تكفون تكفون عندي تانكي فيبر ذبحتني ريحة الماء وطعمه المعروف وش السواة

[عبودكم]

عبييته أكثر من 50 مره وحطيت خل وماء ورد على قول بعض الناس و ما في فايده الي عنده حل يفزع لنا وتحياتي للجميع

[مشوت الحصى]

اخوي حاول تفرغ تممممممممماااااااماااا من الماء

وتتركه فترة الين تموت البكتريا اللي موجودة بداخلة
طبعا تتركة مفتوح للهواء
لان بعض البكتريا تتكاثرفي الماءالراكد بشرااااااااااهه


جرب لعلها تنفع

ولعل نوعية الفيبر رديئة
فأقترح
انك تدهن الجوانب بــ (بوية_ صبغ)

لا اعرف نوعة ولاكن مجرد فكرة




لتتأكد ان هناك بكتريا في التانكي
ادخل اصبعك والمس جدران التانكي

وسوف تجد انها تنزلق
للمعلومية
البكتريا
تسبب هذي الرائحة

علما ان العرق <<<<< اعزكم الله

لا تفوح ريحتة الا اذا وجد بكتريا

والسلام

المهندز خالد

[عبودكم]

اخوي الكريم (مشوت الحصى )
التانكي شريته من الرماية الي في الرياض 260 ريال 80 لتر قبل شهر تقريبا ما امداه تجيه بكتريا على قولك ويقولون ان هذه ريحة الفيبر لكن هل في حل مع الشكر على مشاركتك يا خوي (مرجم عفوا مشوت الحصى )

[السويبع]

اضن مافيه حل
اشتر سل استيل
عندي له اربع سنين من ابدع ما يكون
بس تراه غالي
بالف وميتين
بس سعره فيه

[* ضب *]

جرب واصبغ التانكي من الخارج باي لون وحاول ان يكون وجة البوية ثقيل وحاول ان لا يتعرض التناكي للشمس
طريقة مجربة وناجحة

[غيّام]

اولا: لا يضيق صدرك ولا شي هذي خزانات بيوتنا فيبر من يوم طلعنا عاى الدنيا والحمد لله ماشفنا الا الخير
ثانيا : سو مثل ماقال ضب اصبغه بأي لون انصحك بالون الرمادي
ثالثا: صب فيه خمس قوارير خل ابيض وخل في التانكي لمدة ساعه وخذبه كم مشوار عشان ينخض المحلول وبإذن الله انك بتدعيلنا
رابعا : وسع صدرك واضحك للدنيا تضحك لك


اخوك
غيام
للمراسله والماسينجر
mo3tz26@hotmail.com
والله ولي التوفيق

[كشات]

بسم الله الرحمن الرحيم

السلام عليكم ورحمة الله وبركاته

الاخ الغالي عبودكم

اولا وسع صدرك شوي

شف هالصوره وانا ما ستاسع صدرك لك مني غدا باي وقت انت تامر فيه

http://www.mekshat.com/pix/upload/images9/mk485_sabah alkhair1.jpg


هاااا بشر استاسع صدرك اخوي عبودكم؟

شف ياخوي
ابتفلسف شوي عشان نستفيد كلنا من مشاكل بعض

الفيبر غلاس عباره
1- ريسن(غراءسايل)
2-هاردنر(مجفف للغراء)
3- شعر(عباره عن زجاج,قزاز)مشذب بشكل ناااااااااعم مره يجي لفات مثل طاقات القماش والطرابيل
4-جلي كوت(ماده سيراميكيه)لها عدة فوائد أ-جماليه حيث تخفي عيوب سطح الفيبر الخشن دائما ب-تعمل كواقي من رائحة الفيبر


اللي عليك تسويه اخوي الغالي عبودكم
1- شف داخل الخزان اما بوضع مرايه صغيره مع وجود اضاءه كافيه داخل الخزان عشان نشوف ان كان مطلي جلي كوت والا ما فيه جلي كوت
2- اذا ماقدرت تشوف داخل التانكي الله لايهينك وقف لك اقرب بس (قطو) واقلع عينه (تسلفه ) واشبكه بوايرات وادعس عين البس بالتانكي عشان تقدر تعرف ان كان التانكي من داخل مطلي جيلي كوت او لا
3- ان كان مطلي جيلي كوت وسطح التانكي من داخل ناعم فما عليك الا انك تصب لك شوية صابون سايل فيري او لوكس ومعه شوية كلوركس وعب التانكي الى قبل مايمتلي بشوي عشان الهوا الي داخل يترك مجال للماء والرغوه انه تتحرك وتفرك التانكي زين وغط التانكي زين
وتمش لك شوي باقرب نفود عشان الخلطه اللي بالتانكي تتفاعل واذا رجعت فرغ التانكي وعبه بنفسه الطريقه ولكن خله واقف مثل اللوح بالشمس تصكه لين يعرف يغربلك مره ثانيه وبعد كم يوم (التانكي مليان صابون وكلوركس) خذ لك لفه بس بالحاره لاتبعد كثير
وفرغه
واغسله عاد بمعرفتك مرتين ثلاث اربع حسب حلاوة وملوحة الماء اللي تستعمله المهم اغسله لين تروح الرغوه كلها ولا تحط اي شي بالغسيل النهائي غير الماء

واتركه حتى يجف خل فتحاته العلويه والسفليه مفتوحه حتى يتهوا والشمس تصكه صكا مبرحا حتى يتأدب

