مشكلة بوزن السكوب حق السكتون

[Caliber]

السلام عليكم


اول شي كل عام وانتم بخير وعساكم من عواده.


امس شريت سكوب للسكتون حقي وقعدت ساعات وأنا احاول اوزن فيه ولا قدرة اوزنها صح
مرة تجي فوق مرة يمين ولا بعد بعيدة مرة عن الهدف فـ رحت لم الرماية وعطيتهم البندقية
عشان يظبطون الوزنية بعد ما ظبطوها رجعت البيت ومستانس وجا أخوكم يتلقف ولعبت بالوزنية مرة ثانية وخربة علي ولا بعد صار الزائد اللي بالسكوب شكلة مثل علامة الضرب
؟؟ فحاولت أوزنها ما عرفت وما ودي اروح للمحل كل شوي يعني ودي اتعلم .
وعلا فكرة شفت مقطع على اليوتوب وحاولت اقلدة ولا ظبطت معي يوم احرك الوزنية لا يتحرك لا يمين ولا يسار وحتى لا فوق ولاتحت الصراحة تعقدت من ذا السكوب.


وهذا رابط الفيديو حق الوزنية


http://www.youtube.com/watch?v=lLirsAFpsfE


تكفون يا شباب ابي احد يعلمني طريقة سهلة بالوزن بس بدون طريقة الليزر.

[مجنون نحم]

اذا تبي العلم الصح ارسل رسالة على الخاص

[Caliber]

اذا تبي العلم الصح ارسل رسالة على الخاص

أخوي ما اقدر ارسلك رسالة على الخاص لأني مشاركاتي ما تجاوزت الخمسين ؟؟

اذا عندك شي اكتبة في الموضوع عشان كلنا نستفيد.

[مجنون نحم]

ســو اللي اقولكــ خطوة خطوة

1- رح للهدف اللي في التخصصي بتلقى سعودي هناك قلة ابي قاعدة للدربيل بيوريك القواعد خذ اللي بــ100

وقلة ابيكم تركبون الدربيل عليها وتوزنون الدربيل وعلمة كم المسافة اللي تبيهم يوزنونة عليها مثلا 20 متر او 30 او 40 بشرط ما تكون

اكثر من 100 متر ( هذا لو معك خرازة )


( لا تقول مابي قواعد منهم ترا القواعد اهم شيئ في الدربيل )

وهو ترا ما يوزنها في المحل يوزنها في الصيانة

[Caliber]

طيب اخوي اذا وزنها مثلاً على مسافة 20 متر على كذا لو اطلقة على هدف كانت مسافة اقل او اكثر من 20 متر الاصابة تكون غير دقيقة صح ؟

وإذا ما عليك امر وين بالظبط محل الهدف لأني ما أعرف الا الرماية والرميح

[Abu Sary]

ليش تروح محل ومامحل ..

دام الدربيل راكب على البندق ..

حـطلك إشارة _ هدف _ ولو يكون بلكاش أو ورق كبير بشرط مايتحرك مع الضربه ..

وحط علامة فيه .. وارمي بالبندق ، بشرط تكون متأكد من رميك ..

ومثلاً طلعت فوق الدربيل يجيك له مفتاحين واحد فوق وواحد باليمين ..

اللي فوق حق اللي يرفعه فوق وينزلة تحت ..واللي باليمين حق اليمين واليسار ..

مثلا جات الضربة تحت .. مكتوب على المفتاح up وسهم يعني لو لفيته جهه السهم راح يرتفع معك والعكس ينزله ..

واللي باليمين يجيك سهم ومكتوب عليه r يعني يمين ..


ومثلاً جات الضربة تحت ترفعه من فوق جهه السهم اللي مكتوب عليه فوق ..

واذا جات فوق تنزلة عكس السهم


واليمين واليسـار نفس الطريقة ..





وليش الخساير من صعب الشغلة ..

واللي بالمقطع ، ماتصلح الا إذا كان سلاحك ناري ...

ويحتـاج لها تثبيت بملزمة بشرط ماتتحرك ولآ حركة ..



