عزيزي المكشاتي :: ادخـل واكـتـب لنا موقفك وتجربتك لأول طبخهـ طبختها .. يوجد هنا فضايح

[كاري]

السلام عليكم ..


صباحـ // مساء ,,, الخير



اكيد لكل واحد منا بدايات محرجهـ , مضحكهـ , غبيهـ , مع اول طبخه طبخها


ولا عيب في ذلك :D فكل دقهـ بتعليمهـ


عموما اتمنى من الجميع المشاركهـ .. ويذكر لنا مواقفهـ وذكرياتهـ مع اول طبخه لهـ




ابدأ بنفسي اولا ..


ما انسى اول طبخه لي :D انواع الغشامه والدباشه منقطعة النظير :(


بس الحين اذا تذكرت ذيك الطبخة اشرهـ على نفسي ..



جبت القدر >> لاحظوا كيف :D


مليته ماء ثم كبيت عليه البهارات ومسكت علبة الصفار وغرفة كم غرفه بالملعقه وحطيته على الماء :D


ثم كبيت الرز عليه وخليته يطبخ .. قسم ان الرز طلع فسفوري :D من الصفار


وزوود على كذا تعدى مرحلة انه يكون جريش :D صار سليق من القهر :(


الموووهيم .. بعد ماخلص


حسيت اني جايب العيد بشيء بس مدري وشو



طلع خوينا ..>> يعني انا :D




ناسي الزيت :o





طبعا للمعلوميه اللي جالس اسويهـ ذا كلهـ كان برمضان سحور ;)


جالس امطرس بالحالي بالمطبخ :D


لو تلاحظون كنت ناسي البصل والطماط وزود على كذا مافي دجاج او لحمـ



عموما كانت ذكريات جميله :good2:



اتمنى من الجميع التفاعل .. طلعوا فضايحكمـ :D خلونا نشب عليكم


وخصوصا دهران :D ورعد الصحراء :D
ولايهونون البقيهـ ;)


<<< تحسوون اني جبت العيد :D





سيـ يو :good2:




كاري :)

[shaheen70]

أسوأ طبخة لي يوم توهقت فيه كبيتها في الرمل
عشان ماحد يعلق عليها من سوء ماشفت :D
وقلت لهم أنكب علي القدر وطلعت كذاب بس
في مثل هالمواقف ماتقدر لازم تتخذ القرار المماثل
الله يعفي ويتوب أتصدق حتى لو في قطاوة الله يكرمكم
ماتاكل منها :D:D:D:D

[أبو عمار الخالدي]

انا اول طبخه امممم

كانت بداياتي في حلى (( عزوبي في البيت واشوف دفتر حق المدام )) فيه وصفات

قلت ابسوي حلى المهم الحلى بسبوسه ضبط كل شي مره مره (( بقي الشيره )) الشيره طبعا انا جبت القدر وكبيت كاسين سكر <<< بدون ماء وشبيت على النار وقلت ابروح اجيب المدام الين يمووووع الي صار رحت وجبت المدام واشوف دخان كثيييييييف يطلع من البيت

والدرايش يطلع منها والباب يطلع منه دخخخخخخخخخخخخخا ن يروع مره مره قسم بالله اني في اول البيت ما اشوف شي طيقت اللطمه واخش وصار من السكر هههههههههههههه قلب لون السكر من ابيض الى اسود وتفاااعل وصار معبي القدر كله بالماده السوداء المهم ما صار الا كل خير وشغلت المراوح كلها هههههههههههه والشاهد ان الماده السوداء صارت زي البلكه ما طاعت تروح فرميت القدر



وشلاااامتكم هع هع

[مرطرط]

السلام عليكم

انا بصراحة اول مره طبخت فيها وكانوا اهلي مسافرين

سويت كبسه اول ماحطيت الرز ع اللحم ع البهارات كلها خلط سوى <<تعرفون عليمي

رحت لغرفتي ونمت ونسيت ان مسوي غدا ماصحيت الا والبيت ماشاء الله كله ادخنه

ماقدرت ادخل المطبخ من الدخان بس كانت تجربة حلوه بس والله عانيت من غسل القدر المحروق

