وش حل الصقار لاصارو اخوياه ماهم صقاقير

[أسير المساري]

صبحكم الله بالخير جميع

يالربع كل السالفه حبيت ابدي عليكم بعض معاناتي (مجرد فضفضه )

يالربع انا اعشق الصقاره من صغر سني ومارستها من يوم اني صغير

ولقيت متعه ووناسه وولع بس المشكله ان اخوياي كلهم مافيهم الصقار ولافيهم احد يحب الصقور

ويعتبرون هالوايه شي تافه وبعضهم يلومني ويقول وش لك بالتعب وهالخرابيط والمهايط ورغم معاناتي

معهم ماتركت هالهوايه ولاقدرت رغم كثر اشغالي

حتى لاطرحت طير وجيت ابشرهم تقول كني طارح لي قميريه مافيهم اللي يفز قلبه

ولافيه الا انتو اصحاب موقع مكشات والله اني استانس لادخلت وشفت مواضيعكم وردودكم

هذي بعض همومي وبيض الله وجيهكم جميع وعساكم سالمين وغانمين

[صقار مبتدئ]

الله يحييك و لا عليك منهم غيرك يشكي من ابوه و اهله لكن خويانك و نعم فيهم و فيك بس لازم تدورلك على صقار تخاويه و تاخذ علومه و ياخذ علومك و لا فيها شي لو تعلم و احد الصقارة دام تحس فيه رغبه
على العموم حنا خويانك في مكشات و اللي تامر عليه حاضرين

[SRAAAB]

الله يرزقك بأخويا يعشقون الصقور

[عاشق الوكري]

والله اني اعيش شبه نفس معاناتك

انا البعض من اخوياي يتحمس معي بس انا ما علي انا من صغري وانا امارس هالهوايه وربعي ولا واحد فيهم صقار

وعادي مرتاح

[س الشلاقي]

مساكم الله بالخير جميع أول شى ونعم فيك وبخوياك أبي انصحك اذا الله ارزقك وطرحت طير رح يمهم وخلهم يروحون معك لابعت وخلهم يشوفون الدراهم بعيونهم واذا ماتعلمو الصقاره بعهدها لك شرط

[Bo-Rakan KWT]

هلا بك اخو و عزيز ,, و عندنا و عندك خير انا نفس حالتك الله المستعان

[عتيج الصوف]

حمسهم من خلال شفهم للهدد وان شاء الله راح يتغيرون

[ابوعزيز2007]

الله يحيك ونتشرف يالاسير

[سارق الكحل]

حمسهم من خلال شفهم للهدد وان شاء الله راح يتغيرون

صحيح نفس المعاناة من أبوي وزوجتي وكل الاقارب
وانواع النغزات تجيك لو شرى له ارض اصرف له من انه يضيع فلوس في الجيب والطيور

بس طنش

عندي ولدي توه داخل المدرسة (( طبعا المعزز حقي )) وقت الهدد ياشيخ يفلها معك كانك واحد من اخوياه وانوااع التعزيز

والله اذا مادرس والا ماسمع كلام امه بس اقول الهدد مافيه روحه معي وبنهد الخميس الجاي ياشيخ يبكى كل شي الا الهدد لايفوته

والحمد لله اخوياي صقاقير وهم الي تعلمت منهم وشجعوني والا أول بس ادربي راسي
والزين في الصقارة شبت الضوء لاجا الربيع والدله بعد المغرب وذاك البراد على الجمر
واذا نهاية الاسبوع لحقناها بتيس يحبه قلبك في أقرب حفره
هذه انا اشوف متعة الصقارة والا الصيد هالدوامات ماتخلي احد مرتاح

[البوابه]

بسم الله الرحمن الرحيم

عائلتنا معظمهم صقارين ومن قديم يوم الصقر و السلقه بدية رجال وبعظهم مازالو يمارسونها وانا احبها ! ولكن هالزمان يوم تعسرة الامور ولاعاد فيه صيد يستاهل تعنا له كل ماشفتهم العصاري يطردون القوقسي او العصافير واذا مالقو راحو للحمام واذا ضاقت عليهم شرو سمان !!!!!!! قلت الحمد لله الي عافاني مما ابتلاهم فيه !!!!!! الراحه نص القوت

