مشكلة بأمبير زيت اللاندكروزر (بالعربي ضعف ضخ طرمبة الزيت)

[kmk9999]

السلام عليكم


إخواني أعضاء مكشات عندي مشكلة ولا لقيت لها حل


أرجوا إنكم تساعدوني لأن المشكلة جابت لي حالة نفسية


أنا كنت مسافر يوم الإربعاء الماضي لحائل من الرياض


وكنت أمشي على 150 تقريبا كان أمبير الزيت على النص


وفجأة صارت على الربع وقفت عند المشحمة وغيرت الزيت


والسيفون والمشكلة ما زالت (حتى إني إذا وقفت ينزل الأمبير


للخط الأخير وإذا مشيت ما يتعدى الربع) ورحت لحائل ورجعت


للرياض ومريت الورش قالوا لي هذي طرمبة الزيت وغيرت طرمبة


الزيت ولا زالت المشكلة فيها وقالوا الحساس وغيرت الحساس


وقالوا شيك على أنبير الزيت اللي بالطبلون ورحت للتشليح وركبت


الطبلون وأخذت عليه مشوار وصار إذا مشيت يصير أقل من النص


بشئ بسيط وإذا وقفت ينزل بشوي شوي إلين ما ياصل الخط الأخير


ورجعت الطبلون وما قصر الهندي حق التشليح وفتحت غطا المكينة


علشان أشيك إن الزيت يمر على جميع السبايك والتيمن وصار يجيهن


حتى إن الميكانيكي يقول لي شف الزيت يهرب من عند عمود التيمن من


يم راس المكينة ويقولون لي وضب المكينة أو غيرها بواحد من التشليح


وأنا والله الماده على قد حالي وش تنصحون فيه يا أخواني أرجوا التفاعل


لكل من مرت عليه مشكلة.


للمعلومية لايوجد أي صوت بالمكينة من ناحية صوت السبايك أو غيرها


حيث أن السيارة لها إسبوع وأنا أستخدمها من بعد المشكلة.


سيارتي لاندكروزر 99 جي إكس آر

أقل شيء تدلوني على ورشة ممتازة جداً أنا من الرياض

[زاير الغيم]

أخي الكريم تأكد من الحساس ترى فيه كهربجيه يركبون حق كامري على اللاند لأنه يشبهه

ويختلف عنه برقم واحد..

ومادام مافيه صوت بالمكينة تطمن ..

س- وش الزيت اللي تستخدمه ؟
س- ليش 6 علب أشوفها شويه .. شيك عالكتالوج شف كم ياخذ علبة؟

[البرق 2009]

اخوي
نفس المشكله بسيارت اخوي
ويقولون من السيفون اذا ماه اصلي
وعموماً مايخلي مكان مايروحه اهم شي اذا كان الزيت ماينقص
على ذمتهم يقولون عادي ويمكن من السيفون وانت تأكد ترى ماني متأكد بس اشوف اخوي سأل
وقالوله عادي اذا مافيه تهريب ولانقص
وانت بدورك تأكد مره ثانيه
وانا حبيت اقولك انها نفس مشكلة اخوي واللي صار معه

[كودو]

اخوي
نفس المشكله بسيارت اخوي
ويقولون من السيفون اذا ماه اصلي
وعموماً مايخلي مكان مايروحه اهم شي اذا كان الزيت ماينقص
على ذمتهم يقولون عادي ويمكن من السيفون وانت تأكد ترى ماني متأكد بس اشوف اخوي سأل
وقالوله عادي اذا مافيه تهريب ولانقص
وانت بدورك تأكد مره ثانيه
وانا حبيت اقولك انها نفس مشكلة اخوي واللي صار معه

تاكد من السيفون اذا كان غير اصلي احتمال منه ما يسمح بدوران الزيت بشكل منتظم غيره ثانيه وابدا بارخص الاشياء

[kmk9999]

إخواني بدلت السيفون ونفس المشكلة

بس مريت على ورشة العضيب الخاص باللاندكروزر وقال لي

هذي المشكلة ماهي من المكينة هذي من كتاوت سلك الزيت

بس ما أدري وين مكان الكتاوت .

[زاير الغيم]

هذا هو الحساس
أفتح الكبوت ومن جهة الفلتر يسار تحت بالمكينة تلقاه

http://www.mekshat.com/pix/upload04/images179/mk50658_08092010905.jpg


http://www.mekshat.com/pix/upload04/images179/mk50658_08092010904.jpg

[rigidman]

اخي الكريم ضع علبة او علبتين من ستوب بـ 5 ريال من محلات البنشر وسوق السيارة كم كيلو بسرعات مختلفة اذا ارتفع ضغط الزيت فعندك شنبر ضعيف وبحاجة الى توظيب , واذا لم يتغير شي فاعلم يقينا ان المشكلة كهربائية فقط والله يحفظك.

