الصيد بالغزول ....ابغى الخبرة تطلع

[النوخذة]

السلام عليكم ورحمة الله وبركاته
بعد الإطلاع على استفسار اخونا TAI CHI عن كيفية الصيد بالشباك الحقيقة كان ودنا نفزع له لاكن الرجال قال ان العمق
يبدأمن 60 قدم وبالنسبة لي ماعندي ذيك الخبرة في الصيد بالغزول ولا ادري ان كان فيه شباك للصيد في مثل هالاعماق
انا ودي ان كل واحد يشاركنا باللي عنده علشان تعم الفائدة
وخلوني ابدأ علشان نحمسكم شوي
كان جدي رحمة الله عليه من الناس اللي يصيدون بالغزول على السيف( الشاطئ ) وكان يقول لي
( ان الغزول ماتنحط وبس , اذا بغيت الصيد لازم تسوي خطة )
الشاهد من الموضوع انه علمني بعض الخطط اللي يسونها اثناء نصب الغزول
وانا باعرض عليكم الخطة اللي علمني جدي
http://www.mekshat.com/pix/upload/images9/mk5291_abc.jpg
ولو جينا لشرح الخطة نقول
ان السمك في العادة يمشي موازي للسيف ولو واجه غزل ماراح يصدم فيه وينتهي الموضوع , السمكة ماتمسك في االغزل على طول , اذا صدمت فيه ولا مسكت , راح تمشي بشكل موازي للغزل ومن هنا تبدأ رحلة الدوران
زي ماتشوفون في الرسمة راح يخش السمك ويبدأ يصدم في الغزل وكل ماصدم زيادة , زادت فرصة انه يمسك فيه
وطبعا لو مشى السمك موازي للكروكي اللي فوق , ماراح يطلع الا ماشاء الله
بالنسبة لاسم هالخطة انا مااعرف الاسم لاكن هي لازم تكون مكونة من تشبيك عدة غزول بالطول اللي يبغاه الصياد واما اسماء الجزاء اللي تتكون منه هالخطة فهي
1 الجدار
2 + 4 رداد
3 الصيادة (اللي اغلب السمك بتشوفه ماسك هناك)
الطريقة هاذي تبدأ من السيف مباشرة حتى ان الرداد يكون طالع على السيف شوي ولازم تعرف مستوى المد والجزر علشان لايصير فيه فتحات تسمح للسمك بالخروج
.
.
.
آسف على الاطالة وارجو ان اكون قد قدمت الفائدة واذا فيه اي استفسار تراني حاضر
بس اهم شئ
لاتبخلون علينا بالمعلومات اللي عندكم
تحياتي للجميع

[gulfhunter]

السلام عليكم ورحمة الله وبركاته

حياك الله اخوي ابوعتيق ................ مشكور على الموضوع المميز ......وبأنتظار مشاركت باقي الأعضاء

الله يوفقك ويبارك فيك

[riffe]

مشكور اخوى سردال واعتقد فكرتها من فكره الحضره

[Keynes]

مشكور اخوي النوخذة عالموضوع المفيد :good: .. وانشالله نشوف مشاركات بقية الاعضاء
اضغط هنـــا : : : : موضوع قديم عن طريقة نصب الغزل : : : : اضغط هنــــا (http://mekshat.com/vb/showthread.php?t=13221)

[SRDAL]

السلام عليكم ورحمة الله وبركاته

حياك الله اخوي بوعتيق

ماشاء الله موضوع ممتاز ونصبه ... بس لكل سيف غالباً يكون له نصبته الخاصه فيه حسب نوع السيف .

وعلى فكرة اغلب شغلنا انا والشباب كله حقطات مونصبات .

