ماهي أسباب ضعف عزم الددسن الدبل

[دفرنسين خليجي]

السلام عليكم ورحمة الله وبركاته

يالربع أبي فزعتكم عندي ددسن دبل 2005 عزمه ضعيف جداً مع إني غيرت البواجي

وأسلاكها وصافية البنزين ومركب مراوح كهرب وحد سرعته مايتعدا 170ولا فيه فايده حتى

صوت الماكينه لما أم شي 120تقريباً لها صوت قوي جداً كأنك حاطة بالرابع أرجوكم

أفيدوني مأجورين .

[-المهـــــاد-]

وعليكم السلام

توك ما شفت شي( الله يعينك على رفعة الظغط ) خل الهوا ينطحك وأنت مسافر ومحمل والله لتعافه وإذا ماوقفت وشبيبته ,,
نصيحه من مجرب لأخو موترك وعليه مراوح لاكثر من 3 سنين ’الله لا يعيده بهكا الددسن’ انواع السفريات عليه ,, (( بعه واشتر جيب لو هو 2000م نظيف ابركلك )) الحمد لله بعته من شهور وشريت جيب ونزل الظغط عندي ....

[YUKON_GMC]

الددسن معروف عزمه ضعيف خاصاً مع الطريق مابالك عاد إذا صار دبل

لكن تأكد من تماتيك المروحه انه خفيف ولاهو معلق وركب بواجي بوش الالمانيه واسلاك بواجي خاصه لونها احمر تعطي كهرب اقوى من حق الوكاله

[alimuhammed]

وش بعد 170 اذا تبي تسابق لا تشتري ددسن

عليك بسيارت الطيران اللي تصفط 220 وهي تصحك

الددسن سيارة عقل و ركادة و قضيان لزوم

[العاذر]

كم ماشي الموتر

[دفرنسين خليجي]

السلام عليكم
حياكم الله وبياكم

أخوي العاذر موتري ياطويل العمر ماشي 74620 تقريبا حتى الآن
ماأدري هل ممكن يكون الكلتش تعبان ولا هو طبيعي كذا
مع إني بصراحه متحسف أللعب بالمكينة أخاف أجي اكحلها أعميها خاصة إن موتري ماهو ماشي
واجد اربعه وسبعين ألف بصراحة شي يقهر يعني السيارات الصغيرة تلعب فيني
والله ما أدري وش السوات ناس قالو ركب عليه مكينة باتفندر
الله يوفق كل من رد وشارك ويرزقه مايتمنى في الدنيا والآخرة

[العاذر]

كلتش المروحه

[دفرنسين خليجي]

بس أنا مركب له مراوح مكسيما

[العاذر]

المشكله جت بعد المراوح علطول وضح اكثر

وهل فاحت ريحة الكلتش عندالتغريز

وهل اعطيت موترك لشخص ثاني

[دفرنسين خليجي]

الله يطول عمرك
أحياناً تطلع فيه ريحة الكلتش والي غاثني إن إلي
يركب جنبك ماتسمع صوته لما يكلمك إلا ترسله رساله يمكن يفهم عليك
الصراحة إني تعبت منه ماأدري وش الحل وإذا تعرف ورشة مختصه الله يرحم والديك
وبعدين احس تقل يقطع

[-المهـــــاد-]

إلي
يركب جنبك ماتسمع صوته لما يكلمك إلا ترسله رساله يمكن يفهم عليك


نفس شعورك أول , بعد 150 ماتقدر تسولف مع اللي معك بالسيارة , احيانا إذا سافرت الحالي وفيه هوا أحط السماعات الكبيرة اللي تغطي كل اللأذن وفوقه لطمه لزيادة الهدوء , اخبر انا وخويي اللي قدام بسالفة الحال واللي ورا بسالفة الحال بدون مبالغة إلين ما نهدي .

أخي الكريم : نصيحه لوجه الله بعه من غير حسافه .

