معلومات عن راس بوعلي

[الخيول2002]

بسم الله الرحمن الرحيم

السلام عليكم ورحمة الله وبركاته

كيف الحال شباب ... هالأسبوع اروح راس بوعلي مع الشباب :cool:

بغيت منكم بعض المعلومات :::

1- كم المسافه من الدمام الى راس بوعلي ؟؟

2- شنهو احتاج اذا رحت هناك يعني (المنطقه فيه بقالات شيش بانزين ) ؟؟

3- هل تحتاج الى تصريح ؟؟؟ وكيف نقدر ناخذ تصريح ؟؟

4- شنهو المناطق الزينه حق الصيد (يعني اذا فيه خريطه للموقع او علامه

موجوده في نفس المنطقه توضحونه لي الله لا يهينكم) ؟؟

5-هل تحتاج الى سياره جيب 4x4 :redcar: ؟؟

في انتظار ردودمك الطيبه

وسلامتكم

[مرجان]

هلا بك خوي
راس بوعلي هي عباره عن منطقة لسلاح الحدود يعني لا بقالات والاشي ولازم تصريح بواسطه والمنطقه قريبه من الجبيل

وشباب عندهم خبره اكثر انشالله يفيدوك

تحياتي

[الخيول2002]

يسلوووو اخي مرجان نشووف كلام الشباب

تحياتي للجميع

[ابوماجد]

السلام عليكم ورحمة الله وبركاته
اخوي الخيول

1-المسافة من الدمام حول 100كيلو متر تزيد تقصر مو كثير

2-اقرب اماكن مأهولة لها هي الهيئة الملكية وفيها اسواق وشيش بنزين في الحويلات والفناتير وحي الدفي وترى ما هي ذيك البعد 000يعني لو احتجت شي كلها نصف ساعة رايح جاي

3-نعم تحتاج الى تصريح من الميناء التجاري في الجبيل البلد حسب معلوماتي القديمة (اذا ماتغير مكان التصريح) وما تحتاج لواسطة بأذن الله فقط اخذ معاك صور بطاقة الاحوال لك وللشبابك

4-هناك اماكن كثيرة للصيد ممتازة في ابوعلي بس ماحددت طريقة الصيد الي رايح تتبعها بس حسب علمي الغزل ممنوع والمسدس البحري

5- ابو علي ماتحتاج لسيارة جيب في معظم مناطقها فهي راس يمتد في داخل البحر ويقسم هذا الراس شارع اسفلتي بامكانك استخدامه بامان

ملاحظة : يجب عليك الابتعاد عن الاماكن المحظورة كمواقع شركة ارامكو والقواعد الحربية

اتمنى ان تقضي اوقات جميلة وسعيدة

[الخيول2002]

يسلموووو ابوماجد على المعلووومات وياريت اللي راح من فتره قريبه وعنده معلومات جديده مايبخل علينا

تحياتي للجميع

[ابوماجد]

السلام عليكم ورحمة الله وبركاته

اخوي الخيول انا سألت اليوم صديق راح من فترة قريبة (الاسبوع الماضي ) وقال التصريح من الميناء التجاري في الجبيل

بالتوفيق

[lone]

السلام عليكم ورحمة الله وبركاته...

كلام اخوي ابو ماجد سليم 100% ، وبالنسبه للتصاريح الحين يعطونك تصريح لمدة 3 شهور على شكل بطاقة قابله للتجديد وبدون واسطه.

اخوي ابو ماجد...

انت ذكرت ان ابوعلي فيه اماكن واجد زينه للحداق، ممكن تذكر لي او توصف لي كم محل اذا كان حداقنا خيوط وسنانير. لأن اخوك ما يدل الا محل او محلين بالكثير وطفشنا منها، فياليت تفيدنا الله يفيدك.

اخوك
ابوعبدالله

[بو-علي]

السلام عليكم ورحمة الله وبركاته...

اخوي ابو ماجد...

انت ذكرت ان ابوعلي فيه اماكن واجد زينه للحداق، ممكن تذكر لي او توصف لي كم محل اذا كان حداقنا خيوط وسنانير. لأن اخوك ما يدل الا محل او محلين بالكثير وطفشنا منها، فياليت تفيدنا الله يفيدك.