وبالتوفيق للجميع ,























( اللهم حسن الخاتمة )

[مجنون نحم]

طيب اخوي اذا وزنها مثلاً على مسافة 20 متر على كذا لو اطلقة على هدف كانت مسافة اقل او اكثر من 20 متر الاصابة تكون غير دقيقة صح ؟

وإذا ما عليك امر وين بالظبط محل الهدف لأني ما أعرف الا الرماية والرميح


تعرف الرماية والرميح الي في التخصصي تعدهم بشوي وبيجيك

وبالنسبة لسؤالك صح يعني اذا جاك شيئ على 30 متر لازم تحطها فوقها

واذا جت 10 متر لازم تحطها تحتها .., او زي كذا

[Caliber]

مشكورين يا اخوان وما قصرتوا بس تدرون وش صار معي؟؟ طلع الدربيل اللي شريتة من الرماية خربان
وهذا بعد ما شافوه ناس اصحاب خبره ولكن ولله الحمد رجعت لم الرماية وتفهم السوداني المشكلة اللي بالسكوب
وارجعلي ثمنة طبعاً هذا بعد نص ساعة الإقناع تدرون شلون صارت التصويبة اللي شكلها مثل الزائد صارت مثل
علامة الضرب خخخ وجا العامل يفك بالدربيل ويعدل التصويبة من داخل الدربيل بالله عليكم هذا دربيل ينباع ولا يقولي السوداني اساس المشكلة من البندقية حقتي يقول مرة قوية وهي اللي خربت الدربيل وقبل لأشتريها يقولي
هذا الدربيل يركب على جفت وخرازات !!! اذا على السكتون خربت اجل شلون على البنادق النارية مع العلم
ان مديل بندقيتي ديانا 34 يالله الحمد الله على كل شي.
فالحين أنا ابي سكوب بس يكون من شركة متخصصة فأنا شفت السكوبات اللي بالنت وحصلت انواع من شركات مشهورة وسعرها نفس سعر السكوب الصيني اللي شريتة مع العلم اني شارية 345 ريال وشفت سكوب من شركة نيكون حقت الكمرات بـ 99 دولار يعني حول 370 .
فالحين عندي سؤالين :

1- هل استطيع اني اشتري سكوب من النت واشحنة الى هنا بدون مشاكل مع الجمارك ؟
2- هل يوجد محل في الرياض يبيع سكوبات من شركات معروفة واسعار معقولة؟

وآسف على الإطالة .

[بارود برنو]

السلام عليكم ورحمة الله وبركاته

في البدايه حاول تتقن وزن السلاح يدوي :) بدون اي مساعدات مثل الليزر او الملزمه او غيرها

مثل ماقال اخي الجيب القربوع الطريقه سهله وشرحها لك

لاحض بعض الدرابيل يجي مكتوب l مع اتجاه السهم يسار

وr مع اتجاه السهم يمين

موفق ان شاء الله

[ovls]

مشكورين يا اخوان وما قصرتوا بس تدرون وش صار معي؟؟ طلع الدربيل اللي شريتة من الرماية خربان
وهذا بعد ما شافوه ناس اصحاب خبره ولكن ولله الحمد رجعت لم الرماية وتفهم السوداني المشكلة اللي بالسكوب
وارجعلي ثمنة طبعاً هذا بعد نص ساعة الإقناع تدرون شلون صارت التصويبة اللي شكلها مثل الزائد صارت مثل
علامة الضرب خخخ وجا العامل يفك بالدربيل ويعدل التصويبة من داخل الدربيل بالله عليكم هذا دربيل ينباع ولا يقولي السوداني اساس المشكلة من البندقية حقتي يقول مرة قوية وهي اللي خربت الدربيل وقبل لأشتريها يقولي
هذا الدربيل يركب على جفت وخرازات !!! اذا على السكتون خربت اجل شلون على البنادق النارية مع العلم
ان مديل بندقيتي ديانا 34 يالله الحمد الله على كل شي.
فالحين أنا ابي سكوب بس يكون من شركة متخصصة فأنا شفت السكوبات اللي بالنت وحصلت انواع من شركات مشهورة وسعرها نفس سعر السكوب الصيني اللي شريتة مع العلم اني شارية 345 ريال وشفت سكوب من شركة نيكون حقت الكمرات بـ 99 دولار يعني حول 370 .
فالحين عندي سؤالين :

1- هل استطيع اني اشتري سكوب من النت واشحنة الى هنا بدون مشاكل مع الجمارك ؟
2- هل يوجد محل في الرياض يبيع سكوبات من شركات معروفة واسعار معقولة؟

وآسف على الإطالة .

بالنسبة للجمرك اصبر علي اسبوع لأني طالب دربيل وابشوف يوصل ولا لا

اما شركات درابيل على حسب علمي مافيه

[مجنون نحم]

في الرمايــة عندهم افضــل درابيل من شركو زيس الالمانية ومعه ضمان وبارد على العين ولكن سعرة 3500

شركة زيس من افضل 3 شركات في العالم لتصنيع الدرابيل