[أبويعقوب]

هههههههههههـ ,,

الله يهديكم يا شباب وش فيكم على الرجال ,,

اخوي دفرنسين خليجي ,,

طبعا لازم تعترف وتثق ان الدتسن الدفرنشين عزمها ابد غير مرضي لا بالخط ولا بالبر لو يحفر الكفر شوي لازم تشغل الثقيل ول سلم على الكلتش !!

لكن اذا كان الموتر عاجبك ولا ودك تغيره مالك الا حل واحد اوش شي الجنوط الجي تي ( عرض 8 انش) وكفرات عراض شوي ما تمشي باخط اكيد يعني لا تتمنى فوق 170 !!

لان حتى الهايلكس الغماره لو يركب جنوط 8 انش وكفرات 255 ما يمشي بالخط وش رايك بالدتسن الدبل !!

طيب بالنسبه اذا تبي تخلي عزم الموتر طيب فيه كم حركه تسويها ,,

اول شي ركب هدرز بس لازم يكون التركب حلو وقطر الشكمان 2.5 موب 3 لان 3 كبير ويضيع العزم !!

ادري انك بتقول لي لا حرام الهدرز يخرب ويسوي ( اخوي الشركات الكبيره مثل جمس وتويوتا ونيسان كلها لها تعديل من نفس الشركه او شركه ثانيه يركبون هدرز وهو شي ما اقول ما يضر المكينه الا يضر بس موب بذاك القدر الي تتوقع يعني اذا كان عمر المكينه 15 سنه ممكن ينقص سنه سنتين )

الفلتر احرص انه يكون نظيف وكل مواصير الفلتر الين يدخل المكينه حلوه ولا فيه تنسيم بس لا تركب فلتر رياضي لانه ما يفرق ,,

تاكد ان البواجي واسلاك البواجي جديدهـ واصليه لانها تفرق بالكهرب وتضعف عزم غير معقول عند تلفها !!

( اتوقع تغييرها باليد لانها مثل شرب الماء )

الشي الثالث اذا انت بالصيف ولا تحتاج الكفرات العراض ركب كفرات سلق مع جنوط الوكاله طبعا بالخط تفرق فرق موب طبيعي ركب كفرات 195/75 شف لك كفرات حجريه للخطوط ول رل رمليه هانكوك ول غيرها اذا تبي طلعات خفيفه ,,
بتقول ابد ما تصلح للبر اقولك اذا انت رايق نسم 10 او 15 وكفرات صغار وموتر عليه هدرز والله ان يقطع ثاني بالبر !!

شي ثاني اذا بتركب هدرز تاكد من الزيت لانه يمكن يسير ينقص نص علبه او اقل ( لا توسوس شيك كل 2500كيلو )

بالنسبه للمرواح ما اتوقع تفرق واجد لكن يمكن تخفف الحنه ,,

لو تمسك خط الارضيه بتسير نار من حراره الشكمان العادي والهدرز حاول تركب عازل ,,

لا تحاول ترفع السياره لانه بتسير ترد الهوا ,,

اذا عندك اي سؤال انا حاضر بس تواجدي قليل واي سؤال وانا راجع للسعوديه بعد شهر ونص اذا تبي اساعدك بشي تراني رايق للفك والتركيب من زمان ما فكيت مكينه ول قير ^_^ اخوك من الشرقيه

[دفرنسين خليجي]

السلام عليكم ورحمة الله وبركاته ،،،

صباح الخير والمسرات

سوف اعترف بحقيقة مرة جدا الاوهي أن هذه الكفرات والجنوط ماأركبها أكثر من ثلاثة
أشهر يعني في وقت البراد فقط لأن السرعة ماتتجاوز 150 فقط أما طوال السنة شد البلد
ودي أسأل يقال إن الهدرز على سيارات نيسان عامه يضرها يخبط المكينة هل هذا صحيح
وين أحسن مكان في الرياض يركبه إذا كان مافيه ضرر عليه ، بعدين ما تلا حظون إن الدبل الخفيف بس شكل لا ينفع ولا يضر .
س / هل مكينة الجيب النيسان 6 سلندر تضبط علية ولا زم تغير كل شي معها ؟

أفيدوني مأجورين
الله يجزاكم خير ولا يحرمكم الاجر وجزاالله خير كل من رد وشارك برأيه حتى وإن قال بعه أحسن لك لأن حنا عندنا ديمقراطية في الأراء .

