سؤال لمن جرب الخيمتين

[Abo ziad]

اخواني السلام عليكم ورحمة الله وبركاته،
ارجو ممن جرب خيمة الوسم وخيمة البيرق 3 *3 الافادة بميزات كل خيمة وسلبياتها وما هي الاسهل في النصب والطي وفقكم الله

[ن م ر]

سوف أذكر المميزات والاخوان ما يقصرون

خيمة الوسم :
1- بدون عمود في الوسط
2- مواصيرها غير ظاهره مخفيه يعني
3- صناعة متينه وذات جودة عاليه
4- سهلة النصب والطي
5- وجود أنواع مختلفة ومقاسات متعددة وحسب الطلب


البيرق :
1- خفّة الوزن
2- شكل مميز
3- وجود عاكسات ليلية
4- وجود أطناب للتثبيت
5- توفر طبقة أو طبقتين من العزل للدفء أو الاستخدامات الصيفية
6- وجود مصانع القاضي في مناطق متعددة

[لاتكب البيالة]

السلام عليكم
خيمة 3*3 ما انصحك تاخذ شي بوسطه عامود مهما كان نوعه

[عاشق السيل]

أنا جربت البيرق 3*3 خفيفة وسهلة النصب والفك لكن عيبها الوحيد العمود اللي بالنص !!!

[Abo ziad]

اشكر اخوانى

[ابن غفيص]

أنا جربت خيمة البيرق مبطنه 4*4 ممتازه جداً وشوري عليك لا تعقبه عيبها الوحيد إنها ثقيله شوي قرابة 45كيلو بس خيمه على مستوى. . .

واللي يخبرلي خيمة البيرق 5*5 أو خيمه عاديه أو جحشه تراي شراي يراسلني عالخاص.

[Abo ziad]

شكرا للجميع على الايضاح وفقكم الله

[سرهيد]

البيرق :
1- خفّة الوزن
2- شكل مميز
3- وجود عاكسات ليلية
4- وجود أطناب للتثبيت
5- توفر طبقة أو طبقتين من العزل للدفء أو الاستخدامات الصيفية
6- وجود مصانع القاضي في مناطق متعددة

:good2::good2::good2:

اضف على ذلك سهولة تركيبها فانا املك منها ولله الحمد الثلاث احجام

تقبلوا مودتي

[ابوناهض.]

طيب يالربع كم سعر البيرق 3*3 والوسم 3*3 وين المحلات الي يبيعونها وتكفون يالربع ردو علي

[راع العوجاء]

ابو زياد

اذا بتاخذ 3x3 افضل لك ان لا تأخذ :no2: البيرق او الوسم لانها صغيرة ولا تسوى من يطقها ويشيلها لثقلها مقارنه بالخيام العادية
اما اذا كانت الاحجام الأكبر 4x4 و 5x5 فيفضل تأخذ أحد هاتين الخيمتين لكن ترى ما هيب خفيفة يعني يبيلك اثنين نشاط يشيلونها من الموتر

تقبل مروري ومداخلتي

ابو سعد






.

[سرهيد]

ابو زياد

اذا بتاخذ 3x3 افضل لك ان لا تأخذ :no2: البيرق او الوسم لانها صغيرة ولا تسوى من يطقها ويشيلها لثقلها مقارنه بالخيام العادية
اما اذا كانت الاحجام الأكبر 4x4 و 5x5 فيفضل تأخذ أحد هاتين الخيمتين لكن ترى ما هيب خفيفة يعني يبيلك اثنين نشاط يشيلونها من الموتر

تقبل مروري ومداخلتي

ابو سعد






.

بخصوص الثقل

انا عني اشيل 3*3 و 4.5*4.5 العادية بدون ما احد يساعدني

ما اعني شويب :) امزح يقولون اني شويب وانا توني شباب :):)

تقبلوا احترامي

[صعصعه]

وعليكم السلام ورحمه الله وبركاته

انا عني جربت خيمة البيرق 4*4 مبطنه .. اخذتها من ابها الصيف اللي راح هذا
اووول نصبه لها ويجي المطر وتبدى تنقط (مع مكان الخياطه بالسقف)
ويوم رجعت للرياض رحت للقاضي وعلمتهم بالسالفه قالو اكثر من واحد يعانون من المشكله هذي
والعامل اللي عندهم نصحني (بالشمع)

فاااا مادري انا لحالي اللي عندي المشكله .. اول كل اللي استخدمو البيرق كذا ؟

[عامر11]

انا توني خذيت 5 في 5 عز الله مايشلونها كود 2 متعافين والا لحالك والله ماتشلها وخذيتها من مصنع القاضي في الخالديه بالدمام بـ1850 غاطين ووزنها تقريبا 65 كيلو جرام يعني اكثر من خيشة الشعير ب15 الي يبي يعرف انه يقدر يشلها المثال واضح مر على سوق وارفع لك خيشة شعير .
هذا للفائدة تمت المشاركة وتحياتي لصاحب الفكرة والمشاركين والشكر للجميع.

