يا اهل الاحساء الكرام افيدوني...عن العقير وزبنه

[بيتر]

مراااحب ...
هل التخييم مناسب في العقير او زبنه وما حولها :s ...

وين افضل مكان :good2:...واقرب خدمات محطه او قريه فيها خدمات او شقق مفروشه وكم تبعد...;) وكيف الجو في الظهر...

هل افضل الوصول هناك عن طريق الهاف مون او من طريق العيون ما نستغني عن فزعاتكم...@

[وحدآني]

انا بصراحه ماخبرت احد يخيم بعقير بالصيف

وبالنسبه للمحطه اول ماتوصل عقير تلقاها يمينك مافيه غيرها
ومافيه شقق مفروشه ولا غرفه ولا غيره مافيه الا مظلات خخخ

وبالنسبه للجو بالظهر مايحتاج اعلمك صيفنا واحد والشمس حارقه

بالنسبه لزبنه سمعت ان حرس الحدود مانعين الصيد فيها

وبالنسبه للطريق انا سمعت ان طريق هاف مون خطر وفيه بعارين وهيك
روح على خط العيون اضمن لك مع انك بتلقى تعديلات بالبدايه حوالي 500 متر
لكن باقي الطريق اوك

اتمنى اني قدرت افيدك

[زاحف بحر]

عليكم السلام ورحمة الله وبركاته


يالغلااااا قبل كل شي انت ما حددت موقعك بالضبط علشان اوضح لك


المسافة اما بالنسبة للعقير تبعد عن مدينة العيون 70 كليو


اما عن الهفوف 100 كليو تقريباً ..


اما الخدمات اللي في العقير طااال عمرك ما عندك الا محطة وحدة فقط


اما شقق او غرف ماكو شي حولك الا مظلات او بعض الباعة البسطة


في العقير مؤكلات او العاب اطفال يعني طال عمرك لا تجي الا و كانك


بتهاجر وجيب كل شي يخصك يعني اضمن لك طبعاً كل عيد يسوون


مهرجان في العقير لكن في عيدالاضحى فقط تقريباً واي شي تبية


طال عمرك زاحف نت بخدمتك وخدمة مكشااات ..



بالتوفيق لك للجميع ..






..

[عبادي بليزر]

بيتر

الأخوان ما قصرووا كفوو و وفوا

أما بالنسبة للطريق من هافمون هو اقرب بكثير من انك تطلع من العيون

و اوصف الطريق من هافمون

طبعاً تطلع و كأنك رايح شاليهات الخليج..

حط رجلك حتى يجيك مخرج على اليمين عليه لوحة ( الشركة السعودية للكهرباء - محطة القرية )

ادخل معها و امش لا تروح لا يمين و لا يسااار خلك على طوول بتشوف علي يسارك و انت ماشي شاليهات جديده تنشأ و غيره من الشركات

ما علينا من الكلام

انت بتمشي و بالأخير بتوصل عند شاطئ القرية ( قرية ارامكو ) على يسارك اطلع على طوول بس انتبه للطريق خفف و بعدها بيجيك نافذ يمين خذ معه يمين .. بتلاقي سكيكو بعد خلهم عنك..

خلك ماشي على طووول .. حتى تطلع على الخط.. في نفس التقاطع اللي بتطلع عليه بتلاقي نقطة تفتيش

كالعادة النقطه فاضيه بس فيها جيب دورية ضاربه الحلا هع

خذ يساار .. و امش حط رجلك اشوي و بعدين يجيك شارع يسار ( العقير) ادخل و وسع صدرك

بس اعطيك نصيحه

اذا دخلت العقير. طبعاً المظلات جديده و زراعه و حركات..
اذا دخلت رووح امش إلى آخ شي.. راح تشوف مظلات بس بدون عنايه.. يعني بدون زراعه وحركات

روح اجلس هناك

لأن البحر هناااك مرررره ممتاااز.. و خصوصاً ان العمق يكون قريب.. مو مثل اللي عند المكان اللي فيه العناية...


و عساك ع القوة.. و لا تنسانا من التقرير المصور

تحياتي

[بيتر]

رحم الله والديكم عزالله انكم اهل فزعات مايلحقني فيكم شك....بس مشكله الجو كنت متوقع فيه شقق غرف قريبه...بس على هالحال مايصلح التخييم على راي اخونا وحداني...عيد الفطر حر شديد وعيد الاضحى برد شديد..

تقبلوا تحياتي,, وكل عام وانتم بالف خير

[زاحف بحر]

هلا وسهلاً فيك يالغلاا..


أما بالنسبة للتخيم انا أشوف الجو مو حار ذيك الدرجة

يعني الجوو بدء بالاعتدال يالغلااا اذا انت بتروح تخيم روح

يعني انا اعتبر هالوقت وقت تغييير( خروج الصيف ودخول الشتاء)

والجو بعد العيد راح يصير للاحسن .. الله يوفقك ..



بالتوفيق للجميع ..






..

[لحظةوداع]

شوقتوني لشاطئ العقير
ودائما أستمتع بآآخر المظلات
وآخر الشاطئ مايمشي إلا 4*4

[accentkool]

بالعيد العالم كلهم مخيمين بالعقير ناس واجد بالعكس الجو بدا يتحسن عن اول واما عن الشقق لايوجد والصيد بالعقير جدا ممتاز شوارات وقصبات بس خلك اخر المظلات من بعد الفرضة والعقير حلوة بالعيد