يوميات بدوى سافر لندن

[(( ابن الحياة ))]

قصة جديدة اتمنى ان تحوز على بعض رضاكم واعجابكم والتى لاازلت اكتب احداثها لأنى رأيت ان اكثركم يحب البداوة والابل والحياة الفطرية فاحببت ان اوصل فكرة وحقيقة ستتضح لديكم بعد قرائتكم لأحداث القصة ولكن اتمنى منكم الصبر واعتذر مقدما على التاخير لأنى لازلت اكتب وافكر فى احداثها فان اتت كما نحب ففضل من الله وان اتت دون المستوى فهذا جهد المقل

وتقبلوا صادق تحياتى ومحبتى
اخوكم ابن الحياة

[(( ابن الحياة ))]

300راس غنم 200 بل بيت شعر وايت ماء شاص 75 مقبل من بعيد حنتة تقل ماشى الف وهو يالله يوصل اربعين بالدف وبالصندوق اربعه شباب انا وعويد وعيد وسعد ووفينا شيفة الله لا يوريكم ثياب لو تعصر فى ثم كلب اعزكم الله مات ومكشخين بهاك الغتر الى ماحد قدنا تقل عيال شيوخ لأن ماحد درس بالثنوى من القبيلة الا حنا واعلى مؤهل جابوة سادس ابتدائى وليلى بعد لكن مع كذا رجال حطهم على يمناك المهم قرب الموتر من بيتنا ويربط حميد هاك الفرامل الى تقل مطلع رجله برا الموتر عشان يوقفة وقاصدها فينا ولا حنا متنثرين فى الصندوق والى ماجاه شى ضرب راسة بعمود الغمارة ويلتفت لنا حميد وهو يضحك جاكم شى وحنا الى نتقامز من الصندوق وبصايح واحد افا الحديد ما يأثر فينا حنا سباع ويوم ناظرت لعويد صديق الصبا ولاهو يحك راسة ويناظر لى مثل الى يقول ياكذااااااااااااااب
وانا الى اجرة بيدة ونمشى لا نى اعرف ان الحنونة الله يطول بعمرها حاسبت لى الوقت الى بنرجع فية مع ها الخبل حميد من المدرسة وخاصة ان اليوم هو اخر يوم فى المدرسة وتستنى الشهادة والا العجوز مزبطة لنا هاك الغدا الى يحبة قلبك والى كان خبز على الملة وبراد شاهى نصة شكر على قولة الشايب وخبز ذرة على الصاج يعنى العجوز مخربتها لان الشاهى مايطلع هو والشكر والذرة الا من الجمعه للجمعه ولا يخليها الشايب تسويهم جميع المهم وندخل انا وعويد وهى الى تهلى وترحب بى (طبعا الحشاشة=اخر العنقود ياهل الشرقية:D) وقالت هاه بشر ياولدى فى النور والا فى التنور وانا الى اوطى واحب راسها وهى قاعده تخبزعلى الصاج ابشرك ناجح وجايب تقدير ممتاز وهى تقل لى مبروك يالله لك الحمد ثم وهى تحك راسها بس وش منتاز ذا لا يكون صرت مثل منتاز دختر الصحية بزاز الابر :eek:
وانا الى اضحك انا وعويد لاياميمتى الله يحييك يعنى زين جدا وفوق الزين
وهى الى تهز كتفها بمعنى مايهم المهم انك رفعت راسى قدام الربع هاقم ياشافى يا وليدى صوت لبوك من عند الحلال قل له ترى الغدى زاهب وانا الى اقمز واخذ الطريق طمرتين من زود الجوع الى ببطنى وزود الفرحة بالشهادة ويوم وصلت لة وانا الى اسلم علية واقول لة ابشرك يابوى نجحت وجبت ممتاز وبكل ثقل وهدوء يرد على مبروك مع انى عارف انه بيطير من الفرح لأن تعبنا وسهرنا وتضحيتة هو جابت نتيجة وطيبة المهم رجعنا البيت ونتغدى هاك الغداء الى ماقد ذقت زية وانا الى اقوم ابى اتريح الين عصير ويبداء بعدها رحلة الألف ميل وهى كيف بقدر اقنع الشايب يخلينى اروح الشرقية ادرس بالجامعه
