تكفون يا أهل الخرج فزعتكم

[شايب مطور]

السلام عليكم ورحمة الله وبركاته


أنا بروح للخرج خلال هاليومين القادمة بإذن الله

وأبي أمر على سوق الأعلاف لأني بأشتري معكب وشعير
وماأعرف وين مكانه بالضبط


فياليت توصفون لي الطريق والمكان بالضبط لأني ماادل زين




وشكرا لكم

[عبدالله العمرو]

حياك الله اخوي شايب مطور وابشر والله :


أول إشارة بعد البرج خذ يسار يصير وجهك شرق واستمر حتى الدوار بعده 300 متر يوجد محل لبيع الشعير والمكعب
علمي فيه قبل شهرين او 3 إذا مالقيته استمر باتجاهك للدوار الثاني ثم خذ المسار الأيسر من الدوار
واستمر على طول بنفس الاتجاه شرق بعده دوار آخر خذ الأيسر اللي يمشيك على طول شرق ايضا ...
تقابلك إشارة خذ ألأيسر اللي بحجاجك الأيسر باتجاه الشمال الشرقي واستمر حتى الأشارة
وبعده سيده على فالك .. بعد تقريبا 2 كيلو وشويات بتشوفهم على يمينك ويسارك ...
وسيارات الرودس و لبن البرسيم بعدهم على اليسار ....



وسوق الثليما :


من اول اشارة بعد البرج خلك بطريقك باتجاه الجنوب بعدها 200-300 متر اشارة سامبا
استمر جنوب وبعدها إشارة 3 استمر ايضا جنوب حتى ينحني الطريق اجباري يسار للشرق
بيكون على يمينك سور المؤسسة العامةللصناعات الحربية استمر حتى إشارة شارع الستين هي اول إشارة بتقابلك
خذ اليمين درب الغانمين .. واستمر 500 متر حتى حرف t خذ يسار شرق واستمر 500 متر بعدها t خذ يمين واستمر جنوب حدود 3 كيلو بينتهي الطريق اجباري يسار استمر حتى الإشارة وخذ يمين للجنوب واستمر 5-6 كيلو تلقاهم يمينك ويسارك قريب من محطة وقود ...




وحياك وبياك وأي خدمة الله يحييك وياليت تشرفني بزيارتك لبيتك الثاني ....


تحياتي /

[شايب مطور]

عزالله ماقصرت ياعبدالله العمرو وعلومك وافية بالحيل

وبيض الله وجهك والله يجزاك خير ويرزقك

[عبدالله العمرو]

عزالله ماقصرت ياعبدالله العمرو وعلومك وافية بالحيل

وبيض الله وجهك والله يجزاك خير ويرزقك


ووجهك أبيض و حياك الله شايبنا ومستعدين بأي خدمة طال عمرك ...