[راعي تاحوف]

يااخوي بعه وفك نفسك وش تبي به

والي يقولك ركب وركب ترااه مهب فارقه معك الموتر الى بشي بسيط وشي نفسي غير محسوس

آشتر هايلوكس ابرك منه اذا انت راغب للنوعيه
وعدل علا كيفك بالهايلوكس حبوبه وتتحمل وتفرق معك كثير اذا عدلته
يكفي ركب كمبيوتر وتيربو وتصير لك طياره

[دفرنسين خليجي]

الله يبارك فيك ياخوي


الهايلكس صحيح إن عزمه أقووى بس إنه ردي والله لا قوة بدي ولا فرامل ولا أي ويسيله


من وسائل الامان ياأخوان روحو تشليح الحاير والله إن أكثر السيارات في التشليح


الهايلكس وكلها جديدة 2008 /2009 /2010 مركبها تقل جالس على مركة أقل


مطب وأنت طالع مع القزازة والله يرحمك ، بشكل عام كل سيارات تويوتا مافيها أمان


أنا ما أقولكم إني مع نيسان ضد تويوتا ولا مع غيرها بس هذه الحقيقة
وبعدين أشتر هايلكس وركب عليه كذا وكذا ...........................
يطلع قيمة سيارة ثانيه ، الصراحة مافي مثل الوانيت الجمس تاخذه شدبلد لاتركب ولا يركب

[YUKON_GMC]

شوف الددسن بشكل عام مكينتها ضعيفه وعزمها ضعيف شد بلد حتى الددسن العاديه أذا نزلت غرازه وهي بالثاني شوي وتطفي

يعني بالمختصر الددسن حتى لو غماره وعادي يبقى عزمها ضعيف بسبب البخاخات وطريقة توزيع الوقود حتى لو غيرت كل شيء

الا ان كان بتغير له مكينه جمس

حتى الجيوب النسيان الباترول .. انا جربت موديل 91 و 92و 93و96 وصراحه انه بالرمل والدبل الخفيف فاشل من يلمس الرمل يطفي ولايقوم الا تزر عليه زر تقول مورسدس والا تعشقه بالدبل الثقيل

بعدها جربت تويوتا vxr موديل 94 ولقيت فرق شاسع بينهم وان التويوتا مايبرد عزمه بسهوله بالغراز مقارنه بالنسيان وحبيته واشريت 97 واخذ معي سنتين لكن عفته ان قيره تماتيك ولايعطيني حريه بالغراز

لكن لقيت اللي اطيب منهم بالزفلت و بالغراز ولايعرف ضعف العزم اليوكن الدبل مكينته جباره مع الخط يطق طبلونه وزياده وباقي نص الدعسه و الدبل الثقيل تنساه بالغرازه لكن عيبه ان دبله ضعيف ويخرب بسرعه خصوصاً مع استخدامه في السحب
جربت 2 موديل 99 و98 و96
والسوبرمان قريب منه لكن وزنه ثقيل وإذا طاح بالرمل ماطلع بسهوله

[هائم]

يمكن يكون صحن الكلتش يكون علي وشك انه يخرب معك بس انتبه لايقطعك تراه باي وقت ينتهي وغير تماتيك المروحه تراها مزعجني بسيارتي

[MjNo0oN]

اخوي الددسن بشكل عام ضعيف عزمه بسبب صغر حجم الشكمان

اخبر واحد من الشباب ركب عليه هدرز (الجيوب و الهايلوكسات و الكوامري) ماتلحقه وموتره غماره

