طريقة تدريب جديده ... شو رايكم؟

[Ahmed_AD]

بسم الله الرحمن الرحيم

السلام عليكم يا لربع ...

من فتره وانا على بالي فكره جديده ما قد شفت حد استخدمها لحد الحين وقلت خل اخبركم ابها ونشوف شو الانتقادات عليها، عيوبها، وفوايدها ... الفكره جت على بالي بحكم ان لي خبره بسيطه في الطيران اللاسلكي ...

اتوقع ان الفكره وصلت ، على العموم خل اخبركم ابها ...

هذه الطريقه بتفيد في زيادة لياقة الطير ان شاء الله

يتم ربط التلواح بخيط تقريبا طوله 20 متر او اكثر

الطرف الآخر من التلواح يتم ربطه بطائره لاسلكيه ويفضل انها تكونه كهربائيه يعني تشتغل على البطاريه وليس البترول واظن تعرفون ليش ... عشان الطير ما يحل وهو ماخذ حمّام زيت

المهم يكون في طيّار وشخص يمسك الطير وشخص ثالث يتابع الطير ويتوجه له في حالة امساكه بالتلواح

يقوم الطيار باطارة الطائره على ارتفاع معين ويفكون الطير عليه (التلواح) والطيار يقوم بزيادة سرعة الطائره الى ان تصل الى السرعه المطلوبه ويبدا بالمناورات ... مثلا يلفها وينزلها ويرفعها ...

طبعا التلواح بيكون مربوط بطريقه ان اذا زاد عليه الوزن ( الطير امسك به) يفك لحاله من الطياره

هذي هي الطريقه وعاد لاتظحكون وخبرونا رايكم فيها :)

ونتريا ردودكم ...

أحمد

[راعي مسكت]

احمد مشكور اخوي وانا سمعت من اولت العام عن هالطريقه عند هل الامارات وهم فعلوها وكان الخيط الي مربوط او اقل من 20 متر

[أبو شعلان]

بسم الله الرحمن الرحيم

حياك الله أخوي احمد صحيح إنها طريقه جيده بس توقع مافيه أي خطر على الطير .

وبعدين وين نحصل على الطائرات هذي عشان نسويها .

وتقبل تحياتي..

[فارس 74]

والله مشالله طريقه مبتكره ويمكن تنجح:)

واقول اللي ماعنده طياره زي كذا يروح للمطار ويكلمهم وانشالله ما يرفضون يربطون التلواح في ذيل الطياره علشان يدعي طيره

بس لازم يحرص ان الطياره متوجهه لدول الخليج علشان مايروح الطير بعيد

موفقين خير انشالله :)

[سفاري]

فكره حلوه ولكنها مجربه

و كان فيه سباق تحمل للخيل العربيه تقريبا من ستة اشهر ومن ضمن فقرات الحفل كان فيه اخوه لنا من الامارات نفذو هذي الطريقة وكانت طريقه حلوه مررررره ومن ميزاتها انك تقدر تبعد النلواح عن الطير وتقدر تقربه منه اذا حسيت انه ماهو معطيه بال .

ومن الاحداث الي صارت كان التلواح مربوط في الطياره وهي طايره وهم هادين الطير عليه وكان ارنفاعها عالي جدا والطير قريب من التلواح وما درينا الا ذاك الطير الجارح الثاني جاي من برا وكان حجمه كبير وراعي الطير خاف على طيره ونزل الطياره الى مستوى منخفض ولا تشوف الا الحر ينزل عليها مثل الرصاصه ما شاءالله تبارك الله .

