قبل 5 سنين بايع باترول 92

[مشرع الباب]

السلام ياشباب قبل 10 سنين شريت جيب باترول ب 28 او 38 والله اني ناسي بس اغلب الضن انه ب28 المهم الموتر زين وكد معي ولا عليه كلام لاكن حبيت ابيعه قبل 5 سنين والله اني بايعه ب11 الف الحين اجي اشوف السيارات الي مثله توصل 25 الف غريبه هل السوق الحين يبالغون فيه ولا كيف اذا ان الجيب 2004 ب35 ربع نضيف وربع زيه 97 نفس القيمه معقوله.؟؟؟؟؟؟؟؟؟؟؟؟؟؟؟؟؟؟ احد يفسرلي هل معادله

[قدر مكتوب]

اخوي قبل 5 سنوات كان النزين غالي والباترول مش مرغوب لان يبي شغل من تحويل لديزل وتركيب مكينه وخلافه

الحين تغير الوضع ياربي لك الحمد والشكر النزين رخص والاخضر يخب على الباترول والموتر راسي وحلو وخفيف نفس بالبر

[الصقر المهاجر]

اخوي مشرع الباب كل عام وانت والحبايب بمنتدانا بخير وعافية ومن العايدين للجميع !!!!
سبحان الله انا والله من فتره نفس الموضوع يدور بخاطري سبحان الله وانا شخصيا كان عندي سفاري باب واحد موديل 91 كل شي فيه مغير ومجدد ونظيف جدا وبعد حركات مدلع قير اوتوماتيك المهم الموتر ما ودي اكثر نظيف بمعنى كلمة نظيف !!
بعته تصدقون من يمكن 3 سنوات او اكثر شوي ب18000 ريال الحين ادور واسال عن مواتر مثله ولا تجي نص نظافته اسمع اسعار مبالغ فيها وغير معقوله مدري وش السر هل الشعب من جد والا الدنيا فيها شي وحنا نرفع الاسعار بلا منطق معقول الله العالم سبحانه !!!
عموما حبيت اطرح تجربتي الشخصية لعل الاخوان بعد يشاركونا الرأي ليستفيد الجميع وتقبلوا جميعا تحياتي !!
شاكرا مرة اخرى لصاحب الموضوع !!!

[شروكي500]

حياكم الله يالغالين
وكل عام وانتم بخير
والله انا من توقعاتي الي رفع اسعار البواترول التعديل او الترهيم الي مكاين ال اس ون الي طاحوا فيها اغلب الشباب السنين هاذي لانها على الباترول من توقعاتي انها تسقط مكينه الكابريس من دون ما تغير الجير والدفرنسات
والشكر لصاحب الموضوع

[abu thameer]

السلام عليكم ورحمة الله وبركاته
كل عام وانتم بخير ومن العايدين وينعاد عليكم وانتم بصحه وسلامة
موضوعك حلو يا مشرع الباب انشاء الله مشرعه على العلم الطيب في عام 2004 اشتؤيت جيب نيسان ربع من البحرين كلفني الين وصل السعودية يمكن 19000 الف انا شاريه 14000 او 15000 ماني متذكر وزينته ماخليت شي الا غيرتة قطع اصلية واستخدمتة سنتان ونصف وبعتة 13000 الف ولقيته العام في منتدى مكشات نفس الموتر وطالب رعية مبلغ حول العشرين شي غريب حقيقة

[هموووس]

انا بايع قبل خمس سنوات باترل سفاري مديل 94 والله ماشي 140 الف وحولها ونضيف بمعنى الكلمة
13 الف واليوم ادور موديل 90 نظيف بنفس سعره وما لقيت

[عالي الكيف]

اخوي مشرع الباب
ولا يهونون الشباب

انتم تسألون عن سبب ارتفاع النيسان وخصوصآ الباترول القديم والجواب حسب معرفتي المتواضعه :

1/ جهل الناس بمزايا النيسان قديمآ ومما ساعد في التعريف في جيوب نيسان
اولآ القنوص وبالتحديد الصقاقير فهم جربوا انواع الجيوب ولم يخدم معهم مثل النيسان .

