من يدلني على ورشه متخصصه في اليوكن

[المسافر574]

سلام عليكم ورحمة الله وبركاته

بداية كل عام وانتم بالف خير
وتقبل الله منا ومنكم صالح الاعمال


يا جماعه معي يوكن 2006

اذا شغلت السياره وهي بارده الوضع زين اذا تمت اربع دقايق او حولها وهي تحتمي السياره
بعد كذا
يطلع صوت طق طق طق طق طق

اطفي واشغل مره او مرتين يروح الصوت

وبعد كذا ما يطلع الصوت

الا اذا بردت السياره

وش الحل طرمبه زيت والا وش بيكون

الي عنده علم او يعرف ورشه ممتازه يدلني عليها وله الدعاء

[figo_2776]

روح اي واحد عندة كبيموتر

[saad.saud]

السلام عليكم
اذا كان الصوت مثل الصرصرة من المكينة فهو يمكن من طرمبة الزيت .... لكن قبل ماتسوي شيء شيك على بعض المواضيع في المنتدى يمكن تحلها بـ ( تيب سباكة الأبيض ) أو بطريقة أخرى بسيطة بدون ما تتكلف عناء تغيير طرمبة الزيت

[المسافر574]

الصوت مش صرصره

الصوت بعد تشغيل السياره اربع او خمس دقايق يطلع مثل طق طق طق

[المسافر574]

وين فزعه المكشاتيه اهل الخبره ابي احد مرت عليه نفس الحاله او يدلني على ورشه مظبوطه

[قطيفان]

ياخوي شوف عيار الزيت الموجود الطبلون اذا كان المؤشر يتجه لليسار وانت تقود السيارة فعلم ان طرمبة الزيت فيها مشكلة ,, واذا كان متجه الى اليمين فالمشكلة من شئ اخر ,,,

[تناهيت]

يا طرمبة الزيت ضعيفة يا صوت تكايات بلوف يبيلها تغيير جلد بلوف
هل تلاحظ دخان ابيض اذا دعست والموتر بارد

لأنها صارت معي على جمس 2002 وغيرت جلد بلوف وراح الصوت لاكن انخفض ضغط الطرمبة

هذا يعني انه من الممكن تكون المشكلة من الأثنين

الأفضل انك تحل المشكلة و اذا خليته على حالها ما فيه تأثير خطير على المكينة شرط ضغط الزيت ما ينزل عن الثلث
تحياتي

[تناهيت]

http://www.mekshat.com/pix/upload04/images164/mk53291_bjpjgjoog.jpg





يفترض ان يكون ضغط الزيت وانت ماشي فوق النصف مثل الصورة اللي تحت واذا كان الموتر واقف يكون على النص مثل الصورة أعلاه

http://www.mekshat.com/pix/upload04/images164/mk53291_nfgipjgpi.jpg


ياليت تذكر حجم اليوكن 1500 ولا 2500 + كم قراءه عداد الزيت عند الوقوف وعند المشي

[YUKON SLT2004]

ياجماعه كيف اعرف اذا اليوكن 1500 ولا 2500 انا عندي يوكن خليجي موديل 2004 دبل فل كامل و الجنط 6 بلوط هل هو 1500 ولا 2500 ؟!

[تناهيت]

ياجماعه كيف اعرف اذا اليوكن 1500 ولا 2500 انا عندي يوكن خليجي موديل 2004 دبل فل كامل و الجنط 6 بلوط هل هو 1500 ولا 2500 ؟!


موترك حجمه 1500 مكينة 5300 سي سي وقيره حجمه ال 60 l نظام التعليق يايات
الــ2500 يجي 8 بلوط مكينة 6000 سي سي نظام التعليق سست

تحياتي

[الوافي0]

جميع اليوكنات حجمها 1500 والمقصود بها الوزن الي تشيله السيارة ويترتب عليه حجم الماكينة والقير والدفرنس يعني طن ونص
و2500 يعني طنين ونص وهكذا

[طنايا]

انا مثل مشكلتك بالضبط

غيرت طرمبة الزيت وراح الصوت على طول

[الوافي0]

عيب طرمبات الجمس والكابرس كثيرة الله يستر منها
بس فيه ميكانيكي يقول علاجها بسيط انك تركب وردة عشان ما تسبب فضاوة وترجع تشتغل زي اول

[المسافر574]

الله يعطيكم الف عافيه على التفاعل
مكينته 1500 موديله 2006

امبير الزيت وانا واقف النصف اوتحته بخط واحد

واذا مشيت يرتفع فوق النصف على حسب الدعسه والسرعه

[تناهيت]

الله يعطيكم الف عافيه على التفاعل
مكينته 1500 موديله 2006

امبير الزيت وانا واقف النصف اوتحته بخط واحد

واذا مشيت يرتفع فوق النصف على حسب الدعسه والسرعه


كلامك يعني لنا ان طرمبة الزيت شغاله تمام ولله الحمد

وش نوع الزيت وعيار كم تحط له

لأن الجمس عيار 10 على 30 كانك تحط اثقل منه حاول تغيره الى العيار المذكور وشف بيفرق معك ولالا

تحياتي

[المسافر574]

انا اغير 10=== 30

بس الي احب اوضحه ان الصوت ما يطلع الا اذا شغلت السياره وجلست اربع دقايق او خمس يعني تحديدا اذا وصلت الحراره بعد الربع بشوي يطلع الصوت

[قمة افرست]