انت ماشاء الله عليك مابقيت شي شيكت على الكهرب + مراوح كهرب

ينقصك تنضف الفلتر

ونبعدك عن الخساير ولمحاولة تزيين غزمه ركب لك مواصير 2.5 على قزوز الوكاله + دبات الوكاله التكلفه ماتاكل عليك 200 ريال بدال هدرز بـ1200 او 1500 ريال

لاكن ماراح يفرق معك واجد

واذا كنت هاوي الموتر وجايز لك ومانوت تغيره جرب تركب عليه جنوط هلل حقات الباجيرو ((يبيلها فلنجات وتركب تمام التمام)) وهي اخف وشكلها احلى من حقات الوكاله

وان شاء الله انه بيفرق معك فرق طيب في النفود وفي الخط مهوب فارق ذاك الزود لانه هاذا حده 170 لل180 واذا كنت تبي الزود عطه رابع مهوب فاصل الا اذا قطع القير تقريباً 185 لل190 <<بس ما انصحك فيها

والكلتش مافيه اية مشكله دامه مايفوت ((انبير الضغط يرتفع و وانت على سرعتك او مايرتفع بسرعه)) يعني تحس ان فيه تفاوت بين الامبيرين ولاتوسوس منه لان الفرق راح يكون واضح وضوح الشمس وماتحتاج انك تغيره لان العزم هو هو ماراح يتغير ابد

[kellahd]

اولا اذا الكلتش تعبان ما يصل الموتر الى 170 حده 100 و حولها و يبدأ التفويت
ثانيا انت محمل الموتر كثير شد و توانك و كفرات عريضة على جنوط عريضة

خفف يخف موترك

و اذا بتبيع السيارة تراني مشتر اها وش قلت :D

اذكر مرة
فكيت صندوق ددسني موديل 75 مكينتها 1500
و كانت يالله تصل 150
تصدق وصل الامبير الى الصفر مرة ثانية يعني تقريبا 180 و حولها
هذا الكلام قبل 27 سنة او اكثر

المختصر المفيد كل ما خفت السيارة و نحفت الكفرات زادت السرعة و استجابة السيارة بشكل اسرع

[kellahd]

السلام عليكم ورحمة الله وبركاته ،،،

صباح الخير والمسرات

سوف اعترف بحقيقة مرة جدا الاوهي أن هذه الكفرات والجنوط ماأركبها أكثر من ثلاثة
أشهر يعني في وقت البراد فقط لأن السرعة ماتتجاوز 150 فقط أما طوال السنة شد البلد
ودي أسأل يقال إن الهدرز على سيارات نيسان عامه يضرها يخبط المكينة هل هذا صحيح
وين أحسن مكان في الرياض يركبه إذا كان مافيه ضرر عليه ، بعدين ما تلا حظون إن الدبل الخفيف بس شكل لا ينفع ولا يضر .
س / هل مكينة الجيب النيسان 6 سلندر تضبط علية ولا زم تغير كل شي معها ؟

أفيدوني مأجورين
الله يجزاكم خير ولا يحرمكم الاجر وجزاالله خير كل من رد وشارك برأيه حتى وإن قال بعه أحسن لك لأن حنا عندنا ديمقراطية في الأراء .


وش معنى الديمقراطية ؟؟؟؟


لا يكون معناها
مثل ما قال اليمني الذي سأله المذيع وش معنى الديمقراطية

قال (( كل واحد يتمطرق على كيفه )) :hot:

[YUKON_GMC]

^^
ديمطراطيه تعني = حريه في الرأي حريه في التعبير والتصرف يعني مافيه احد يعارض الثاني

[3فلاتر]

الحل لك بعه واشترلك سوزودبل2007وطالع ديزل تيربومكينته3000قيرعايدي من واقع تجربةأقوى بكثيرمن الددسن بنفودأوزفلت واترك عنك الهايلكس غالي وهومايستاهل والددسن عزمه فاشل وتبي تعرف أكثرعن السوزودبل أكتب بقوقل رابطةالديماكس وبتعرف تجارب اللي أستخدموه

[دفرنسين خليجي]