2 / زيادة الوعي العام حيث كان شريطية السيارات يمجدون سيارات معينه والمستخدمين لها (بساقتهم)

3/ نعمة الله علينا بانخفاض سعر البانزين .

[ابوصالح77]

اخوي مشرع الباب
ولا يهونون الشباب

انتم تسألون عن سبب ارتفاع النيسان وخصوصآ الباترول القديم والجواب حسب معرفتي المتواضعه :

1/ جهل الناس بمزايا النيسان قديمآ ومما ساعد في التعريف في جيوب نيسان
اولآ القنوص وبالتحديد الصقاقير فهم جربوا انواع الجيوب ولم يخدم معهم مثل النيسان .

2 / زيادة الوعي العام حيث كان شريطية السيارات يمجدون سيارات معينه والمستخدمين لها (بساقتهم)

3/ نعمة الله علينا بانخفاض سعر البانزين .

كلام:good2::good2::good2::good2::good2:
وأزيد
مركب القديم أفضل من الجديد
القديم صدامات حديد
أخف وزن

[التعـ King ـديل]

السالفه ومافيها

الدراهم منول واجد اسهم وفله حجاج والواحد يطنخ يبيع القديم برخص التراب ويطق له وكاله

ويوم طاحت الاسهم ودحدرو الناس رجعو للقديم وطارت اسعاره

والدليل على كلامي عام 2003 بايع كامري بوكس ماشيه 65 الف ب 38 الف موديلها 2002

والحين مثلها بالسوق واردى منها بالنظافه على 30 و 35

الجي اكس مشتريه ابوي عام 97 قير عادي وثلاجه ومكيفين وشنطه ب 90 الف

والحين بالسوق سعره بال 60 وال 70

مع العلم بايعه ابوي جديد بطاقه جمركيه على وقته ب 85

وعام 2003 يوم بعت الكامري اشترى ابوي مثله بيج ونظيف بالحيل ب 35

والحين طار

[الباترول دمي]

اولاً: كل عام وانتم بخير
ثانياً: بالنسبة للموضوع بلخصه لك في نقاط:-
1- انخفاض سعر البنزين كما قال الإخوان ويدلك على ذلك قبل لا يرخص البنزين كان الديزل غالي ولآن رخص
2-ارتفاع اسعار السيارات المنافسة له مثل (الاند كروزر والشاص والربع ) مما ادى الى الإقبال عليه
3- كثرة ترهيم كما ذكر الإخوان هذا النوع بالذات بسبب مزايا خاصة وخاصة مكينة الفتك مما ادى الى ارتفاع اسعار المكينة نفسها
4- كثرة النظيف منها في تلك الأونة وبذلك تكثر الخيارات ويقل السعراما الأن قل وجود النظيف منها فيزيد في سعرها
5- الغلاء الفاحش لسيارات الجديدة
6- صيانتها رخيصة نسبياً مقارنة بالسيارات الجديدة

[القاف2010]

كل عام وانتم بخير اطلعت علي الاخوان المشاركين في الموظوع لم اجد الجواب ياخوان اسبب هوان الجمارك او صانع القرار((الله يجزاها خير )) لاتسمح بدخول السيارات التي مضى علي صنعها اقل من خمس سنين من السيارت الصغيره والسيارت الكبيره عشر سنين واما الارتفاع بالاسعار ليس علي سياره معينه لو نظرت الي مثل سعر الوايت العايدي نوع مرسيدس موديل 78 لايقل سعره عن 100000 ووو غيرها من المبالغ في السعر
واشــــــــــــــــــــــــــــــــــــكرا

[SRAAAB]