[قمري قيال]

عيد مبارك على الجميع

اخي الكريم ضع علبة او علبتين من ستوب بـ 5 ريال من محلات البنشر وسوق السيارة كم كيلو بسرعات مختلفة اذا ارتفع ضغط الزيت فعندك شنبر ضعيف وبحاجة الى توظيب , واذا لم يتغير شي فاعلم يقينا ان المشكلة كهربائية فقط والله يحفظك.
لا اخوي خطاء الستوب ماينحط بالمكينه الا اذا كانت تنقص السياره دولك يوميا يعني الدخان وراك كانه فليت وناوي توضبها ولا غير كذا ماينفع بالعكس يضر

وبالنسبه لك صاحب الموضوع الله يعينك
ومن رايي حاول ماتروح عليه لين تنحل المشكله لان الطرمبه اللي ركبتها ماهو شرط
تكون شغاله تمام حتى لو جديده من الوكاله
لكن مثل ماقالو الاخوان جزاهم الله خير ابدا بالاسهل وبيعينك الله

[ابوطاقية]

صورة الاخ زاير الغيم بالنسبه للحساس فكه وخله رابط سنتين فقط وشغل الموتر وفكه لاكن انتبه من رشق الزيت اذا رشق بقوه طرمبتك زينه وماعليك من الانبير واذا كان ضعيف فطرمبة الزيت ضعيفه
هذا اختبار قوة ظغط الزيت
اذا الموتر مايصرف زيت والطرمبة تمام لاتوضب وتخسر نفسك
موترك مافيه الا العافيه

[ابن عكاش]

تأكد كم تحط فيه من علبه ترى مكينة 4500 7علب ومع السيفون7ونص
يمكن انك مقلل الزيت والعداد عطاك المستوى الحقيقي

[بواسامه]

اذا المكينه صوتها زين وادائها جيد ولا تنقص
فلا تحط ريال فيه وتوكل على الله
فيه جيوب مالها حساس ضغط الزيت ولا خلت مكان
وسع صدرك وانا اخوك واحفظ قريشاتك

[ابوراكان تبوك]

صار معي نفس مشكلتك بالظبط الانمبير حقت الزيت على الربع واحياننا على الخط الاحمر شلت السيارة بسطحة خوفا على المكينة لا تخبط وكل اللي في بالي انها طربة الزيت مع ان السيارة شبه جديدة
بغيت افك المكنية حتى اتفقت معهم على حق الفك والتركيب واشار علي الميكانيكي اغير حساس الزيت
( زي اللي في صورة زاير الغيم )
وقال اخسر 60 ريال وجرب
وجبت له حساس وغيره وضبط امبير الزيت 200% وطلب شغل يد 40 ريال واعطيته 100 لأنه فكني من خساير

[ساري 111]

انتبه للسيفون
السيفون اللي عند البناشر تجاري..

السيفون لاتاخذه الا من الوكاله وفيه نوعين تايلندي وفيه ياباني بس غالي شوي

[kmk9999]

اخواني جربت كل اللي قلتوه لي ونفس الشئ
وانا الحين بحائل وهذا ثان مشوار اروح عليه
وامشي عليه 160 وصوت المكينه ماتغير
ما شاء الله عليه
وش الدبره يا اخوان ابي كهربائي ثاني

[ن م ر]

اتوقع والله العلم ان موترك ما فيه الا العافيه

وكثير من الجيوب ( منها موتري ) مثل موترك ينزل عداد ضغط الزيت الى الربع أو أقل من الربع

أهم شي عشان ترتاح تأكد أن

1- صوت المكينه طبيعي وما فيه مشكله
2- الزيت ما ينقص عن المعدل الطبيعي
3- حساس الزيت اللي ذكره الأخ زاير الغيم يعمل بصورة طبيعيه


وعلى الأغلب موترك سليم والله يوفقنا وياك وتنحل مشكلتك

[ابوصالح77]

كل عام وأنتم بخير
مادامك غيرت الطرمبة والحساس فموترك مافيه شيء
أهم شيء : ركب سيفون صغير أصلي + سبع علب مو ست
شيك على فيش الحساس والسلك اللي راكب فيه
بالتوفيق

[kmk9999]

كل عام وانتم طيبين

يا اخواني انا فكيت فيش الحساس ووصلت عليه الفاحص حق الفيوزات
واناظر بلمبة الفاحص انه ما تشتغل الا اذا دست على البنزين
هاه وش المشكله مع العلم ان الحساس جديد

[بارق تميم1]