وجت الاجازة وكانت مثلها مثل اى اجازة ثانية قومة من فجر الله ومطارد ورى ها البل واما ممرحين ولاشادين وعلى طارى الشد صار لنا موقف وحنا نسوق البل نبى لها المرعى الزين وهذى عادة كل البدو اصحاب البل الا امحلت قاع ((يعنى جفت ياهل الشرقية:D))ولا قربت تمحل شدد الابل لمكان قد عسة وشافة قبل مايشدد ابلة المهم كان عندنا فحل بسم الله وماشاء الله مسمية الشايب عساف ومع انه كان مصيبة ولا يلزمة ثنين لكن كان مبروك لا يذى ولا يقرب انسان لان الشايب اساسا كان ما يخلى احد يقرب منه المهم شدينا هاك اليوم ومشينا نهارنا كلة ويوم امرحنا مع العشا وانا الى بدون مارية واربط الرحول بحمظ حولنا وانا الى اتوزى بفراشى والراعى بعد ما بركنا البل ومحيميد مدرى وينة ولا وعينا مع العشا الاخير ولا هدير وهبيد وانا الى انتول البندق واصيح بمحيميد والراعى جاكم الذيب جاكم وهم الى يتناكعون وكلا عمر بندقة ولا قدرنا نشوف شى ولا نتثبت لنها غدرا والبل هجيج بس مادرينا وش الى مهججها وانا ارمى فى الهوا معبرين قلت اذا فية ذيب يشرد وياليتنى ماسويتها البل الباقية الى ماهجت وهى تجفل والمصيبة ان كل وحدة خذت لها جهه وها حدها الحين واطرد وراها ولا حسيت بعدها الا بحرارة الكف على وجهى من محيميد قبل ماسمع صوتة وهو الى يخطف البندق وهو يقول هذا الدلع وما يسوى نستك المدرسة علوم هلك جفلت البل فوق ماهى هاجة رح رد البل من قبلة وانا برد الى تيامنت وانت ياشاكر الى يجيك اربطة عند الرحول خلنا نشوف وش مهججها ولا امدانا نتحرك شوى ولا بذاك الزول الى مقبل ويهدر ويوم قرب منا والا هو عساف وهو فية شيفة تقل مستجن و لهاتة منتفخة تقل قربة ما وهو الى ينصى الرحول المربوطة ويهدر عندها ويوم ما مشت وهو الى يعضها وهى ترغى تقول صياح واحدة ميت ولدها المهم ونفزع بعد ماعرفنا وش الى هجج البل ويلف محيميد شماغة ويقمز على رقبتة ويثبتها وشاكر تعلق بيدة الين ماعطفها وايصيح فينى حط القيد ياشافى وانا الى امسك الحبل واربط بة يدة ولاخذنا لحظة الا واليد الثانية مثلها وهو الى يبرك ويرغى والزبد مالى وجهه ويقوم الراعى ويكمل علية ويربط الهجار برجلة وخليناة بعد ما ابعدنا منه الرحول ونعود على البل ونجمعها لين قال الله واكبر الفجر وعساف باقى يزاحف ويهدر يبى البل اثارية مغلوث ولا قال لنا الراعى الله يبلشة المهم ما وعينا يوم اضهرت علينا الشمس والا الدميان والحالة قشرا فى البل الى متهبد بها والى عاضها والى قاطع اذنها ويروح يومنا وحنا نعالج ونداوى اما عساف باقى على حالتة مربوط الين جاه ابوى عصير بعد ما تباطانا ويوم شافة عساف سبحان الله تقل يخاف منه وهو الى يتمسح بة ويتشممة وهو ساكت

