حملة "خــلــوهـــا تــعــدي"... لهواة قنص الحباري!!

[قاع رمثان]

بسم الله الرحمن الرحيم

حملة "خــلــوهـــا تــعــدي"


بداية اود ان ابارك لجميع صقاقير الجزيره العربيه والوطن العربي ببداية موسم المقناص لطيور الحباري والتي ظهرت بوادرها مع دخول شهر اكتوبر ومع بدايه هجره الطيور الجوارح وعلى راسها الحر والشاهين وكذاك مع اكتمال نمو ريش الطيور البيتيه واكتمال امواسها.


ومع بدايه الموسم حيث الجميع يقوم بتجهيز طيره واغراض المقناص فان في كل عام يكون معدل الصيد في المتوسط للعامه حباراتين في الموسم لكل صقار، وهذا في المتوسط واعداد الصقاقير بازدياد كل عام. فلو افترضنا ان الصقاقير ينموا عددهم بمعدل ٥% سنويا وان الحباري تتناقص بمعدل ٥% سنويا فان معدل صيد الحباري للشخص سيتناقص الى ان يصل المعدل الى حبارى واحده لكل صقار سنويا بعد خمس سنوات وسيصل الى الصفر بعد عشر سنوات. اي انه بعد عشر سنوات ستكاد تنقرض الحبارى اذا استمر النمو في الصقاقير بنفس المعدل واستمر تناقص الحباري بنفس المعدل.


اذا ما هو الحل؟ دائها بما كانت هي الداء!


نعم الحل والعلاج هو بايدينا نحن الصقاقير. نعم انا وانت وصديقك وصديقي


واليكم احد الحلول :


يتفق ٩٠% من الصقاقير ان متعة صيد الحبارى تنتهي بمجرد ان يمسك الطير بالحبارى والباقي من المتعه ١٠% يتجرد بباقي الاحداث سواء ترك الطير يذبحها او عزلت لمهام اخرى.


لذلك لو اننا تكاتفنا وقمنا باطلاق الحباري بعد صيدها مع وضع حجل باسم ورقم جوال الشخص الذي صادها (نفس حجل الطير) حتى اذا صادها صقار اخر قام بالتواصل مع الصائد الاول وهكذا. وبذلك يكون حبارى واحده تصاد اكثر من مره ولكن لاتذبح. " نعم لصيد الحباري ولا لذبحها". حتى لو لم يتم اطلاقها فعلى الاقل لاتذبحا ام ان يعلم عليها طير او تربى او اي غرض اخر


ولكن "لاتذبحها" خلها "تعدي"


بهذه الطريقه يزيد عدد معدل صيد الحباري كل سنه لكل صقار وايضا يزيد عدد الحباري او على الاقل لاتتناقص.
الاهم بالموضوع انه بعد صيد الحبارى من الطير الصايد البيتي فانه لافائدها من ذبحها. يجب ان تعزل وتضع فيها حجل فيه اسمك ورقمك مثل حجل الطير ثم تطلقها. واذا صادها غيرك حط حجله واطلقها وهكذا. المهم لا تجعل الطير يذبحها، حجلها واطلقها. وكل من يصيد حبارى محجله يتصل على صاحب الحجل ويعطيه موقعها.
واخيرا لنتكاتف جميعا لحمايه هوايتنا العريقه والتي تحتل مكانه كبيره في قلوبنا. فهذه الطريقه تزيد من كميه صيد الحباري وبالتالي تزداد سعادتنا.


اذا "نعم لصيد الحباري ولا لذبحها"


ولنتكاتف جميعا مع حمله "خلوها تعدي" التي ستظهر نتائجها بعد ٥ او ١٠ سنوات ونحن المستفيد.