[راع العوجاء]

بخصوص الثقل

انا عني اشيل 3*3 و 4.5*4.5 العادية بدون ما احد يساعدني

ما اعني شويب :) امزح يقولون اني شويب وانا توني شباب :):)

تقبلوا احترامي

ابو عبدالله

ما شاء الله تبارك الله ( ترى ما يحسد الحلال إلا أهله :D )

ويقولون ظلع من عود ولا ظلعين من صبي :j

لكن الظاهر أنك تشيلها بدون العمود ولا الأطناب ;) ;) يعني الخيمة لحالها ؟؟

على العموم من أراد أن يجرب ثقلها موجودة في المعرض يجرب اللي يقدر يشيلها يشتريها :D


تقبل مروري

ابو سعد








.

[سرهيد]

ابو عبدالله

ما شاء الله تبارك الله ( ترى ما يحسد الحلال إلا أهله :D )

ويقولون ظلع من عود ولا ظلعين من صبي :j


.

هلا وغلا باخوي الكريم قلعة الامجاد

( تسن ) كلامك جازي وبيخليني اشوف لي بنية مزيونة اطرررررب شبابي بها .

يا زين المدح اتاريه يطرب النفس لو هو مو صدق :):):)

لا طال عمرك شايلها بعمدانها .. تراني راعي قرص بر مو بيتزا :) يعني نشيّط :) وما احكم على غيري بشيلها :)

تقبل مودتي

[فهدالغيهب]

.. تراني راعي قرص بر مو بيتزا :) يعني نشيّط :) وما احكم على غيري بشيلها :)

تقبل مودتي

ههههههه

أجل ماتاكل بيتزا وش تقصد يابوعبدالله

بتشوف أوريك إن ماطيحتك في البيتزا لين تصير كرشتك مترين في متر ويغلطون الناس بين الخيمة وكرشتك يعني كلهن أمتار في أمتار هههههه

[العاذر]

يا جماعة الخير
صاحب الموضوع سؤاله لمن جرب الخيمتين..وليست أحداهما
بارك الله فيكم

[سرهيد]

يا جماعة الخير



صاحب الموضوع سؤاله لمن جرب الخيمتين..وليست أحداهما


بارك الله فيكم


اخي الكريم

في الغالب ان كل شخص اذا ملك خيمة لا يمكن يملك خيمة ثانية ، يعني انا عندي الوسم فقد لا اجرب غيرها بحكم اني مقتنع بها .

وانا عني مجرب خيمة البيرق واعطيت رأي فيها .. وكل شخص بامكانه ان يعطي رأيه في الخيمة التي يريد من طلب الاستفسار ان كان جربها ..

فانا استطيع اعطي مميزات وعيوب الخيمة التي لديّ .

مع اني اطلعت على احدى خيام الوسم من واقع وتجربة وهي المبطنة 3*3 او حولها ، لكن الاخوان الذين جربوا اكثر مني ورأيهم فيها يكفي ...

والمطلع يقرر ما يريد .

ويحيك ربي اخوي العاذر

تقبل مودتي

[Abo ziad]

شكرا لمن شارك وساهم في ايصال المعلومة وجزاكم الله خيرا

[كشّات شتوي]

جربت البيرق 5×5 طبقتين (مبطنة).....ممتازة والثنين يبنونها بالراحة .
أما العمود بالوسط أظنه ليس عيب مع جودة الخيمة وخفها في الحمل
عموما ... أخي الكريم الأذواق تختلف وكذلك السلع .
أما البيرق إذا نصبتها صح وشديت أطنابها ووفقت في اخيار مكان نصبها.
فلا تقلق.. جربتها العام بام رقيبة ......وجانا مطر وبرد والحمدلله لا يعلى عليه
لكن في الهواء الشديد يلزم شدها مضبوط ودفن أطرافها بالقوز . وانس القلق بعد توفيق الله .