[ابوفهيدان]

اول طبخة لي ضبطت تقريبا ؟؟؟
بس ماحسبت حساب كمية الرز
كان القدر صغير ومعبيه رز قبل الحافة
وماكان عندي خبر ان الرز ينتفش ويصير دبل الكمية
المهم كل ماطلع شي من تحت الغطا كليناه وكل خمس دقايق تطلع دفعه وناكله
وكل كمية تجي احلي من اللي قبل
تقوووول فشاار ماعاد ذا رز

[ابن سيف 18]

اول طبخة لي ضبطت تقريبا ؟؟؟

بس ماحسبت حساب كمية الرز
كان القدر صغير ومعبيه رز قبل الحافة
وماكان عندي خبر ان الرز ينتفش ويصير دبل الكمية
المهم كل ماطلع شي من تحت الغطا كليناه وكل خمس دقايق تطلع دفعه وناكله
وكل كمية تجي احلي من اللي قبل

تقوووول فشاار ماعاد ذا رز


هههههههههههههههههههههههههههههههههههههههههههههههههه هههههههههههههههههههههههههههههههه

والله الصراحة استفتدوا من الغلطه

اما عن نفسي

اول طبخه لي كان الدجاج دم ما استوى
والرز ابيض ما كثرت بهارات
وخانس ماحطيت ملح ابد <ناسيه!
وطبعا الماء مكثره

عشان تكونون بالصورة

اربع انفار وطباخهم ابن سيف

وجوعاااااااانين
بالاخير الغداء يكون :
ابييض بهارات شوييييه
مااء واجد
خانس
والدجاج ما استوى
هههههههههههه بس والله العظيم انا اكلناااهـ
والليمون الصراحة عوضنا عن الملح صار غدانا
جريش مع عصير ليمون هههههه


وهذا اللي عندي
والله يذكر ذاك اليوم بالخير

عموما من سياستي بالطبخ
اذا بغيت اتفلسف بالطبخة
ازين حل اجوع اللي عندي
عشان ياكلونه على اية حاااال:good2:


واسف اذا به اخطاء املائية
كتبته على عجله

[ابن سيف 18]

ولا انسى شكر صاحب الموضوع


شكرا على نبش الذاكرة
وجزاك الله كل خيييير
بأمان الله

[حق الفيتو]

خخخخخخخخخخ اما الفشار ..

اول طبخه اضن كانت لي طولت وانا وخويي انواع الهواش كلنا حارين وزد ما والا نقص بالاخير اربع ساعات وحنا نطبخ دجاجه

[صقر منحاش]

اما اول طبخة كانت في البر لا مسوي فاهم:D مع ان الامور كلها تمام كنت مصلح مكرونة بس المشكلة كان في غسل المكرونة مسوي فيها نظيف طلعت المكرونة متلبدة وكتلة وحدة والمشكلة معرفنا في ذلك الوقت ليش صارت كذا :D

[ياعين ابوي]

:D:D


عادي والله الفشل له طعم ..


أنا كنت كثير أنسى الأكل على النار ويحترق فكنت ما أتعب نفسي على طول أرمي القدور :D


كان لغز بالنسبه لأهلي


فقدآن القدور وخاصة الصغيره


عسآهم بس يسآمحوني لأني كنت أزعل وأعصب و... أرميها :(

موضوع حلو:good2:

[قناص طيبه]

و أولا احييك على موضوعك الجميل:


الصراحه انا اول طبخه لي صيد قميري وسمان (ما يلعب)
المهم السالفه اننا بعد ما نتفنا وقضينا ولا قالولي الشباب العشاء عليك قلت تم بس بشروط (ناويهم!)تاكلونه ولا احد يتكلم حط زد ولا احد يتكلم قالوا خلاص .

المهم اطبخلهم طبخه معلمني اياها واحد الله يذكره بالخير اللي هي(تحمس الصيد على القدر بدون أي شئ لين ينزل الشحم ثم تضيف المويه الين مايستوي وتحط الملح وبعدين الرز بدووون اي شئ من البهار او الطماط او البصل)طبعا خاصه بصيد.
المهم بديت بسم الله وهم يحتروني احط البهار يا فلان شكلك نسيت البهار قلت اسكتوا وش شرطي انا اطبخ بكيفي.

