السوناتا

[AL-OTAIBI]

السلام عليكم و رحمة الله و بركاته
يا شباب ياليت تقولون لي عن السوناتا 2005 كم أسعارها أقصاد و كاش


و دمتم

[صالح المطيري]

وعليكم السلام ورحمة الله وبركاته ، هلا فيك أخوي ، بالنسبة للسوناتا الجديدة 2005 ، انصحك تتركها لأنه فيها مشاكل كثيرة بخلاف الموديلات السابقة فهي افضل من الموديل الحالي ، فقد تحدثت مع احد الفنيين في شركة الوعلان وكيل هيونداي وهو فني فلبيني مختص بالعكوس وأجهزة التعليق وقال ان السوناتا الجديدة مشاكلها كثيرة جداً بحكم ان السيارة تغيرت تماماً ، فقد كنت قبل شهر عند الوكيل لإصلاح عطل في سيارتي نوع ماتركس 2005 وصلحتها تحت الضمان وهذا على فكرة الخراب الثاني في سيارتي مع انها للحين ما كملت سنة !!! ، الفني الفلبيني قال هيونداي فيها سيارتين ناجحات بس ، الآكسنت والألنترا والباقي فاشل .
بالنسبة لأسعار للسوناتا أعتقد انها تبدأ بـ 46 الف للستاندرد العادية إلى 63 الف للفل كامل .

[مرابع نجد]

تبي راي ولو اني ماستخدمته اي شي كوري انحش عنه وانت مغمض (بس وحدة من عيونك) ولا وشلون تنحاش وانت مغمض بعدين تصدم لاقدر الله وتدعي علي

[AL-OTAIBI]

مشكووووووورين على المرور
و جزاكم الله خير

[اسيزو 4x4]

أخوي العتيبي أنا مع كلام الأخوان كلامهم هو الصح ‌‌‌ْْْْْ}}}}}

[انا ناصر]

يبدا من 2000الف الى 50000الف

[عاشق الجبل]

عليك بالياباني لو لحقك الدين :)

[حياتي الهلي]

ياخوي اذاتبي سياره كد وكرف ومنظر خذ نصيحة اخوك غير الكامري لاتدور واذا بتدفع 50 الاف بسوناتا زود عليهن 10 الاف وخذ لك سياره لك ولزمن بلا سونات بلا خرابيط اصلا هي بالعقل ياباني وكوري اكيد الياباني احسن
الا اقول ياخوي ورا ماتاخذ هلي والله تطربك

[AL-OTAIBI]

مشكوووووووورين على النصيحه ياالاخوان شكلي باخذ كامري ولا هلي

[سهيل1]

الأخ العتيبي
صراحة لي رأي مخالف
الأخوان .. قالوا (( ياباني وبس )) .... دون أي نقاش ... من باب السمعة
يا إخوان تويوتا ونيسان مع أنها سيارات .. أصبحت قيمتها ... (( خيالية )) (( فوق مواصفاتها )) وبالذات فئة سيدان
كامري ومكسيما .........
أخوك له تجربة .... فقد تحيرت كثيرا بين كامري .. وسوناتا
كنت حاط بالي قير أوتماتيك تعرف زحمة سير وكثر إشارات ............... فوجدت الآتي :
سوناتا ..... 48.000
كامري 80.000

طبعا شاورت .... قالوا لي عليك بالكامري .. قلت ياخوان ذي ثمانين ألف .. قيمة جيب فاكس
قالوا الهيونداي تطيح قيمتها على طول
الكامري قوية وتمسك قيمتها

في الأخير ما وجدت غير واحد قال كلمة ممكن تصير مثل
قالي بالحرف الواحد (( الكامري تشتري سيارة وتشتري معها الشعار )) يعني لازم تدفع مبلغ كبير للشعار

ثم ترددت في أن الهيونداي ما تمسك قيمتها
إلى أن وصل بي المطاف إلى أني أريد أن أشتري سيارة للمواصلات واقتصادية ورخيصة وأريد استحدامها لمدة خمس سبع سنوات
فقررت أني أخذ هيونداي
لأن تبين لي أن الكامري هي التي ما تمسك قيمتها حقيقة ,,,
كيف ................
هناك فارق أكثر من ثلاثين ألف ريال بين السيارتين .......... يعني موفرة في الجيب
وأني أريد أن أقتني سيارة .............. لحاجتي للموصلات فقط


المهم بعد التشاور والتردد طول حوالي شهر ..............
وبعد أن قررت شراء الهيونداي
رحت للشركة قالوا للأسف خلصت ...(( القير أتوماتيك )) وليس الفل كامل (( ومن فروع المملكة كلها ))

وصدق المتنبي حين قال :
تأخرت استبقي الحياة فلم أجد......... لنفسي حياة مثل أن أتقدما
... مدري ويش ...........وآفة المرء أن يترددا ..(( والله مادري هو اللي قالها واللا.. لا


فصراحة
كثير من الشركات سيارات بنادق درابيل جوالات أجهزة
تبيعنا شعارها .........


