ما طريقتكم في تنسيق رحلتكم ؟

[الرسيفر]

أمسي على الجميع وحبيت أطرح هالسؤال اللي ودي أعرف طريقة تنسيق الرحلة عند زعماء مكشات
يعني وشلون تبدأ فكرة الطلعة سواءً طلعة يوم أو أيام .
وهل هو شخص واحد المسؤول عن تنسيق رحلاتكم ؟
وما هي الطريقة يعني يدق على الجوال ويقول ترا فيه طلعة ؟ !
وكيف يتم احتساب مصاريف الرحلة ؟

أما عن طريقتنا كنا نتصل اتصال وغيرناه برسالة
( يوجد رحلة = عاد تكتب مدة الرحلة والمكان = بادر بالحجز برسالة )
لأني بصراحة أحس احراج وفشيلة تدق على واحد ويقول ما أقدر وصعبة يرفض أكثر من مرة لأنه بعض المرات يبي يطلع مجاملة حتى لو كان ما له نفس بالطلعة .

عاد نبي العلم منكم ونستفيد من خبرتكم

[الرسيفر]

والله غريبة ما فيه ردود يعني أحس الدعوى مشينا مشينا بدون تنسيق

وين أهل مكشات وين الترتيب

[عبدالله الجري]

مساك الله بالصحة والعافية

يالرسيفر وسع صدرك

لاتستعجل الناس صوام ورواد مكشات قليل هالايام مقارنة بغيرة
فأحلم بهم قليلاً

بالنسبة لي كبرنا والطلعات قلت . لكن يجتمع فيها الزبد

ولنا أمير لازم وهذا شرط ... من صغرنا ، وبالاغلب الاتفاق يخرج بعد اجتماع الربع


أخوك ابو صالح

[الرسيفر]

بالنسبة لي كبرنا والطلعات قلت . لكن يجتمع فيها الزبد

ولنا أمير لازم وهذا شرط ... من صغرنا ، وبالاغلب الاتفاق يخرج بعد اجتماع الربع


أخوك ابو صالح

الله يكتب للجميع الأجر وإدراك ليلة القدر

وأشكرك يا أبو صالح على الرد :good2:

[662]

الطلعة من شهر 11 الى نهاية شهر 2
والربع واجد وكلن يقوم بجهده

[( برى بحرى)]

من خبرتي المتواضعه

يجب الاعلان عنها قبل فتره حتي الكل يحسب حسابه من حيث الاجازه مثلا + ضروف البيت مثلا

الاعلان عن مكان الرحله وجم يوم تكون الرحله

ويجب ابلاغ صاحب الفكره قبلها باسبوع عن من سيحظر ومن لا يستطيع الحظور

من هنا تحدد القطيه علي عدد الحظور وتوزع المهام من الامير الي اللي يغسل المواعين

ويجب تجهيز السيارات اولا وقبل كل شي من حيث التواير الي غايشات المكينه الي دهن الموتر الي القلص

والبطاريات الاحتيات الخ الخ الخ الخ

ومن ثم شراء حاجيات الرحله - الاكل - ويكون المصروف عند شخص واحد هو المسؤول عن المشتريات

تكتب كل الاغراض في ورقه وكل ما تشتري شي تشطب عليه وتتم الورقه معاك الي نهايه الرحله حتي لا يقولون

ترى ما شري الشي الفلاني او نسي الشي الفلاني

واهم شي تختار المكام المناسب للرحله وتضع مكان بديل عنه لا سمح الله تجي المكان ولا ما لك مكان فيه من

كثر الكشاته فيجب اختيار موقع بديل دائما ويكون بالاتفاق

بالنهايه نتمي للكل رحله وكتشته سعيده ويجب ان تترك المكان انظف مما كان عليه قبل مجيئك

تحياتي لك وهذه خبرتي المتواضعه والمبسطه جدا

[الشميسه]

في الصيف ايام القمرا اذا كانت مصادفه خميس وجمعه اكيد في طلعة بر والشتاء كل خميس بالديره ووقت الامطار وعطلة الربيع للصمان او الدهنا هذا روتيني

[الرسيفر]

أشكر الجميع على المشاركة
بالنسبة لنا رسالة للشقردي الي يصلح لنا من الربع وتنسيق على الموعد والمكان والمدة أما الأغراض العزب موجودة ولله الحمد وباقي الأغراض أشتريهن واجمعهن وتوزع قيمتهن على أعضاء الرحلة عند العودة .
بس ما تحسون إنه شينه أنا اللي أشتري وأنسق وغالبا الطبخ والنفخ علي وهم بس ادفع وامش وأحيانا أصير بوجه المدفع إذا عرف واحد في موضوع الطلعة وقال أفا ا ا وأنا ليش ما قلتو لي حصل الاحراج ! ! !
وأصير أنا بالمقرضة ( المسؤول ) خصوصا إني أنا اللي نسقت وخذ يا مشاكل

لأني دايم أقول التوبة ما راح أسوي شي وكله كم يوم ويرجع الموال الأول .