تحياتي لك يالغالي .

srdal

[عبادل العاصمي]

مشكور على الموضوع

[النوخذة]

السلام عليكم ورحمة الله وبركاته
اشكر الجميع على المرور التعقيب
مشرفنا gulfhunter شاكر لك تعليقك
riffe اولا مشكور على المرور وثانيا انا مااعرف طريقة الحضرة وبما انك ذكرتها , ودنا تشرحها لنا لاهنت
وآخر شي ( ترى الكلام هذا لاخوي riffe باقي العضاء لاتطالعون ok :cool: ) وش مسوي فيك سردال ؟؟ مقطع قلبك !!حتى اسمي صرت تقراه سردال :D يحق لك ياشيخ
Keynes ماشاء الله عليك شكلك حافظ المنتدى عن ظهر قلب ماشاء الله لاقوة الا بالله :) مشكور لوضع الرابط
SRDAL :heart:يامقطع قلوب النشامى ترا مايكفيني تعليقك ;) لاهنت اشرح لنا عن اي شي ياخوي ودنا نتعلم , وانت والربع تبخلون علينا !! مايصير يامقطع القلوب:D
رجل الجنوب العفو اخي الكريم

بس ياشباب ابغى قوة تعليق مع الشرح تراني مااكتفيت

[riffe]

السلام عليكم

النوخذه ههههههههه

لا مومقطع قلبى بس يغوض فيه ههههههههه

.....

المهم اخوى النوخذه اذا رحت صوب الحضره راح اصورها حتى تكون اوضح وبنسبة لموضوعك ماقلت حجم فتحه الغزل ولا حجم الخيط واعتقد اذا كانت فيه مايه راح تخترب الخطه وتنسحب عكس الى شفنها فى اللنك الموجود مع الاخر key nes وبعد لزم نعرف هل تم تشبيت الغزل بعمود او بيب

[gulfhunter]

السلام عليكم ورحمة الله وبركاته

هلابك اخوي ابوعتيق................ عندي تعليق على نصبت الغزل........وهي ان حضن الغزل لازم يكون ضيق لأجبار السمك على الضرب في الغزل..........

شكراً لك اخوي Keynes...... لوضعك للرابط ,,,, والنصبه اللي في الرابط هي اكثر شي منتشره....... ولاكن لازم يكون الحضن اضيق ...

[النوخذة]

السلام عليكم ورحمة الله وبركاته
اخوي riffe دامك ضحكت انا مستانس وودي كل الشباب تصير عندهم هالروح العالية
اخوي انا ماصيد بالغزول لاكن عندي خلفية بسيطة جدا يعني لاتلومني اذا جبت العيد :D
بالنسبة ل تثبيت الغزل , الغزل فعلا يكون مثبت سواءا في بيب او حصاة
اما الفتحات وحجم الخيط فهذا مااعرفه لاكن اكيد حسب حجم السمك اللي انت تبغى تصيده
زودنا معلومات يخليك ربي تراني توني فرخ (فرخ ديناصور زي ماقال اخوي مشرفنا ابو عبد الله :D )
مشرفنا الغالي ابو عبد الله

حضن الغزل لازم يكون ضيق لأجبار السمك على الضرب في الغزل
اشرح وش هو حضن الغزل !!نورنا ياشيخ تراني اتعلم منكم الان ( لاتنسى اني فرخ :D )
وياشباب بلاش بخل افكار

[gulfhunter]

السلام عليكم ورحمة الله وبركاته

حياك الله أخوي ابوعتيق ................ حضن الغزل المكان اللي تصيد فيه السمك داخل الغزل....(تبي شرح زياده) شوف الصور اللي منزله اخوي ابوراشد الله يذكره بالخير........

http://www.mekshat.com/pix/upload/images9/mk7686_gzl.jpg

هلا بك اخوي riffe........طبعاً لازم يثبت الغزل ...... طريقة التثبيت ترجع لك انت...... في ناس تستخدم الطابوق او سن او باوره صغيره................... بالنسبه إلى قوة التيار.... أنا افضل انه يكون في مكان عادي مايكون دردور او مجرى المايه......لأنك لو تحطه عند مكان تياره قوي ...لو تثبت بأي شي راح ينسدح الغزل وعليه العوض........اما بالنسبه إلى حركة المد والجزر العاديه ان شاء الله لن تؤثر عليه (لكن كل مره يمكن تحتاج انك تعدله

طبعاً في طرق اخره ... ولكن تحتاج إلى طراد وإلى خبره كبيره لأن الغزل يبيله احتراف في الطراد.. اما للنصبه فسهل نوعً ما

الله يوفقكم ويبارك فيكم

[SinyaR]

http://www.mekshat.com/pix/upload/images9/mk16208_gazal.gif
وهذي طريقة استخدمها في نصبة الغزل .. في الأماكن المقاربة للأسياف وذات العمق البسيط اللي ما يتعدى ال 20 قدم

والصراحة انا اشوف ان الطرق تقريبا متشابه من حيث المبدأ والنتيجة

[gulfhunter]

السلام عليكم ورحمة الله وبركاته

حياك الله أخوي SinyaR في منتديات مكشات وبالأخص الخيمه البحريه وان شاء الله تلاقي اللي يسرك ويرضيك.......... ومشكور اخو على المشاركه .....