وتقبلوا تحياتي،،،


الكاتب قاع رمثان


ملاحظه جميع الارقام اعلاه هي ارقام تقريبيه وليست مبنيه على دراسه وانما اجتهاد شخصي
وارجو نشر هذه المقاله على اكبر شريحه في المجتمع والصقاقير خاصه وفي المنتديات

[قرناس شماالي]

السلام عليكم ورحمة الله وبركاتة
كيف الحال اخوي بارك الله فيك اخوي على الحمله
لاكن انا وقفت قنص وقل100صقار ترك الحباري
فيه بعضهم يقنصون ومايردون روسهم يابسه
يصيدون ويشبعون وانا اقول الحباري كثرت
والى فلان صاد5وفلان14بسنه
انا انقهر وكنت صابر لاكن ماهو كل الناس تستوعب
اخسر الوناسه والمقناص من اجل الناس
ويقول الشاعر
غثا الهم مثل الشجاعه يقنع الصبره ومن يضمن الدنيا ولو ربع ساعه
انا فهمت ان الواحد يعيش حق يومه
ماحد ضامن شئ بهدنيا
ولاكن الكل يتمنا تكاثر الطائر لاكن لاحيات لمن تندي
وجزاك الله خير اخوي
وتقبل تحياتي\ قرناس شماالي

[الحزوبر]

وين تعدي والتقرير اللي كتبه اخونا عن خروج الحبارى من عنق الزجاجه يقول انها علاج للضعف الجنسي عزالله ماخلوها عقب هالدعايه هههههههه

[ابو عادل SS]

جزاك الله خير على الموضوع

بس عسى فيه احد يسمع الكلام

[بن نقا]

حملة خلوها تعدي هي الحملة الوحيدة التي سوف يتفق الشعب على مقاطعتها ... لماذا لأنها بعكس ماتهواه أنفسهم فلن يتركوها وهم طول الصيف قرنسه وغثاء وأخرتها أشوف الحبارى وأخليها تعدي ما ظنتي .... ولكن ليش مانخليها ( حملة خلوها تتكاثر بالأسر ) يعني اللي عنده مكان مناسب يسوي محمية صغيره وكل سنة يقوم بإطلاق 25% من إنتاج المحمية ... مجرد رأي لايقلل من فكرة كاتب الموضوع ...

[الصاعقة33]

ماراح تنقرض حطومزارع تفريخ حبارى ويطلقونها كل سنه وابشرك راح تزود ولى يصيد كل سنه حباره اوحباروين راح يصيد من 6 وانت طالع خل الصقاقير تستانس وتزود والرزق على الله

[فهد الدقباسي]

الله كثر المحميات بالعالم وشركات انتاج الحباري واااجد بالخليج

[سرهيد الهاجري]

مدام فيه حسد بين الصقاقير فلا ظنيت إن الحبارى بتطلق حيه رايك هو الراي السديد لكن تفكير الناس ماهو نفس تفكيرك . الله من واحد بيقول افكها حيه ويذبحها طير غيري بعشيها طيري ابركلي
لاهنت وبيض الله وجهك

[بوبداح]

صح الله لسانك يا قاع رمثان
كلامك سليم ميه باالمية

بس ياخوي لو كل من صادها حط حجله الخاص الحبارى معاد هي بطايرة من كثر الحجووول :)

[فهد الميموني]

بارك الله فيك على هالمجهود الطيب بس نسيت تذكر فيه الحباري اللي تنرمي بالبندق وياكثرهم اللي يشدون له الرحال بالبندق و مالهم خلق راعي الطير لا وازيدك من الشعر بيت لاقربت لهم قالوا انزح عندنا حبارى وبرقع طيرك وتشطررررر ويقنصون ويفلون الارض فللللي ولا احسن صقااار ويعرفون مواقعها ويطلعون مجموعات والسوبر مليانه فشق ابو ضغوط اليوم صيد الحبارى صار مفخره حتى لوهي بالبندق واعتقد ان اعداد الحباري اللي تنرمي ماهوا سهل وما اقول الا الله يهديهم بس .
تحياتي لك اخوي على هالحمله والله يوفقك وتقبل مروري.