[ادليلة]

والله
فكره حلوه لاكن بعض الناس يتغلا انتا تبيه وهو وده يرو ح يعني اغصبني وتغيصب لازم تكلمه اوعساه يطيع علشانكم

[camping expert]

1- التنسيق ويفضل عقد اجتماع لاعضاء الرحلة ان كانت أكثر من يوم وان كانت أقل فالجوال سيد الموقف
2- تعيين الأمير
3- توزيع المهام
4- اختيار المكان
5- ثم بعد ذلك تتوالى المهام

[الرسيفر]

والله فكره حلوه لاكن بعض الناس يتغلا انتا تبيه وهو وده يرو ح يعني اغصبني وتغيصب لازم تكلمه اوعساه يطيع علشانكم


والله يا ابن الحلال كأنك عايش بيننا

مع الأسف هذا اللي يصير بالضبط

[الرسيفر]

1- التنسيق ويفضل عقد اجتماع لاعضاء الرحلة ان كانت أكثر من يوم وان كانت أقل فالجوال سيد الموقف
2- تعيين الأمير
3- توزيع المهام
4- اختيار المكان
5- ثم بعد ذلك تتوالى المهام

من خلال هذا الرد اكتشف إنك انسان قيادي

أو إنك رائد أسرة في مركز صيفي

الله المستعان توزيع المهام ما عرفتها إلا يوم كنا في المراكز الصيفية وهي شيء جميل

طريقتكم رائعة تسلم أخوي على الرد واستفدنا منك الكثير:good2:

[ابوصالح77]

لا تعقدونها بالحيل (عقد إجتماع+توزيع مهام +تنصيب إمير + ترتيب )
الطلعات على التياسير وأنا أخوك
والرجل ماهو طالع إلا مع ناس مجربهم وخابرهم .
وكلٍ يشمر عن ساعده ويورينا قرامته .
في الغالب التنسيق على الجوال أو في الإستراحة أو الدوام
تقبل مروري
بالتوفيق

[فايز العامر]

يعتمد على الموقع والوقت ومدة الرحلة

بعض الطلعات مايحتاج تكلم أحد اطلع وأنت بالسيارة أرسل رسالة يجونك الشباب أو تجيهم، وبعضها تحتاج موعد وبعضها تحتاج تجهيز من عدة أطراف.
بالنسبة لي أفضل نوعين من الطلعات الأولى اللي تجي بدون ترتيب طويل يعني ( يافلان مشينا ؟ فلان : مشينا :) )، هذي لها طعم خاص، والنوع الثاني الطلعة اللي تحتاج ترتيب قوي وموعد قبل يمكن يصل إلى أسابيع.

[السااهر]

اذا اكثر من يوم اذبيحه كل طلعه على واحد والباقي اغراض الريوق على واحد

العفش كل واحد سيارته مليانه مواعين طبعن الاجتماع يتم من قبل الامير بعداد وجبة عشاء اوغداء

باالاستراحه ويتم تحديد الزمان والمكان واذا يوم اويومين الي حولك من الربع مشينا مشينا

[الهرم]

بالنسبه لي

والله اغلب الطلعات ما اتوافق مع الشباب

والله من حبي للبر اطلع لحاالي وافل الحجاااج اللين يطيح اللي بالخاطر

موفقين يارب

[منقذ]

مشكور يالرسيفر
فعلا هو موضوع محرج للبعض التنسيق للرحلة حيث شخصيا اواجه احراج في التنسيق
لابد فيه تشرهات لاني انا المنسق للرحلة
وبعضهم تعزه وتقدره لكن اذا قلتله جاب بزارينه معه في رحلة خاصة للكبار وهذه من الاحراجات في البعد عن تنسيقها او حتى في الخروج لها
وبعضهم مايعرف الا القطة فقط
وبعضهم مايعرف الا التشره
اخيرا خليت الرحلة البعيدة بين اثنين او ثلاثة من الربع الي يوافقونك في افكارك علما ان البقية تتمناهم
لكن تواجه احراجا بما ذكرت سابقا

[بتاع بر]

[quote=منقذ;5208934]

وبعضهم تعزه وتقدره لكن اذا قلتله جاب بزارينه معه في رحلة خاصة للكبار وهذه من الاحراجات في البعد عن تنسيقها او حتى في الخروج لها