والحين اتوقع انك منت محتاج عين البس
بتلقاه ينتظر عوينته يحول حط عليها سيليكون وادعسها بدميجته بس انتبه لاتركبها مقلوبه بعدين يمشي على ظهره :p



انا وش لقفني اتميلح عليك
بس عاد عقب الصوره اللي فوق قلت اكيد انك بتتحمل غثاي وكلامي الواجد
سو الطريقه وعطنا النتيجه حتى غيرك يستفيد

[nooh79]

بسيطه ياخوي
رح كل شيء للتنظيف وخذ منه كلور خاص بتنظيف الخزانات ومعه فرشه خشنه ومن ثم غسل الخزان زين وادعكه بالكلور
او غسله =====بشوية====== يعني قليل كلوركس حق الملابس -----------انتبه ----------فهو سام ومضر بالصحه

[عبودكم]

أخوي السويبع
أخوي (الضب)
أخوي غيام
أخوي كشات (الله يوسع صدرك)رهييييييييييب
أخوي نوح 79
أشكركم جميعا على المرور والتعقيب وسوف أجرب كل الطرق الي قلتوها وأعطيكم النتيجة ;)

[الاصفر]

السلام عليكم
يا الغالي ولا عليك امر ...اسمع من اخوك.. عب التانكي ماء وحط فيه مسمار الاكل ونقعه فيه ثلاث ايام وبعدها فضه اذا ما نفع الله يعوض عليك وشتر واحد ثاني او قصه وخل احد يصبلك قار داخله بس المسمار مجرب

[ابـ معزي ـو]

لا تقعد تحاول به اخوي

مالك الا تانكي الومنيوم ترا مامثله معروف مايحتااااج


الفيبر والله ماحد يمدحه يارجال الفيبر اذا طلعت ريحته ماعليه حسوفه

حتى انت شف الفيبر اللي على صناديق الدداسن والهلكسات والجيوب و.....إلخ.

تلقاه اذا غسل السياره وهو بوسط المغسله تلقا ريحة خياس ولكم الكرامه

هذا من الفيبر ما انصحك بالفيبر

خذ لك تانكي الومنيوم اذا غلا تلقاه (( 250 )) .

وفيه بمحافظة عفيف بأحد محلات الحداده يقول لي خذه [ 2 سم ] بـ 180



وانشاء الله تكون استفدت




اي خدمة

[أبـ [مطلق] ـو]

لكن لو بتنضفه وقل مثلاً راحت الريحه

يجيه وقت ترجع ريحته زي أول

يعني والله ماينفعك الا لفتره بسيطه بس



.

[بواسامه]

نصيحه

دعه ولا تكثر عليه التأ سفا

وطق لك المونيوم لك للزمن

وكل طقه بتعلومه

[أبو يوسف]

الالمنيوم كم اسعاره ووين القا من يفصله ؟؟؟

مع الاعتذار لصاحب الموضوع

[ذيب المساري]

اخووي عبودكم
كانت عندي نفس المشكله وديته عند المحلات الي يغسلوون توانكي البيوت وراحت الريحه

[عاشق هدوء]

اذا كان طاقته الشمس لو تغسله بماء ورد ماراح تروح ريحته لكن اطلب العوض من الله

[الكونترولCONTROL]

حط فيه ملح خشن و خل الماء نصف التانكي و اتركه مدة يومين او ثلاثة - ليقتل البكتيريا
----------------------------------------------------------------------------------------------
ثم فرغ الخزان و اغسله - ثم توكل على الله
========================
كل 3 اشهر يلزمك تسويها مرة
===================
و السبب في وجود البكتيريا هو تركك الخزان فارغا - انت تظنه فارغ و هو فيه ماء قليل راكد ننما يوفر بيئة للبكتيريا تتجمع ثم يتعفن الخزان
======================

[الـ ع ـارض]

خالي انا عندي تانكي فيبر واستخدمه من سنتين ومافيه ريحه ولا طعم ....

بتقول شلون ؟؟؟


اول ما سويت التانكي قالي صاحب المصنع عشان تروح الريحه والطعم جب كاس عصير ليمون طبيعي ونص كاس خل وصبهم بالتانكي وحط التانكي بموترك وعبي ثلاث ارباعه مويه همن استخدم السيارة بمشاوريك العاديه وبعد 24 ساعه بالظبط لا تزيدها فضي التانكي من المويه والعصير والخل طبعا وعبي ثلثينه مويه عاديه بدون اي اضافات واستخدمه 24 ساعه ثانيه همن فضي التانكي ... وطبقت نصيحته وبالفعل سنتين ما له ريحه او طعم .... مع اني انزل التانكي بالبيت واخليه شهور ما استخدمه ولين جيت استخدمه بس اغسله بشوي مويه واكبها واعبي التانكي واتوكل على الله ......


جربها وبتدعي لي ولصاحب المصنع

[صاروخ]

نصيحه

دعه ولا تكثر عليه التأ سفا

وطق لك المونيوم لك للزمن

وكل طقه بتعلومه

مالك ومال الشقا :no2:
وأطلب الخلف من الله

[CRUISE**كروز]

والله يالربع الفيبر خساره:(
والقهر سعره غالي
تونا شرينا واحد جديد صناعة الزامل يعني احسن نوعيه
وحطيناه بالبيت نبيه للماء الحلو ولكن الله يخلف
من يوم حطيناه وطعم المويه متغير والشاهي والقهوه دمار في دمار
ولاندري وش الحل