ماهو حل رائحة غسيل السمك في السيارة ؟!

[رواق]

السلام عليكم :)

الحقيقة ترددت في مكان الموضوع ، بين خيمة السيارات وبين خيمة الصيد البحري لكني قررت أضعه هنا لأن أهل السمك أدرى بشعابه

وأعتذر من المشرفين إن كان لهم رأي آخر علما بأني كتبت في محرك بحث الخيمة "رائحة السمك" لكني لم "أشم" أي رائحة :)

وبالتأكيد بعضكم عنده حل لمشكلتي ، وهي باختصار اني صدت سمك وربيان من سوق السمك في البحرين ، وحطيته في صندوق فلين مع الثلج ومسكت الخط للرياض

اللي حصل ... خرخر الفلين على التلبيسة التنزاني اللي حاطها في الشنطة ، ومنها صبغ في أرضية الشنطة والمراتب الثالثة في الجيب لأني سادحهن ، و خشمك مايشوف الا النور :D

يعني المشكلة ليست في رائحة السمك فقط ، بل الماء الناتج عن ذوبان الثلج ، واللي طبعا ريحته تكون خياس ( أعزكم الله ) مقارنة برائحة السمك نفسه

وديت السيارة للتلميع ، وقاموا بفك المراتب الأخيرة مع الفرش وصارت خلفية الموتر على الحديدة ، وقالوا نبي نسوي عملية غسيل لها وإذا اختفت الريحة تماما أو نبي نغسلها مرتين وثلاث ، وهذا أقصى شي نقدر نسويه لك

الحين المراتب عندهم ، وقمت بتمسيح الحديد في الخلفية بالديتول المعطر ، لكن الريحة باقية في السيارة تصرع الطير :(

وش الحلول المقترحة الله يجزاكم خير ويوفقكم ؟

أحد الحلول المقترحة :

قال لي واحد القرفة مجربة في البيوت وحدة بوحدة ، لازم تغلي الماء مع القرفة وتخليها تبخر ، بس مدري وشلون تبي تسويها في السيارة

طبعا أنا على طول جا في بالي الدافور الصغير حق الشاي والقهوة أحطه في خلفية السيارة وأشب على القرفة

هل هناك اقتراحات أخرى ؟ أفيدونا مشكورين

[فارس الغزير]

الحل

افتح جميع ابواب السيارة في الشمس لمدة 4 ساعات

لان الرائحة تفوح اذا كانت السيارة مكتومه

[وحدآني]

والله صارت لي نفس سالفتك

وماراحت الريحه الا بعد ماغسلت مكان الريحه بكلوركس وخلطت معاه لوكس وصابون عادي وخليت السياره مكشوفه تحت الشمس وراحت الريحه بس فيه ريحة كلوركس خفيفه تقدر تتصرف معها يعني

الله يكون بعونك

[صايد الحوت]

ولكمواااااااااااااااااا( صراحه ياخوي الله يعينك تمر على مخيم الغواصين تاخذ لك عده كامله مع اكسجين ومنظم عشان تسوق وانت مرتاااااااااح هههههههههههههههههه امزح معك انا اقولك اغسل السياره من داخل بلفيري وبعدين ياطويل العمر الله يعينك تستغني عن السياره على اقل 3او 4 ايام توقفها بمكان فيه الشمس عموديه يعني متفارق السياره الا المغرب وتنسم الدرايش حق السياره شوي وتفتح الفتحه وانشاء الله راح تخف الريحه مره ( يعني على حسب يمكن يبقاء ريحه بس يمكن علاجها بلعطور او الغسيل المكرر ) والله يسر لك امورك يارب .

[النوخذة]

فيه ناس تقول ان الفحم يسحب اي ريحة من اي مكان مسكر
أنا عن نفسي ماجربت هالشئ , لكني إذا رجعت من البحر
أشب لي بخور داخل السيارة وأكتمها إلى اليوم الثاني ويالله الحق راس
جرب الفحم !! لأنه واجد اللي يمدحونه

[رواق]

فارس الغزير
وحداني
صايد الحوت
النوخذة

جزاكم الله خير ، مشكورين على سرعة تجاوبكم

وإن شاء الله من بكرا اطبق كل اللي قلتوه ، أول شي افتح البيبان والدرايش الظهر ، ثم في الليل اببخر السيارة بالمدخنة واحط فيها فحم وأشب على القرفة واكتم ام السيارة إلى الصبح .. ونقول لعل وعسى

[Boury]

ماتتعبش نفسك.
كفاية غسل المكان و تهوية السيارة قدر المستطاع.
و الرائحة حتفضل شوية و تاخد وقتها و تروح.