[بو غازي]

والله كلامك جميل وعين العقل
واعطيك مثال الربع الخالي يوم حمووه
كثره الارانب فيه مع العلم ان فيه قنوص يدخلونه
لكن الطير شوي احسها صعبه
الصعوبه انك تنتظر طيرك يصفي الريش الصيف كله
وبعدها تنقل طيرك
وتدهله وتدعيه يوميا وتقنص وتتكلف
طيب خل لا صار عندك قرناس تبيه يصيد وتعزل لطيور الربع اما فرخ غشيم يبون يعلمونه ولا غيره من الطيور الي ودك انه يصيد وتبي تعلمه يعني شوي فيها صعوبه على الصقار
لكن الحمدالله ان شاءالله انها كثرت واعداادها كثرت وكل مالها في تزايد مع العلم ان الصقاااقير كثروا وعسى الله يكثرها
:)

[مساح الريضان]

هذا طير مهاجر وعابر مايستطون الجزيرة عندنا واعدادهم بالملايين تهاجر ولاينصاد منهم الا القليل القليل اكثر الصقاقير ياطيب طيرة ان صاد اكثر من 3 حباري بالموسم
وشنو المشكلة من صيدة

[الصارم1]

والله فكره حلوه ه ه ه ه وياليت الصقاقير يتفاعلون معها

[shaheen70]

هناك أفضل السبل للحفاظ على طائر الحباري
وهو إيقاف جميع أشكال الصيد في أماكن
تكثرها في سيبيريا ودول الأتحاد السوفيتي
سابقاً هناك تقام حفلات الأبادة لهذا الطائر
فبين الفينة والأخرى تسمع أن أحدهم أصطاد
ألفين وثلاثة ألآف وغيرها هنـــــــــــــا
تقع المشكلة فكيف تهاجر لك الحباري وتذبح بالطريقة
المذكورة وتخيل أن عدد أربعة الآف حباره سوف تقطع على دفعات الجزيرة العربية سوف يتمكن الجميع
من الصيد ودون الأضرار بالكمية لأن الأغلب سوف
يتمكن من العبور دمت بود وحفظك المولى

[d3izol]

السلام عليكم ورحمة الله وبركاته

الحقيقه أني سعيد جداً بهذه الحملة وتابعت الردود في اكثر من منتدى طرحت فيه الحملة

أولاً : أجد كثير من الأخوة كأنهم مصدومين من الحملة وكأن الكلام فوق الاستيعاب او أنه شي مستحيل والصيح أن السؤال المنطقي هو لماذا أذبح الحبارى؟ وهل التعب في تدويرها يبرر ذبحها؟ وما هي اللذة أو المتعه في ذبحها ؟ وهل إذا أطلقتها وصادها صقار أخر يعتبر هذا شي صعب على النفس ( أعتقد بعد فتره لو تواصينا بمثل هذا الامر سيكون من سلوم الصقارة ويعاب على الشخص الي يذبح الحبارى من غير حاجة) لكن بعد الصدمه لو تمعنا في الكلام نجده واقعي وجيد جداًوسنناقشه فيما يلي

ثانياً : سؤال لكل صقار ( مالفائده من أن الطير يعلف من الحبارى ؟ ومالفرق بين أنه يعلف منها أو يعلف من حمام على ظهرها بعد ما يصيد واذا علف وشبع تعزلها منه ؟ وهل المقصود صيدة الحبارى بالطير او ذبحها ؟

ثالثاً : بعد عزل الحبارى هناك خيارات كثيرة :
1- تعليم الفروخ عليها ( والمحافظة عليها قدر الإمكان من الموت )
2- أخذها لمكان مجهز ولو أتفقت كل حمله على أن يكون لهم مكان يجمعون فيه الحباري المعزولة ( وتكون بمزرعه أو استراحة ) ويوضع لها مكان وترعا فيه إما للتزاوج اوالتفريخ والتكاثر حتى لو ما أطلق منها شي وراحت هدايا أو حفظت بالأقفاص وهذا كله أفضل من قتلها
أو للإطلاق أخر الموسم بعد ربط الطيور لتهاجر وترجع بعد التكاثر من العام القادم وهذا جيد يعني بعد ما تهد وتصيد أعزل الحبارى واحفظها عندك وكحل عيونك بشوفتها كل يوم وسمنها واكرمها بالفول والذره واخر الموسم حط حجلك عليها من أجل الذكريات واطلقها أخر الموسم يعني الطيور بالربطه والقوانيص بالبيوت وماراح أحد يقنصها وهي تكون صحتها زينه وصنيعه وراح تهاجر ويتم تزاوجها بالطبيعه وترجع العام القادم بدل الوحده ثلاث واذا صادها أحد يكون عليها حجلك ويكلم عليك وتبارك له ويبارك لك ويتوصيه يسوي معها زي ماسويت معها.( وبالنسبة للمحافظة عليها وتربيتها في الأسر هناك تجارب كثيرة عند الصقاقير اللي جربوا ونجحوا واعتقد هناك أخطاء عند اللي حاول يربيها وماتت عنده )
3- بعد الهدد اذا كنت لاترغب بالاحتفاظ بها وليس معك فروخ للتعليم فيمكن أنك تحجلها وتطلقا بمكان صاد أو يصعب المقناص فيه مثل المزارع ( ولا أدري مالصعب في هذا ؟ مع العلم أن أكثر الصقاقير لايصيد الحبارى من أجل أكلها وإنما من أجل الطير - والطير هد وصاد والطير اللي تعزل منه الحبارى ما أحد يقول أنه ماصاد أو أن عزل الحبارى ينقص من متعة الهدد ؟؟؟؟؟!!!! ) وهل يصعب على نفسك أن غيرك يصيد معك ( يعني من قوة الحسد اذبحها ولا أحد يصيدها ) والتبرير لأني تعبت ورها وهذا منطق الحسد لو راجعنا انفسنا