كل عام وانتم بخير
كل شي وله وقته يالربع
وأول ما أحد يعطيه وجه بس يوم إلتفتو الناس له كل طار به
مثل الجنوط الهلل أحد يركبها أول والله ما أحد يدري عنها
وسع صدرك بس ومشكور على الموضوع
وكل شي بيتغير اصبر شوي شف وش السيارة اللي بتطلع ألحين وهي ماتسوى 5000 وبتوصل الاربعين
لكن الحمد لله على نعمته

[دل البحار]

السبب انو الجيب حلو وصبور ولا طلع بعده افضل منه ورخص البانزيم وحلاته للكشتات ماهو زي الربع تويوتا
ينفع الربع تويوتا للدواير الحكوميه ما احد يبغاه الا موضف سابق في مجال امني عارفه
لكن الباترول موتر مريح وجنتل وقوي
اسعارها واحد عارض 96 بحدود 42 الف سوم وحده 45 الف في منتدى حراج للسيارات

[وسيع البنايد]

السبب الرئيسي وهو القرار الذي وافق عليه النائب الثاني بمنع استيراد السيارات التي عمرها اكبرمن خمس سنوات من بعد هذا القرار والسيارات المستعمله في ارتفاع ولا زالت النسب في ارتفاع واملنا في الله كبير ثم في القياده بدراسة هذا القرار مجددا حيث ان الفائده منه تصب فقط في مصلحة وكلات السيارات فقط وضرره واضح على المواطن

[هويدي]

تعقيباً على كلام الاخ صاحب الموضوع


اذا ان الجيب 2004 ب35 ربع نضيف

كان لي صولات وجولات بمعارض الرياض والقصيم العام الماضي
2004 نظيف بخاخ ماشي 140 الف يسام 47 وحاده بخمسين

ولقيت بمعرض جيوب شركه 2002 كلبليتر يقول ـ ولا ادري عنه ولا احط بذمتي شي ـ تسام 46 !!

وقبل خمس سنوات 97 بمعارض النسيم ماشي 300 الف وكسور يسام 32500

[العابر2222]

وازيد على كلام الأخوان التجاهـ الناس والشباب للدفع الرباعي بشكل ملحوظ

وميزة النيسان يقبل الترهيم في كل شي لو تبي تفككه قطعه قطعه وترجعه عادي جدا ولا يأثر فيه

خفيف في البر يتحمل الجلد


أخوي شراله قبل كم سنه نيسان 89 طويل بــ 14 الف مكيفين فل كامل وكديناهـ كد الين اذن ونطلناه عند البيت نقول هذا معاد يجيب شي ابد ويجلس واقف يمكن 6 شهور مغبر لا اشتغل ولا شي ويجي واحد قال الموتر ابيه قلنا سم قال 20 الف وبعناه له .... والله اني اقوله وش تبي فيه يبن الحلال ما ابيه يتوهق فيه .... يقول ما عليك مني انتم بتبيعوني ولا لا ..

[مشرع الباب]

حياكم الله وكل عام وانتم بخير جميعا واشكركم للمشاركه في هذا الموضوع
انا اشوف ان اكثر سبب اقنعني هو رد اخوي صاحب الرد..((((((ر اطلعت علي الاخوان المشاركين في الموظوع لم اجد الجواب ياخوان اسبب هوان الجمارك او صانع القرار((الله يجزاها خير )) لاتسمح بدخول السيارات التي مضى علي صنعها اقل من خمس سنين من السيارت الصغيره والسيارت الكبيره عشر سنين))))))

والعلم عند الله

[مشرع الباب]

اخوي دل البحار و هويدي والله الاسعار ماهي طبيعيه اذا بوصل الخميسن في موتر تاريخ انتاجه قبل 6سنين او اكثر ياخوي بزوده 20 واخذ موديل الي قبل الجديد في ناس تقول ارغب القديم اصبر ومن هل كلام يمكن فيه شوي صح بس الموتر طلعت عافيته لو بقا فيه شي ماتقارنه مع الجديد في حتى لو بديه ارداء لاكن الشركات تنتجا دايم افضل واقوى عشان تبيع اكثر ماتوقع تنتج ارداء من الموديل الي قبل والمكاين كل يحاولون ينتجون اقوى هذا والله اعلم

