السيارة تطفأ فجاة بدون تفتفة ؟؟ (احتاج حل من أصحاب التجارب)

[Rapture]

السلام عليكم كيف حالكم يالمكشاتية عساكم بخير,,

ياليت تساعدوني مع هالسيارة رميتها عند البيت ولا احركها,, مشكلتها انها تطفا فجاة مع ان المكينة صافية ولا فيها تفتفة وغالبا ما تطفا الا اذا طلعت فيها مشوار داخل المدينة من ساعة الى ساعتين ( لاحظت هالشي يعني ما تطفا على طول بداية المشوار)

مع العلم انه تم تغيير هالقطع بدون فائدة:

بواجي واسلاك بواجي ,,,,, طرمبة البنزين,,,,, بطارية جديدة وكلهم قطع اصلية

غالبا تطفا لما اكون ماشي 30 الى 40 ومرة طفت وانا ماشي ريوس

السيارة كابريس 91

[saad.saud]

غير فلتر البنزين ... بس !!!!

[asdali]

وعليكم السلام ورحمة الله وبركاته

اخوي هالمرة اقطع فيها نفس المسافة لكن بدون غطى البنزين وشوف تطفي ولا لا ؟

[Rapture]

saad

اخوي فلتر البنزين مغيرها مع تصفية كاملة للسيارة قبل 6 شهور


asdali

صراحة اقتراحك غريب بس ما في خطورة امشي على السيارة بدون غطا ؟؟

شرايك اغير الغطا بكبره واجرب؟؟




والله يا جماعة احس الحل بسيط جدا ,, سلك يفصل او شي من هذا القبيل ,, بس ما تدري وينه؟؟

رحت اكثر من ورشة عشان فحص كمبيوتر قالوا ما عندنا برنامج السيارات القديمة !!!

[asdali]

مو مشكلة اخوي غير غطا جديد اضمن واسلم

المقصد اخوي ان احد اسباب انطفاء المحرك المفاجيء انتهاء صلاحية غطاء التانكي ويصير التانكي مضغوط بالهواء ويقطع البنزين عن المحرك .

[RIFA3Y]

السلام



شوف يا غالي انا واحد مرهـ قال لي عن جيب موديل 2001


وكان كل ما مشى شوي طفى ووداه لاكثر من ورشه و مو عارفين شنو مشكله و حتى الوكاله


ما عرفت و عن طريق الصدفه طلع انه المشكله البطاريه غيرها و صارت الموتر مافيه احسن منه


بس انت كابرس 91 ما ادري جريب بدل بطاريتك مع احد اخوياك و شوف


وان شاء الله اني اكون افدتك



و اتوقع لو انه كان فلتز البانزين كان ممكن تكون السيارهـ مكتومه


بس تمشي و ما تطفي بالسيارهـ



و اتمنى اكون نفعتك



لك ودي
رفاعي

[الصيادالمليح]

شيّك على الدينمو يمكن ما توصل كهرباء ويحتاج تغيره جديد وتكون اسلاكها مهترئة وما توصل كهرباء بالشكل الصحيح

وشيكها عند كهربائي لف مواطير

وربنا يوفقك إن شاء الله

[Rapture]

شيّك على الدينمو يمكن ما توصل كهرباء ويحتاج تغيره جديد وتكون اسلاكها مهترئة وما توصل كهرباء بالشكل الصحيح

وشيكها عند كهربائي لف مواطير

وربنا يوفقك إن شاء الله


اخوي ما اتوقع الدينمو له علاقة لانه لما تطفا السيارة فجاة علي ,, الانوار تكون شغالة والراديو ولا انا غلطان ؟؟؟

[بوونواف]

انا معي سيارة نوع كامري .. صارت معي هالمشكله وتعبتني كثيرا ومافيه شي ماغيرته ؟!

وبالاخير غيرت الكاتوات ( اثنين) والحمد الان تمام التمام

[شط العرب]

وفق استشارة أحد الزملاء ينصح بزيادة هواء البنزين الذي بجوار البخاخات وهو عبارة عن مسمار يتم الرفع عليه قليلاً .

[Rapture]

بو نواف

اي كتاوت بالضبط ؟؟


شط العرب

اخوي السيارة كربريتر

[Rapture]

تم تغيير غطاء تانكي البنزين للتجربة ( نبدأ بالأشياء الرخيصة) وبدأت المتاهة

كلفني 35 ريال

[سبتان]

تأكد من طرنبة البنزين التي داخل التانكي

[سليمان 10]

شيك على الفيوز فقط000

[Rapture]

اخوي الفيوزات كثيرة حدد اي واحد

[خوي الريح]

اخوي احتمال من الطرنبه حقت البنزين او الكويل وكذالك تأكد من السلك حق الديلكو الي يوصل بالاكويل

معلومه [اذا طفى الموتر وانت مارفعت رجلك عن البنزين وضليت مواصل على نفس الدعسه او زياده لين مايوقف او قريب يقف وحدث صوت [تفطيع] فهذا يعني ان الخلل كهرب

[قمة افرست]

اخوي ياليت توضح
تطفي وانت واقف او والسيارة ماشية
مع تشغيل المكيف والتعشيق تضعف السيارة
بعد ماتطفي تشتغل على طول اذا شغلتها ولاتدق سلف ولاتشتغل

[مدري علامي]

السلام عليكم ورحمة الله وبركاته

اخوي كان عندي فورد توروس 96 ونفس المشكله اللي تقولها كانت معي حاولت بكل الحلول كمبيوتر وتصفية مكينه الخ .... ما نفع