يتبع

[BEN SADEQ]

ننتظر البقيه يابعدي

[عبد الله 99]

ننتظر الباقي اخي ابن الحياة

[حرنا بك]

ننتظر البقية

[جون الشمالي]

ابن الحياه لا هنت
انا عندي القصه مو مثل كذا
هو بأمريكا

[(( ابن الحياة ))]

BEN SADEQ
عبد الله 99
حرنا بك
ابشروا بالخير
============
جون الشمالي
اشكرك على تذكيرنا بهذة القصة الشيقة التى واصدقك القول انى كنت من اول من قرائها فى تلك الايام منذ 2005 والتى ومن جمالها ومصداقيتها انتشرت بعد هذا انتشار عجيب وها أنت تعيد لى الذاكرة الى اول مرة قرائتها بة فشكرا على التذكير بالزمن الجميل وهنا قرائتها
::يوميات بدوي يدرس في امريكا :: - منتديات مجالس العرب (http://www.z77z.com/vb/1297-%D9%8A%D9%88%D9%85%D9%8A%D8%A7%D8%AA-%D8%A8%D8%AF%D9%88%D9%8A-%D9%8A%D8%AF%D8%B1%D8%B3-%D9%81%D9%8A-%D8%A7%D9%85%D8%B1%D9%8A%D9%83%D8%A7.html)

