اطلب تفسير منطقي لهذا

[المموه]

بسم الله الرحمن الرحيم
اخواني واعزائي
السلام عليكم ورحمة الله وبركاته
يعلم الجميع اهمية البر والكشتات في حياتنا واننا نترك احيانا اشياء مهمه جدا ونتنازل عنها من اجل طلعه للبر .ولا يخفى عليكم ان الكثير منا لا يكفيه احيانا مستودع واحد لحاجات البر . سياره مكمله بأجهزه وثلاجات وسلاح وفشق ودربيل وكمره وتوانك وكبوس وعدة طبخ وفك وربط وقلص ماء وخيام ورواقات وفراشين وسرير وملابس شتاء وصيف وفرشات و و و و ....الخ . وتحصل كل واحد طردي وراء كل جديد ما غير يشتري ولا يدقق ويدفع وهو مبسوط اذا راح للبر سيارته ما تحصل به مكان ابره تحطه محمل ومليان ومستمر على هالحال سنين ما مل .
يجي يوم فيه عج والا ذباب والا يقرص احد اخوياه او تخرب السياره ويتبهذل او يضيع وشوي والا يموت ويقول توبه بلا بر بلا خرابيط وش جابنا بالبيت مكيف مرتاح وعند عيالي . وبعد فتره تحصله محمل عفشه ورايح .
سؤالي ماهو السر في ان راعي البر يدفع ببذخ ولا يدقق لكل مايخص البر وكذلك عدم التزامه بأنه لن يطلع ثانيه للبر . والسلام عليكم . اخوكم ( المموه )

[الضاحي]

حياك الله يا أخوي المموه وتشكر على هالموضوع الممتاز واللي كل راعي بر يمر فيه ( خصوصا وين تحط هالأغراض وهالعفوش) :confused:

وانا بصراحة أشوف ان الموضوع لا يعدو كونه هواية يعشقها ناس ويكرهها ناس آخرين وانا أعرف واحد لو تعصيه يوميته 1000 وتقول له نوصل صلبوخ قال الا خذ 1000 وفكني :mad: . والهوايات أنواع وأشكال وكل هواية لها عشاقها مثل الغوص والصيد وتسلق الجبال وسباق السيارات والقفز بالمظلة وجمع الساعات الثمينة وترهيم السيارات وجمع امزاين من الإبل وغيرها.

وانا أحمد الله اللي هوايتي عي البر والكشتات لأنها هواية جميلة ورجولية وتعلم الإنسان أشياء كثيرة وعلوم رجال غانمة شرواكم :good: . وعلى فكرة تراها من أقل الهوايات مصرف وانت قارنها بغيرها وبتشوف وبعدين كل معظم مصاريفها (الدورية) في أكل وشرب وهذا ما يعد مخاسير ;) . انا أعرف واحد من حقين الحمام ووالله انه يخسر اكثر من اللي اخسره في كل طلعاتي لأن هوايته يمارسها هو بشكل يومي اما أهل البر فطلعاتهم مهما كثرت في السنة تظل معدودة :rolleyes:

ويازيييييييييييييييييييييين البر في الشتا وخل عنك بس (يا ويلي على ذيك الحليبة بالزنجبيل على طلوع الشمس ممممممممممممه) :D

وسلامتكم.

[المموه]

اخوي الضاحي
السلام عليكم ورحمة الله وبركاته
اشكر لك مرورك ورأيك . لكن فعلا ودي تحط لك تاريخ بداية ونهاية لمدة سنه وتحسب في نهايتها مصاريف البر مع ماهو عندك من قبل اكيد بتحصل عندك ثروه . هي ماهي خساره بالبر وممارسة هواياتك وهي مرجله وافضل من التبطح بالاستراحات والسفر المشبوه .لكن احيانا يصير البر بالاضافه لمصاريفه العاليه غرابيل ومشاكل وش اللي حادنا ويخلينا ما نقدر نتركه .!..؟

[جرير]

الاخ المموه

السلام عليكم

ترا حنا علي طول بريين لان طبيعتنا كذا وارضنا كلها بر في بر لذلك اثرت علينا اضافه الي عدم وجود البديل .
وياخي احيانا ترا الانسان يستمتع بالتعب والشقا والصرف ايضا في امور ربما يراها الاخرين غير مقنعه
فتجد متعة الكريم بالصرف في وجوه الكرم واهل الحيوانات اكثرهم يخسر الاموال من اجل المتعه خاصه اهل الابل
وراع البر مثلهم يحب يقتني اي شيء يتعلق البر فاذا حاز عليه تحصل متعه لديه حتي لو لم يستخدمه واهل البحر والجو ايضا لهم مثل ذلك وهذه طبيعة البشر .


هذه وجهة نظري وانت ابخص ..
.

[الضاحي]

والله يا أخوي المموه - ولا يهون استاذنا جرير -

انا فعلا دايما أفكر وش اللي معلقني في هالبران وهالمطارد وهالقشان والقراشيع اللي تحتاج مستودع في السلي علشان يضفها ويااااااااالله ، وكل ما رحت كشتة والا طلعة بر حتى لو هي يوم واحد قلت لنفسي (لما ارجع في الليل طبعا) وش اللي حادني وووش اللي مبليني؟ انا وش لي وللبربسة والطبخ والنفخ ووين القدر ووين الغطا ووين راحت السكين وما جبنا الملح .... الخ من الأمور اللي تمر على كل مكشاتي. بس تدري وانا اخوك: هالغثا وهالبربسة وضاع وما ضاع وصدنا وما صدنا ونسينا وما نسينا وبرد وحر وبعوض وذبان هي اللي تحلى الطلعات وتضفي نكهة على ما تلاقيه في الصحاري من هدوء ومساحات فاضية وطبيعة بأنواعها والوانها وبعد عن صخب المدن وايقاع الحياة السريع والصناعي ، ولا تنسى الصحبة الطيبة اللي على قلب واحد وتتعلم منهم كل يوم فوائد عديدة ما لها ثمن.

تحياتي لك على هالطرح الجميل اللي يدغدغ المشاعر ... (متى نكشت بس ؟ )

[سهيل1]

أكيد السبب الراحة النفسية والمتعة التي يجدها في الرحلات البرية
وقد يكون وراءها دوافع نفسية مثل : الهروب من ضغوط العمل والمشاكل الأسرية وروتين الحياة

والحل :
التوسط في جميع الأمور في عَدد الرحلات وعُدة الرحلة .... والبساطة وعدم التكلف ..

[المموه]

اخواني الاعزاء
السلام عليكم ورحمة الله وبركاته
اشكر مروركم وابدائكم ارائكم الصائبه ولكن لازال هناك اسباب غير معروفه ياترى ماهي؟