[الامبراطوري]

غير الشله ودورلك شلت صقاره وارتح

[قرناس شماالي]

ياخوي ماعليك منهم قله اذ عرفتو قيمت الطير
اتمهزو ومدامهم كذا طنشش
والله الله بلعلوم الغانمه

[أسير المساري]

بيض الله وجيهكم يالربع وعلي الملازيم انكم رفعتو معنوياتي فوووووووق اشكركم جزيل الشكر على ردودكم الاكثر من رائعه

[الصارم1]

اقول الله يعينك عليهم

[نواف-]

اسير والله ان الحال من بعضه والله اني اعاني نفس معاناتك واخوة الرجال اللي مثلك وشروالك تنشرا طال عمرك بس انت وين موقعك

[الصقار3]

ماعليك من احدوأخوياك ونعم فيهم والصقارة ماهي للناس عن ناس وهي ولعة يتولع فيها الصقارويوسع صدرة
واذا عندك سؤال عن الصقوراو اماكنها أو اي شئ يتعلق بالصقور ماأحنا مقصرين وجميع الي في الموقع بيساعدونك بالي يقدرون من معلومات ...

[جره الصيد]

انصحك انك تشوف الوضع عدل بس ركز على الاخلاق والصلاه والله يوفقك
ملاحظه هامه جدا
لااتحاول ياخوي انك تتخلى عنهم ترى الربع ماتعرفهم قدرهم الا اذا فارقتهم؟وجلست لحالك؟؟

[16315]

مرحبا وسهلا مسااك الله بالخير اخوي اسير المساري والله وانا اخوك حالي من حالك عندي ربع وياكثرهم ويحبون طلعات البر والعزب بس كل حياتهم مراكيض ومفاحيم ركاب ولا قلت لواحد منهم بتخاويني المدعا قالي ترك عنك هالشغله وخذ لك نوق ابرك عن الطيور ومن زمان وانا وياهم بس يوم وقت المدعى اللي يا منهم حياه الله و ع هالشله لين اليوم.. بس في مره سرت للبيطري افحص الطير ولقيت واحد شيبه لابس كندوره و فوقها كاب اللي يلبسونه الانجليز ع روسهم ف تحريته واحد عربي وافد يعني فقلت له " يالطيب متى يفتح البيطري لانه كان يوم اليمعه والساعه 5:00 والبيطري مب فاتح ..فـــ رد عليه بالانجليزي قالي انا ما اعرف وفتح البيطري عقب ربع ساعه فدخلنا وقعد يسولف وظهرت انا قظيتي شغلي وفحصة الطير وظهرت عنه و بالباجر ياني رقم غريب رديت ولا هو الانجليزي متصل بس فــ سلم وقام يسولف وعقب قالي متى بتسير المدعاه هو راعي طيور من 10 سنين كان يعرف عرب وعلموه يدرسهم في الكليه العسكريه ومن هذاك اليوم وانا وياه دووم يخاويني .
فــ عادي هالشىء لا تكدر بالك ولا عندك خبر خلك و ونس روحك بالطيور وسير و رد وشوف لك حد من الشباب في اي مكان في المدعا ولا اي مكان وتعرف عليهم وسر ورد وياهم .
السموحه ع الاطاله
تقبل مروري

[عابر الموج]

اشوف اكثر الاعضاء عندهم نفس المعاناة وعندي راي اخوي اسير ممكن بعض الاعضاء يكون قريب عندك ويمكن من مدينة واحدة لوصلحتو رابطة للصقاقير لكل مدينة للتعارف يكون افضل ومش مهم الاسم رمزك يكفي مجرد راي بالتوفيق للجميع

[مهوووي]

