وش اول طير طرحته

[راعي السلاح]

:Dسلام عليكم ورحمة الله وبركاته
ياشباب وياشياب<:j
نبي نعرف وش شعوركـ وانت توكـ طارح لك طير مزيون
وايش اول طير طرحته
انا عن نفسي ما طرحت الا باشقين:p بس شعوووووور لا يوصف
وانا اعتبرها البداية...

[قرناس شماالي]

والله ياخوي انا شفت شيهانه
ماتبعد عني يمكن كم قدم ومامعي شئ
وشعوري اني مرتبك ومدري وش اسوي
اما بطرح طرحت بواشق الدنيا وجلمه

[صقر البحرين]

وعـــليكم السلام ورحــمة الله وبركاته

اول طــير طرحته حــر في مثل هذه الايام
وشعوري فرح لا توصف

[الحمش1]

والله شـفت طيريـن
حـر فـأرسي وماكـان معنى شـبكه
والبـواشق قـووووم وقعـده

[عاشق جلاد]

انا عمري 16سنه وطرحت جبليتين وبحريه تامه وفرحه لا تصدق شقيت ثوبي

[راعي السلاح]

ماشاء الله ياعاشق الجلاد
ولا يهونون الاخوان البقية

[عسااااف]

انا لقيت ثلاث شياهين بحريات قبل كم سنه ثنتين كانن قريبات حيل بس للأسف ماهدن وطارن والثالثه طبت باستراحه المغرب وماحصلتها والله يرزقنا واياكم بالنادر

[مساح الريضان]

انا من بداية الموسم اطلع ولالقيت شي من السنة الي فاتت وادعولي ان شاء الله اطرح طير حر

[عاشق الوعل170]

انا شبكت الشبوط وعقبال انشاء الله النادر

[راعي السلاح]

الله يرزقنا بالنادر ان شاء الله

[الرجل الطموح]

انا طرحت طير بيتي ولا فيه حجل وأعلنت عنه بأكثر من منتدى في شهر 2 ( صفر الماضي ) لعام 1431 وبلغنا اخويانا الصقاقير ولا جانا راعيه وربطناه وانتهت الربطه وصفى ريشه والله يعوض راعيه بخير منه وتمنيت انه وحش والله يرزقنا وياكم 0
وإلى الخميس الماضي جاني طير قرناس وحش وانا الاعب بطيري ملواح مع غياب الشمس واللي ماهو مقسوم عسير والرزق على الله0

[صقرالعوسي]

انا طارح بواشق لا تعد ولا تحصى بس امنيتي بالحياة اطرح شنيفية او تبع مثلوث لأني مو طماع حيل ادور الحر النادرهههههههههه
الله يرزقنا ويرزق الجميع

[راعي السلاح]

صقر الوسي ما شاء الله انت انسان قنوع

[الرووقي511]

انا طرحت 3 طيور اول طير كانت فى المتوسط وشبكت انا واخوى باز وبعدها بسنتين وانا رايح للمدرسه الصباح دخل طير فالعباره وانا مع الخط وطلعت قرناسه بحريه تامه وكان البيت قريب والحمام والشبك والحمد لله شبكتها انا واخوى والثالث كنت لحالى وقت الهجره فرخ حر وشبكته بعد ان ذبح الحمامه وطار وخلاها ووقع مسافه وزينت عيون الشبكه وكتب الله انه يرجع لها وعلق وكانت فرحتى لاتوصف هاذى كلها في ايام الشباب وبعد الوظيفه نشبنا فالعمل ماعاد طلعنا

[صقار صغير]

انا طرحت خمس حميميجات و بجه(جليميه) و تبعه بحريه شعور لا يوصف

[طير الجنوب]

اول طبر طرحته كان وكري خلوي

[الماظي]

انا ولا طير جارح حتى الشبابيط والحقبان ماقدرة اشبكهن ورى هذا كله معني نفسي ومذهب حالي ومالي وبكل موسم اول من ينزل الخبت ويقنص اناواخرمن يطلع منالخبت انا والحمد لله علا كل حال

[صقار محترف]

الماظي
لا تيأس وأنا أخوك
المقناص يبي صبر وجلاده
باذن الله انك تبشرنا بالحر النادر
الله يرزقك ان شاءالله

[هاوي الطيار]

موضوع جميل ونشط اشكرك اخوي عليه

تقريبا اكثر الطواريح بداية بالبواشق >>حتى انا منهم ولا عمري طرحت طيور ولاكن شفت شيهانه وحبلت لها وماهدت الله والعليم توها مفطره ,الله يعوض ان شاء الله, اذكر قصة واحد من خويانا هو ساكن بمزارع سبحان الله حدا الايام صحى مع شقة الشمس وطلع يتمغط اماري الوكريه مرقبه على كينة حفد مزرعتهم ووهو يسرع يجيب الشبك وتوقعوا وش حط بها؟؟؟ شيصان دجاج صغيره وهو يبعد عنها حول ربع ساعه ويرجع والا هي شابكه ماشاء الله , عاد الرجال هذا توفى الله يرحمه ويسكنه فسيح جناته ,ادعوا له بالرحمه جزاكم الله خير.