مهما عملت حتفضل موجودة مدة معينة على حسب الكمية المسكوبة، بعد 4-5 أيام ان شاء الله تختفي تماما.

[al7aaly]

اخوي رواق
شوف يالغالي انا قد صارت لي كذاا ثلاجة السمك صبت في الخلفيه والحل بأذن الله اشتر خل حق الاكل ورشه في الخلفيه كلهاا وان شالله تروح الريحه

[accentkool]

اولا_ تغسل اماكن الريحة بمنظفات لوكس وصابون وغيرة وديتول
ثانيا_ انك تحط السيارة في مكان مشمس بقوة وفتح النوافذ لمدة 3 ايام
واح امورك تظبط والريح تصير معدومة

[أبرق الحيراء]

اخوى روواق كانت عندى مشكلة بالثلاجة حقت البيت وخربت وفيها كان ربيان
الموهم
مثل ما تفضلت ريجتها تصرع الطير ما لقيت حل لها
الا بالحل ذا وووهو انك تشترى كيس فحم وتحطة بكرتون كبير وتخلية بالسيارة اذا هي مسكرة وبري البيت واذا رجعت بيتك بالحووش افتح السيارة تتهوى بالشمس والفرشة لازم تغسلها بعصير ليمووون طبعا طبيعى وما فية سكر وتنتهى المشكلة ان شاء الله بالنسب للفحم خلية اطوول مدة ممكنة

[المارلين]

رش جواتها بنزين بعدين ولعها وهرب 20 متر ولما تنفجر استنا ربع ساعة لما تفحم وبعدين طفيها بعدين ما راح تشم اي ريحة سمك \\\\ موفق ان شاء الله:f:D:D:D

[سداح الاول]

انا ضد كلام اخوي المارلين لان 20 متر ابعيده مره وراح تتعب لين تروح وترجع مره ثانيه انا انصحك انك تبعد 18 متر فقط انا مجرب هذي الطريقه مرتين والحمد لله مره راحت الريحه ومره ما راحت انت وحظك

انا انصحك تخلي الدرايش مفتوحه شوي في الشمس وانشاء الله تروح الريحه

تحياتي لك

[صياد متهور]

وعليكم السلام
اخوي الفحم انا مجربه مية مية
يعني اللي يغال لك غسل السيارة وتشميس السيارة مع فتح النوافد والفحم وبخور وبادن الله مية مية مافي ريحة
بالتوفيق

[A B D U L L A H]

فيه ناس تقول ان الفحم يسحب اي ريحة من اي مكان مسكر



أنا عن نفسي ماجربت هالشئ , لكني إذا رجعت من البحر
أشب لي بخور داخل السيارة وأكتمها إلى اليوم الثاني ويالله الحق راس


جرب الفحم !! لأنه واجد اللي يمدحونه



صدقت ... خصوصا بالماء ( احواض سمك الزينه )


جربته وكان نافع بنسبه كبيره وقلل من رائحه الحوض


ولكن الأفضل عدم إستعمال الفحم العادي


يوجد فحم ( صناعي ) مضاف إليه مواد .. بحيث تكون فعاليته آقوى


ويمكن الحصول عليه من محلات الحيوانات وتربيه الآسماك والطيور

لكن يا ( روآق )

في ناس تكيف على ريحه السمك :D

بس عاد ماهو يعفن وتقول تعال شمه

لا طازه ... يازينه زينآهـ بس :f

[O M A A R]

مً ششآء آلله الأخوآن أفآدوك

طب وتخييير في الحلووول :D

ومثل مً قآلوآ الششبآب عليييك بالششمس أحسسن علآج لإزآلة الروآئح ;)

[dsa929]

خير الكلام ماقل ودل
اغسل السيارة وحطلك فحم والسلام

[بحرالخبر]

التجربة خير برهان
غسل مكان ماء الربيان بالخل ثم علبة فيري كاملة تضع السائل على المكان ولمدة ساعة
بعد ذلك تقوم بالغسيل وتنظف المكان وينشف وطبعا تترك السيارة مفتوحة على الأقل
3 ساعات النتيجة ان شاء الله مضمونة

[White_Shark]

فحم ومعطرات بس !

[كابوس السمك]

إضافة على كلام الأخوان... فيه بودرة (صودا كاوية معطرة) تنباع في السوبرماركت... جهة منظفات المنزل... تستعمل عادة للبساط في البيت... تنثر عليه قبل الكنيس.... ممتازة... و فعالة... و سريعة....