[النوخذة]

السلام عليكم ورحمة الله وبركاته
SinyaR حياك الله اخوي عضو جديد في هالمنتدى المميز
اخوي SinyaR زي ماتفضلت الطريقة مشابهه للطرق اللي طرحنا لاكن اذا كان استخدام هالطريقة بعيد عن السيف فأنا اشوف انك لو سويت حضن ثاني ممكن النتيجة تكون احسن شوي هذا والله اعلم
مشرفنا ابو عبد الله جزاك الله خير على الشرح والتوضيح

[SinyaR]

مشكورين على الترحيب .. وبصراحة اهنيكم على الموقع والتواصل الطيب

وحبيت اذكر شغله ان الطريقه هذي استخدمها حق راس الكنعد
كلمة راس تطلق على مجموعة السمك .. ما ادري عن تشابه المصطلحات بين المملكة والكويت

وتسلمون ...

[gulfhunter]

السلام عليكم ورحمة الله وبركاته

حياك الله أخوي SinyaR............ نعم اخوي نفس التسميه عندنا......................

الله يسلمك

[النوخذة]

السلام عليكم ورحمة الله وبركاته

الطريقه هذي استخدمها حق راس الكنعد
اخوي ابو عبد الله واخوي SinyaR اما انا فالمصطلح جديد علي
لكن هل الكنعد ينصاد على السيف ؟؟:confused:

[الربـــان]

هلا بالصيادين كلهم والموضوع المسكت للصيد ((بالغزل )) او (( الشباك ))

طبعا اخواني انا باعطيكم تسميات البحر الاحمر من الركن الشمالى لشبه الجزيرة
وراح اتحدث عن انواع الشباك

1 _ الشباك الموجهة ( وهي عبارة عن ثلاث طبقات فتحة كبيرة 5 *5 ثم فتحة صغيرة 2*2 ثم فتحة كبيرة
ايضا 5*5 )
تستخدم هذه الشباك للصيد في المناطق التى لا تستطيع تحديد نوع السمك فهي قادة على صيد الشعور وصيد
البوري او العربي او القاص وذلك لأختلاف احجام فتحات الغزل

2_ غزل او شباك طبقة واحدة اي فتحة واحدة غير مبطنه وهي تستخدم لصيد السيجان وسهلة اللم والنصب

3_ المخدجة او ( البلمية ) او (شباك الرمي المستدير ) لااعرف تسميتها في بعض المناطق وهي تتراوح
بين 10 الى 18 قامة او ذراع وهي للرمي من الكتف وتستخدم في صيد (السردين - واللعف )

لا اود الاطالة ولكن الاضافة لكم تحياتي

[النوخذة]

السلام عليكم ورحمة الله وبركاته
حياك الله اخوي الربـــان وان شاء الله نشوف مشاركات مستمرة
اولا اخوي الشباك اللي تتكلم عنها في رقم واحد

الشباك الموجهة ( وهي عبارة عن ثلاث طبقات فتحة كبيرة 5 *5 ثم فتحة صغيرة 2*2 ثم فتحة كبيرة ايضا 5*5 )
هذا شباك ممنوعة لأنها تقضي على الاسماك بشكل مروع حتى الاسماك الصغيرة
وهنا في منطقتنا نسميها ( إسرائلية )
اما بالنسبة ل (شباك الرمي المستدير ) هاذي نسميها عندنا ( سالية ) وزي ماقلت نصيد فيها طعوم
يعطيك العافية اخوي الربان

[المقصود]

يعطيك العافيه
الله يجزاك خير
وما قصرت يــــابو عتيق

[النوخذة]

مرحبا فيك يالمقصود
وحاضرين , وودنا انك تزودنا بشئ من عندك طال عمرك