[ربان السفينة]

انا اول طيرطرحتة شبوط وعقبال الحرالنادر

[مستر غربال]

اول طير طرحته باشق ( شبوط )

وشفت شيهانتين جبليه وافيه ولا طرحتها شبكت يوم جيت ابي امسكها طارت سبحان الله ماهي مقسومه

وشفت حر حوووم وتحته عقبان ولا نزل على الحمام


الله يرزق الجميع

[رســــــلان الوجه]

أول طير مسكته بيدي مو بشبكه :)
السالفة انا وواحد من الربع قانصين حجل المهم احنا بوادي ضيق وبه ماء عين وسبحان الله والا الطير موقع على الجبل قريب المهم وخويي يمد السوجر وده يرميه حنا وقتها غشمان بالطيور واحلف على الرجال انه مايرميه ويهديه الله قال ابي اروح له اطيره قلت رح ويوم طيره ويجي عند الماء الباين ان الطير مايطير مادري وش بلاه واركض عليه ويكفخ وامسكه بيدي واحطه جو كرتون هههههههههه المهم مالكم بالطويلة الكلام هذا قبل عشر سنوات وانزله عند صقارين قالوا هذا العيز طير مابه خير
والطير هذا اول طير مسكته
&
&
وعقبها بسنة
واقنص والا هذا الحر في ديره بالساحل قبل المغرب
موقع ع الارض قبل المغرب
المهم وادربل عليه طير ياولد ماهو طير ههههههههه بالي وسيع
قلت يارجل الحين المغرب خله وارجع له الصبيحة
بالليل مانمت طول ليلي على مكشات واناظر الصقور واتذكر الطير اللي ممسيه
والا والله طير مابه كلام
المهم وعلى الفجر
وانا اجي المنطقة اللي امسيت فيها الطير والغم الموقع
بثلاث سمانات وحمام
بعد شوي والا هذا الطير اللي البارح ويطير ونضيعه
اثريه طايح بالسمانه ونرجع للموقع والا هويعلف
ويم قربنا منه ويطير الشبكة برجولة وحبل الثقالة مقطوع
ونجلس نطرد فيه نص ساعة والله مايبعد يبي يفك الشبكة
من مكان لمكان ويوقع
مامعنا مخدجه وقتها والا صارت العلوم الحمد لله على كل حال
وبعدها بشوي ويطير ويطير ويرتفع سماء ولعادنا شفناه
وشفت طيور بعدها لكن ماكتب الله نصيب
الجبليات والوكارى عندنا بالديرة واجد لكن ماتعنيت لها
والله يرزقنا ويرزقكم

[البوجي]

الله يرزقنا ويرزق كل صقااااار انا طرحت اول شي الباشق وعقبال النااادر انشاء وعقبالكم

[القصير111]

تعلمنا على البواشق والبكاك

والحمدلله العام الماضي طرحنا مثلوثة

بحرية 13.5*13.5

ونسأل الله لنا ولكم الرزق

[الشـ صقرـــام]

السلام عليكم ورحمة الله وبركاته


اخواني الغوالي جميع


اول شيء احب اشكر الغالي


(راعي السلاح)


على هذا الموضوع الي جا في قلب الذكريات الطيبه والمفرحه


اقسم بالله اني لليوم ما فرحت اكثر من فرحتي باول طير اطرحه


ذهبت مع والدي رحمه الله للمقناص نشبك طيور وكان يقلي انت ماتروح معنا بس تضل داخل الخيمه تشوف طلباتنا


وظليت علىهذي الحال حوالي 20 يوم كرهت حتى البر من ضيق خلقي كل يوم ساوي شاي جانا ضيوف نظف القدور والكاسات قهوي الرجاجيل وعلى هالحال


يوم جا الوالد يركب السياره طبق الباب على رجله عور نفسه


نزل وهو يتالم وقال فؤاد تعال واخرج مع فهد انا رجلي معورتني كان عمري يومها 16 سنه وخويي فهد كمان اغشم مني


من انحدرنا للخبره (المشقوقه الغربيه) شلت النقل وطيرته واستانست جدا على مطياره كان يدور خمسات ويرتفع جاه حقبي وصار يضرب النقليه ببراده وانا ادعي واقول يارب يعلق حتى اشوف شلون ينطرح


صد الحقبي عن النقل وراح بعيد شوي ولا الطير يضرب النقليه ويعلق هوا وجا وراه العقاب ومسك النقل وقتها طار العقل مني وانا اقول طيرين وصار كل واحد منهم يسحب عكس الاخر


ومن وقف خويي السياره جنبهم نزلت بسرعه طار الشماغ من فوق راسي والنعول ايضا كل واحد صار بديره


وامسك بالطير مباشر والعقاب ترك النقل ميت وانحاش وظل الطير بيدي وانا احدي من فرحتي وابكي بنفس الوقت


رجعت للوالد رحمه الله اقوله ابشر بالطير وهو يقلي كفو ولدي


وكل هذا الكلام كان بما يقارب النصف ساعه وكان وقتها طير الموسم في سوريا


وبعدها والحمد لله استمريت لليوم والفضل لله ما اعرف اعداد الطيور التي طرحتها من كثرها


والله يرزق الجميع


سامحوني طولت عليكم

[راعي السلاح]

الله يعطيك العافية يا صقر الشام