اخواني استفساااااااااار عن شياهين الحواسي طيور نكلس

[راع الطيب]

السلام عليكم ورحمة الله وبركاته
اخواني العنوان واضح انا سمعت كلام كثير عن الشياهين اللي يجيبهن مركز الحواسي بالرياض طيور نكلس

انهن سباااااااااق ويرتفعن وطيبات اللي تشابه الفروخ الاصيلات من الشياهين البحريه مقاسات 15 \15 و 15 ونص \15 و16\16 هالقياسات
وفيه معلومه انهم يقولون انها تقرنس قبل الطيور او معه يعني تنطل ريشها طبيعي من دون كورسات
وانا اسئلكم بالله وفي ذمتكم تسالون عنها يوم القيامه
من جربها او شاف بعينه عند احد ربعه وكلامه موثوق فيه يعطينا العلم عنهن وعن ماوجه منهن والطيور علمها وفعله عند الله محد يدري عنه لاكن ابي التجارب الشخصيه او شي شفته بعينك وهل راكدات او لا وهل ينطلن صحيح

اخواني انا ابي الفايده لاني اهز نفسي هالسنه ابي اجرب التفاريخ

ولو تجاوبوني برساله على الخاص مافيه مشكله لاكن ابي العلم منك ياخواني المكشاتيين

[راكان 11]

واحد من الاخوان نزل موضوع لطيور ( نكلس )
والأعضاء خاصه أهل الأمارات كشفوا حقيقته بالخدع والكذب
والآن هاهو يروج سلعته عندنا بالسعودية
شاهد الرابط : http://www.mekshat.com/vb/showthread.php?t=342031

[الخرب الازرق]

السلام عليكم ورحمة الله وبركاته
وانا اخوك العام الماضي عن تجربه اخذت شياهين 15/15.5
اخذتها ويومين وهديتها عيبها انها ماتعرف توقع على الارض
ارتفاعها ماترتفع بالحيل لاكن تهد على اي شي هديتها على طير ماء كبير بالأرض
مع العلم انه شارط الارتفاع لاكن فاشله طيورهم بالنسبه لي .
وفي واحد من الربع أخذ منهم جير شاهين ( ماشاء الله تبارك الله ماشافته عينه هد عليه اي شي بندق الله يسترعليه ) ذبح فيها 2 حباري + الكراوين حدث ولا حرج والنورس وانواع طيور الماء .
وهذا توفيق من رب العالمين .
وأنا مااقولك لا تاخذ منهم يمكن حظي في الشاهين هاذي دمار
وتقبل مروري

[koko9999]

انا بلنسبة لي اخذت حرار عدد 2راس ابيض ظهر صافي واحد مجهم اخر الوقت هدن على الكراوين واحد طرد غراب بارتفاع عالي
بالنسبه للقرنسة صفت قبل الطيور طبيعي بدون علاج والحين تذبح الدجاج والحبش والرومي

[قرناس شماالي]

والله ياخوي مالي علم بتفريخ
خذ حر ابركلك من الي ماتدري هو صاحي ولى به عيب
وهاذا الي اعرفه

[se7t]

السلام عليكم

اخوي الغالي انت ماجربت التفاريخ التفاريخ نفس الطيور العاديه بس اذا شرط لك انه طايره ومتعوده علي الطيار والارتفاعاات وانا اقولك التفريخ ان فعل عزالله انك تبي تطرب راسك في الهدد وخص الجياره من فولكن سنتر لانه شركه معروفه بخصوص القرنااس حتي الطيور العاديه الوحش الاصليه مرات تتاخر في القرناس
وهذا الشي يكون سبب مرض او عطل في المدهنه او قصر في العلف يعني مو شرط تقول تاخر والله من الطير نفسه بسبب انه تفريخ او سرعت القرناس في التفريخ احسن من الطيور العاديه كله سوا نفس الشي
الغلطه في الل يربطون الطيور يعلفون الطير علف واحد والطير تقل مناعته في المربط وتعرض لامرااض بسبب اخطاء من اهل المرابط
انا عن نفسي ان ربط طيوري اربطه عندي انا واتابعه في نفسي او يكون واحد من اخواني مباشره معي اذا انا تغيبت او سافرت ودايم احط لهم مع العلف فتاميناات مع العلم ان علفي الاغلب يكون الفري المجمد بس اني اطلعه قبل العلف بساعه او ساعه ونص وحتي الحمام اذبحه واجمده علي شان يكون العلف مامن من الامراض
بخصوص التفاريخ اخي الكريم ان فعلت فعلت ولا تبي غيرها بس انك ان اخذت الطير او الشاهين التفريخ يكون مشروط من الرجال اللي انت ماخذه منه انه طاير ويرتفع في هالحاله اخذه وانت مغمض
مو تاخذ طير مقلبينه اكثر من صقار ومخربين طبوعه
ومعلومه اتمنا انه تكون في مخك ماتطلع منه التفريخ لا تقصر علفه ولا اطوفه وخله دايم صنيع وباذن الله انك تبي تكييف علي الهدد في الاجواء البارده
موفق خير وان شاءالله اني اجبت علي سؤال او يجي احد الاخوان ويكون عنده خبره اكثر منفي في الجيره
انا عندي جير ولله الحمد مافرط فيه لو يعطوني وزنه ذهب وتارس راسي عن الف شيهانه وطير عندي مايجون نفس هدد واحد من هدده هو