[عوام 5]

الله يعينك على ريحة السمك

[غواص فلسطين]

وعليكم السلام ورحمة الله وبركاته

أهم شيء لا تكتم السيارة لا بالليل ولا بالنهار لأن الريحة بترجع ثاني ولازم فعلا تأخذ وقتها ,,
الله يعينك ,,

تحياتي

[MR VEDO]

السلام عليكم
حدث معي نفس الشيء الحل عندي
شوف عزيزي ولع لك فحم وحط بخور جاوي عاد اذا فيك سكني خل غيرك يسويها هع هع هع وخل المبخر داخل السياره وكتمها وكل اشوي افنح السياره وحط اشوي جاوي اذا طفى وشف النتيجه شرط تدعيلي
بس والله جد السالفه انا سويتها في موتري وراحت الريحه


بس ياريحت الجاوي كايفه هههههههههههههههه

[القنصل,,,]

بسراحه انا دخلت عشان الموضوع مادري كيف جاي شكلك اخترته ونت قاعد تحك راسك وعشان كذا تلخبط الموضوع
هههههههه
اتزعل علينا ترى نحب نمزح على العموم حط بيكنج بودر اللي يستخدم للكيك حط يوم كامل وبعدين اكنسه

[وليد الغربة]

الحمد لله على كل حال
مافي مثل الشمس
ممكن تدخن السيارة

اخوك الغربة

[صياد عماني]

هلا اخوى موضوعك حلو جدا وانا والله كنت دائما اتعب بتنظيف ريحة السمك من السيارة الى ان وجد الحل المناسب وهو ارضية الدبة مال السيارة تشلها الى اقرب محل تنجيد المقاعد وفرش السيارات وتعمل لها بلاستيك مقوى سمكه 8م وتخيطه على طول قطعة قاعدة الدبة وعنده انسكاب الماء على البلاستيك تجيب قطعة تنظيف السيارة وتمسح عليه بالماء الساخن وشوف بعدين الريحة تزول ام لا وتظيف على ذاك عنده الانتهاء بوضع مبخار مشتعل به فحم وفوقه لبان وشوف عاد كيف ريحة سيارتك بتكون وهذى صور الدبة بالبلاستيك المخيوط لسيارتي :
http://www.mekshat.com/pix/upload05/images222/mk112703_123 (1).jpg
http://www.mekshat.com/pix/upload05/images222/mk112703_123 (2).jpg

http://www.mekshat.com/pix/upload05/images222/mk112703_123 (3).jpg

وهذى صورة السيارة والحمد لله ما فيه ريحة بعد اليوم لسمك بعد كل رحلة اقوم فيها
http://www.mekshat.com/pix/upload05/images222/mk112703_123 (4).jpg

:good2::good2::good2:

[فتى الوادي]

مشاركة :

مثل ما قال الشباب اترك الأبواب والنوافذ مفتوحة كم ساعة ...
واللي انا جربته هو تشتري لك كيس صابون تايد او بونكس .. كيس 6 كيلو ... واتركه في السيارة كم يوم بدون ما تفتحه ... تطلع ريحة السيارة تجنن .

وإذا راحت الريحة خذ كيس الصابون لبيتك .

[Makaveli]

الظاهر كنت كاتب رد هنا أو الموضوع أتكرر لأني فاكر المشكلة هاذي

على العموم

مرة طلعت ريحة جثة في السيارة

لما دورت لقيت في علبة الصيد جلب عليه طُعم مازال فيه وصار مثل الحجر

يمكن نسيت قطعة صغيرة ماتُرى أو تحسبها حصى وتكون هي الريحة منها

أنصحك بمايلي

جيب فحم ومبخرة وصحن
وقف السيارة على أرض مستوية عشان توقف المبخرة
صب لبان مستكة - حق الرز عليها
وأقفل الشنطة مدة ساعة أو نص ساعة وكل فترة عبي لبان وروح راح تنظف وغصباً عن أبوها

[white_angel]

عادي الوضع دايم تصير لنا

خل الشمس تضربها وافتح البيبان

وكله حيروح يا معلم :)

[Boury]

ريح نفسك و سيبك من البخور و العطور
كلها حلول مؤقتة
التهوية هي الحل الاكيد و الموضوع حياخد شوية وقت
زي ما قالوا الاخوان كام يوم في الشمس مع التهوية و ان شاء الله كله يبقى تمام

[ABO ZAIN 29]

فيه ناس تقول ان الفحم يسحب اي ريحة من اي مكان مسكر
أنا عن نفسي ماجربت هالشئ , لكني إذا رجعت من البحر
أشب لي بخور داخل السيارة وأكتمها إلى اليوم الثاني ويالله الحق راس
جرب الفحم !! لأنه واجد اللي يمدحونه


انا مع راي أخي النوخذه
بس بعد غسيل المكان وتجفيفهـ تماماً

[سامي الحسين]

قبل كم سنة صار لي نفس الموقف ..
جبت روبيان جامبو من سوق السمك في البحرين ..
ووصلت الخبر والماء نازل على فرش السيارة ..
السيارة جديدة وكالة .. نيسان باترول سوبر سفاري ..
حاولت بأغلب الطرق اللي ذكروها الأخوان ..
وفي الظهر تختلط ريحة الروبيان بريحة الديتول !!
في الأخير بعت السيارة .. ما كملت سنة وشوي !!



