جمس 97 عزمه طايح

[kmera]

السلام عليكم ورحمة الله و بركاته
احبتي في الله حبيت اعرض عليكم هذه المشكله و ان شاء الله اجد عندكم الحل

عندي جمس موديل 97 مكينه 2500 بالبيد مخزن ماشي 30الف اخذته من الوالد حفظه الله و كان مطلعه على يده من الوكاله

المهم قبل فتره بدات مشكلة عوامة البنزين و بدا صوتها يطلع ززززززززززززننننننننن و حسيت عزم السياره بدا يضعف و الدعسه مكتومه اثناء المشي و مشيت على الكلام هذا فتره و يوم تفرغت له وديته لمكانيكي غيرله العوامه و فلتر البنزين و البواجي
و النتيجه اختفى صوت العوامه زززززننننننننننننننننننن
السياره و هي واقفه دعسه البنزين طيبه لكن يوم امشيبها مشوار احس فيه تكتيم و العزم ماهو عزم جمس مكينته 2500 و خاصه في الطلعات طلعت مع عقبة كرا للهدا من مكه و الله اني داعس للاخير و السياره يادوبها 40 الى 60 هذا وانا حاط القير في 3 و اللي مستغرب منه انه مع اني داع للاخي اشوف عداد Rpm دوران المحرك على 2 او فوقها بشرطتين و اذا و قفت بعد مشوار ومريت من جنب التانكي اروحلي ريحة بنزين

وشرايكم يالربع هل تتوقعون انه ماركب العوامه مزبوط او انها من الديلكو يبيله وزن او من البخاخات مع انه مافيها تفتفه واضحه اثناء المشي وانما تكتيم لكن اثناء ما تكون السياره واقفه و اجي عند الشكمان اسمع تفتفه او تقطيع بسيط

ارجو الافاده اثابكم الله و اجركم عظيم الاجر

[200]

من الوقوف يبي مغط امش علية واحشرة بالبنزين عندي ددسن الشايب يمشي عليها 80كم يوميا وهي ماخزنت صارت ثقيلة بس اخذتها شهرين لين فجرتها وبعدين رجعت احسن من أول

[almjrooh_07]

تاكد وانا خوك من زيت القير ويجب تغير الفلتر تاكد من اسلاك البواجي والاحسن تسويله فحص كومبيوتر قبل هذا كله ويبين لك العطل الكهربائي فقط اما الفلتر لازم تغيره كل سبعة اشهر

[الصيادالمليح]

سوي له تصفية مكينة وشيك على فلتر الهواء و مسالك الهواء الداخل و الخارج من المكينة من قبل فلتر الهواء إلى الشكمان لأنه لو الشكمان مكتوم فالعزم يقل بصورة كبيرة وفي نفس الوقت لو هناك شيء يمنع وصول الهواء للمكينة فالعزم يقل بدرجة كبيرة و إن شاء الله تلاقي الحل لمشكلتك

[ابو الوهب]

التكتيم حله تصفية بخاخات باذن الله ويظبط يمكن الكربون كتم العزم

[kmera]

من الوقوف يبي مغط امش علية واحشرة بالبنزين عندي ددسن الشايب يمشي عليها 80كم يوميا وهي ماخزنت صارت ثقيلة بس اخذتها شهرين لين فجرتها وبعدين رجعت احسن من أول
تسلم يالغالي و الله وانا اخوك ماظنتي من الوقوف لاني ظغطت عليه فتره و الحال مثل ماهو

تاكد وانا خوك من زيت القير ويجب تغير الفلتر تاكد من اسلاك البواجي والاحسن تسويله فحص كومبيوتر قبل هذا كله ويبين لك العطل الكهربائي فقط اما الفلتر لازم تغيره كل سبعة اشهر
يارك الله فيك باامر على البنشري و اشيك على زيت القير و باغيرله فلترو اتوقع فحص الكمبيوتر يطلع الاعطال الكهربائيه لكن بسويله فحص و اشوف

سوي له تصفية مكينة وشيك على فلتر الهواء و مسالك الهواء الداخل و الخارج من المكينة من قبل فلتر الهواء إلى الشكمان لأنه لو الشكمان مكتوم فالعزم يقل بصورة كبيرة وفي نفس الوقت لو هناك شيء يمنع وصول الهواء للمكينة فالعزم يقل بدرجة كبيرة و إن شاء الله تلاقي الحل لمشكلتك
تسلم حبيبي و بحط ملاحظاتك في عين الاعتبار عند فحص السياره

التكتيم حله تصفية بخاخات باذن الله ويظبط يمكن الكربون كتم العزم
بارك الله فيك اخي الكريم و باشوف الفحص وش بيقول

[gihad]

حسبي الله لا إله إلا هو عليه توكلت وهوه رب العرش العظيم

[aka777]

انا عندي يوكن حسيت به ضعف عزم


لقيت سلك الدعسه منفلت


رحت لورشه وشدو عليه


والحمد لله انتهت المشكله

واتمنى لك التوفيق

[kmera]

حسبي الله لا إله إلا هو عليه توكلت وهوه رب العرش العظيم
جزاك الله خير

انا عندي يوكن حسيت به ضعف عزم


لقيت سلك الدعسه منفلت


رحت لورشه وشدو عليه


والحمد لله انتهت المشكله

واتمنى لك التوفيق

تسلم حبيبي على اهتمامك لكن الدعسه طيبه على الخط المستوي المشكله تبان اثناء الطلوع في المناطق الجبليه

[تناهيت]

ماشاء الله موترك جديد الله يبارك لك

طيب اخوي هذا النوع او الحجم اللي هو 2500 وهالموديل مكاينه 454 حلابات يعين نص بخاخ ونص كربريتر
والتكتيم من اكبر مشاكلها بحكم تجربه سابقه

وخاصة اذا كانت توقف لفترات طويله يأثر عليه

جرب وناخوك غير شاكوش الديلكو وراح يفرق معك باذن واحد أحد لأن مشكلته ميه في الميه كهرباء
+نظف كربرتير عند متخصص
لاكن نصيحه كانه يكتم لا تشد على المكينه وتضغطها .....
لأن مالها دخل المسكينة ترى بتزعل عليك وتخبط ......

تحياتي

[kmera]

تسلم اخوي تناهيت و جزاك الله خير
و نجرب باذن الله تنحل المشكله

[ابو نايف 111]

السلام عليكم
الي فهمته ان موترك كان ممتاز قبل و الحين ضعف
ارجع وشيك على اسلاك البواجي ( هل هي راكبه صحيح )
مثال رقم واحد راكب في ثلاثه او رقم خمسه راكب في ثمانيه ........
لازم تشيك قبل ماتتعب

[المغيليث]

شيك على البواجي واسلاك البواجي وشيك ولا اهم انك توزن الديلكو بل كهرب 50ريال تقريبا يمكن الديلكو مفرور يطيح من عزم الموتر مرررره اول الشيبان اذا شرو سيارات لي اولا دهم يفرون الديلكو عشان ما يسرع