ابد ياراعي الموضووع ان كنت فادمام هذا رقمي ودق علي بعد ان الاداره 0541466919

[ابراهيم 4444]

كلنا ربعك في مكشات واخوياك
ولا عليك من احد
عقلك براسك تعرف خلاصك

[عيسى عبد الله]

عندنا وعنك خير ياذيب والله اني اعيش مثلك والا اردى واردى لا انعله زاش رايك بالي راعي صيد من صغر سنه وكنت اعاني منها بس كنت اروح مع الوالد وبعض الشيبات والاخوياء وبعض من اولاد العمومه
ولا فكرو بالبر وكنت صابر والقصيم معروف باصيد والديره مبروكه وجه السياره وين ماتروح بعد مده نقنا للشرقيه والله اني من ذاك اليوم وانا تعبان جدا جد جدا ولا اخوياء ولا شيء طبعا نقنا في العطله الصيفيه
وصرت انطوائي وعيال عمي الي بشرقيه حضر ولا عمرهم طبو البر ولا يعرفون الصيد تصبرت ودورت احد الخويا ماش ولم اجد احد صرت اطلع معهم ولاهو دايم وكانو اهم شيء عندهم يطلعون السوق والغزل معنهم
ماعندك احد والله كنت اطالبهم واهاوشهم على العتداء على ماحرم الله لكن ولاعندك احد قالو هذابدوي
اتركوه ماسكين علي هلكلمه صبرت صرت اتخبا عنهم في البيت ودخلو يسالو الوالده وتقول نايم ويروحون
المهم تعبت نفسيا والله كنت اجلس عن باب البيت الصبح واناس رقود والله اتذكر البر والطلعات وقرب المقناص اتحصر على مافات واقول ربك بعدلها ولا من جدوا غيرت نومي على حسابهم وتركت الدراسه وصرت من البيت للبل ومن البل للبيت وكانت البل سوت معي معروف ماهو بصيط اوسع خاطري عندها
وبعد مده ققرت اشتري طير وهي هوايتي من الصغر لكن البوي يقول خلك تخلص الدراسه واشتريلك
وقلتله اذا ماشريتلي طير والله لذبح نفسي شرالي طير وكانت الممعاناه معي تعرف على واحد وصرت اطلع معه
ونقنص سوا قريب لان ابوي مانعني اروح بعيد وباع سيارتي عشان مااروح اقنص بعيد يخاف علي لان انا من النوع الي اذا راح للبر لو اخذ سنه ماعندي مشكله دام معي فلوس مارجع صبرت لين اطير مات واانا لاهلحين والمشكله معي والحين لي 8سنوات على هذا الحال وام اجد حل الله يعين المبتلي
ومشكور اخوي اسير وتحياتي لك وانا اخوك والجميع اخوانك
واي خدمه لايردك الا الاسانك الله لايهينك
تحياااااتي

[نسناس غربي]

مهب شرط اذا كنت قناص سواء بالصقور والا غيره يكونون خوياك كلهم على مودك..
بتلقى كلواحد له ميول لشي
اللي يحب الكوره وسوالفها واللي يحب الدوران والدوجه واللي يحب المغازل وعلومه " الرديه".. وغيرها وغيرها وغيرها
واكيداللي بينك وبينهم صحبه قديمه وتعزهم ولاودك تبدلهم بغيرهم

ترى والله لو بقيت عليهم بتتعب لاسوالفك تعجبهم ولاسوالفهم بتعجبك واللي بينكم كله مجرد مجاملات اخويا..
واذا تبي مني النصيحه
خوياك الاولين خلهم على ماهم عليه وانتبه تقطعهم عشان مايلحقك منهم شرهه ترى شرهة الخوي مهيب زينه
وشفلك خويا اهل مطاريش وصقاره على جوك تعجبه علومك وتعجبك علومه
مثل ماقالوا الاخوان بتلقى فالمنتدى منهم في منطقتك وتعرف عليهم مابتزيدك معرفتهم الا ربح...

وانشاء الله يكون هالحل يعجبك...