ولكن قصتى هذة من وحى خيالى وتأليفى انا وتابع وسترى ان لاتطابق فى الاحداث ولا فى النهاية وايضا القصد منها انى اريد ان اوصل رسالة قد تصل

[جون الشمالي]

ابن الحياه لعلمك ترى القصه حقيقه 100%

[(( ابن الحياة ))]

الحلقة الثانية
صحيح ان سالفة عساف مرت بسلام بعد ماجا ابوى وعطانا دش معتبر وخاصة انا بعد ماعرف الى سويتة بس حلها يوم قال خلاص خلوا عساف لى انا بادبرة وانتوا كملوا طريقكم المهم وماصار بعدها شى يذكر الا اللهم راحت ايامنا قنيص ورعى ويوم خذنا لنا شهر وانا الى اعود للعرب لأن عندى علم ولانى دارى كيف افاتح ابوى فية وهو سالفة الدراسة بالشرقية لانى كنت خايف يسوى مثل ما صار بالثنوى وما وافق الا بعد طلبات وهى قريبة منه ما غير عشرين ولا ثلاثين كيلو فكيف بيرضى انى ابعد لاخر الدنيا وهو اصلا ما يعرف من الشرقية الا اسمها ولا لنا حد فيها وتدرون اول ما كان فية مثل هالتكنولوجيا الى الحين وماكان فية لاجوال ولا تلفزيون يفهم الناس ويوعيهم ولكن ومن توافيق الله نزل واحدا من الجماعة هو وعيالة ساكن بالرياض وعنده عيال الى متوظف والى بالجامعه والى مخلص ثنوى مثلى المهم وتجى الفرصة يوم سووا لة الربع عشاء وعزموة ويجى مقعده جنب ابوى ومن السوالف وهو يسال وش سوى شافى اربة نجح ويرد ابوى الله الله وجاب شى مدرى ويش ايقالة وهو الى يصيح على وانا الى اقرب منه واقول له سم قال ابوى علم عمك وش جبت بالمدرسة قلت نجحت ابشرك وجبت تقدير ممتاز رد العم ما شا الله وكم معدلك قلت 96وهو يقول ماشاء الله تبارك الله والله ياولد طلعت اخير من هل المدينة والى كل شى موفر لهم ولا تعب ولا عنا ويالله يجيبون 80 فالله يوفقك يا بوك بس وش قررت تدرس فى اى جامعه وما امدانى اتكلم ولا ابوى يقول كلمت له صالح ولد عمى بيدور لة وظيفة بالمجاهدين والا بالعسكرية حولنا احسن لة ولنا من الغربة والشحططة
العم بس يابو شافى والله حرام تدفن ولدك وهو جايب ها المجموع وكل جامعات البلد تبغى الى مثلة وبعدين يوم تقول غربة الديرة وحدة والعرب كلهم منا وفينا
وبعد ها الكلام وكأن الشايب بدا يقتنع مو من شى بس بين نارين يبى قربى منه ويزوجنى ويشوف عيالى ونار ودة ان يشوفنى متعلم ومتنور بس ما عطى العم كلمة الا الله يسوى الى بة الخير خاصة يوم حس من كلامى ان ودى اكمل الجامعه ومرت الايام والشايب متغير علينا كلنا يفكر ويهوجس ولا وعيت لى يوم من الايام وهو الى ينادينى ويقول جهز نفسك وجب شهادتك ياولد بننهج صوب ولد عمك فى الديرة الفلانية وانا كالعادة ابشر وسم ولا سألت ليش ولا وش فية ومع فجت الصبح ونركب انا وياة الشاص ونسرح ولا صلينا الظهر الا فى بيت ابن عمى وبعد التراحيب والسلام وتغدينا وعينا من الله خير ويحرم ابوى كل تكلفة وان كرامتة ان ينفعه ابن عمى فى الامر الى جاى على شانة وتمم له ولد عمه واثارى الشايب قلبها براسه شاف ان الى نصحة صدق وان المستقبل ماهو الا بالعلم وهو يقل لمضيفنا اولدى هذا ابشرك خلص الثنوى ويبى يكمل دراسة وشف لة الزين ولاكلم الشايب ويرد مضيفنا مالك هم بس هذا طلبك تامر على اكبر منها ولا شافى هذا ولدى والله يقدم الى فية الخير ويقوم الشايب ويستاذن بعد طلبات بالعشا وهو يخرج ويوصينى الله الله بالعقالة واى شى يقولة لك عمك قل سم ويدخل يده فى جيبة ويخرج ميتين ريال ويعطينى اياها وانا الى انفجع لأن ايامها كانت تسوى مبندق واقل لة وش اسوى بها المبلغ يبوى واجد خله معك ويناظر لى ويقول خلة معك بتعتازة المهم راح الشايب ومرت الايام من تقديم وروحة وجية ولالقينا افضل شى الا ان حنا نروح للشرقية لان كل شى فيها ولا كذبنا خبر وهو الى يحجز لى مع عيالة ومعنا ولده الكبير عشان ايسنعنا وطلعنا الطيارة فى طلبت الله قبل كل شى ثم انروح للشرقية نشوف نصيبنا وين ومن المواقف الطريفة الى حسستنى من جد انى قوطى فى الطيارة دايم لااقلعت يقدمون عصيرات وجرايد وغيرة المهم كان ولد عمى الكبير جالس جنبى ويجى المضيف ويعطينا جرايد ويوم شفت ولد عمى يحط يدة فى جيبة وانا الى امسك يدة واحلف لة والله ماتدفع الحساب على ولااستنيتة يتكلم والتفت للمضيف واقول لة كم حسابك وهو الى يضحك ويمشى من عندى اثارى الاخ حاط يدة بجيبة بيطلع النظارة يبي يقرا وبعد مافهمنى قعدت فى كرسيي مثل الصنم ولاكلمة المهم وبعد ما وصلنا الدمام وحنا الى نستاجر لنا غرفة وبدا مشوار البحث ومع ان الجامعات كانت كلها تطلب فى ذاك الزمن لكن حنا كان الصعوبة هو وش نختار وش الافضل وبعد روحات وجيات ونتعرف على منهج ذى ونشوف تخصص ذيك وقع الاختيار على جامعه البترول ونقدم بها ولاخذنا ايام وبعد ما كملنا الاوراق ويجى القبول ويخلصون لنا البطاقة ويسلمونا السكن وجدول بدء الدراسة يعنى كان الشغل حامى وسريع وهذا من توفيق ربى سبحانة ثم دعا الوالدين وتقديرى الى سهل لى الكثير من المصاعب وبدئنا رحلة الالف ميل وبالرغم من انى كنت مثل مايسمينى عويد دافور واحب الدراسة لكن المشكلة هو كيف بقدر اتأقلم فى مجتمع غريب عنى وعن كل الولفتة فى ديرتى صحيح كلنا بلد واحد واهل وربع بس المشكلة انا لى عوايد وسلوم وعلوم تعتبر عندنا من المصايب على الرجال يتركها او ينقص فيها لكن هنا كل شى عادى وياخذون الامور بشكل ثانى وهذا الى سبب لى احراج اكثر من مرة وفى اكثر من مرة مع الشباب هل الشرقية والى كانوا يتضاحكون منى فى البداية ويمزحون بقولة مالك لوم طعس وانا الى تاكل معى وانقهر ومرة ورى مرة بديت افهم الوضع والناس وتعلمت كيف اتعامل معهم بس بدون مانسى او اتنكر لعوايدى وسلومى

