مشاهدة النسخة كاملة : مشكلة البطاريه في البر اذا فضت وحلها ( سهل جداً )
بدولوجيا
21/08/2005, 01:59 PM
السلام عليكم ورحمة الله وبركاته
اخواني احب اعطيكم فكره وانا مجربها وممتازه جداً وسهله
وهي اذا فضت عليك البطاريه وانت في البر ولا حولك احد
وش تسوي
هذا الموضوع مع احترامي للاخ ابو الريم قريته في هذا المنتدى الخاص بالسيارات بس حبيت اضيفه في موضوع
جديد
اهم شي يكون معك اسلاك بطاريه تتحمل الى 400 واط او اكثر
اشبك اسلاك البطاريه في البطاريه
ومد الاسلاك الى مسامير الجنوط يعني تحط السلك الاحمر في مسمار والسلك الاسود في مسمار
لان الجنوط في ذاك الوقت تكون مليانه كهرب وتعطي سالب وموجب واشبك الاسلاك لمدة دقيقتين
ورح شغل الموتر وانشاء الله بيشتغل واذا ما اشتغل زود المده بس لاتطول كثير لانك اذا طولت بيضرب عليك
السلك
اما من ناحية طلبي انه يكون السلك قوة تحمله من 400 واط واكثر علشان لايضرب عليك السلك وتقعدبها
واي استفسار انا حاضر
واكرر اسفي للاخ ابو الريم لوضع موضوع جديد لنفس المشكله
بدولوجيا
سهيل1
21/08/2005, 02:32 PM
لان الجنوط في ذاك الوقت تكون مليانه كهرب وتعطي سالب وموجب
بدولوجيا
الله يهديك من وين جتها الكهرب
فكرة غير ... علمية .... وخطيرة
.
شـهـاب
21/08/2005, 02:34 PM
خوش طريقه والله
مشكور
لكن اسلاك الاشتراك ماتنفع ..؟؟
القنيص
21/08/2005, 02:52 PM
يعطيك العافية بدولوجيا على الفكرة الطيبة
ــــــــــــــــــــــــــــــــــــــــــــــــــ ـــــــــــ
السلام عليكم ورحمة الله وبركاته
الأخ الكريم بدولوجيا
التصرف هذا قمة في الخطورة :confused: لأنك وبكل بساطه تسوي Short Circuit ( التماس متعمد) وهذا اخطر شي في الكهرباء ....
لأنه إذا كانت البطاريه نشيطه شوي فأنت بين حالتين إما أن الكيابل واللي تقول عنه لازم تحمل 400 تتحترق أو أن البطارية تبي تنفجر من شدة التفاعل أو على اقل تقدير وإذا كانت البطارية ضعيفة مررررره تبي تحتمي الأسلاك وتذوب العازل اللي عليها بتصرفك هذا وإذا كانت البطارية ضعيفة جدا فأنت ترفع درجة حرارتها فتزيد من التفاعل بالقوة ..... قد ينجح هذا التصرف لكنه أقصى درجات المخاطرة بالتعامل مع البطاريات السائلة وتزداد الخطورة مع النوعيات المقفلة اللي ما تتعبا (Maintenance Free)
:no2: :no2: :no2: :no2: :no2: :no2: :no2: :no2: :no2:
أنا احذر جميع الإخوان من هالتصرف بحكم الخوف على إخواني المسلمين لا أكثر ولا اقل وبحكم أني مهندس كهربائي واعرف مدى خطورة هالتصرف!
تخريب الدعوى!!!
اخوك عبدالرحمن
راعي صاروخ
21/08/2005, 03:30 PM
بسم الله الرحمن الرحيم
اخواني سهيل ومطحن
الاخ بدولوجيا عطانا الحل الاخير اخر طريقه اذا احد تعطل ولا حوله بشر
الله لايقدر شر ..........