تقبل تحياتي
اخوك بو علي

[أخو وضحة]

أول شي دام انك سألتنا بالله بنجاوبك
العام أخذنا أنا وخوي لي طيرين أحرار فروخ
طير خويي ما يرتفع ولا يعرف يوقع نهائياً
أما عن طيري ما شاء الله على التلواح يوم انه فرخ يطق الـ 80 وزود ويلعب لعب يحبه قلبك ويشقلب
وعلى الحمام العام ما هديته الا أربع مرات والحمامه الأخيره سلم وجابها ويرتفع
والسنه هذي ذابح على كيسه 2 كراوين وهديته على طيور الماء وراكد وأبلج عنه البرقع على التكاية من غير ما علمته

في الأخير الطيور ما هي سوا حتى الوحش فيها الي ينجح وفيها الي يفشل

[قناص ابن غنام]

كلام اخو وضحه صحيح الوحوش فيهاا الي ينجح وفيها الي يفشل
مجربينهاا العام فرخين مو ذاك الزود واحد بيع ووالثاني قرنسناه وجاء بكر اطيب منه فرخ ماوراه شيء غيرحمام وملواح والشياهين عندناا فرخ شاهين مقاسهاا 17 في 16 ونص طيب طيبه حيل على الحمام وعلمناها على كروان لا وقع ارتفعت وحولت عليه وصاح وخلته من الصياح

[قرناس وافى]

سألتنا بالله وبنقول اللى شفنااااة وجربنااة

أخذت من عندة تبع جير شيهان السنة هذى
الارتفاع ترتفع وارتفاع طيب بالحيل مثل طيار الوحش ماتفرقهاااا
السبق سبوق
صادت كراوين معى بالساحل قبل اسبوعين ولاشفت شى اكرهة فيهاااا
الا الملاحظة هذى(ضربت الارض مرة والكروان كان بالارض وبغت تدوخ وصحت ) ولاعاد تكررت شكلها تعلمت
واليوم الصبح صادت كروان (مطراد طيب وارتفاع )

ادعيها بالملواح تجينى مرتفعة فوق واذا نطحها هوا قوى القطت الارض

فى البداية كانت تخطف المعلفة حقت الحمامة تبى الرقبة عشان تذكى خابرة مكان الرقبة ومضيعتها مرتين صارت وبعدين تذكى من حالها

باقى شى نتأكد منة مناعتها عن الامراض الى الان مافيها الا العافية
هذا اللى عندى

الطيور الثانية اللى عندة مازكيها انا اتكلم عن اللى جربتة

[النـادر]

انحش منها لسبب ان الرجل كذوب ماهو صادق بعض طيوره وانا اقول بعضها والبعض الغالب منها مايعرف يطير ولاحتى يرتفع اما الذبح فطبيعي انها تذبح فالارض لانها في شبوكها تذبح لكن الصيد الطيار والارتفاع وقبله الطيار اغلبها فاااااااااااااااااااااااااااااااااااااااااشل

اما القرنسه فهي تقرنس مع الحرار وترمك مع الحرار هذا اللي يفعل منها ويطير

ياخي ما الله ضيق عليك بنفس القيمه تاخذك طيور من مزارع معروفه ومجربه وهلها يهمهم السمعه ماهو مثل ذا الكذوب الغشاش

خل عنك كلامي وارسل لاي احد من اخويانا الامارتيين واستفسر منه بينك وبينه وشف وش يقول عن نكلوس

[الروقي نت]

ماكفاك الفرخ اللي عندك ياراع الطيب:f
دخيل عنده فرخ يحبه قلبك يمكن احسن لك من طيور necless :good2:

[راع الطيب]