السلام عليكم


بصراحة موتري مافيه عداد ظغط وأعتقد كل الدفرنسين بجميع المواصفات


وأنا قبل مدة سافرت عليه مكه ويوم وصلت واعتمرت رجعت وركبت السيارة وأول ماشغلت


طلع به صوت بالكتتش ورجعت عليه الرياض وراح الصوت إلى يومك مأدري كلتشه


مضبوطولالا وإن شاء الله راح أجرب سالفة ماصورة الشكمان لعل الله يحدث بعد ذلك امرا



وأنا أنصحكم كلكم أشترولكم دداسن تدرون ليه ؟


أنتظر إجابتكم !

[دفرنسين خليجي]

بما أن محد جاوبني !
أنا أجاوب نسفي لان الددسن مايشمي
لذلك ساهر ماراح يصورك

[جساس5]

بما أن محد جاوبني !
أنا أجاوب نسفي لان الددسن مايشمي
لذلك ساهر ماراح يصورك





كيف محد جاوبك

والرجال الي ضيعو وقتهم معك تقريبا18 مشاركه

[YUKON_GMC]

^^^
هدي عصابك هو يقصد يجاوب على سؤاله الاخير يوم قال كلكم اشتروا دداسن ..!!

يقول ان الددسن مايسرع ومايصيده المرور بالسرعه بس 170 عليها سجن بعد وانت تبي زياده ياراعي الموضوع خخخ

[دفرنسين خليجي]

السلام عليكم ورحمة الله وبركاته ،،،

الله يجزاك خير ياسفروت 2 والله إنقصدي ماجاوبو على سؤالي

الله يهديك ياجساس لا يكون زعلت على شان تكلمت على تويوتا والله إني آسف

أنا ترى ماٌصد الاهانه لأي شخص بس الناس كلٍ له رأي ولولا إختلاف الاذواق

والاراء لبارت السلع

وفقكم الله بالدنيا والاخرة .

[(((.ابوتميم .))))]

ايه والله قلبت المواجع انا في النفود بجنوط والوكاله بس الكفرات غير عراض شوي عن الوكاله وارفع منها بشوي
والله اني با الاول على طول واذا دقيته ثاني يوقف وشوي وبيطفي حتى مع اي مرقى لوه خفييييييف لازم الاول
قسم با الله معاناه مع ذا الددسن لا عزم لا طعوس لا دبل تراب في تراب واذا حملت لو حتى حمل خفيف والله انه مايمشي في الطعوس ابدا ابدا ابدا
(((((((هو وش حقه حق تقضييييييه لزووووم ويااالله بعد يعني مش وانا شريته وانا عجل وفرصه كان الموتر نضيف حالك ))))))))
موتري 2005 نظييف ماشي اقل من 80 الف وكلش فيه وكاله
ويدريك بعد ان الددسن الدبل ماينشاف ابدا في الشوارع (((((((((((((((((((((((( والناس مايخلون الشي عبث )))))))))))))))))))))))))))
نقلت لكم تجربتي المريره مع الدقس جعلي ابيعه :D:D
ونصيحه لاحد يقربه :good2::good2::good2::good2::good2:

[دفرنسين خليجي]

السلام عليكم ورحمة الله وبركاته ،،،

والله ياخوي في مثل يقول ( يامن شراله من حلاله عله )

مع إني أشوفه بالنفود ماعليه لكن بالخط والله الهوا يعلب بك

وشكراً على مرورك وتعليقك

[FA.www.AZ]

معليش شباب .. خصوصا ً اللي يسبون
استغرب من المبالغه بالوصف ان السياره ماهي حقت نوفود والا لازم الدبل الثقيل .. من واقع تجربة اسمحولي يمكن انكم ما تعرفون تسوقون مو شرط الموتر ما يمشي لاني اتمشى بالنفود من احسن مايكون وانا جربت الغمارتين 2002 والحين معاي غماره 2007 وعال العال الحمد لله بالنفود وباالنسبه للعيب اللي اوردتوه بخصوص الممشى الرديء على الازفلت انا معكم بهذي
اعذروني على التعقيب بس يقولك اسال مجرب ولا تسأل طبيب