ثم أن شركة هيونداي شركة عالمية وبمعنى الكلمة عالمية
ما أظن أنها تخاطر ... في بيع سيارات ما تسوى واللا تطيح بسرعة

المشكلة في مجتمعنا .؟..... السمعة والدعاية فقط تويوتا وبس (( زعموا ))

حتى (( نيسان )) التي شاركت في تطوير صاروخ أريان الأوروبي مالها قيمة عند كثير من العامة ... والسبب (( إنا وجدنا آباءنا على أمة وإنا على آثارهم مقتدون ))


أسرع واشتر لك سوناتا ... لا تروح عليك العادي مثل ما راح التومتيك عليه .......
ووفر القريشات لا .. لا ... (( القروش )) الباقية



وصدقني إنها سيارة ناجحة ..... لكن تذكر ...(( ناجحة مع العاقل )) .
اقتصادية تقطع 600 لكم بسرعة 140 مع تشغيل المكيف 35 ريال

وصراحة وجدت فيها ضعف العزم ..(( يعني قومتها بطيئة )) في البداية لكن بعد تجاوز السرعة 100 خذ موتر
وصراحة ما دري هو عيب في المكينة ولا في رجلي لأني خايف على موتري ما ودي سرعة الدوران تتعدى رقم 3 في الإنطلاق ............

نسيت أقول لك إني أخذت هيوناداي .. فان صغير ...((( عائلية ورخيصة )) وقير أوتماتيك



بالنسبة للضمان
للأسف عندنا في الدول العربية ... الضمان مجرد اسم
من الجوال .. إلى أفخم سيارة

بالنسبة للهيونداي ..... ضمان خمس سنوات .. أو 100.000 أيهما أسبق
لكن كل الشركات يضحكون علينا لا بد من أن تعمل صيانة كل 5000 كلم إلى 20.000 ثم كل 10.000 إلى نهاية الضمان ... طبعا كل مرة تدفع .............
يلتغي الضمان لو ما تعمل صيانة عندهم .. (( قهر بمعنى الكلمة ))



.

[البرحه]

السلام عليكم

شفني اذا عندك دراهم وتبي موتر للكرف وراحه وفخامه وقليله صرفيتها خذ هوندا اكورد 2003-2005

اذا تبي توفر وتاخذ هونداي فخذ اكسنت والا لا تاخذ والسوناتا بالذات فيها مشكله في المكينه ولاهيب مظبوطه


والاكسنت عز الله انها للكررررررررررررررررررررررررررررررررررررررررررررررر رف

والله لو تجيب اغشم سقيم في العالم يتعلم السواقه عليها ما يظرها وهذا عن تجربه مع واحد من الربع


فلذلك نصيحه

فلوس كثير هوندا اكورد
فلوس قليل هونداي اكسنت

على فكره ترى الكامري من 2003 وفوق استراليه وفوق كذا تتنقز !! بعكس الهوندا يابانيه ميه بالميه ومستحيل تدق سلفها

لو وش ما تسوي ورح اسئل الدوريات كم عدد الهوندا الاكورد الي مسروقه وهي واقفه !! عني انا مافيه

وشكرا

[صالح المطيري]

شباب انا اقول لكم الفني الفلبيني المختص بالعكوس وأجهزة التعليق في شركة الوعلان قال بالحرف الواحد السوناتا الجديدة مشاكلها كثيرة ، اذا مصمم على السوناتا لا تأخذ الموديل الحالي انتظر لحين ما تنزل موديلات 2006 لأنه يمكن انهم عدلوا المشاكل اللي في موديلات 2005 غير كذا خذ كامري مستعمله افضل .

[AL-OTAIBI]

مشكوووور اخوي سهيل واخوي البرحه و اخوي صالح صراحةً ردودكم هذه جعلتني انظر نظره ثانيه شكلي بفكر اكثر و بدخل النت و دور فيه
جزاكم الله خير...................نسيت اقولكم ......وشرايكم بالفكتوريا