اخواني كيف حالكم وانا اسعدني كثيرا تفاعلكم معي ومع الموضوع
اخواني انا ادري ان الطيور فيها الطيب وفيها الفاشل وادري ان بعض الطيور تأخر وبعضها لا تطلع من بدري
هاذا رئيي عن الطيور الاصيله انا يوم سألت عن التفريخ انا مااعرف عنها شي ولا قد قنيتها ولاحطيتها على يدي واما عن الطيور ياخوان والله ان ماعلي قاااااااااصر عندي طيور فاعله وطيور وحوش اصيله شي طرح السعوديه وشي جاي من برا


انا يوم اسال ابي اعرف عن الشياهين اللي عند هالرجال وشلون جربتوها تجاربكم انتم وانا ادري ان الطير فيها الطيب وفيها البطال والسبوق واللي مايلحق وهاذا علمه عند الله هاذا يعتمد على توفيقك بالطير وحظك لان ممكن تفعل ممكن ماتفعل وبالنسبه يوم اسال عن نطل الريش هو بسبب ان البحريات الاصيله ماتنطل ريشها الا بعد عنا ويمكن ماتنطل انا فاهم وانتم فاهمين


لاكن انا اسال عن الشياهين اللي عند الحواسي فقط
واشكركم اخواني على التفاعل والله يوفقكم دنيا واخره ويبارك لكم بطيوركم ويوفقكم هالسنه وكل سنه بالصيد والفال الطيب
واشكرك اخوي الروقي ماداخلتك طيبه وانت اطيب

[النـادر]

عطيتك الزبده وانا اتحدث عن طيور نكلوس اللي عند الحواسي

نعم تقرنس مع الطيور لكن وش الفايده اذا قرنس الفاشل بدري

احرص على الطيب من المزارع حتى لاتعاف الهجين والتفاريخ

وان طحت فالطيب فاشره علي اذا ماخليت الوحوش وصرت مدمن تفاريخ هجين

[راع الطيب]

اخوي الله يوفقك دنيا واخره
وانا فهمت كلامك وعرفته وانا اخوك
وانت كلامك على العين والراس ولا اخليه الا اسمعه ولا افرط فيه

لاكن ننتظر باقي الاخوان ممكن تكون جربت ولا لك حظ انا ابي تجارب الاخوان اذا كلها فاشله فانا استخرت واذا لا مع ناس طيبه ومع ناس فشلت
انا يمكن اخذ منهن

[راع الطيب]

وينكم يا اخوان وين البقيه راسلونا وعطونا العلم لو انه برساله خااااااااااااااااااااصه

[هاووي الطير]

هلا حياك الله اخوي
والله انا مبتدى وتوني متعلم
لواعرف شي راح اخبرك
اتمنى من الاخوان اللي عندهم خبره وجربو الشي هذا يفيدونك
واتمنى لكم التوفيق جميعاااااا ..

[راعي طلاع]

اخوي جيرة الشياهين اللي عند الحواسي

مثل اي طيور اخرى فيها اللي نجح نجاحن طيب وفيها الي من الطيور العاديه

وفيه اللي فشل فشل كبير والدعوى وانا اخوك توافيق والله يطيحك بالطيب,,,,

[راع الطيب]

هلا حياك الله اخوي

والله انا مبتدى وتوني متعلم
لواعرف شي راح اخبرك
اتمنى من الاخوان اللي عندهم خبره وجربو الشي هذا يفيدونك

واتمنى لكم التوفيق جميعاااااا ..


والله يوفقك تفاعلك هاذا معي افدتني فيه والله يجزاك كل الخير
وانشاء الله تعلم فالمستقبل القريب
وننتظر الاخوان

اخوي جيرة الشياهين اللي عند الحواسي

مثل اي طيور اخرى فيها اللي نجح نجاحن طيب وفيها الي من الطيور العاديه

وفيه اللي فشل فشل كبير والدعوى وانا اخوك توافيق والله يطيحك بالطيب,,,,

اخوي انا عااااااااااااااارف ان التوفيق من الله وفيه الطيب وفيه البطال بس انا ابي اشوف اللي جربو وش واجهوا لان التفاريخ لونه توه جااااااي من عندهم (مزارع الطيور) نجاح الطير يعتمد على الله ثم على طريقة تدريبها على الطياران والصيد والارتفاع وكل هالامور لان الطير يجي من عندهم مهوب مثل وحوش الهواء ماتعرف وش صااااااار بحياته فالجو ووش ذبح وهل يذبح والا لا انت واخواني الصقارين ادرى بالامور ذي ولا تخفا علينا واما التفاريخ كلش يدرون عنه وانا مريت المركز وقالوا لي انها مشروطه

