محتآج رآيكم نيسان سفاري91

[مكشآتي للآخر]

السلام عليكم
إخوآني انا مليت من خرآبآت مكاين الكبريتر وصرفيتها لذآلك قررت
إني إركب مكينة تويوتآ 6 سرندل إإإإو 8 سرندل
على نيسان سفاري 91
إعرف ناس كثير مركبين مكاين 6 سرندل و8 بس محتآج منكم
تقولون لي رآيكم إفضل 6 سرندل ولا 8؟؟؟
وبصرآحة النيسان الي عندي إحس انه مايستاهل إركب عليه مكينة تويوتآ
إفكر إبيعة واشتري واحد نظيف واركب عليه؟؟؟
لانه النيسان الي عندي إحس انه لو مشيت عليه مثلا 180 إحس يبي ينقسم نصين
مدري ليش طايح من عيني..
لاهنتم إبي الاسعار والتكآليف الخ..ومكينة النيسان موديل97 كم تجيب لي؟4200

[سديرآوي]

الله يعينك ويفيدونك الاخوان ان شاء الله :d ,,

[قدر مكتوب]

قبل كل شي بسالك

كم له الموتر تحت يدك؟ اذا مده طويلة فالموتر تعرفه زين وتعرف وش قد حطيت به لذالك احرص انك ماتطلقه اذا كان قيره ودفرنساته ودبله كويس

شف يالذيب اذا بدي موترك زين لاتطلق الموتر ترى خرابيط بسيطة ويرجع الموتر تقل جديد وخصوصا الباترول سهل تربيطه والحين الباترول كلن يعرف يشتغل به

كراسي بودي +رباطات (اسفل الموتر) + مساعدات وتشييك اسفل السياره ويرجع تقل جديد وجامد وقطعه وحده
ولو كراسي البودي بهن عمر دبلن عليهن قطع من نسافات تريلة او سير مكينه وبدون ماتغيرها

المكينه :
نجي للمكينه اول شي مكينه موترك اذا نظيفه تبي تجيب لك 5000 الى 6000 الاف ريال ورح للتشاليح وتبي تشوف العجب من اسعارها هناك

قبل ماندخل بمعمه المكاين وشغلها حدد نوع الاستخدام اللي تبي

مثلا اذا انت تبي خطوط ومطينات لها نوع معين من المكاين
مثل مكينه الكزس 400 القديمه من موديل 91 الى 2000 هذي المكينه قوتها حلوه وبخاخ وتركيبها كامله من الى تقريبا من سبعه لااف الى 10 الاف تزيد وتنقص حسب سعر الميكنه ومن يركبها لك
طبعا قوه المكينه 4 ليتر يعني 4000 سي سي المكينه ممتازه وعملية وبالخطوط تبي تشخط سيارات كثير كاكامري وغيرها والمكينه بالبر مثل مكينه شد البلد حيث ان المكينه فيها احصنه وليس فيها قوه شد "عزم" لانها اصلا لسياره صغيره وهي منتشره الان كثير ولو خبطت او صار فيها شي سعرها بالتشاليح 1500 الى 3000 ريال

مكينه الباترول 4500 بخاخ يعني من موديل 2004 وطالع وهذي ايضا عملية بس ماراح تحس بفرق كبير عن 4200 ولكن راح تكون صافيه وهي تفرق عن مكينه التايوتا بانها 12 صباب وليست 24 صباب وسعرها بــ 10 -12 مع الرجيع وراكبه بموترك

مكينه التويوتا 4500 مكينه تكرف ابوها وحلوه وعملية وبخاخ وصافيه ومكينه مجربة وعليها اي غبار وسعرها بــ 15 الف غير سعر التركيب

مكينه 8 سلندر تويوتا 4700 حلوه وعملية جدا ومكينه فجر وبالخطوط حلوه ومامدحت كثير بالبر وفيه الاخ كنج التعديل مركبها ونزل موضوع يتكلم عنها وممكن تشوف انسان مجرب افضل لك

مكينه الفتك سعرها مع التركيب على موترك بــ 17 الف مع الرجيع (اذا مكينتك نظيفه) يزود الف او ينقص الف حسب المكينه مكينه حلوه ولكن عشان تصير بطله تبي قير +دفرنسات فتك وايضا الاخ كنج التعديل جربها على باترول ربع


اما اذا استخدامك مراقى ركب مكينه امريكي كابرس او جمس من الجدد البخاخ 5700 او 6 ليتر

طبعا مكاين الامريكي بالقوه افضل واقوى الف مره من الياباني



نصحية : لاتفكر دائما بالتركيب والسعر بالبدايه فكر لو لاقدر الله خالفت معاك المكينه مثلا لو ركبت مكينه فكس ار وخبطت معاك راح تضطر تركب مكينه فكس ار ثانية ولو سعرتها بالتشاليح راح تحصلها بــ 12 الف وطالع

لو ركبت فتك وخبطت الميكنه لاقدر الله راح تركبها بــ 20 الف


بينما لو ركبت مكينه كابرس 2006 او 2005 اذا خبطت لاقدر الله راح توضبها بــ 3000 الاف ريال او راح تبدلها بــ 5000 الاف ريال وهي لو حسبتها قيمه توضيب مكينه باترول 4200

مكينه اليوكون 5700 بــ 7000 الاف ريال وخطر النقص في السعر هو الغالب

مكينه السكاليد واليوكون الدينالي 6 ليتر (6000 سي سي) وسعرها ماتجاوز العشره ابدا وفيها ستوك اي بدون اي تعديل شد بلدها 350 حصان والفتك اللي هي اقوى الميكنه المذكور اعلى فيها ستوك 280 حصان



قبل التعديل شاور وشوف اللي ركب امريكي وش يقول واللي ركب ياباني وش يقول وبعدها قرر, لكن اسال اكثر من واحد واحذر من مبزره الاستراحات اللي يفك ويركب باستراحة ويتعلم بسيارات خلق الله

وفقك الله