[(( ابن الحياة ))]

وسبب القهر ان الكلام ذا لو بقى بيننا يالشباب كان تهون لكن المصيبة انه يصدر من دكتور مفروض انه يعلمنا ويفهمنا الصح والغلط هذا هو اكبر مشكلة وهذا الى صار ذاك اليوم وحنا فى الجامعه كان عندنا كلاس عملى يعنى يعطونك عمل هندسى ويقولون لك سوة وبالقياسات وكان المشرف حقنا دكتور مصرى فية شوفة نفس غريبة المهم انا من فداغتى وتونى جديد تاخرت لانى كنت ادور القاعه ولا دخلت الا واسلم عليهم بصوت جهورى وهو الى يلتفت لى ويقول هية بدونز قو اوت يعنى اطلع برا وانا ما كلت معى الا كلمة بدونز الى قالها باستهزاء وانا الى ارد علية البدو يادكتور الى ماهم عاجبينك هم الى جابوك من بلدك واكرموك عشان اتدرس عيالهم ماهو تهينهم وهو الى تاكل معه ويعطينى سلب ويقول روح لمكتب المشرف ووصلها لعمادة شئون الطلبة يعنى خربها معى اثارى انا الى جايب العيد وانا مدرى جاى للمعمل بالثوب والغترة وهو لازم تداوم فية بالافرهول بس صارت لى مثل النقطة السوداء عند الدكتور ولا نساها وصار فى كل محاضرة لة يطردنى وبعد طلبات ووساطة من رجال فية خير من العمادة وتنحل المشكلة بس قال لى الدكتور كلمة قدامة خلتنى اغلى من داخل ولا قدرت ارد لأن الرجال قال خلة يقول الى يبى وهو يكلم الرجال انتا بتتوسط لواحد مش حيفلح وأدى دأنى ان خلص السمستر لان هما كدا البدو مش فالحين فى حاقة غير تربية القمال وانا تاكل معى وابى ارد او اسطرة كف يخلية يدور على نفسة بس الرجال ضغط يدى ويقول لة يا دكتور الرجال غلط وانتا الكبير واصلا هو ما كان يعرف وتدرى بعض الانظمة عندنا لازم يتعود عليها الطالب ويعرفها عشان ما يخالفها وانا اضمن لك ان شا الله انة ما يخالفها بعد كذا ويرد هو نشوف المهم انا يوم طلعت مع الرجال وهو الى يقول لى انا سويت الى على لأنى حسيت انك غشيم وفيك خير بس الحين الباقى عليك لا تحتك معه واى شى يقول لك قل سم لانة بيركز عليك وبيدور لك الزلة وانا الى اشكر الرجال وارجع للغرفة وانا عايف نفسى وكاره الدراسة والجامعه والناس كلها لانى حسيت بالغبينة والقهر انى اشوف الغلط واسكت وصراحة قعدت لى يومين وانا ماحس بطعم اى شى فى حلقى ولا صرت انام زى الناس لانة قالوها من زمان الله يجيرك من قهر الرجال ولا وعيت الا اذان الفجر فى اذنى وانا اتوضا واروح المسجد وبعد ما صليت وانا الى ادعى ربى من قلب انة يهدينى للطريق الصحيح ولا اشرقت الشمس الا ورحمة ربى سبحانة يوم لفتنى وانا الى اصمم انى اعلمة من هم البدو وانا الى ادفل الشيطان من الافكار الشينة الى جتنى وامسك كتبى ومراجعى صحيح ان اللغة كانت تسبب لى مشكلة لان المنهج اكثره قلينزى بس ماخليتها توقف قدامى صرت اروح للشباب الى اعرف انهم جيدين فى اللغة واقعد معهم وصراحة ما كانوا يقصرون معى ما يفكونى الين ترسخ المعلومة فى راسى وارجع للغرفة واكمل المذاكرة والروميت يقول بس اكلت الكتب خلنا نطلع ولا نتمشى وانا الى اعيي لان المسئلة صارت عندى مثل التحدى والقهر وابى اثبت لة وللناس الى مثلة ان حنا هل العلم وهل المعرفة خاصة انة هو باقى على حقدة ولا قدمت لة بحث الا ويدور لى الزلة حتى الغلط الاملائى ويا دوب بالدف يعطينى درجة النجاح وتمر الايام والشهور وانا على ها المنوال يا فى الغرفة اذاكر ولا فى المكتبة قاعد الخص من المراجع وصرت حريص ان حتى الكلمة ما اكتبها الا وانا عارف انها فى محلها الصحيح الين صرت احرجة بالبحوث الى اقدمها ما يلقى بها زلة بس مع كذا ما يعطينى درجتى الى استحقها مع ان الباقين من الدكاترة كانوا ملاحظين التغيير الى حصل لى وكانوا يحطون لى الدرجة العادلة الى استحقها بس مستغربين من تخلفى فى مادة الدكتور المهم جت الاجازة ورحت لهلى اغسل بشوفتهم عنا سنة كاملة من التعب والمذاكرة واطيح بحضن الوالدة الله يعطيها العافية كأنى استمد من طيبتها وحنانها القوة انى أكمل المشوار وسبحان الله الايام الحلوة ما تدوم مرت الاجازة على كأنها ثوانى ورجعت للكرف وقلة النوم مرة ثانية المهم بديت السنة الجديدة وانا مصمم اكثر على أنى لازم يكون لى بصمة وذكر فى الجامعه واستمريت على جهدى لاطلعات ولا روحات ماعندى الا الكتب والمراجع ولى خدمنى اكثر ان ما كان فية من ربعنا احد بروح لة او اجية وحتى الشباب لاجو يغرونى انى اطلع معهم الهاف مون ولا البر كنت اعيي واتحجج بالمذاكرة الين سمونى فار الكتب لانى عارف ان