وشرايكم في هالقعود يا أهل الخبرة

[الركبي]

السلام عليكم ورحمة الله وبركاته وكل عام وانتم بخير

يالربع يا أهل الخبرة ابي رايكم في هالقعود انا ناوي اخليه فحل النياق

القعود من احد اطيب نياقي ضربتها من فحل طيب قبل ست سنين واول ضراب القعود اخر الشتا اللي راح ماتت امه قبل العام في النعيرية يوم امراض النياق اللي انتم خابرنها وعوضنا الله هالقعود وبكرة اخته من فحل ثاني

الحقيقة خفت على القعود وديته للشمال في المزرعة عند الشيبان والبرسيم متوفر والحمد لله لكن لاحظت ان القعود فيه هزال وعيا السنام يرزم . نصحوني بعض الاخوان شرواكم باطعامه شعير والبعض الوافي وشوار وحبيت اخذ راي اهل الخبرة منكم اسأل الله ان ياجركم ويبارك في اراؤكم

واليكم الصور للقعود :
http://www.mekshat.com/pix/upload04/images180/mk64334_16-09-2010-11.jpg

http://www.mekshat.com/pix/upload04/images180/mk64334_16-09-2010-22.jpg

http://www.mekshat.com/pix/upload04/images180/mk64334_16-09-2010-33.jpg


اتمنى من الاخوة المشورة والا يبخلوا علينا والله يحفظم


الركبي

[عميد سامودة]

سنامه ماهو موخر بالحيل وخده ماهو عريض

[عاشق سجة البر]

السلام عليكم

نظرة القعود مايصلح فحل

والشي على الانتاج

لكن عسى الله يرزقك الانتاج الطيب منه

[الركبي]

بارك الله فيكم يا اخوان


عميد ساموده وعاشق سجة البر

على الشوروالنصيحة ولا عدمناكم

الركبي

[مظايم الظيم]

ماشاالله تبارك الله الجمل طيب جدا بس عليه القصر شوي وخده ماهو الوافي واذانيه لاباس فيها اما من نحيه سنامه فهوا طبيعي جدا بنسبه للمجاهيم لانه ما يمتاز با السنام المتئخر هيا المغاتير فقط وهذا هو المعروف في السابق ولكن في الااونه الا خيره اصبح في الخلط والتهجين بين الابل فا انتقلت المواصفات من طرف الي اخر والااهم من هذا كله طرح الفحل هو اللي يميزه والله يبارك لك فيه وتقبل مروري ورئيي ولك تحياتي محبك في الله اخوك مظايم الظيم

[قزيزالنعام]

مرحبا ومسهلا والحلال طيب كله وزين 00والقعود عليه نقص عافيه عليك بالشعير والبرسيم هذا ازين شي للركاب

[همس شاعر]

هذا ازين شي للركاب


والله وانا اخوك لا ركاب ولا زين
ولايصلح فحل
المقصب المقصب
لاتخسر عليه
انتظر الى قبل شهر 12 وبعه تراه يجيب قيمه


تقبل مروري

[الركبي]

الاخ مظايم الظيم احبك الله الذي احببتنا فيه ومشكور على الشور المبارك

الاخ قزيز انعام شاكر لك نصيحتك بالعلف وهو متوفر ولله الحمد

الاخ همس شاعر شاكر لك على صراحتك بس يمكن الصبر لين نشوف طرح الجمل مثل ما قال اخونا مظايم الظيم احيانا يكون الجمل ماهو الوافي ويجي منه خير كثير

شاكرين لكم ومقدرين ومانستغني عن مشورة باقي الاخوان اصحاب التجارب

الركبي

[مشراق المر]

اهم شي الاصل اذا انت عارف امه طيبه
وساسها طيب وابوه طيب وخواته طيبات
فحل ولايهمك شكله اما السنام المتقدم ماهو عذروب بالمجاهيم

[الركبي]

بيض الله وجهك يا مشراق المر وامه وابوه ابشرك طيبات بالحيل ونقوه ونرجي من الله خير

شاكر لك على تواصلك ونصيحتك

الركبي

[ابو الشباب3]

ماشاالله تبارك الله الجمل طيب جدا بس عليه القصر شوي وخده ماهو الوافي واذانيه لاباس فيها اما من نحيه سنامه فهوا طبيعي جدا بنسبه للمجاهيم لانه ما يمتاز با السنام المتئخر هيا المغاتير فقط وهذا هو المعروف في السابق ولكن في الااونه الا خيره اصبح في الخلط والتهجين بين الابل فا انتقلت المواصفات من طرف الي اخر والااهم من هذا كله طرح الفحل هو اللي يميزه والله يبارك لك فيه وتقبل مروري ورئيي ولك تحياتي محبك في الله اخوك مظايم الظيم
وازيد على الاخ اصله اذا كان طيب احفظه الين تشوف الانتاج

اكرمه بالعلف عشان يبين زينه ..