اييييييييه ذكرتني ياخ منقذ بطلعه للشمال قبل كم سنه طلعناه مع اجواد واحد منهم الله يصلحه ويهديه ماجاب بزرانه تهون جايبن خاله!!!!!! وتدري كم عمره بالسبعين !!!!! وكل الكشاته شباب !!! حلني في هذي وهات انواع الاحراجات والمطرسه تجلس مع الشايب رسمي !! كنك في مجلس وتحفظ بالسواليف والتتن مافيه وهذي ىيمكن الحسنه الوحيده اللي كسبنها لكن فيه مواقف ستبقى في الذاكره حدثت للشباب مع هالشايب الله يعظم اجره هو حي ولاميت وولد اخته انقطع عقب اك الطلعه ارويها لكم فيما عن اذنكم يبي يقيم صلاة الفجر

[الرسيفر]

أما يجيب بزارينه هذا اللي ما طار طيره :hot::hot::hot:

[كورابيكا]

والله انا اشووف انه يتم تعين موعد الرحله قبل اليوم المحدد بثلاثه ايام اقل الواجب

عشان التجهيزات من ناحية الاشغال والمواعيد وتظبيط المواتر وكذا,,,,,,,,,,

ولازم قبل ما يمشون يعنوون امير لهم اهم شي ,,,,,,,,

والله يـــــــــــــــــــــوفق الجــــــــــميع وهذا الي عندي

[خيال الغلبا]

اما انا فتبدأ الكشتة من عندي امسك الجوال واتصل على عشرة او خمسة عشر ............وفي النهاية تصفي على اثنين او ثلاثة

اما القطة فلا نعرفها ولله الحمد

[النمرالأليف]

بالنسبة لي أول شيء اعرف المدة اللي ابجلس فيها بالبر يعني مدة رحلتي ثم أشيل العزبة واتكل على الله واكشت وبالنسبة للزاد ازود شوي على المدة للإحتياط

[مبارك اا]

الطلعه عندنا تكون عاديه مره مافيها تعقيد ولا شي طبعا كل واحد له شله يطلع معهم دايم ولا بينهم حساب لان العزبه جاهزه بس نكملها من المحطه واحنا طالعين وكل واحد يجيب حاجه بنزين او اغراض وغيره واللي معه يدفع واللي مامعه مابينا رسميات الدعوى فري يعني

[الوالي 999]

المشكله ماهي بذي المشكله مشكلتي ياهي عويصه عوصه
كنا شله وحده تزاعل اثنين من الشله وزعلهم كايد
ونقسمت الشله قسمين مراعات خواطر بالعربي مو تحيز
بس انت تبي ذا وتبي ذا وكلهم على الدين بس الشيطان
شاطر
اعيش كااااابوس اذا جت مواسم الطلعات ودي ارضي ذا وارضي ذا (ربي عجل بالفرج وهدي النفووووس)

[القناص4800]

الطلعه عندنا تكون عاديه مره مافيها تعقيد ولا شي طبعا كل واحد له شله يطلع معهم دايم ولا بينهم حساب لان العزبه جاهزه بس نكملها من المحطه واحنا طالعين وكل واحد يجيب حاجه بنزين او اغراض وغيره واللي معه يدفع واللي مامعه مابينا رسميات الدعوى فري يعني

والله هذا الكلام المضبوط(ميه,ميه)

(يوم قريت بعض الردود السابقة حسيت اني ابطلع 10 سنين مهو اربع خمس ايام)

[الرسيفر]

أشكركم على التفاعل

وأنا أشوف التنسيق مطلوب عشان ما نتواكل على بعض في بعض الأشياء ويحصل نقص.


بعدين أنا مع مبدأ : دقق الحساب تدوم العشرة


والله لا يبلاك بواحد أساسي وهو دقاقن نقاد ولا يشتغل ولا يدفع وهو علة وسيارته في بيته بكل طلعة

وعساه ما يسولف هههه وخله على

[abo_basil]

الطلعه مره نقط لها ونتواعد بمكان معروف بالاحداثيه والطلب على الايكم للمتاخر ونتجمع فيه وبعد الاجتماع نتكل على الله حسب اراء الشباب واذا حصل خلاف يتم التصويت
ومرات تكون كل اسبوع على واحد لاننا مجموعه ويكون هو الامير بها بدون تكليف له مع احضاره العزب والخيمه ويختار خط سير الرحله ( من والى ) مع المساعده بالتقطيع والغسيل والشيل والحط
وكل شخص بما يتيسر معه والشباب شقرديه ويساعدون بالنقص