النهايه:طلعت طباخ وانا ما ادري والله يا شئ (ما ادري هي زينه صدق ولا جوعانين).


وشكراَ

ملاحظه:اللي ما جرب الطريقه هذي يجرب ويدعيلي إن شاء الله.بس لا يكون مشحم

[bader_max]

احس انكم تناظرون في وتقولون عيونك فيها سر

طيب بعلمكم اول طبخه

في الليل سمرنا وكان معنا شايب يطبخ العشاء كبسة حاشي وانا عيوني متبحلقها اعاين فيه ومبيت النيه اطبخ الغداء بكره للشله

راقبت كل حركاته بالملي وغلطتي ماشفت الملح يوم وزنه

جاء وقت الغداء خشيت المطبخ زي ماسوى سويت وجبت العيد

الملح يوم جيت اوزنه ماعرفت قلت تدري وانا افك القدر واقرب خيشة الملح واقعد اكيل بفنجال القهوه

واحد اثنين ثلاثه المهم باقي عندي شك انه قليل قلت تدري نص فنجال عن الشكه واصكه بنص

ويوم خلص غدانا وحطيته على الصحن الا ماشاء الله تبارك الله مابغيت اكل من الفرحه

ويوم حطيناه على السفره وتجمعو الشله وانا مغر اتبسم فرحان وهم يمدحون في

المهم يوم كلو خربت العلاقات بين دول العالم كلها بسبتي وجازوني بالقدور غسيل

وسلامتكم

[بن شمروخ]

هههههههههههههههههههههههههههههههههه

الصراحة موضوع قمة في الروعة ياكاري ....

وسبحان الله الواحد إذا أتقن الشغلة وضبطها تقول بس هذا عمره ما أخطى
ولو تسأله عن بداياته راح يقولك بداية فاشلة ...

طبعا هذا ليس فقط في الطبخ بل في الأمور كلها والانسان المجتهد لا يقف عند نقطة البداية ...

قصتي مع الطبخ

أول طبخة لي .... في البر كان عمري تقريبا 15 سنة تقريبا إن ماخاب ظني بس كنت توني مطلع بطاقة الأحوال المدنية.... طبعا عمري الحالي 22 سنة والحمد الله

المهم يقالك يعنني توني مطلع اثبات ومعي ددسن 91 وراعي كشتات وأمر على العيال طبعا دقيت عليهم من الثابت لأن نظام الوالد مايطلع جوال الا بعد المتوسطة ... طبعا لازم أطلع مع واحد من عيال عمي هو غثيث و ويغثك بالكشتة لكن لازم يطلع معنا لأن عمرهـ 17 سنة ومعه تصريح قيادة ... وهذي من قوانين الوالد الله يحفظه ....

قلت بس ياعوال نبي نغير كله شوي برجر ونقانق هالمرة نبي نزين مضغوط بالكاتم ....
وش رايكم تمام تمام ... قالوا قدام ... يلا هاتوا القطة ...

واتقضى الاغراض ...

وازين ذيك الكشنة الي بصلها طول اصبعك والطماط ماعرفنا نقصه واحط الدجاج قلبته 5 دقايق
وصبيت عليه موية باردة وحطيت بهارات وملح وماطول دقيقتين الا انا كاب الرز وأكتم القدر ...
نحتري البلف يدور الجوع غزانا والبرد لفانا والنار جمرت والبلف يالله بعد 15 دقيقة حركت البلف وألعب على نفسي واقول ايه البلف تش ..
واحسب له 10 دقايق ومن زود الدلاخة حطيته على الجمر يقالك موطي على النار...

ونفك القدر تشوف المنظر تقول بس هذا الزين ...
يالربع الدجاج علك وزفرة تروع والرز متكسر ونصه لين ونصه كما الخيشة ....
وخذلك أنواع الكلمات من العيار الثقيل ... من فلان والي يطالبك بدراهمه ....
عاد اخرتها قضيناها شوي للدجاج... بدون خبز وبدون مطعمات ...