عالجه لا يكون به ديدان اذا كان العلف عنده الله يبارك لك بالانتاج الطيب والجميع

[برج الرمانه]

القعود مهو شين بس ضعيف شوي عليك باالشعير والبرسيم ويبا يسمن ان شاء الله 00 الله يكتب لك التوفيق

[القاف2010]

اخوي الله يباركلك فيها القعود طيب مافيه كلام ومن اجود انواع المجاهيم اما ضعف حاله فهو من امر واحد يوم انه حوار مارضع زين اما امه ماتت او مكسب بدري
وبعطيك طريقه بشهر تشوف الفرق انشاء الله خذلك حلبه يمانيه كيلووطبخه زين وشرب البعير منها بس يكون البعير ضميان وبعد ثلاث ساعات جميع الي في بطن البعير يطلع من دود وغيره
وبعدها عليك بالوافي والشعير اخلطها سوا والبرسيم الناشف وسال مجرب ولا طبيب

[الركبي]

الإخوان برج الرمانه وابو الشباب. بيض الله وجيهكم على التفاعل والنصيحة

الأخ العزيز القاف 2010 بارك الله فيك وراح أجرب الوصفه والله لا يحرمك الأجر

للمعلوميه القعود سيم وهو حوار ( وعمره شهر ) ب 15 ألف ريال.

بارك الله في الجميع

ألركبي

[الوااااافي]

السلام عليكم ورحمه الله وبركاته


مرحبا اخوي الركبي


انكانك تبي الفحل يطلعله سنام عليكم بعد العصر
تعطيه خبز وتمر وشف وشلون يزين سنامه
اخوك الوافي

[الركبي]

مشكور يالوافي وطبعك وافي على هالنصيحة

المعذرة في التأخر على الرد لاني كنت مسافر راح نجرب طريقتك وراح ندعيلك

وبارك الله فيك

الركبي

[نافل1]

عرب الفحل وهده--ومادام ان اصله طيب بيصير طرحه طيب ان شاء الله

[الركبي]

لاعدمناك يا نافل 1 بس مافهمت وش تقصد بعرب الفحل

شاكر لك على التواصل

الركبي

[راعي الشاص 8]

يدينه قصار مايصلح فحل

[المهد]

القعود طيب وواضح انه من ابل مراح وعليك بالشعير اترك الوافي والبرسيم ليتلين البطن واخذ حبوب الديدان يمكن به ديدان وبارك الله لك في حلالك ومالك .

[ذيب العيالي]

الله يطرح البركه
البعير وسط واقل من الوسط
ولكن الدعوى في الانتاج كم بعير وسط وجاء طرحه طيب بالحيل
والعكس طال عمرك

[مجاهيم]

اصبر عليه يمكن يكون إنت انتاجه يصير طيب إذا ساسه طيب... الله يبارك لك فيه.
نظرته ماهيب شينه الله يباركلك فيه.

[الركبي]

الاخوة الاعزاء السلام عليكم ورحمة الله وبركاته

بعد مرور حوالي ستة اشهر من اخر مرة عرضت فيها القعود لاخذ الرأي منكم اهل الخبرة وبعد الاخذ بنصيحت الاخوة وخصوصا الوافي وبرج الرمانه بطريقة الاعتناء وتسمين القعود حبيت اشارككم هالصور لابداء الرأي في التغيير علما بأن هناك تحسن نراه في كل شهر

لا اريد الاطالة عليكم واليكم الصور

الصورة الاولى قبل 6 شهور وعند عرضي للقعود أول مرة

http://www.mekshat.com/pix/upload05/images210/mk64334_mlehan-1.jpg

الصورة الثانية والثالثة قبل شهرين
http://www.mekshat.com/pix/upload05/images210/mk64334_mlehan-2.jpg

الصورة الثالثة وهو يضرب قبل شهرين
http://www.mekshat.com/pix/upload05/images210/mk64334_mlehan-3.jpg
الصورة الرابعة هالاسبوع
http://www.mekshat.com/pix/upload05/images210/mk64334_mlehan-4.jpg

الصورة الخامسة هالاسبوع



http://www.mekshat.com/pix/upload05/images210/mk64334_mlehan-5.jpg

ارخينا عليه الشعير والبرسيم واحيانا الخبز والتمر

في الاخير لاتحرمونا من رايكم السديد وجزاكم الله الف خير

الركبي

[الركبي]

سبحان الله اكثر من 60 قروا الموضوع ولاتعليق

لانستغني عن رايكم يالربع

الركبي

[نفال444]

امسك ولا تفك
القعود من سلاله طيبه

[الركبي]

بارك الله فيك يا نفال 444 ولا عدمناك على النصيحة

[راع الريمة]

اسمع يابعدي...