وراى الدكتور الى بعدين عرفت وش يسعى له يبى يخسف بالمعدل التراكمى حقى الارض عشان اما يفصلنى او على الاقل مااستفيد من مجهودى وادخل تخصص وصراحة وبعد مانتهى كل شى حسيت انه خدمنى خدمة كبيرة فى الوقت الى كان فية يبى يضرنى لأنة عطانى دافع كبير للتحدى حتى انى انا استغرب من نفسى على ها النشاط والصبر وما مرت السنة الثانية الا وانا اقعد فى المكتبة اقراء الروايات الاجنبية بلغتها الانقليزية وصرت ادور عن البحوث للدكاترة والمعيدين الاجانب وصراحة اخذ عقلى الطيران وصممت انى اتخصص فية لكن المشكلة انه لازم يكون معدلك التراكمى ممتاز عشان تتخصص فية وهنا جات المشكلة الاكبر ان هذا المعتوة الحاقد بيكون حاجز وراء تحقيقى لحلمى بدرجاتة الى زى وجهه لكن ومن محاسن الصدف ان الجامعه سوت مسابقة فى البحوث وماكان هو من ضمن اللجنة الى كان العميد رئيسها يبغون يشوفون مستوى الطلبة ومن النابغين فى الكليات ويبتسم لى الحظ لأنى قعدت طول فترة المهلة لتقديم البحوث وانا مانا لا ليل ولانهار وانا اجمع المواد الى بحطها فى البحث وبعد ما تأكدت منه وحسيت بالرضا الكامل عن البحث وانا الى اقدمة لهم وبعد الفرز وهم يتفاجأون او بالاحرى ينصفقون لأنهم يوم شافوا البحث حقى ولا على اعلى مستوى بس المشكلة ان المعدل التراكمى حقى كان مايأهلنى لأنى اكتب اقل منه وطبعا لأننا عرب اول شى نفكر فية من وين جايبة او سارقة وينادينى العميد ويجتمع فينى مع اللجنة وبعد ماتكلم مع الدكتور وطبعا ما قصر عطاهم من الكذب لحد ما ملى قلوبهم شك وحيرة ومن حقهم يتأكدون واول كلمة عشان الدكتور الحاقد يحفظ فيها ما وجهه قال انت سارق البحس دا من فين
قلت ومن قال ان انا سارقة
الدكتور لأنى انا عارف مستواك وبحوثك عندى فمش ممكن تكون انتا الى كاتبة او جامعة
انا: مع الاسف يا دكتور انك لازلت مع كل الى عملتة وكل الى سويتة معى لازلت حاقد وكنت مثال سيئ للأكاديمى وانا اتحداك قدام العميد انك تعرض البحوث الى انا قدمتها لك على اعضاء اللجنة واذا شافوا ان انا استحق الدرجات المتدنية الى انت تعكينى اياها فانا راضى ومن هذى اللحظة انى اطلع بكرامتى من الجامعه وان قالوا غير كذا فالامر لله ثم لسعادة العميد واما بالنسبة للبحث الى انا مقدمة هذا فانا مستعد تناقشونى فية وبيبين اذا انا كنت سارقة ولاجبتة بتعب يدى وفكرى وجهدى
ويقوم الدكتور يبى يرد ويسكتة العميد الى حسيت انة اقتنع بكلامى انه منطقى
ويناقشنى فى البحث الى جبتة والا ماخليت فية فقرة الا وفصلتها لهم وبينت الطريقة ومن وين اعتمدت على المعلومة الفلانية ومن وين جبت الفكرة العلانية وينبهر العميد ويصفق لى هو واللجنة اما الدكتور فقعد فى نص هدومة ولا والمصيبة ان العميد يوم قال لة وين بحوث الطالب وقام يتأتئ ويتلكأ وانا الى اقول للعميد اسمح لى يادكتور انا عندى نسخ من كل بحث سويتة من البداية الى حد اليوم فخلنى اجيبها وسمح لى ويوم جبتها ولاواحد منها ابو الشباب ماخذة ومغير فى بعضة وحاطة على انه منه ويوم سأل العميد وتحرى وسأل الدكتور وش ذا قال دا بتاعى وهو الى سارقة قلت طيب يادكتور اذا كان البحث هذا لك وانت الى جامعه اكيد تعرف مراجعه وهو ينلخم ويقول ايوة سالت وش هى ويرفع يدة انتا مين عشان تألنى الاسئلة دى انتا واحد فاشل حاقد مابتعرفش حاجة عايز تخرب سمعتى وياخذنا بالهبيد وها الكلام يبى يغطى على فشيلتة ويقوم العميد ويسكتة ويقول لى خلاص ياشافى بنرجع ونكلمك بعدين روح الحين ولامر يومين الا واسمع ان الدكتور الله لايرده فصلوة من الجامعه يوم تأكدوا ورجعوا لأوراقة والا الرجال ماهو طلع ظالمنى بس طلع لة قائمة وخرب مستقبل ناس واجد كان ممكن يستفيد منهم الوطن والجامعه ولاخذت شوى الا والعميد يطلبنى فى مكتبة ويعتذر منى شخصيا على الظلم الى شفتة وعايشتة مع ذاك الدكتور والى حلف لى انه ماكان يعرف عن تصرفاتة شى وحط اللوم على ليش انى انا ما اشتكيت او طلبت الانصاف ويقوم بعدها فى حفل توزيع جوائز مسابقة البحوث وأمام الطلبة ويعلن بنفسة لاول مرة ان بحثى اخذ المركز الاول وانة تم ترشيحى لبعثة على حساب الدولة فى جامعة لندن بعد ماأخذ البكالوريس من الجامعه وفوق هذا صرح ووعد انى اذا بقيت على مستواى المشرف هذا واخذت الماجيستير بان يحجز لى مكان معيد فى الجامعه عندة ولن يتركنى حتى اكمل رسالة الدكتوراة
================================