ههههههههههههههههههههههههههههههههههههههههه

والله ما أنسى ذاك اليوم

[الشقااوي]

هههههههههههههههههههههههههههههههههههههههههههههه

هههههههههههههههههههههههههههههههههههههههههههههههههه هههههههه

هههههههههههههههههههههههههههههههههههههههههههههههههه هههههههههههههههههههه

هههههههههههههههههههههههههههههههههههههههههههههههههه ههههههههههههههههههههههههههه

مشكــــــــــــــــــــــــور يا صاحب المووضوع على الفكـــره الحلوه

بصراحه فتحت الانت وانا طفشــــــــــــــان ووالحين ممزق من الضحك

تجارب ولا الـــــــــــــــحلى

[كاري]

مشكورين ... ولي عوذة باذن الوالي ...

[النبع الصافي]

هههههههههههههههههههههههههههه
الملح على عدد الشباب واحد اثنين ثلاثة
الله يسعدك

[بر الوالدين]

بعد ما جهزت كل شي و صار جاهز للطبخ

صااااااااار الغاز فاضي :mad:

[أخت البنات]

والله موضوع فضايح صحيح http://www.m5zn.com/photo_files/2010/10/14/photo/gif/101410151017qmvgnzw16hs29mp6t.gif

انا بطبعي احب الطبخ
واول تجربه لي كان عمري 14

سويت شوربة ماجي طبعاً هي مملحه شد بلدها:D

جيت انا طبلتها وملحتها مرتين:hot:
لما شرب منها ابوي الله يرحمه:(<<< اقول لاتقلبينها غم بسس:mad:

قال حنا نشرب شوربه ولا نشرب من البحر:director:<<سامحني يابابا:(

[ابو عبدالملك 2]

مشكور ياصاحب الموضوع على موضوعك الجميل


اما انا حصل لي موقفين


الاول


انا صراحه ما اذكر اول طبخه بس اذكر مره انا واحد تشاركنا في طبخه يوم جا الملح كل


واحد يزيد من راسه نحط الملح ونذوق ويصير ماصل لانه ماطبخ ونحط ونحط الين صار


مملحه خخخخخخ



الثاني

اذكر ان اميمتي كانت رايحه للمستشفى مراجعه وشفت انها طابخه خضار قلت اكيد بتحط


قرصان قلت خل افزع لامي الى جت تلقى كلش جاهز المهم حطيت القرصان وكبيت عليه


المرق يوم جت امي وتناظر وتمسك راسها وتقول احد يحط قرصان ومعه بطاطس فكانت


امي تبي تسوي مرقه وانا خربت المشروع عقبها تعودت ما اتلقف ابد

[جنون الليل]

أما الموقف الأول صراحة توووووووحفة
الحمدلله ما صار لي مواقف في البداية لأنها في البداية من عمرنا 9سنوات تبدأ الوالدة تدربنا على الطبخ البسيط بالأضافة أني كنت أحب الطبخ فما عانت معي أبد
بس صارت لما كبرت وأغلبها نسيان الأكل على النار بسبب
كثرة الطلبات وماما هاتي وماما جيبي وماما عطيني:(
الله يصلحهم ياااارب

[كاري]

أسوأ طبخة لي يوم توهقت فيه كبيتها في الرمل

عشان ماحد يعلق عليها من سوء ماشفت :D
وقلت لهم أنكب علي القدر وطلعت كذاب بس
في مثل هالمواقف ماتقدر لازم تتخذ القرار المماثل
الله يعفي ويتوب أتصدق حتى لو في قطاوة الله يكرمكم

ماتاكل منها :D:D:D:D



طيب قلنا وش طبختك :D:D

والله شاكلك جايب اوووم العيد :D

اشكرك على المرور ;)

[الم وعشناه]