أرجوا أن تكون هذه الحملة بداية للتعامل الأخلاقي مع المقناص فالمقناص هذه الأيام يعاني من كثير من التجاوزات وسوء الأخلاق مما أفسد على الجميع لذة المقناص

وأقترح على إدارة المنتدى أن تكرم كل من يتفاعل مع الحملة بحيث يوضع موضوع ويثبت ويكون فيه أخبار المشاركين بالحملة والحباري التي اصطادوها وكيف تم التعامل معها والاقتراحات لتطويرها

وأشكر أخوي قاع رمثان على الموضوع الرائع والفكرة السامية والموضوع حقيقه يستحق الدعم من الإدارة والأعضاء وتثبيت الموضوع ونشر هذه الثقافة عند الصقاقير في الخليج

[قناص ابن غنام]

فكره حلوه ومنها انشالله تتزايد الحبارى وفيه نقطه غير الرمي بيع الحبارى ولا ذكرهاا علشان فلو س لاحد شيء ساهم في انقراضهاا الحين راعي الا بل والغنم لا لقاها اتصل على راعي الدراهم ولا رماها والي يروح فيهاا راعي الطير يتعب ويعلم طيره ويشتري وحوش واخرتها مايلقى الي يعلم طيره

[مكرم الضيف]

خلوها تعدي لبطيناتنا .هاذي مهاجرة وتكاثر وان عديتها مايعديها غيرك

لكن موضوعك جدا مهم وتفكيرك راقي لكن يخوك تكلم من مع احترامي للجميع

[عاشق غزلان]

ماقصرت وجزاك الله خير

[راعي الشلفاء]

السلام عليكم


قبل فتره كتبت نفس الموضوع باحد المنتديات القريبه ولم اجد التفاعل المطلوب
(الي الان تم اطلاق ثلاث حباري العام وحده ولي قبله ثنتين) انا متاكد يبي يجي اليوم

الي يقتنعون الصقاقير بلفكره متى ما ارتقاء الفكر و الثقافه في الوقت السابق كانو يقولون الي راحت على الطير لالاتروح من البندق اليوم عيب الي يرمي


اشكر من اعماق قلبي

[النداوي84]

ما عندي اى تعقيب انا مع اخوي قرناس الشماالي ويكفي البيت هذا
غثا الهم مثل الشجاعه يقنع الصبره ومن يضمن الدنيا ولو ربع ساعه

[قاع رمثان]

بالبداية أعتذر عن التأخر عن الرد بسبب إنشغالي وخصوصا مع بداية موسم المقناص


أرجو ملاحظة أن حملة



" خلـــوهـــا تـــــعــــدي"



لا تهدف الى المحافظة على أعداد الحباري
ولكن تهدف الى زيادة كمية صيد (وليس ذبح) الحباري لكل صقار في كل سنه



لاحظت أن هناك لبس في كثير من الردود حيث فهموا أن الهدف من الحملة هو المحافظة على أعداد الحباري وليس الهدف ذلك



بعدين أكثر الردود والناس اللي ناقشتهم بالمجالس يقولون "لاوالله ماني مطلقها ومخلي غيري يذبحها"


طيب ياخي ليش كلنا نفكر أننا حنا اللي نطلق الحبارى اذا صدناها


يأخي ليش ما تفكر بالجهة المقابلة وتقول لو أن غيري " خــــلاهـــا تـــــعــــدي" كان لقيت أنت الحبارى وصدتها !!!!!!