[أ ب و ع ل ي]

يارجال هذا عزمه وكاله

[عين حصنان]

انا شريت ددتسن غمارتين دبل 2009 جديد من الوكاله

رحت عليه مكشات يم الربيع بالشمال و القصيم

رجعت بعته بخسااااااااره فوق 15 ألف ريال

الله يعوض على بخير

الموتر ضعيييف عزمه للغايه ...وليس الهدف من السرعه على الخطوط

انا ما تعدى 120 بكل الاحوال

لكن في التغاريز لو تحطه بواحد مع الدبل يطيح العزم لين تطفي السياره

وأخس شي يوم تمشي بالخط تمشي 120 و تجيك طلعه طويله

اول ما ارقى الطلعه ادعس له للأخيييير وفي اخر الطلعه تكون سرعتك 30

غير السته سلندر (أقل شي )لا تدور ولا تدفع قروووشك

الله يعوض عليك ويخلف عليك بموتر افضل من الددتسن

بارك الله لكم

[زمزم 100]

في إحدى المناطق في الجنوب كنا في تهامة و أردنا الصعود مع العقبة و هي طريق مسفلـت شديد الإرتفاع

و معنا ددسن 2007 جديد ووكالة ع وقته .. تصدقون بالله أنه طفى الموتر و هو بالقير الأول !! عزم بااااااارد

و ما مشى إلا بالدبل الثقيل مع بخور الكلتش ...

وتشطفنا الكرسيدا و الكورلات مثل البرق .

[معاند البحر]

ياشباب انا معروض علي ددسن 2008 دبل ماشي 160000 بسعر 43000الف هل يستاهل الفلوس والا لا !!!!!!!!
ومن استشارك دخل في ذمتك

[حر اليدين]

السلام عليكم ورحمة الله وبركاته


مبروك عليكم الشهر الكريم .. نسال الله ان يجعلنا من المقبولين ومن عتقاءه من النار




.. حبيت ادلو بدلوي ومن واقع تجربة .. انا كان عندي 1996 دفرنسين ... والحقيقة راضي عنها كل الرضا اربعة سرندل وكبريتر .. مراوح سوبارو وفرارات .. في الخط ان جابت 170 قعدت امدحها اسبوع .. السيارة امكانياتها على قد حالها .. لاتكلفونها مالا تطيقه .. انا وريتها العزر هالسيارة قنصت عليها الرملة وماخليت مكان مارحتله .. ماتقارن بالجيوب .. وبعدين وش تبي ياراعي الموضوع ورى الــ 170 ههههههه .. صراحة لازلت احب هالسيارة واعشقها مع اني شريت صغيرة تقضي لزومك وتمشيك مع اهل الجيوب .. ومهما سويت هدرز وبواجي واسلاك وكل هذا كله ماراح تزود عندك السرعة والعزم الا شي بسيط .. اهم شي تخفف العبء .. ركب فرارات ومراوح .. ولاتبالغ في حجم الكفر والجنط


ولكم مني حزيل التحية

اخوكم حر اليدين

[بحر الاشواق]

ياشباب الى يبي عزم وصندوق لا يتعدا السيرا او السلفرادو

[((ابوملاك))]

لا والله وانت الصادق تبي عزم وحوض وتحميل وكرف شااااص

عز الله انه موتر بكل موديلاته

[وجعين]

نصحيه ونا اخوك الي قالك هدرز وسلاك بواجي ومراوح تراك تبي تخسر على غير فايده لاني مجرب الغماره العايدي بدون دبل فما بالك بدبل؟ مكينة الددسن ضعيفه خلقه لو كانت مكينة هلي او حتى كرسيدا كان يمكن اقولك حط عليها هدرز ومشتقاته لانه مكاين تعطيك عزم نصيحه بعها اوركب مكينه اكستيرا 6 سلندر