صراحه بداياتكم كانت مبدعه ههههههههههه

ماكنت اتوقع ان هالمهره لهم زلات

هالموضوع طلع فضايح

اولا احييك ياصاحب هالموضوع

وحبيت اشاركم باول طبخه لي

كنت طالع من العمل وناوي الغدوه يوم مريت المطاعم مقفلين كلهم وقت صلاه العصر

قلت مابدهاش اطبخ انا

رحت البيت وقتها الاهل مسافرين

واطلع اللحم من الثلاجه قلت في نفسي وين انتظر يذوب الثلج خلني احطه بالكيس في مويه على النار هاديه لين يذوب بسرعه اختصار يعني

حطيت المويه بالقدر شبيت النار وحطيت الكيس في القدر وخففت على النار

ورحت وخذا وقتي برنامج ثقافي بالتلفزيون مادريت الى بريحه مدري وشهي بلاستيك شاب

ناسي ام القدر

واطلع برى البيت خايف على السيارات قلت يمكن شبت

الى هي سليمه ياولد وش السالفه

وارجع مشغول بالي بهالريحه الي قويه وقريبه مني

ذكرت القدر وركض

عينك ماتشوف الى النور

وش اقول بس :(

الاهل الحين ماسكيني بهالسالفه كل ماقلت شرايكم بطبخ لكم وخلصت طبخي كلوه قالو ياخي من يصدق بسالفتك ام كيس :D

وسلامتكم

[ابن الراوي]

اخواني اشكر تفاعلكم مع هذا الموضوع واشكر صاحب الفكرة وحيث ان تجربة الطبخ تجعل الشخص

هو الذي يمدح طبخه فقط عند الاكل وبعد ذلك يعرف انه يكذب على نفسه وان طبخته دمار رغم مجاملة البعض وأليكم طبخه سويتها سميت مكرونة المراسيم وهذه سالفته وهي قديمة لها حوالي ثلاثين سنه ولا زالت تحمل هذا الاسم لكل من حضر الواقعة:
كنا في رحلة للبر في ليالي الشتاء ومعروف طول ليله واقترح احدهم انامن يخسر بالبلوت يسوي العشاء وصارت الخسارة علي انا وزميلي وحيث انهم يعرفون عجزي خففوا العقوبة من طبخ الكبسة إلى مكرونة فقام من تقضى الاغراض ابوه صاحب مواد غذائية واعطاني كيسةالمكرونه من الطوال وقال شف شغلك قلت في نفسي وشلون اشوف شغلي وانا اول مره اشوف المكرونه فناديت
زميلي قلت له بس عليك تكسيره ولما خلص من التكسيرغسلته وبداء كل عود من المكرونه يزرق باتجاه ألي بين الاصابع والي خارج الصحن المهم شبيت عليه ولاادري وش حطيت كشنته ومده بسيطه وهي قاضيه غسله اطول من طبخه المهم كبيته بالصحن وقلت تفضلوا قاموا للمكرونه والجوع
ذباح وقالوا به انا ورفيقي ماكلنا انا قلت الطباخ يكفيه البواخ ورفيقي قال لي وشلون اكل وانا اشوف
حوسك المهم جاء وقت النوم انا ورفيقي نمنا خففين والبقيه كل الليل صايرين مراسيم كل واحد بجهه

هذا يتلوى وهذا ماسك بطنه وهذاقبل يجلس وهو منطلق واناورفيقي نقول لهم ليش اشغلتونا ماخليتونا ننام ونضحك عليهم المهم إلى الان تسمى كشتت المراسيم لاانهم صاروا مثل مراسيم الارض كل واحد بجهه يقضي حاجته
ابوسلطان تحياتي

[((ابوملاك))]

ابعلمكم بس لاتعلمون احد :D

( جبت ضب بعكرته وجلده ورأسه وشويته )

[ملك الفكتوريا]

^^^^^^^^^^^^^^^^^^^^

ههههههههههههههههههههههههههههههههههههههههههه لا وبعد بدون تنظيف




أنا سلمكم الله كنا انا واخواني بالبيت لحالنا وسويت نفسي فيها الطباخ الماهر

قلت بسوي تونه وحركات والله


بدأ الوضع تمام بصل وطماطم واحط التونه على النار ورحت فتحت علبة صلصة كامله واحطها كلها العلبة واخليها تطبخ