[kellahd]

لا التفتوا له ولا شيء

المواتر السلاكة =
اذا قدمة وصلت الى منطقة يقال لها منطقة الصفر تجدها سنين تراوح فيها ما تنزل و يصير الفارق بينها نظافتها و جودة العرض من صاحب السلعة (( يعني زبرقة السلعة بالكلام الذي يجعل المشتري يقدم )) طبعا ليس من جود السلعة المعروضة و لكن من زهلقة العارض لسلعته حيث استفاد من الدعاية العامة عند الناس ان هذا النوع جيد و انه كد و مد الى آخره من السمعة المنشورة بين الناس يستفيد منها هذا العارض و يحلويها في نظر المشتري
و هذه الانواع مثل ونيت الداتسون و الهايلوكس و الكرسيدا و الشاص و الباترول و غيرها

اضرب لك مثال داتسون ونيت موديل 86 مبيوع بـ 7500 ريال
ونيت داتسون موديل 92 مبيوع بـ 8000 ريال
شوف الفرق 500 فقط مع فارق 6 موديلات
و ونيت داتسون موديل 88 مبيوع بـ 7000 ريال

هذه الاسعار تعتبر وصلت الى مستوى النعال (( انت و الاعضاء بكرامة )) فهل يتغير سعر النعلة

===========
اذكر لك قصة
اشتريت ونيت داتسون موديل 82 من صديق كان رامي السيارة تحت شجرة بـ 500 ريال
انا اللي اعطيته اياها و الا هو رفض و قال خذها مجانا بس عشان تظهر منه و لا يتحسف او يطلب مبلغ بعد زمن لها الزمته بأخذ الـ 500 كانت هذه القصة قبل 27 سنة كانت تحت شجرة مغبرة
اخذتها لا فيها كمبيوتر و شريحة في المفتاح و لا تعقيدات سيارات اليوم
نفخناها و ركبنا لها بطارية و عبيناها زيت و بنزين و صيانة خفيفة و شغلناها و اشتغلت تسد الشارع من الدخان تصرف زيت
سقطت لها شنبر و سبيكة و ركبت لها مكيف حيث انها عادي و بعد استخدام 8 او 7 سنوات بعتها بـ 8000 ريال

[مشرع الباب]

ههههههههههههههههههههههههههههههههههههههه والله صادق بس ابيك تشوف اسعار الباترول 98 و 99 وراعيه يشرط نضافته كامل وكاله مايتعدا 42 الف ونجي نشوف مديلات 93/94 الخ.. توصل حووول نفس القيمه واحيان توصله يعني ب 35 و37 واحد يقول 45 هنا علامت تعجب وتعقيب على كلامك هل هي النظافه بس؟ وزبرقه

ماتوقع اما جهل لزبون او دعاية لموديل حنا نقول الموتر زين بس ماتوصل قيمته كذا يناس

[m9y3b_396]

باختصار شديد اللي غلى السيارات المستعملة وانها تاصل سعر خيالي
هو ان السيارات الجديدة غلت!!!! اقرب مثال السفاري الجديد 2010 بحول 250
و2009 كان الفل بحول 160 تقريبا
وكذلك الاندكروزر 2011 تعدى 300 الف يعني اسعار خالية
و 2007 كان تقريبا ما ياصل ال 200
وكل ذلك التجار يتعذرون بان الدولار طايح امام اليورو
والريال السعودي مرتبط بالدولار عشان كذا الريال طاح مع الدولار
هذا هو السبب اللي خلى القديم يغلى لان الشعب السعودس طفران
ما عنده استعداد يشتري موتر ب 300 ويطام به في البر
ودمتم 000000

[وضح النقى]

نعوذ بالله من الغلا
نعوذ بالله من الغلا
نعوذ بالله من الغلا

[محمد العوني]

اولآ قرار منع استيراد الموديلات القديمه...

ثانيآ رخص البنزين..