شوركم وهداية الله لهل البوالين

[سعد2006]

السلام عليكم ورحمة الله بركاته
انا ودي اركب بوالين على سيارتي
والحقيقه متردد لاني مااحرك السياره الا يومين في الاسبوع وباقي الوقت واقفه
هل تنصحوني اركب ؟
وهل تضر الوقفه ؟
ارجو التفاعل لهل الخبره
وجزاكم الله خير

[اسير الغضا]

للرفع
ومواضيع البوالين واجد بالمنتدى شف بالتوقيع فيه موضوع يفيدك

موفق

[عاشق الفكسار]

وش استعمالك للموتر ؟

[الذود العفر]

علعمووم البوالين مايركبهن الا اللي يبي يضرب الوعر أو الصقاقير لأنه لا هد طيره

مايراعي لطريقه يدعس اللي بطريقه أو قناص الحره ..

يفيدونك الأخوان ,,

[التعـ King ـديل]

اذا الموتر يوقف اكثر من ثلاث ايام

طق لك ماكسس 900 / 8 غاط وخل الهواء 40

وبكذا ماتضره الوقفه بس اهم شي الجنط 16

[ابوصالح77]

اذا الموتر يوقف اكثر من ثلاث ايام

طق لك ماكسس 900 / 8 غاط وخل الهواء 40

وبكذا ماتضره الوقفه بس اهم شي الجنط 16

:good2::good2::good2::good2::good2::good2::good2:: good2::good2:

[مقلع الرمث]

فيه نوع اسمه شاهين حلو جداا

[احمد الصقر]

الله يبارك فيك ..

انا لم ادخل الموضوع لطرح تعليق ولكني رغبت في توضيح امر وهو عنوان الموضوع ..

انت كتبت ( شوركم وهداية الله ) ..
وهذا اللفظ خاطئ لغوياً وذلك لتقديم المشوره من المخلوق على هداية الخالق ..

الله سبحانه تعالى أمرنا في كثير من المواضع والمواقع في كتابه الكريم بالسؤال له سبحانه وحده دون السؤال الى احد غيره جل جلاله .

اخي الكريم وعزيزي الغالي ..
لا اتفضل عليك بعلم ولا معرفه وانما انا مثلي مثلك لدي معلومه وحبيت افيدك وافيد الاخوان الاخرين منها ..

وهي ان تبدل اللفظ بهذه العبارة ( شوركم وهداية الله ) الى ( هداية الله ثم شوركم ) فانت هنا قدمت هداية الله سبحانه وتعالى على مشورة الاخرين ..

فليس من المعقول أن نقدم مشورة البشر على هداية الخالق العظيم ..

اتمنى أني لم اكن فض بالكلام او التنبيه في الوقوع في مثل تلك الألفاظ الدارجه بين الناس دون الوعي لما تعني ولشدة حساسيتها بالقول والحكي ..

اتمنى تقبل خالص التقدير والاحترام ..

اخوكم في الله

اسير الوجد

بومحمد

[ابويعقوب4]

اخوي انصحك طق مشلان ضمان سنه وراحه وممشى حلو اما بوالين حقت بر ورمل يعني انت تقول واقفه واذا انفقع الكفر صعب انك تهدي الموتر

[محنك]