المهم رحت لاخواني ويوم شافوها حمراء استغربوا كل واحد اكل لقمة وعلى الزبالة وانتو بالكرامه والاهم نسيت الملح :p


واخواني ازعجوني احد يحط طماط وصلصة :mad:


والثانيه برحلة بالجنوب ضيعت البلف حق قدر الضغط:Dوالرحلة مشهورة برحلة البلف

[يا سلام سلم]

اييييييييييييه ،،

الدور عندي اللحين ،، صح ؟؟؟؟؟

هذا سلمكم الله كنت اطلع بخواني الصغار لحفيرة نساح واكشخ عليهم،،

على بالي راعي كشتات الحقيقة كنت مجتهد واحب الطبخ والنفخ لكن تنقصني الخبرة ،،،

كنت اسال امي الله يخليها عن اي شي بسويه وهي تعلمني لكن مو بدقة لانها تطبخ بالفطرة ،،،

المهم كان الوضع يمشي مع شوي وما شوي جيت اخربها ذا اليوم بكبسة :(

وياليتنا من حجنا سالمينا ،، كان الذنوب اللي علينا خفيفات ،،،

جبت العدة كاملة وكان عندي انطباع مبدئي عن الشغلة لكن ما دريت ان التطبيق صعب ،،،

بداية كشنت للحمة وحطيت اللحمة المعم جبت الماء وعبيت القدر لين ثلاث ارباعة تقريبا واحتريته لين فاح عقب ما فاح حطيت الملح ،،

خليته يطبخ شوي وهنا بدت الكارثة ،،،

حسيت ان المرق واجد واللحمة بدت تستوي ،، وش الدبرة وش الدبرة ؟؟

والله وابدا احقن في بطون ذا المبزرة مرق :D:D

وما فيه الا صب وابن امه يقول بس وما فيه الا صب ،،

اعبي لهم بيالة ورا بيالة ليش شرقوا ،،

المهم حسيت ان المرق نقص قلت يالله عطونا الرز ،،

اثر الرز طلع شوي والمرق زايد وانا ناقع الرز يعني موب شارب ماء واجد ،،،

غطيت القدر وقلت يالله جيت للقدر بعد 25 دقيقة لقيت ،،،

الرز سليق ،، والمرق واجد ،،، وزيطة زمبليطة ،،،

كبيت المرق الزايد و غرفت لهم الرز الممروس ،،

وقلت لهم تموا على ما يسر الله :D

قالو وش ذالمطاريس قلت لهم لا يكثر ،،،

صراحة اخذوا عني انطباع سيئ ،،

ومن عقبها ولنا الحين 12 سنة تقريبا لو اقول لهم بطبخ قالوا فكنا ،،،

مع اني اللحين اعتبر طباخ جيد لكن ،،،

العود على اول ركزة ،،

تقبل المرور ،،، وفكرتك رائعة ،،، والمكشاتيين اروع ،،

[PATHFINDER 4]

موضوع جدا حلو

(عتبي على بعض الاعضاء يطول في الكلام)

المهم انا شخصيا ما اعرف اطبخ لادجاج ولالحم
لكني خبير في الحمس والتقطيع والتتبيل عقبها يكرشوني الشباب !
يعني في المقادير واضافة الموية وغيره ما اعرف
ولم يسبق ان حصل لي موقف طريف في الطبخ لاني ماجربت من الاساس
لكن الشئ الوحيد اللي احس اني اتقنه هو التتبيل
ويرجع السبب حبي للتلطيس (بربسة) !

[((ابوملاك))]

^^^

ليه يعني المنتدى مخصص لشخص معين علشان يتكلم

انا واحد احب اللي يطولون بالكلام بعكسك

يعني انا دخلت الموضوع لانه عاجبن وما ودي يخلص وانت بس تبي تطلع !

[امير الامراء]

الطبخه الاوله لي كانت كبسه على اشراف من الوالده والحمد لله طلعت روعه والحمد لله حفظت الطريقه صح الله يخلي لي والدتي
ويشفيها عاجل غير اجل
دعواتكم لها بشفاء جزاكم الله خير