اخوي سيارتك مافيها شي الصوت الي تسمعه صوت بسيط وغير واضح
الاذا قربت من المكينة او عند الكفر بتسمعه داخل المكينة وهذا صوت الصبابات وموجود بالتويوتا الجيوب واغلب السيارات
وحتى اليوكون جديد ومامنه مشكلة ولاله حل الى الان
ممكن يكون لنوعية الزيت علاقة بالصوت عموما مالقينا له حل لحد الان
اذا المرة الجاية غيرت زيت جرب زيت قلف ماكس 10 دبليو 30

[aakolife]

نعم المشكلة من طرمبة الزيت أحياناً يغيرون لها ربلة ويروح الصوت ولكن ممكن يرجع بعد فترة
الأفضل تغيرها بالكامل

[المسافر574]

اخوي الله يحفظكم

الصوت واضح مره بس زي ما ذكرت يطلع الصوت اذا وصلت الحراره الربع

ولازم اطفي السياره واشغلها مره او مرتين عشان يروح الصوت

ومن يصلح هالربله الي تقول لاني رحت كذا ورشه وما عرفو تغير الربله

[تناهيت]

اخوي المسافر

مثل ماذكرت الطرمبه لا تلمسها
وعيار الزيت عندك مضبوط 10 على 30 تمام التمام

سؤال بعد التشغيل بخمس دقايق اذا دعست بقوة يطلع دخان أبيض ولالا ؟وهل الصوت المقصود شبيه لصوت مكينة الديزل ؟

اخوي المسافر .......>نصيحة اخو دام موترك ما ينقص زيت لا تحوس فيه وخله على فاله

مر علي جمس حوض نفس وضعك وخليته فوق السنه ونصف وماعليه خلاف رغم اني اطلع عليه مكاشيت ومراقى نفود في الدهناء واجلده جلد وماضره ولله الحمد وبعته على شخص معرفه والى يومك ما غير فيه شي
اهم شي لا ينقص اكثر من علبه لن 1500 يضره نقص الزيت اكثر من حجم 2500 والدليل اني راجع عليه من الامارات للرياض بعلبتين زيت فقط والمكيف شغال وثلاجه ماشاء الله وفي عز الصيف .........<طبعا عارف انه ناقص مع ذلك قلت في نفسي خل نشوف
مكاين جي ام سي وش قوة تحملها طبع البلوك حق موتري حديد موب زهر وهنا يجي فر ق المكاين الاوله.....والله على مااقول خير شاهد

تحياتي

[المسافر574]

الله يعطيكم الف عافيه وعلى قولتك بخليه لا الحمد لله ما ينقص ولا فيه دخان ابيض مغير الشكمان ينقط مويه وهذا الي اعرفه انه زين للمكينه وسلامي عليكم ورحمة الله وبركاته

[ولد وايل..]

السلام عليكم...

انا ادري يمكن انها خطمه لكن ما على كلام الأساتذه قمة وتناهيت كلام...


بس شيك الصوت لا يكون من القزوز..وبالأصح وصله القزوز الشعب الأيسر جهة السواق...

انت اذا خليت الموتر يشتغل وعطيته لمسه بنزين وتركته يرجع يطلع الصوت ..؟

يعني تحس حاله فتور وعقبها يطلع الصوت ولا ماله علاقه في هذا .؟

عموما هذا إحتمال ضئيل جدا بس تأكد...

[ملك الصيانه]

السلام عليكم
المشكله هذي صارت معي في رمضان و طلعت طرمبة الزيت سعرها عند با لبيد مع الجلبه 520 بعد الخصم .
وعشان تركبها لازم يفك صدر المكينه يعني الورشه لازم تكون مظبوطه .
الله يعيننا واياك وعشان تتأكد افحص كمبيوتر

[فارس 123]

سيارتي دينالي حجم 2500 موديله 2005

هذه المشكلة عندي إذا شغلت السيارة أسمع صوت ( تك تك تك ) ويصير مؤشر الزيت نازل تحت الربع ويعطيني إشارة ( ضغط الزيت منخفض ) بس إذا دعست عليه طلع المؤشر لين النص يعني طبيعي ويختفي التحذير ، وأيضاً إذا أنا ماشي خط يصير المؤشر فوق النص ويزيد عنه شووووي يعني متجه لليمين وإذا وقفت عند إشارة يرجع ينزل وكذلك إذا وقفت السيارة في طلعه كمدخل البيت ينزل تحت الربع وراجعت اكثر من ورشة ولا عندهم إلا كلمة واحده (( غير طرمبة الزيت )) .
المشكلة عندي من شهر وباقي أبحث عن حل سهل وأقل تكلفه . وآمل من بقية الأعضاء الكرام أو ممن مر بمثل هذه التجربه أن يعطينا الحل . ولكم خالص تحياتي ،،،

[sweed1]

السلام عليكم ورحمة الله وبركاته

حصلت معي واختفت المشكلة بعد تغيير طرمبة الزيت.
لاحظ أن الصوت في المكينة يكون عادة من جهة السائق ويتركز في مقمة المحرك خلف الدينمو مباشرة!
واذا تركت المشكلة سياتى وقت وتسمع طقطة تكيات البلوف وأن تسوق السيارة وراح تعتقد أنها بلوف المكينة!

عموما ضغط الزيت في العداد راح يحسم المسئلة بمجرد نزوله عن النصف.

تحياتى للجميع.

[black denali]

طيب الي يخبر لنا ورشه تركب الطرمبه او تحل المشكله لانهآ عندي في دينالي 2005

لها تقريبا اسبوع تروح وتجي وكم اسعار تركيبها او تغير الجلبه ؟؟؟؟