وانا اشوف التفاريخ
تنطبق على :
الطير الطيب اللي يفعل مع الصقار الصاحي اللي معطي الطير حقوقه وعارف لنفسه وطرق تدريبه وهدده وكيف يتعامل معه التعامل الصحيح الناجح
اويشريه غشيم اوواحدمايعرف للصقاره بس فك الطير نزل الطير شل الطير ويفشل معه طيب الطير فعل مع الرجال اللي قبل وشلون الطير فشل مع هاذا
من تعامله وتدريبه وقلت فهمه للصقاره
انا اطبق هالكلام على التفاريخ والمزارع حقت الطيور
انا لو ابي اقارن بالمزارع اخذت من طيور فالكن سنتر
لاكن انا ابي اشوف اللي عند الحواسي من الشياهين الفروخ وش واجهوا صقاقيرنا منهن

والله يوفق من شارك معي بها الموضوع ولو بالرد فيه تكفيني روح المساعده بينا والامانه

وننتظرررررررررررررر باقي الاخوان

[ابو تمام]

روح زياره لمركز الحواسي ابوناصر وبتلقى عنده اللي يسرك

صدقني إنسان واضح وماعنده غش

[راع الطيب]

روح زياره لمركز الحواسي ابوناصر وبتلقى عنده اللي يسرك




صدقني إنسان واضح وماعنده غش


انت اخوي جربت الطيور اللي اسال عنهن والا لا
اخوي مشكور على التفاعل انا اعر ف المركز وطريقه وزرته وعلومه يقول السبق والفعل وتقرنس قدام الحرار لاكن انا ابي اللي جرب ويعرف عنهن معلومات

[راعي طلاع]

راع الطيب انا وانا اخوك كلامي واضح فيها جيرة شياهين اخذت من

ابو ناصر الحواسي وفعلت فعلن يهول وامورها كلها طيبه من ناحية ارتفاع

وسبق وطبوعن زينه وفيه ناسن خذو منه ويذمون ويقولون انها فاشله هذا اللي

ابي اوصلك اياه وسلامتك..........

[$ تساهيل$]

ياخوي انا عندي شاهين بحري من الربطه مطشت الى ريشه
وحده وهي فرخ العام وعندي ثانيه باقي ثلاث ثلاث
في تغير في الطيور وفيه نوع من البحريه تصفي مع
الحرار هذا الى عندي عسى انا فيدك

[راع الطيب]

راع الطيب انا وانا اخوك كلامي واضح فيها جيرة شياهين اخذت من

ابو ناصر الحواسي وفعلت فعلن يهول وامورها كلها طيبه من ناحية ارتفاع

وسبق وطبوعن زينه وفيه ناسن خذو منه ويذمون ويقولون انها فاشله هذا اللي

ابي اوصلك اياه وسلامتك..........
يامرحبا باخوي (راعي طلاع)

الله يوفقك والرساله وصلت وانا اخوك والله يبارك لك في مالك وطيور
والله يبلغك مرادك

ياخوي انا عندي شاهين بحري من الربطه مطشت الى ريشه
وحده وهي فرخ العام وعندي ثانيه باقي ثلاث ثلاث
في تغير في الطيور وفيه نوع من البحريه تصفي مع
الحرار هذا الى عندي عسى انا فيدك
اخوي يامرحبا فيك
اخوي احنا نتكلم عن التفريخ اللي عند الحواسي والا الطيور الثانيه خابرين علومها وانا عاااااااااااااااااااااارف تمام المعرفه وحوش والا تفاريخ مهيب سوا فيه الطيب وفيه الفاشل
والله يجزاك كل الخير

[تميم222]

اخوي النادر السلام عليك ...انا خذيت منه لعااااااااااااااام والله انها تطرب الحر من حر ...بس اذا بغيت تاخذ رح وخل معك واحد خبره في التفاريخ عشان يعطيك الخلطه المتناسقه والمدمجده بشكل صحيح ... ...وكل صقار وتدريبه ..لامن تفريخ ولامن وحوش ...والحقائق انكشفت يهمنا كشف الحقيقه لرتقاْ باسلوب افضل ولتطوير الهوايه ...ولك تحياااتي

[هوايتي مكشات]

الله يوفقك ياغاااالي

[الطبشي]

فيه موضوع نزل
لاكن
صارفيه جدال
وماقصور ربعنا اهل الامارات
كشفو لنا بعض اساليب الغش
وياليت احد يبحث عن الموضوع
ويحط الرابط
،،،،،،،،،،،،،،،،،،،،،،،،،،،،،،،،