والله يعطيك العافيه يا بدولوجيا
حجلان
21/08/2005, 03:40 PM
الطريقه هاذي خطيره جدا وممكن تسبب مشاكل لاسمح الله
السلام عليكم ورحمة الله وبركاته
الاخ راعي صاروخ ....... الطريقه هذي مثل اللي يقول للمريض اشرب كاسين كلوركس اما تقوم شديد والا تموت ونرتاح منك ....... الغالب على مستخدمي السيارات انهم ما يعرفون وشلون يفحصون هل المشكله بالبطاريه والا بشي ثاني .... تخيل انه واحد اقتنع بهالفكره وسواه بسيارته وكانت المشكله ميكانيكيه مهيب ضعف بالبطاريه ...... وش يبي يصير .... اووووول شي يبي يضرب شرار قوي وهو يحاول يوصل الكيبل بالصواميل ,,,,, واذا صار بايعها وركب الاسلاك بالقوه فهو لايمكن يطلع من حالتين ... اما الحريق والا الانفجار
اخوكم عبدالرحمن
بدولوجيا
21/08/2005, 05:14 PM
السلام عليكم
الاخ سهيل حياك الله اخوي الكهرباء تجي من الدوران والاحتكاك
وجرب قبل تحكم
وحياك الله
بدولوجيا
21/08/2005, 05:16 PM
اخوي شهاب
تنفع اذا كانت كبيره ومثل ما قلتلك لاتطول الشحن يعني اقصر مده تقدر عليها
وجرب ( والتجربه خير برهان )
بدولوجيا
21/08/2005, 05:17 PM
حياك الله اخوي القنيص
وحاضرين طال عمرك
بدولوجيا
21/08/2005, 05:37 PM
اخوي عبدالرحمن ( مطحن ) حياك الله
اول شي الله يجزاك خير على التحذير وانا معك بس ترى مو لهالدرجه الخطوره الله يحييك
ولا بيني وبين هالاخوان المسلمين ثار علشان اضرهم بالعكس الموضوع للفائده
وانا مجرب هالشيء صدفه وبقولك كيف
كنت مساافر من السعوديه للاردن ودخلت الحدود الاردنيه وتعديتها بمسافة حوالي 100 كيلو في طريقي لمعان
وتوقفت على جانب الطريق وطفيت السياره وكان الجو رائع جداً وفتحت الكبوت وفرشت فرشتي وزينت شاهيي
وخذيتلي حوالي ساعه استراحه من عناء الطريق لاني ماشي من جده
واذا بالسياره ما تشتغل وحاولت جاهد بدون اي نتائج ايجابيه وتبنلي ان البطاريه فضت
وطلعت اسلاك البطاريه وشبكتها في البطاريه واخذت لي لفه صغيره على رجولي ادورلي اي قطعتين حديد لاشبك الاسلاك فيهم
ولا لقيت ولا حولك احد في الطريق
وانتبهت للجنوط ولمسامير الجنوط وخطرت في بالي الفكره
وشبكت اسلاك البطاريه فيها وبالفعل من اول نقره اشتغلت السياره على طول
وكانت اسلاك البطاريه غايه في الحراره بعدها
ولو انا سويت هالعمليه مباشرة بعد توقفي والكفرات حاره هي والجنوط كان الاسلاك ضربت وفي هذه النقطه انا اويدك
ولكن اخذتلي حوالي ساعه تقريباً والكفرات والجنوط بردت قليلاً وبكذا انحلت مشكلتي الحمد لله
ولوتلاحظ انا قلت هذا اخر حل اذا ما حولك احد وورطان
ويعطيك العافيه على مرورك وما نخلى من مشورتك
بدولوجيا
21/08/2005, 05:39 PM
اخوي راعي صاروخ
الله لايهينك وبالفعل هذا اخر حل
وانت اللي فاهمني
بدولوجيا
21/08/2005, 05:44 PM
اخوي مطحن
الله يجزاك خير على النصيحه وكلامك في محله
وفي هالوقت ماحد مايعرف اذا كانت المشكله من البطاريه او ميكانيكيه
واللي ما يعرف نقدر نوضحله ومثل ما قلتلك انا مجرب ولا جبت شي من راسي الله يطولنا في عمرك
وشاكر ومقدر
nahham
21/08/2005, 07:12 PM
والله ما ادري لكن المسأله قمة في الخطوره
وين اللي جربو
عاشق الجبل
21/08/2005, 07:18 PM
ماقصرت أخوي بدولوجيا
عزالله اذا أنا في محل مقطوع أبجربها ولا أهلك
غيّام
22/08/2005, 06:16 AM
السلام عليكم يالربع
وش السالفه شبيتوا على الرجال على طول الرجال ما جاب شئ من راسه ولاهوب ناصح الا بخير
وبعدين هو مجرب
واحسن رد رد الذيب عاشق الجبل اذا حدتني الحاجه ابستخدم اي وسيله لو تخبط المكينه اذا سلمت هو يقول للضروره مهوب اذا طفت وانت معك اشتراك بس متعيجز
اتوقع ان الرجال صار له موقف وجربها ونجحت
على كل وسعوا صدوركم والموضوع ما ياصل المسأله تجربه ونجحت
تقبلوا فائق تحياتي للجميع بدون استثناء
غيام
gasomi
22/08/2005, 07:19 AM
الفكرة غير عملية ولكن ارتفاع درجة حرارة البطارية نتيجة الالتماس ين السالب والموجب يعطي كهرباء قليلة جدا نتيجة التفاعل الشديد داخل البطارية وهناك حلول أكثر
1- إذا كانت السيارة جير عادي ارفع أحد الكفرات الخلفية بالعفريتة ولف الكفر بحبل طويل ثم ضع السيارة في نمرة الثالث كي يسهل لفه وضع المفتاح في وضع التشغيل كما في طريقة ( نتع ) السيارة أعتقد هذه الطريقة تنجح
2- السيارات الجير اوتوماتيك لايوجد حل إلا تغيير البطارية أوالمحافظة عليها وفحصها على الدوام
رسلان
22/08/2005, 01:24 PM
فكرة عجيبة !!
