حذف الامواس ..!!

[راعي دهام]

.




السلام عليكم و رحمة الله وبركاته ..

الحمدلله والصلاة والسلام على رسول الله وعلى آله وصحبه أجمعين


صبحكم / مساكم الله بالخير ..


يسعدني الانضمام اليكم في هذا المنتدى الطيب الذي يجمع الطيبين شرواكم ..


بما انكم اهل خبره في الطيور ومشاكلها حبيت اسأل اهل الخبره ..


عندي طير قرناس سابع حر ما حذف الامواس مع العلم انه حاذف الطوايل اول شهر خمسه ميلادي

والطير ما نقدت عليه بشي من ناحية العده والعلف ونشاطه كل شي طبيعي وهو مهدود في المربط من شهر

تقريبا ويطير ويتنقل في المربط ما عليه خلاف ما شاء الله عليه..


اللي يقدر يفيدني او يعطيني حل يخليه يحذف الموس لا يبخل علييا أخوان ..



تقبلوا تحياتي ..




.

[عناز]

السلام عليكم ورحمة الله وبركاته
باين من كلامك ان الطير غالي عندك انصحك بأن تصبر عليه المقناص بعد رمضان الله يشرفه
واعتقد ان السبب يانقص في الهرمونات المحفزه للقرنسه
او بسبب تغيير المربط بعد ما هديته طلق

[Abunaif]

عزيز حبب تاخر الطير في حذف الموس احتمال يكون من عدة اسباب
1- انك مغير مربطه لانك تقول توك هاده من شهر في المربط اي انه كان مربوط والحين هدد والتغيير في مربط الطير يخليه يمسك الريش
2- يكون الطير العام صادف موسه شي اي يمكن انه انفضخ قبل ما ييبس وساق من جديد مما يجعله هالسنه يتاخر بان موسه ما مرة عليه المده الكافيه لحذفة
3- ان كان الطير هذي اول سنه له عندك يمكن موسه مغروز اي انه منكسر ومجبر بطريقت الغرس في اللحم مما يصعب عليه حذفه لانه ماسك باللحم

وللعلم عند اللــــــــــــه

انصحك انكان حاذف الطويله شهر 5 واحنا الحين شهر 9 انك توديه للدكتور لانها غريبه جدا نظرا للمده الطويله

[سرهيد1]

السلام عليكم

أخوي قد أعلموك الاخوان الذين سبقوني الخير الكثير . ولا أزيد على كلامهم شي سوى .... ان من اكبر الاخطاء أن يتم تغيير الاجواء في المربط اذا كانت الطيور في وقت القرناس .

نصيحة خذه للدكتور وأن لم يجد فيه أي مشكلة بينه فافعل ما يلي :

أربط الطير في غرفة معتدلة الجو ( بارده ) وبرقعه ولا تكشف عنه غير وقت العلف فقط . وسوذ يقوم بحذف الموس بحول الله .

والله تعالى أعلم .

[راعي دهام]

.



السلام عليكم ورحمة الله وبركاته ..



ابشركم يالربع عشيت الطيور ورحت اصلي العشاء وبعد الصلاة سيرت على واحد من الربع
ويوم عوّدت مريت اشيّك على الطيور الا الامواس تحت الطير ..
حمدت الله وشكرته ..




اخوي العزيز عناز ..


حياك الله طال عمرك على طاعته ..

فعلا الطير غالي عندي و لا اسمع فيه ..
ومن صبر ظفر ..ولله الحمد ..

اخوي الغالي / ابو نايف ..

بالنسبه لتغيير المربط كما ذكرت فانا هديته في نفس مربطه ونفس الاجواء وهذا كان تقريبا قبل شهر او حوله
يزيد او ينقص كم يوم ..يعني قبل شهر كان له ثلاث شهور من تاريخ حذفه للطوايل ..
والطير من عام 2000 م وهو عندي لكن العام تعرض لوعكه صحيه واستخدمت معه ابر اعتقد انها
مضاد حيوي او شي من هالقبيل وهالكلام كان في المقيض وكان وقت حذف الامواس فـ طلعت الامواس عايبه في الاطراف كذلك ريشتين من ذنيباه طلعت عايبه ايضا والسبب من هالابر والادويه اللي استخدمتها له
ربما يكون هذا سبب في تأخيره ..!!


اخوي الغالي / سرهيد ..


احترم رايك وعلى عيني و راسي لكن الطير اذا هديته بيكون ماخذ راحته على الآخر وبيختار المكان اللي
يناسبه ويرتاح له بعكس لما يكون مربوط ماله حيله سواء ارتاح والا مرتاح مثل ما يقول المثل :

مالك الا خشمك لو هو عوج ..

بالنسبه لابقاء الطير مبرقع على وكره ، بعض الطيور تمسك الريش ولا تحذف على اعتبار انه منقول ..




الله يعطيكم العافيه على تجاوبكم ونصايحكم الطيبه ..




تقبلوا تحياتي و تقديري ..





راعي دهام .