هذا السؤال بالذات لن تجد له جوابا واضحا شافياً ,,,
بعض الــــردود المتوقعــــه :
1_ ركبها ممتازة
2_ لاتركبها ترج وتتعبك
3_ انا ركبتها ومارجت
4_ كانك راعي وعر ركبها
5_ نصيحتي ركبها ورصص ارضي
6_ أنا رصصت ومافي فايده ترج
7_ أنا رصصت أرضي وراحت الرجه
8_ ثقيله ورفيعه وتهد وتطرح العزم
9_ خطيرة تزحلق بك وقت المطر
10_ نضرتها عالجيب ممتازه بس ترج
11_ تتعب الكوارين مفرد كارونه ولفتها كبيرة وتضر الدفرنس والدوده .
12_ انا مركبها من 10 سنوات مافي أي ضرر على السيارة ولا الكارونه وبالعكس مطب ممتاز مثل اللكزس .
13_ ركب 8 غاط بس ثقيل
14_ ركب 6 غاط اخف لك واخف مطب
والآراء والتجارب في هذه الكفرات كثيرة
وأنا أقول لك :
ركب وأستانس وجربها ولو ماقنصت ولو مارحت للوعر
شي في نفسك جــــربه .. إذا ماناسبتك بعها
.. وفيه طريقة حلوة إن شاء الله تناسبك ألا وهـــي : انك تحط البوالين على جنوط خاصه فيها ,, وجنوطك الأصليه وكفراتك الحاليه موجوده ومتى مامليت من البوالين ركب العراض شد البلد واذا مليت من العراض بدل وركب البوالين والسبب لأن البوالين اولا احتمال ماترتاح لها في الفتره الاولى من تركيبها وشوي شوي لين تحبها ويمكن ترج او يثقل الجيب في يدك لأنها فعلاً تطرح العزم ويبيلها 8 سلندر يشيلها شيل ..
إضافه الى العرجـــه اللي في بداية الممشى من أثر الوقفه .. وشكلها هو اللي يجذب أكثر الناس تركبها .. والاصل أن البالون للحجر والحصى الحاااد والشوك العاذر الطويل والرمل .. لأن جنبها يتحمل الرقعـــــــه عكس الكفرات الاخرى والحديث عن سلبياتها وايجابياتها يطووول وستجد في هذه الخيمه مواضيع عنها وفق الله الجميع لما يحب ويرضى ...
ملاحظة لأخونا مقلع الرمث : نوع الكفرات الشاهين ليس بالون ولايطلق عليه بالون أبداً ولايمت للبالون بصلة ..

[شطب]

ماأزيــد على كلام أخوي محنك
كفى وففى من غير قصور بالباقين

بس بخصوص الرجه والترصيص بعطيك الحل
اول ماتركب الكفرات رصصها ترصيص عادي زي اي كفرات ثانيه

وبعد ثلاثه اسابيع تقريبا رصصها مره ثانيه
وان شاء الله تنسى الرجه

تقبل مروري ....

[العودالازرقhk]

ماقصروالربع وفو وكفو
وخاصه اخونا محنك على اسمه
ولا من قصور فى الربع الثانين

[قنااااص]

بالنسبة لي أنا إذا دخل الوسم سنويا أركب بالون

ماكسس والحمدلله كويس

والبالون مع الايام لابد من الرجه

وبالتوفيق لك...

[خيام الندم]

ننتظر مشاركات وإفادات الأخوة ...

[محنك]

لاشك ولاريب أن من أهم سلبياته :
فقدان الرساوة والتوازن والثبات والسيطرة التامة على الجيب في وقت الأزمات كالأمطار والردميات الطينية الموحلة والإنعطافات المفاجئة والتوقف السريع بالسرعات العالية أو المتوسطة وإرتفاعه سبب لسرعة وقوع الكارثة لاقدر الله ... فأخذ الحيطة والحذر واجب ...
فسيارات الدفع الرباعي مرتفعه عن الأرض والإنقلاب وارد بكفرات عريضة ,, فمابالكم بالبالون في ظل ظروف مفاجئة تحتاج وقتها السيطرة على المركبة ......

[سعد2006]

شكرا للجميع واخص بالذكر اسير الوجد على تنبيهه جزاه الله خير
ومحنك ماقصرت وافي بيض الله وجهك
ولا مانع من المزيد من المعلومات ...

[alkongrs]

محنك كفى وفى :)

[سارق الكحل]

انا رائي من راي أخوي محنك
انا عن نفسي عندي بوالين وحجري اذا دخل الربيع ركبت البوالين لانها بصراحه مريحة بالبر والدبل ماتحتاجه الا نادر

واذا جا وقت الصيف رجعت الحجري وخزنت البوالين وبعد ثلاث سنين غيرتهم كلهم