في امره}

استخر الله وان كان نفسك ارتاحة للموتر حاول مع الرجال ينزل في السعر والله يوفقك ان شاءالله

[kh23]

جزاك الله الف خير ابن المدينه

لكن لابد من السؤال لاني والله مالي لا ناقه ولا جمل بالنيسان كله

[kh23]

والله يا اخواني ماني لا مقتدر ولا شي

وراس مالي طالب

لكن كان عندي فورد وبعته

والباترول هذا بعيني لكن انا مالي باسعارهن

ولا هو والله ما شفت الي بنظافته ابد لا من داخل ولا من الخارج

ولا طلبت شوركم الا منكم ابي استفيد

[SRAAAB]

والله السعر لك عليه شوي
بس إذا كنت مستخدم الموتر خذه ولا تشاور وحتى لاتقول لأحد
وممشاه زين
الله يدلك على اللي فيه خير يارب

[حزين الكون]

والله العام اسعارها بالمعارض على 47 وتحت .. الى ال38

وانا اقول استخر احسن لك

[kh23]

الله يجزاكم كل خير

ماقصرتوا ومنكم نستفيد

ومن شاور ما خاب

تسلمون وربي يعطيكم على نياتكم

[راعي طويلات]

وعليكم السلام ورحمه الله وبركاته
من رأيي أن الموتر غالي عليك وبما أنك شاب فما ودي تأخذ هالموديل وبهالقيمة لانه بيخليك تأخذ فكرة سيئة عن الباترول كلامي عن تجربة موديل 99 فل ابشن بخاخ وقير عادي هو زين ويمشي حالة وفي البر كفو بس فيه قل العزم (خجمه_رخمه_ضفعه) ايضا يصرف بنزين بعض القطع الي فيه أغلى من الموديلات الجديده
واشور عليك أنك تجمع لك كم ألف فوق دراهمك وتحطها في فتك الي مكينته 4800 من 2002 وفوق حتى لو كان sgl عز الله بيبرد كبد تبيه ديرة تبيه بر ونفود تبيه خط خذ ولد أنشط وابرك من الموديلات القديمة خصوصا من 98-2001 لاتحرص عليها الا اذا انك بتمشي حالك وتبي اسم جيب

[عطيب ومايغيب]

يالحبيب اسمع كلام راعي الطويلات النيسان غالي وناء اخوك قطاععه ومديله قديم هذءعرفي والله يوفقك

ولا ادفعهن مهر في بنت حلال...وصلىالله وبارك

[kh23]

الله يعطيكم العافيه

كفيتو ووفيتو وربي يجزاكم كل خير

ماقصرتو والله

[راعي الطلعات]

راعي الطويلات كلامه صراحه في محله

وانا مثله معي 99 فل ماشاءالله كان ماشي 190الف وكان واقف في كراج البيت مأخذه بـ50الف بس مكينه الله بالخير

وراعي الـ98 مغليه بالحيل

واسئل الله ان يرزقك ويعوضك بالموتر الخير

[ابوفاضل2]

حسب خبرتي المتواضعه اذاكان على كلامك
لو ينزله للمعارض اخذهن وهو يضحك
تحياااااااااااااااااااااااااااااااااااااتي

[kh23]

الله يعطيكم العافيه

مشكورين وما قصرتو

ومنكم نستفيد