أكيد بتكون مبسوط!!!! لقيت جرتها وقصيتها وطلع طيرك وصاد



يعني لو اللي قبلك ذبحها كان ما جتك وصدتها



وهذي هدية لأعضاء حملة خلوها تعدي تصوير لحبارى لقيناها قبل أسبوع
بس للأسف راحت وكنت شارط على المجموعه أننا نبي " نخلــيهـــا تـــــعــــدي" اذا صدناها


http://www.youtube.com/watch?v=k_V10eRgn7M
أو
http://www.mediafire.com/?g44x24quz72e0nm (http://www.mediafire.com/?g44x24quz72e0nm)




أتمنى المزيد من المؤيدين للحملة والمنفذين وهذا أهم
وأعلم أن تغيير الفكروالثقافة من أصعب الأشياء تقبل في أي مجتمع



" خلـــووووووووهـــااااااااااا تـــــعــــدي"

[س الشلاقي]

موضوع رائع جدا وبارك الله فيك وياليت ينطبق

[الجرودي القصب]

السلام عليكم حمله رائعه تزيد من تكرار الصيد دون ان تزيد اعداد الحباري
انا سعيد حداَ ان فيه شباب يفكرون بعبقريه لتطوير هواياتهم اشكرك من شغاف قلبي ياقاع روثان:f:l:s
حطاب ياطيرِ تنقاه صقار :good2: :good2: صقار يبخص طير طرح الحمادي
صاروخ نفاثٍ وناقله طير :good2: :good2: وكروز مايفتر وحاديه حادي

[أبـــوصــالـح]

كلام والله ياقاع رمثان
وانا عن نفسي باذن باطبق هالكلام

ياخي والله مافيه فايده اذا ذبحه الطير
اما تقعد بالفريزر سنه ولا علف للطير
يعني انت يالصقار ما استفدت


ليش ما تفك الحبارى اذا صاده طيرك وعزلته منه حيه واطلقته
وتخلي صقار ثاني يفرح هالفرحه اللي انت فرحت
اللي مايخليك تسوي كذا الحسد

ومشكور يا قاع رمثان جزيل الشكر على الفكره

[ريم البراري]

تقول لهم:
لا تحطبون ويحطبون
لاتقتلون ويقتلون
لاتخربون ويخربون
لاتسرفون ويسرفون

ولاحياة لمن تنادي

[عبدالرحمن ‍]

السلام عليكم ورحمة الله وبركاته،،،

أولاً جزاك الله خير على هذا الموضوع.. وبالفعل استمرار الصقاقير (اللي هو أنا وأنت) على هذا الوضع راح يبيد الحبارى، وكلنا نلاحظ قلّتها في السنوات الأخيرة بحيث ان كثير الصقاقير تركوا القنص لهذا السبب،

ولكن أخي الكريم،، (والكلام موجه لكل قارئ)

هديت طيري وصاد بعد ما صف كم طير، أو طير أول مره يصيدها. فهل من الحكمة اني اعزله منها؟

اعتقد انك عرفت قصدي عدل، وأختصار للكلام أنا اقترح الآتي:
أولاً اتمنى ان هاذا الاقتراح يقدم للجهة المختصة مثل (لجان هواة الصيد). وهو أن كل صقار يدفع قيمة رسوم لكل طير عنده كل سنة مثلاً 1000 ريال لكل طير. والقيمة هذي ممكن تعدل وتصنف حسب نوع الطير (حر، شاهين، جير ... الخ). وثم تجمع هذه المبالغ تحت اشراف الجهة التنفيذية وترسل الى مزارع انتاج الحباري... وتطلق في مكانها الاصلي لتتأقلم مع تغير المناخ وثم تهاجر كطبيعتها.

اتمنى من الله عز وجل ان تعجبكم الفكرة.