وللفائده : الطائره كانت تشتغل على البنزين وما ضر الطيور شئ

واما الي يبي طيارات فهي موجوده في الرياض ولها ناسها ومحبيها والظاهر لهم تجمع كل يوم جمعه يطيرون فيه طياراتهم ومره قابلو معاهم في التلفزيون وكانو يطالبون بوجود اتحاد للعبتهم مثل باقي اللعب .ولكن ماادري بالظبط وينهم فيه ومن سأل ماتاه

[أبو رداد]

السلام عليكم ورحمة الله وبركاته

الاخ العزيز احمد
مشكور على طرح هذه الطريقه في الدعو
وهذه الطريقه مستخدمه في دولة الامارات ويستخدمون الطائرات ثابتة الجناح للدعو
والطائرات المروحيه يوضعون فيها بط او حبار لغرض تعليمه التلقيف
والطائرات موجوده في دبي - مركز الهوايات .. واسعارها من 2000 درهم وانت صاعد
وحسب توع الجهاز (4 جنل او 6 جنل او8 جنل او 12 جنل ) وحسب المحرك ايضا وحسب البدي
وفيها مشكلتان .. الاولى هي التعلم على قيادة هذه الطائره فهو امر صعب . واذا موضابط قيادتهما ممكن تقتل الطير
والمشكله الثانيه هي ان بعض الطيور يتعود على شكل الطائره ويبدا يتبع اي طائره كبيره تمر من فوقه
وحصلت معنا العام الماضي .. اثناء دعو الطير بالتلواح مرت طائره كبيره فتبعها الطير ولم يرد على دعوانا
وعقب ثلاث ساعات لاقيناه على حروة اتجاه الطائره ...
والي معزم على الموضوع يجب ان يتدرب عليها بواسطة برنامج يحمل على الحاسبه وجهاز يباع لدى نفس المحلات وقيمته 700 درهم
وهذه صورة الجهاز

http://www.w6w.net/upload/09-08-2005/w6w_200508090416255b383f33.jpg

[لهاب]

السلام عليكم ،،،،

جزاك الله خير على المعلومات وأقول أن الحاجه أم الأختراع.

وبالنسبه للطيارات فهي كثيرة لكن المشكله كيف تستخدمها ولنفرض انك شريتها ينتهى المقناص وانت ماعرفت تطيرها ولا تنزلها.( وانا عندي وحده بس ماشريتها للطير هذي للوناسه فكرتها سهله وأثريها بلشه طيرتها مرة وحده بس وطاحت وهذه بالكرتون خايف اطيرها وتتكسر )

مع التحيه،،،،،

[Ahmed_AD]

راعي مسكت
شي طيب الصراحه ... وانا كان اختياري لـ 20 متر عشان الطير ما يربط الاكل و التلواح مع الطياره ...

أبو شعلان
الله يحييك ويبقيك يا بوشعلان والله اتوقع اذا كان الشخص اللي يطير الطياره متمكن منها ويعرف للطير ... ان شاء الله الطير مايصيبه الا الخير ... بس اهم شي ان الواحد يتحمل من اللفات الحاده

شايف خير
ان شاء الله تنجح

سفاري
ما شاء الله على الطير ... اخوي سفاري ... الطائره الى تشتغل على البنزين تصدر زيت من العادم وطبعا الهوا و الزيت اللي خارج من العادم احتمال يكون في مسار الطير والتلواح وبالتالي احتمال ان الطير يتاذى من الزيت هذا او حتى التلواح راح يصيبه شي من الزيت والله اعلم ...

ابو رداد
الظاهر انك من سكان الامارات بورداد :)
و ما شاء الله عليك لك خبره في هالطيارات ...

على العموم هل تعتقد ان اذا صغر حجم الطائرة و زاد طول الخيط بين التلواح والطائره راح يكون له تاثير وفائده ؟

لهاب
هيه نعم الحاجه ام الاختراع بس شكلهم سبقونا في تنفيذ هالفكره :)
هو الهدف من الطائره يكون في المناطق المنبسطه اللي مافيها عراقيب (طعوس) ولا اماكن مرتفعه وراح تغني عن الطائرات الورقيه اللي يستخدمونها الانجليز ...

و اتوقع انها مفيده جدا ... لان اذا تزيد ارتفاع التلواح وتجبر الطير انه يزيد في ارتفاعه راح يطير بزاويه الى الاعلى وهذا راح يساعده في تقوية عضلات الظهر والرقبه ( هذي المعلومات من موقع انجليزي )

شكرا جميعا للمشاركه.

أحمد

[almaari]

الله لا يهينك على الموضوع

[لطاش]

مشكور على الموضوع

[الببر]

مشكورين على الموضوع القيم
وللخبره رجالها