ولكن ( النتع ) أليس حلاً كافياً ؟!!
شكرا لكم ...
شـهـاب
22/08/2005, 04:56 PM
مشكور بديولوجيه على تكرار الرد
شاكر لك
تميراوي
22/08/2005, 11:05 PM
انا بانسبه لي ماقتنعة بالطريقه هذي ابد لانها خطره بس عندك حل ثاني احسن من كذا وهي النتش للسيارات العاديه اما التماتيك فينتضر له واحد يعطيه اشتراك
يا اخوان
علميا وعقليا كيف يكون كهرب في قطعة معدنية واحدة ( الجنط )
ثم اصلا لا يمكن ان يجمع الجنط هذه الكمية من الكهرب
الموضوع فيه لبس ولا يمكن ان يكون بهذه الطريقة
المرنقط
23/08/2005, 03:01 AM
يا شباب الرجال عطاكم تجربة ولقاها مفيدة اذ انقطع الواحد فينا لا قدر الله
والحل هذا هو اخر الحلول يعني يانك تقعد الى ان يفرجها ربك ولا انك تجرب هذي الطريقة
انا معاك اخوي الناصح ان التجربة هذي غريبة بس مادام اخوي بدولوجيا جربها وانفعت اكيد ان الطريقة لها عملية معينة تخفى على الكثير والتجربة خير برهان ولا تحكم ما دام انك ماجربت :no2:
وجزاك الله الف خير اخوي على هذي الفكرة :good:
اخوك ابو عبدالكريم
بدولوجيا
23/08/2005, 10:40 AM
بسم الله الرحمن الرحيم
اخواني
nahham
عاشق جبل
غيام
gasomi
رسلان
شهاب
تيمراوي
ناصح
المرنقط
اشكر لكم تواجدكم وحضوركم ومتابعتكم وتعليقاتكم الرائعه ونقد بعضكم
ولكن يا اخوان الطريقه هذي اللي غير مقتنع فيها يقدر يجربها على بطاريه شبه فاضيه خارج السياره اذا كان شاك
بعد مشوار وسيجد النتائج اللي قلتها لكم
او يروح مشوار ولا رجع يطلع الاشتراك ويشبكه في مسامير الجنط ويضرب السالب والموجب اللي في الطرف
الثاني في بعضها وسيرى انه تولد كهرباء وبيعرف ان هالطريقه غير خطيره وصدقوني يا خوان احاول المساعده
فقط وانا موجود والاخوان اللي يقولون ان النتش حل هو حل لكن لا صرت لحالك ما اظن تفيدك هالطريقه
او في البر وكفراتك منسمها على 10 وش يحرك الموتر حتى لوانكم 2 او 3
ولكم مني كل الود والاحترام
بدولوجيا
عاشق الصياهد
23/08/2005, 11:46 AM
ألي جنوظة كروم تصلح؟؟؟؟؟؟؟؟؟؟؟
بدولوجيا
24/08/2005, 04:50 PM
اخوي عاشق الصياهد
انت عليك من المسامير ما عليك من الجنوط
وحياك الله
Powered by vBulletin® Version 4.2.3 Copyright © 2024 vBulletin Solutions, Inc. All rights reserved, TranZ by Almuhajir