المغزى او المقصد من القصة هو ان من قلة العقل النظر الى الانسان وتقييمة من واقع طائفتة او قبيلتة او حتى انتمائة لدولة ما لأن من قد تزدرية الاعين ولاتقيم لة وزننا يكون مختزلا لخير واخلاص وحب وقابلية للتعلم ومنفعه الكل ولكن يحتاج الى يدا حانية تسندة على طريقة وقلبا صافيا لايحمل الحقد ليدلة على دربة والى عقلا متفتحا لينير له شموع العلم والمعرفة

ودمتم

[غسلاوي]

ابن الحياة ..
اسلوبك ممتع ورائع .. بس لو تكبر الخط الله لا يهينك ..

[(( ابن الحياة ))]

ابن الحياة ..
اسلوبك ممتع ورائع .. بس لو تكبر الخط الله لا يهينك ..
شكرا لك على المرور وابشر المرة القادمة نكبر الخط

[رمثان155]

مــــــــــــــــا شاء الله اسلوب رائع ومشوق ...اولأهم من ذلك الدرس المستفاد من القصه
الله يوفقك بحياتك العمليه والعلميه ويكثر من امثالك ..والى الامام
حقيقه استمتعت بكل كلمه وبكل حرف قرأته ...
شرا لك .
رمثان 155

[بوابراهيم ع]

الله يعطيك العافيه قصه جميله وأسلوب رائع

[Ahmad ss]

ابن الحياة

كتبت فأبدعت ... وسطرت فأتقنت

لك مني كل الشكر والتقدير ع اسلوبك وقصتك الأكثر من رائعة

[مكشات الحفر]

الله يعطيك العافيه سرد جميل للقصه
تقبل مروري .......

[(( ابن الحياة ))]

الاخ رمثان155

سعدت بمرورك وحضورك ويكفينى ان رسمت على محياكم بسمة رضا
============================
بوابراهيم ع
يسعدنى مرورك
============================
Ahmad ss

الابداع هو حضورك والأتقان هو كلماتك وزاد يقينى بمقولة ان سحر البيان لايسطرة الاقلب شاعرا فنان فبوركت من الرب الحنان المنان
============================
مكشات الحفر
اشكر لك مرورك وكلماتك الطيبة