اخر الحلول هي الكهرباء وبالفعل طلعت كهرباء

المشكله // اول ما تطفى السياره كنت اسمع صوت ازززززززززز
مكانها بالظبط // تحت الغطاء اللي فوق الارديتر( اللي مرسوم عليه طريقة تركيب السير)
العله // الجهاز طلع مكان تجميع الكهرباء في السياره عموما على كلام المهندس
الخلل // سلك على وشك انه ينقطع ومع المطبات راح فيها فيمسك مره ويشبك مره
التكلفه // زراديه .. شطرطون.. والحمد لله زانت

اتمنى انك تشيك يمكن تطلع نفس المشكله اللي كانت عندي

ولك خالص الود

[aakolife]

أخي العزيز

ودي تشوف الكنداسة لا تكون مسدودة " طبعاً الشخالات أقصد " لأن نسيبي معه يوكن ومثلك حسربه أحياناً يطفى وأحياناً إذا كان يمشي يضعف عزمة مرة حتى يوقف وبعده اتضح انه من الشخالات مسكرة بالكربون

وبعد ما قصهن صارت السيارة زي العسل

أتمنى أن نوفق أنا وجميع الأعضاء في إيجاد الحل

[هو1ي البر]

شف روس البطاريه يمكن فيها ترسبات ولا توصل كهرب زين

[almjrooh_07]

السلام عليكم اخي شيك على علبة الفيوز الي داخل الكبوت في الزاويه يسار والاحسن تغيريها هي 2 فيوز لون اسود كبيره الحجم ارجو اذا كان هذا حل لمشكل بلغني على الخاص

[على رمشي تمشي]

برضوو شيك على اصابع البطاريــة

[حزم نجد]

موترك مالحق على التقنيات من حساس كرنك وثروتل أو تنظيف ثروتل
أعطيك احتمالات:
1- دقمة سلف
2- منظم بخاخ وهو قطعه صغيرة بالبخاخات (بس تقول كاربريتور)
3- شاكوش الديلكو
4-سلك بوجي منقطع او عدة اسلاك

===


اذا الموتر طفئ وجلس فترة مايشتغل يعني 10ألى15دقيقة المشكلة من السلف أو الحذاف الكبير

===

تأكد من الطرمبه و قلب الطرمبه يكون مطابق للكابرس

===

وتأكد من الثروتل اذا كان موجود عندك ما يكون فيه اوسااخ
الثروتل هو مدخل الهوا الهوز الي جاي من فلتر الهوا للمكينه

[ارقد يا ساهر]

اخوي شيك على كتاوت طرمبه البنزين يمكن اذا احتمى قفل

[الاطار]

اهل الخبره يعرفون ......لاتلعب في سيارتك

[محمد العوني]

سبق وصارت معي نفس المشكله يطفي فجآه وبعدها يدق سلف ومايشتغل ..

اخليه نصف ساعه واشغل ويطلع مافيه الا العافيه ..

شوف فيه سلك جاي من مجمع الاسلاك الي في الكبوت يشبك في الديلكو بجانب اسلاك البواجي شيك عليه والمشكله اتوقع 99% انها منه

[مريقب العيفار]

اخوي احتمال من الطرنبه حقت البنزين او الكويل وكذالك تأكد من السلك حق الديلكو الي يوصل بالاكويل

معلومه [اذا طفى الموتر وانت مارفعت رجلك عن البنزين وضليت مواصل على نفس الدعسه او زياده لين مايوقف او قريب يقف وحدث صوت [تفطيع] فهذا يعني ان الخلل كهرب


سبق وصارت معي نفس المشكله يطفي فجآه وبعدها يدق سلف ومايشتغل ..

اخليه نصف ساعه واشغل ويطلع مافيه الا العافيه ..

شوف فيه سلك جاي من مجمع الاسلاك الي في الكبوت يشبك في الديلكو بجانب اسلاك البواجي شيك عليه والمشكله اتوقع 99% انها منه

سبق ان واجهت نفس المشكلة

وصارت من الديلكو

[الصيادالمليح]

اخوي ما اتوقع الدينمو له علاقة لانه لما تطفا السيارة فجاة علي ,, الانوار تكون شغالة والراديو ولا انا غلطان ؟؟؟

الأنوار و الراديو يكون شغال لأنها بتسحب كهربا من البطارية

تأكد من كل التمديدات الكهربائية ممكن تلاقي سلك محلول أو تالف

[BRAG]

السلام عليكم كيف حالكم يالمكشاتية عساكم بخير,,

ياليت تساعدوني مع هالسيارة رميتها عند البيت ولا احركها,, مشكلتها انها تطفا فجاة مع ان المكينة صافية ولا فيها تفتفة وغالبا ما تطفا الا اذا طلعت فيها مشوار داخل المدينة من ساعة الى ساعتين ( لاحظت هالشي يعني ما تطفا على طول بداية المشوار)

مع العلم انه تم تغيير هالقطع بدون فائدة:

بواجي واسلاك بواجي ,,,,, طرمبة البنزين,,,,, بطارية جديدة وكلهم قطع اصلية

غالبا تطفا لما اكون ماشي 30 الى 40 ومرة طفت وانا ماشي ريوس

السيارة كابريس 91
كان عندي نفس مشكلتك في البليزر 2006 بالضبط
ولا خليت ورشة وطلع في الاخير الكمبيوتر غيرته وسارت مثل الساعة ماشاء الله