نفس الطلب ممكن تحدد لنا بعض الاماكن اذا كان حداقنا خيوط وسنانير. ونوع اليم وافضل ووقت

تحياتي لكم

[حداق الـجعيمة]

هلا قواكم الله شباب أنا عضو جديد واتمنى ترحيبكم
وأنا عضو جديد من المنطقة الشرقية الدمام و أحب البحر بجميع أشكاله
------------------------------------
وعلى سالفت رأس أبو علي خوش محدق في أيام الصيف... و أما البرد ماجربته بس الشباب يقولون أن راحو كم مره وكان مافي شئي والله أعلم
1- المسافه مثل ماقال أخوي بوماجد 100 كيلو تقريباً لين جزيرة رأس أبو علي و من تدخل البوابه تمسك الطريق مسفلت و تمشي شاق الجزيره نصفين وماشاء الله الجزيره كبيره يعني نمشي 120 أكثر من نصف ساعة ولسا في قدام
2-وعلى شنو تحتاج أذا رحت يعني قبل لا توصل الجزيره في شيش و بقالات و مطاعم بس من توصل البوابه خلاص مافي شئي...أهم شئي اذا كنت بتروح النهار وبتجلس لين الليل لازم تأخذ معك ليت (لمبه ) لان هناك ظلمه وحتى في أيام القمر كتمه يعني الليت أعتبره من الأشياء المهمة و ثاني شئي خذ معاك ثلاجة وفيها ثلج و طعم و أكل ومشروبات و الأشياء اللازمه وأنا أعتبر أن الربيان مهم جداً هناك لان هناك مافي زمارير ولا جمجام أو مشوى (يعني بالغلط أذا صدت حاجه من هالحاجات ذي)والخثاق أخذه أذا كنت أبي شعري و الميد أو اي طعم سمك حق البلاوي الزرقه
3-وزي ماقالو لك الأخوان لازم تصريح و ماقصرو
4-أنا يعني يمكن حدقة في 5 أو 6 مناطق بس أكثر مكان عجبني قبل أرامكو في دخله يعني طريق مرصوص على اليسار تدخله ويجيك البحر فيه حصه خفيف بس فيه بواليل فسكر قرقفان جنم شعري يعني الحمدلله فيها خير ونظيفه (طبعاً وانت تمشي في الجزيره بيكون على يدك اليمين بر و على يدك اليسار بر بس بعد البر يجي البحر بس مو بر بر يعني خطوتين في الرمل ويجيك البحر يعني كل مكان غير عن الثانيه في إلي تمشي مسافيه طويله في البر وفي إلي تمشي مترين وتوصل البحر... وانت تمشي تشوف كل شوي زي الطريق في الرمل مرصوص فيه خطوات السيارات هاذا يعتمد على نوع الأرض بس أكثرهم مافي تغريز و في بعضهم مافي أحد حدق فيهم بس تحتاج جيب حق توصل البحر المهم على اليمين البحر حق ربيان و على اليسار هو البحر العدل حق الحداق)وفي منطقه حق اصبيطي بس حدقة فيها مره وكان صيدنا كلا قرقفان وفسكر كبار بس الشباب ماشاء الله كذه مره يطلعون اصبيطيه كبار وخوش أحجام وهاذي مكانها وانت تمشي على الشارع مره وحده بيجيك منعطف أول ماتنعطف طالع على اليسار راح تشوف صنادق مكتوب عليها حظرة خالد الغامدي لو ويش والله نسيت أسمه المهم قبلها بشوي في دخله أدخلها وبيكون هناك حظرات واجد أحدق بينهم بس وباقي المكانات والله ماجازو ليي يعني كلها شير و ووجع رأس ومافي ضرب داك الزود وزي مايقول المثل البحر غدار و ثاني شئي ارزاق
------------------------------------
أنا آخر مره رحتها قبل شهرين تقريباً وكان صيدنا الحمدلله شعريه وقرقفان واجد و فسكرو بالول و جنم ونيسر وفي لخم بعد بس يالله الحمدلله .. وقبل سبوع تقريباً صاحبي راح هناك وكان صيده كلا شعوم و مزيزيه بس مادري في أي منطقة بس خيم يومين و اذا قرحة الماي يروح عند الخور و الصيد كله هناك

يالله بالتوفيق و أي شئي انا حاضر ترء أنا حداقي كلا سيف أسئل عن أي بحر أو مكان وإنشاء الله أقدر أفيدك
واسمحو ليي على الأطاااااااله

[lone]

جزاك الله خير اخوي حداق الجعيمة وبيض الله وجهك وما قصرت...