اغلب الاندكروزر فيه هذي المشكله
موتر الوالد vx_r ومن شريناه وفيه المشكله الي تقول عليها و الحمدالله ماشي تمام
اذكر مره قلت خلني اشوف وش السالفه ووديته لورشه قالي هذا عيب في اغلب الجيوب حتى الوكاله مايعرفونله
انت ريح بالك ولا تاكل هم موترك بإذن واحد احد مافيه مشكله

[kmk9999]

يا أخواني المكشاتيه

فيه ميكانيكي فتح الغطا اللي فوق المكينة

ودق سلف ولقا إنه فيه تهريب زيت من عند

عمود التيمن من جهت الأمام هل هذا صحيح؟

وقلت المشكله هذي لميكانيكي ثاني وقالي لازم

يصنفرها ويوديها للمخرطه


نسيت لأصورها

[كايد]

الله يجزبكم خير ويرفع قدركم .
اليوم بغيت اافك المكينة قالو فيه صوت عمود تيمن وضغط الزيت من الربع للنص
سألت البعض قالو مصنعي .
بحثت في المنتديات لقيت الموضوع هذا .
الصراحة رايتكم بيضا
لكن لاندكروزر مشاكله واجد
والنيسان افضل .

[الحربي 591]

اخوي انت فكيت راس المكينه...اللي انت مسميه غطا المكينه صح..
طيب ليش ما غيرت الوجيه
وانصحك تغير وجه كرتير الزيت لانه بالغالب هو السبب والناس دايم يهملون الوجه.. غيره وعلمنا ترا ما تكلف 100ريال مع التركيب

[0راعي الجبيل0]

اذا الزيت ياصل لعمود التيمن ماعندك مشكلة يالطرمبة
طرمبة زيت اللاند كروزر اسمها gear pump وهذي عبارة عن ترسين وسط بعض مستحيل تخرب الا اذا انكسرت تروسها او انصدع مجراها في حلق الموتر ولو صار احد الامرين بتسمع صوت صرقعة بوجهية الموتر ..

مشكلتك كهربائية وهي يالحساس عطلان وغيره افضل لك او ان الاسلاك مهترئة ولاتوصل كهرباء والاهم من هذا كله شيك على سلك ارضي المكينة يمكن ضعيف توصيله
اللاند كروزر يموت وطرمبة زيته ماماتت
من تجارب سنين معها ومع صيانتها

تم الإرسال من جهازي GT-I9300 بواسطة تاباتوك 2

[1824]

مشكلتك كهربائية الحساس ما يجيب قرائة صحيحة بسبب غير معلوم ما دام مافي صوت في محرك سيارتك توكل على الله وتقدر تصلحها في اي وقت او تخليها بكيفك ترى حساس يقراً وبس السيارة ما وقفت عليه ياما جموس مشيت 10 سنين قدام وضغط الزيت يلعب فوق تحت بس بدون صوت بالتوفيق يا صاحبي ولا تشيل هم

[أحمد أبوعلي]

مشكلة ضغط الزيت في اللاندكروزر معروفه
كان معاي gxr2004 تماتيك وفيه نفس المشكلة
ولا أثرت فيه
والأن معاي gx2006 ونفس الشغلة ولا ما فيه إلا العافية

[كايد]

الله يجزيكم خير ويرفع قدركم
مالنا غناة عنكم يامكشات
الشور بستخدم الين يفرجها الله

[ابو الريان]

اعتقد والله العالم ان المشكلة من الشبك الموجود في أسفل ماصورة الزيت داخل المكينة ، تلاقيه مسدود من الرواسب الموجودة في الزيت وهذا يخلي الضغط ضعيف ، جرب تسوي غسيل للمكينة وان شاء الله يظبط الضغط ..

[ashg90]

السلام عليكم جميع
اخوي فيه بعض الورش عندهم ساعه خارجيه مثل ذي
http://image.made-in-china.com/2f0j00RvsTnGhIVEur/Engine-Oil-Pressure-Test-Kit-6120-.jpg
يركبونها مكان الحساس وتبين له ضغط الزيت دور لك ورشه عندهم هالساعه وخله يشيك على ضغط الزيت عشان تتاكد هل المشكله من الحساس او مكينتك فيها مشكله واذا مالقيت ورشه عندها الحساس فيه حساس خارجي مثل حق الحراره يباع عند قطع الغيار يجي حساس ومعاه عداده ركبه عند كهربائي او ركبه انت اذا عندك خبره في الكهرب
ركبه مؤقت بس الين تتاكد من الضغط وهذا افضل حل

[مجنون فيها]

السلام عليكم..اخوي انا معي نفس موترك ..واﻻمبير حق الزيت زي ماقلت
ماشاء الله تبارك الله مااخلي عليه وﻻ مكان..مدام المكينه مافيها صوت خلاص
..وبعدين موترك وانت اخبر به
تحياتي لك

[رجل العدة]

هههههههههه الموضوع قدييييم الـــلــــه يعطيكم العافية