أنا أتوقع أن الحل الوحيد هو فعلاً هذا الحل ..


رش جواتها بنزين بعدين ولعها وهرب 20 متر ولما تنفجر استنا ربع ساعة لما تفحم وبعدين طفيها بعدين ما راح تشم اي ريحة سمك \\\\ موفق ان شاء الله:f:D:D:D

[ra3ibox]

احسن وأقوى حلى لكل الروايح هو القهوة
جرب تحط قهوة عربية بالهيل من المطحنة ساخنة ولسة طرية للمدة االلي تريحك وراح تلاقي الفرق
وان ما ظبطت فا ما الك الا تبخر السيارة بـ قهوة بس يبغالها في محماس ولا تتركها تحترق بس تحمير خفيف

وان شاء الله ريحة القهوة تجيب مزاجك

[s3eed]

مافي اي ماده تحطها فوق رائحة السمك وتشيلها
بالمنطق السمك او الموية الي قطرة من الفلينه موجوده في السياره كيف تروح والله لو تخليها سنه على الشمس ماتروح


المهم خذ مني الكلام >> فك الفرش ( موكيت او الكراسي ) لازم تفكها وتطلع الفرش برى وأغسلها بنفسك او وديها مغسله
غسلها بأي صابون ممتاز تايد او اي شيء وخليها تنشف في الشمس
المهم والاهم من هذا المكان تحت الموكيت لازم ينغسل يعني لو في عازل او اسفتج المهم غيره او غسله اذا ينسغل
انا دايم اغسل السياره كذا اذا كان في رائحة سمك
والله يعينك عالفك

[goldenrife]

انا عن نفسي حرييص كل الحرص على اني ما احط سمك في السيارة الا باكياس وزحمة حتى لدرجة اني ما اشغل المكيف كمان


والله يكون في العون

[ابو تركي سندي]

الله يعينك ...
و أنا أقول مثل ما قالوا الأخوان ...
الفحم و تهوية وتشميس السيارة ....

[fadi707]

انصحك بل فحم والسارة مكتومه وحطها عند المكان الي يطلع ريحه :)

[فوتوغراف]

أحد الحلول المقترحة :

قال لي واحد القرفة مجربة في البيوت وحدة بوحدة ، لازم تغلي الماء مع القرفة وتخليها تبخر ، بس مدري وشلون تبي تسويها في السيارة

طبعا أنا على طول جا في بالي الدافور الصغير حق الشاي والقهوة أحطه في خلفية السيارة وأشب على القرفة
*********
*********
*********


صحيح اما ( القرفة ) او ( النسكافة ) او ( الخل )
الله يعينك

[رواق]

أبشركم راحت الريحة ........ بعد ٣ شهور من تاريخ الموضوع هههههه

استخدمت أغلب الحلول :

١- شبيت الدافور وسط الشنطة على ماعون فيه قرفة لمدة ربع ساعة .

٢- حطيت مدخنة وبخور لمدرة ربع ساعة .

٣- حطيت كيس فحم مفتوح تحت المرتبة لمدة ٣ شهور .. بالعربي نسيته :)


طبعا هذا بعد ماوديت السيارة للتلميع وفكوا المراتب وغسلوها


الطريقة الوحيدة اللي ماسويتها طريقة المارلين هههههه



بس فيه شي غريب جدا :

الآن بعد ما اختفت الريحة نهائيا ، كل مارحت للبحرين طلعت الريحة من جديد !!

تتوقعون الريحة تحن لمكانها الأصلي ؟ ههههه

ينطيكم العافية جميعا

[the-rock]

اخوي جيب بن قهوه تركيه مطحونه وحطها بالسياره بصحن يكون ثابت وانساه بالسياره شي اسبوع اسبوعين هي الطريقه تعلمتها من شخص وظبطت معي ميه ميه المنظفات رح تزيد الامر سوئ صارت معي كنت راجع من الجبيل للرياض وجرب البن وظبط معي

[الوهم الأخير]

بالنسبة لي لمن احط اللعف في الشنطه ويطلع ريحة احط مكعبات كافور يشفت أم الريحة ويلغيها بالكامل حل اكيد وجربوه