صراحه... معلومات مفيده جدا وخاصه للي اول مره يروح راس بوعلي...

اسمح لي اثقل عليك شوي اخوي... بس عندي سؤالين:

1- انت قلت انه قبل ارامكو فيه دخله على اليسار وهناك فيه بواليل وفسكر، يعني هذي اخر دخله قبل ارامكو ووين تبعد عن الحضرات اللي تكلمت عنها؟
2- على طاري اسمك، وين المحادق الزينه في الجعيمه؟

وجزاك الله كل الخير اخوي

اخوك
ابوعبدالله

[حداق الـجعيمة]

هلا أخوي بو عبدالله قواك الله
حاضرين يالطيب ولا يهمك على سؤال المنطقه إلي قبل أرامكو في دخلات واجد ادخل آخر وحده أو آخر كم وحده يعني شوف إلي طريقها عدل ادخلها أهم شئي تكون قريب من هاذيك المنطقه لان هناك قليل إلي يروح لان نهايت المكان إلي مصرح لك تمشي فيه في رأس أبو علي وهي تبعد عن الحضرات تقريباً 20 دقيقه يعتمد على السرعة إلي تمشيها و رأس أبو علي في حضرات واجد يعني ماتنعد من كثارتها بس إلي أقصدها في صندقه يعني زي البيت الخشب وفيه ناس وفيه بط و دجاج ومكتوب عليها أسم والله ماذكره ويشو الأسم بالضبط بس أنا اوصف هاذي المكان لان ماتغوي لان أول ماتعدي البوابه راح تمسك طريق مستقيم بعدين بيجيك منعطف كبير على اليمين أول ماتنعطف طالع على اليسار اذا شفت الصندقه أدخل قبلها و بتشوف حضرات واجد يعني قبلها أو بينها اذا ماتكلمو أصحاب الحضرات بس قبلها عادي.......وعلى الجعيمة أنا طبعاً كلا أحدق في الجعيمة و أفضل مكان تعجبني في أيام الحر آخر الكورنيش في دوار جمب مركز خفر السواحل هاذي المنطقه ممتازه يعني فيها عريضية وبدح و اصبيطيه و أمزيزيه على حرارة الشمس و القراح بس يبغى لك سلس حي حق لصبيطي و المشكله النيسر في الليل موجود في كل الجعيمة وأول الصبح الحواقيل موجودين بكثره بس طبعاً المنطقه إلي أقصدها لك فيها بواليل بس يبغى لك تحدق في أعلا مد و يا المغرب أو الفجر ....و ايام البرد أروح أول باركنج إلي في وجه المسجد وايام البرد بعد مايحتاج أقول لك معروف الحداق في البرد يطيب الخاطر ....... واي سؤال أخوي قول ترء حاضرين والله وسلامتكم

[الخيول2002]

يعطيك العافيه اخوي حداق الجعيمة ماقصرت وصف ممتاز ومعلومات مهمه انشالله لي روحه عن قريب

تخياتي للجميع

[lone]

بارك الله فيك وفي امثالك اخوي حداق الجعيمه...

اشهد انك كفيت ووفيت... وانشاء الله نجرب هالاماكن اللي قلت عنها... وخاصه الجعيمه لأنها جديده علي ودايم يمدحونها...

مشكوووووووووور اخوي وما قصرت...

[حداق الـجعيمة]

العفو شباب ماسويت شئي والله تستاهلو كل خير
أخوي بوعبدالله والله الجعيمة أكثر بحر أرتاح فيه و اتوقع كل شئي يضرب وكلشئي موجود فيها وأحسن أيامها البرد بس هم هاذي الأيام فيها خير .....واي سؤال أو استفسار ترء حاضرين

[حسين العوامي]

كم حطره في المحل الي اتقول به