فزعتكم ياأهل مكشات الغالين لايطيح الفأس في الراس,,ايجاد حل لي مع هذه الدلال والبريقات

[عز نفسك]

السلام عليكم ورحمة الله وبركاتة


كل عام وأنتم بالف خير وعساكم من عوادة أن شاء الله

أخواني أبي فزعتكم أنا عندي عيد بعد بكرى وعندي دلال وبريقات ما قد طبخة فيها من 6 شهرو خاصات للعزايم الكبيرة وطالع فيهن ريحة ( أجن ) يعني الريحة هذي تطع مع الطبخ وتطعم بالقهوة والشاهي وطبخت فيهن لين عجزت من الشاهي والقهوة ما راحت خفت بس وابي فزعتكم وانتم تخبرون الشيبان ما يرحمون بهسوالف ...

هل لهن طريقة أسويها وتروح الريحة ؟؟؟؟

[الحزوبر]

ود دلالك للصناع ورب دلالك

تحياتي.

[صاحب الذئب]

[QUOTE=الحزوبر;5222633]ود دلالك للصناع ورب دلالك

تحياتي.[/QUO
مافيه كلام عقب هاالكلام
رب الدلاااااااااااااااااااااااال:good2:

[عز نفسك]

أدري أخوي بس رابهن قبل أخر طبخة

والبريقات؟؟؟

[سيف الذهب]

اعتقد مالهن غير الرب

[رفيع المقام]

بالنسبة للدلال فوح فيه عويدي كذا مرة وإن شاء الله تروح الرائحة.

هذا إذا كنت رابهن قريب.

[ابوصالح77]

هلا بك أخوي
فوح فيهن ماء وملح
وبعدها زين فيهن قهوة وشاهي وبيروح إنشاء الله
من واقع تجربة

[عز نفسك]

الله يجزاكم الف الف خير وابي أجرب الماء والملح

[bader_max]

انا صارت معي وفوحت ماء وعويدي ومكثر العويدي

[محرين باالخير]

حياك اخوي انا تصير معي احيانا وطبخ فيهن قهوه محروقه مثل القهوه التركيه مو قهوتنا الفاتحه تراها ماتسوي معهن شي وانت جرب وشوف والله يستر وجهك من الشيبان ترا رضاهم صعب

[رواق]

وين مكان اللي يربون وينظفون الدلال والأباريق في الرياض ياشباب ؟


انا عندي دلال واباريق أشكال وأنواع مجمعات في المخزن من سنة وأكثر وشكلهن مضيق صدري

وهل الملقامة يلزمها أو يكتفى بتنظيفها في البيت ؟

[العاذر]

الاباريق اغسلها بماء حار وبعدين فوح فيها شاهي ربع ساعه او اقل

ونتهى الموضوع

بس انتبه ونا اخوك لايكون فيه اوساخ ورواسب في فم الابريق من تحت عند الشخال

افحصها مضبوط

شكلك مخزنهن بدون اكياس نايلون لابد من وضع كل دله وابريق داخل كيس ويغلق جيدا



والدلال حط بوسطها قهوه او عويدي وخلها تطبخ

المسئله بسيطه

او ضعها في ترامس زمازم وريح راسك

[عز نفسك]

الله يعطيكم العافية يا شباب لكن البريقات طبخت بهن ليمون وشاهي أفضل شوي هو مشكلة الغضار ما يترك علطول

[ramisif]

أخوي عليك بالسفن

أغسلهن بالسفن وأفركهن زين

[ترهيم]

بنسبه لدلال وانا خوك اطبخ فيها مثل ماقول لاخوان عويدي وان ماراحت مالك إلا تربها من جديد ... عموماً يجب المحافظه عليها وقت التخزين بتغسيلها وتركها حتي تنشف وتغليفها بكيس كل وحده لحالها ..

اما الاباريق غير وش نوع الاباريق !! اذا ستيل غريبه .. اما اذا نحاس ارمها طول يدك بتلقى فيها الوان خظراء مع الاطراف وهذا صدا النحاس وعلى ماسمعت انه ســــام ..

[جزاء الشمري]

ودهن للصناع يربهن لك

[بو جريس 73]

اشتر ملح الليمون وفوحه بأي قدر او دله مدة 10 دقائق وبعدين الدلال والأباريق فوح فيهم هيل او قهوه والجدور فوح فيهم هيل وعويدي وكل عام وانتم بخير

[ملاس]

حط لك بيالة كلوركس بالبريق وحاول انه يدور داخل البريق (رجه ) ولاحظ النتيجة باللون شرط ان يرجع جديد
بالنسبه للمصب سده من الخارج بمنديل او بلاستك وخل الكلوركس ينزل داخله لفتره ثم اغسل البريق عدة مرات بالماء

[اسد الطوارق]

هلا بك أخوي
فوح فيهن ماء وملح
وبعدها زين فيهن قهوة وشاهي وبيروح إنشاء الله
من واقع تجربة
البارح شريت ابريق شاهي هندي من السنيدي
قيمتة 16 ريال
رحت البيت وسويت فيه شاهي للتجربة وكان فيه طعم غريب خرب الشاهي
حطيت فيه ماء وغليتة ثلاث مرات ولا فيه فايده

قمت ادور بالمنتدى حتى لقيت هالفكرة وفعلا حطيت ملح خشن ملي اليد وعبيتة ماء حتى الغطى حق البريق وخليته يغلي
فعلا راح الطعم الغريب
حتى لون الابريق من داخل تغير لونه صار ممتاز مثل اباريق العالم

وترى لك فنجال شاهي على فكرتك الطيبه عندى محفوظ متى ماشفناك
انت وجميع من طرح افكار مشابهه

وعسى صاحب الموضوع الاصلي زانت اباريقه