والسلام عليكم ورحمة الله

[sameer_1798]

بارك الله فيك وبيض الله وجهك ياراعي الموضوع على هالفكر الراقي

[الهذلي2]

كلامك عين العقل ولله لو كل واحد يبي يطبق هل فكره نبي نلقا حباري بلهبل يعني بلعام لو مره بس فيه الي صدق متلهفين على صيد الحباري ويطلعون من الفجر وما يرجعون الى المغرب هذولا ولله يبون يلقون بذن الله الي يدربون طيورهم فيه...تقبل مروري.....اخوك الهذلي2

[قنااااص]

والله ياعزيزي صعبه

الخير واجد يالله لك الحمد

والصقار كل فترة القيض يتحرى يجهز طيره وينقله ويدلهه

وبتعب ويشقى وبالأخير إذا صاد الحبارى يفكها

ولو سلمت مني ومن فلان وفلان ماسلمت من فلان

لكن نسأل الله العزيز الكريم أنه مايخب كل صقار في هالموسم ويرزق الحبارى اللي تسر

خاطره وتفرحه وتنسيه تعبه ولايرده خايب

وللمعلوميه : كلامك ياخوي سليم ميه بالميه وودنا أنه ينفذ لكن يعتبر صعب صعب صعب

والله يوفق الجميع لما يحبه ويرضاه

[قاع رمثان]

والله أدري أن أصعب ما على الصقار أنه يفك الحبارى ويخليها تعدي بعد ما صادها...


لكن الصعوبه بأول حبارى بعدين يصير الموضوع أهون بواجد...


بعدين لو لقيت لك جره وقصيتها وهديت وصدت ثم لقيت الحبارى محجله!!! أكيد تبي تقول الله يجزاه خير...


هد وصاد وهدينا وصدنا... وما أحد نقص من وناسته أو صيده شي...


لــــــــــــــــــــــــــكــــــــــــــــــــــ ـــــن... خل أول وحده تعدي...


واذا طيرك فرخ او وحش اول مره يصيد أو بيتي اول مره يصيد او طير صايد ولحق لحوق يطيب خاطرك.... فعشه إياها يستاهلها...


نبي نخليها تعدي مع الطيور الصايده والعايده بالحباري...



وأخيراً...


أحد المنضمين للحملة أرسل لي هالصوره وسائط وكتب عليها


" المزيد من الحجول للحباري ان شاء الله"



http://www12.0zz0.com/2010/11/01/19/365785799.jpg (http://www.0zz0.com)
http://www12.0zz0.com/2010/11/01/19/365785799.jpg

قولوا آمين

الله يجعلها في دربه وين ما وجه


آآآآآآآآآآآمي


خلــــــــــــــــــوهـــــــــــــــا تـــــــــــــــــــــــعــــــــــــــــدي

[يمك دروب]

مافي شي ماينقرض اذا ماحافظنااااااا عليه وبذات كثروا المقانيص والي يقنصووووون

[يمك دروب]

شكرن على موضوووووعك الراقي بس حبيت ارد عليك وعلى قولتهم راعي الولع ماهو عن الناس نشاد ينصى حباريه وطيوره تسله ايه شاعر وانا واثق من ابياتي خلهم يقولون ماهمني عواذلهم

[falcon 1]

السلام عليكم ورحمة الله وبركاته
الله يجزاك خير على الفكره والكلام السليم ..لكن انا اقول بين 10 صقاقير ثلاث بيفعلون خطتك او اربع . والله العالم
مع الوقت نشوف النتايج

وبيض الله وجهك
اخوك
فالكن 1

[تميم222]

قاع رمثان اخوي ...كلامك ..من جد اكثر من رائع ...وانتمنى هذا الشي ,,وانا عن نفسي ...راح ابد..بهشي ...لانها فكره حلووووووووووووووووه واعجبتني حيل ...بس وانا اخوك ..اذا كانت مواته يعني ترى بعض الطيور ..ما يمديك تخلص الحبارى...هذي مشكله ؟؟

[نسل الشيوخ]

ممكن سؤال ياخوك

هل تصيدون للمتعة فقط ؟؟؟؟؟؟؟؟

يعني ما تآكلونهآآآ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


ماقد سمعت بناس يقنصون إلا لجل اكلها والاستمتاع بصيدها واخذ الفائدة من مرقها ولحمها

ما اظن انكم تصيدون لجل تستمتعون وبس