كلن له رايه....

أما رايي... الجمل عند ساسه --اصبر ايلين تشوف طرحه واذا جاك ماهو باللي هو...بيعه ومنت خسران
(هذا واحد من العيال عنده جمل .والله انك تستحقر انك تربيه.قصير وله شنبات تقال بس..وحقير وأذانيه تقال حصني لكن والله ياطرحه شيييي بناته لون وطول وراس وبناته بره لو تحطلها شويه برسيم تسمن عليها..وحليييييب...)

أما عن العلف... حطله كل يوم نص برسيم وشوية شعير ..بشرط انك تستمر فترررررره واذا حصلت خبز...راح تشوفه شي ثاني



الله يبارلك بحلالك وانا اخوك

تقبل مروري
أخوك/أشرف العوفي

[الركبي]

بيض الله وجهك يا راع الريمة

انشهد انك نصحت وافدت واسأل الله يبارك لك في عيالك ومالك وحلالك

لاهنت وشاكر لك تواصلك

الركبي

[أبيض قلب]

أسمع وأنا أخوك من ناحية البعير البعير علا إنتاجه

ومن ناحية العلف أنا مجرب عندنا قعود أوضح أمه ميته من يوم عمره شهرين أو ثلاث شهور وشهر كامل ما يذوق غير علف وافي ونعطيه العصر خبز وتغير بشهر وعقبها قطعنا عنه وافي لانه ما هو موجود بالديرة اللي حنا فيها وصرنا نعلفه العلف الموجود وحالته علا ماهي عليه من يوم ترك وافي

ويفيدك اللي أعرف مني

[مرعي السرحاني]

السلام عليكم
أسأل الله العلي القدير ان يبارك لك ببعيرك وماملكت ...

الركبي وكاد انك راعي بل اذا البعير ساسه طيب ومعروف اللي يحكم ماهو حنا اللي يحكم انتاجه
أما بخصوص شكل البعير ومواصفته بإختصار بعير بدوي شكلاً بنظر اخوك بالله اكثر من عادي و اقل من زين

والله يوفقك وبإنتظار صور لإنتاجه بإذن الله

[ابو بندر2755]

الله يطرح فيه البركه

[ع العمرو]

ماشاء الله تبارك الرحمن

[الركبي]

بيض الله وجيهكم يا اخوان على النصيحة واسأل الله يبارك لكم في حلالكم ويبعد عنا وعنكم الغلا والبلا والمحن

اسف على التأخر في الرد وذلك بسبب زيارة الوالد لي لاني حبيت اقضي كل الوقت معه

راح ان شاء الله اشرككم طرح الفحل وهو فعلا الحكم مثل ما شرتم علي

بارك الله فيكم

الركبي

[ابو الشبرميات]

راح ان شاء الله اشرككم طرح الفحل وهو فعلا الحكم مثل ما شرتم علي

الركبي

الاخ الكريم الركبي
الله يبارك لك في حلالك ويزيدنا واياك وكل مسلم
الصراحة ان البعير مثل ما قال احد الاخوان اقل من عادي ولافيه اي صفة تجذب اهل الحلال فيه
الا ساسه الطيب وهو الاهم
والانتاج طال عمرك والسامعين ما ينحكم عليه الا بعد ثالث سنة من الطرح هذا ما تعارف عليه المربين للابل وانت على كلامك بعيرك على ساس طيب وامه طيبه ومن ساس معروف لذلك لاتستعجل على البعير
وتقبل مروري
,,,

[عاااشق الطير]

اخوي القعود ساس وراس واذا اخذ من الثنتين وحده تكفي وركز علا الساس واذا ساسه طيب فحله وانا اخوك واذا ساسه ردي لاوالله بعه واليل ممسى وبنسبه للسمن عليك بشعير وتبن في وجه العدو الشعير في البدايه عطه شوي ربع سطل مدة 3ايام وبعده نص مدة 3ايام وبعده كامل مدة 3 وبعده نقع الشعير عنده اتركه ناقع وتبي تدعيلي وعطه طال عمرك احبوب دود المركز الي لونها اخضر هاذي نصيحه من شخص مجرب

[الركبي]

ابوالشبرميات لاهنت وبارك الله فيك

عاشق الطير

وصفه طيبه من وجه طيب بس ما أدري الشعير إذا نقع بالماء مايضر

أشكر كل من شارك في إبداء رأيه

الركبي