مطارة الهدلق

[عاشق الجبل]

السلام عليكم ورحمة الله وبركاته


الله يذكر أيامها بالخير


أنقطعت من الأسواق وجابوا لنا مطارات : السنيدي والهيبي وعزالله أن الفرق واضح

أما مطارة السنيدي تذكرني بالمنخل عجزت وأنا أعبيها وأربصها بالماء لكن الخايب خايب .

ومطارة الهيبي ماجربتها وأتوقع ( سعيد أخو مبارك )لكن ماأقول إلا : الله يرحم أيامك يالهدلق :(


السؤال : وين أحصل مطارة الهدلق وإذا مافيه ماهي أفضل مطارة تقارب لها ؟

[صوعان]

انا جربت مطاره الهيبي وانت الصادق مهيب مطاره جركل مويه ماتخر ولا نقطه ومويتها ماتبرد ابد
نقعتها ثلاثه ايام ومافيه فايده ..مطاره الهيبي من جوى مطليه بماده مثل الشمع صحيح انها ماتخر المويه بس ماتبرد ابد
لكن البديل عن مطاره الهدلق مطاره الشراع اشوف الشباب طايحين فيها وعزالله انها تبرد زين
اشوف نوع ها الايام عند محلات رحلتي بثلاثين ريال شراع ملبسها خيشه بشتريها اليوم اجربها انشالله
تحياتي

[عاشق الجبل]

لاهنت أخوي صوعان

الظاهر نبي نرجع لأيام الأجداد ( قربه أو بدره )

[ابو فص فص]

عموما يا اخوان المطارات من الهدلق الى الهندية حظ نصيب .... لحد يقول انا جربت وكذا

فيه مطارة هندية جربتها عز الله انها فليزر من جد ولكن الماء ما يقعد ابد .... نقعتها واخر شيء قلت يا ولد خطها ولكن سوات اللي بغى يكحل العين واعماها قامت تصب صب ......
قلت يا ولد خذ لك ثانية وجرب وفعلا ضبطت واختلفت عن الاول بكثير في سرق الماء وتبرد ....

قمت واخذت اللهيبي وكما قلتوا انها ما تخر بس تبرد اذا صارت مليانة اما اذا نقص الماء عن النصف كنها جركل ماء

عموما انا في طور تجربة ام خيشة ولكن يبي لها انك ترشها بالماء عشان تبرد

هذا ما حبيت اضيفة هنا

ولا انس السنيدى ما جربتها بس الربع يمدحونها ويعيب عليها اذا ما حطيت فيها ماء لدة ثلاثة ايام تطلع حبوبب سوداء ويقول انها ما تاثر


والسلام عليكم

[صفــــارة]

عجزنا نمسك سالفة,,,...
الزين زين والشين شين نبي شي محكور ومظبوط.

[الجندي2005]

دورت الهدلق بالرياض والقصيم وحائل وما لقيتها قلت ياولد ما لك الا القربه وفعلا ارتحت

[عاشق الجبل]

تسلم يافص فص على هالمعلومات وعسى الله يفكنا من الغش وأهله .



الأخ : صفارة ... عسى الله يجيب المحكور


الأخ : الجندي 2005 الظاهر مالنا إلا القربه ونخلي المطارات بحلوق أهلها .

[أبـ [مطلق] ـو]

يا رجال عندي مطـارة السنيدي

أعبيها امشي خمس دقايق فــاضيه تماماً

والحين الطريقه الي بتنفع والي انا مسويها

جركل ما المنهل كبير ولاف عليه خيشه

وارش على الخيشه ماء والله فتره بسيطه ويبرد على طول ولا يخر مـاء ولا شي

*لكن أن لقيت الهدلق لا تنسـاني وأنا أخوك علمني

تحيااتي

.

[عاشق الجبل]

يبو مطلق ان لقيتها أبشر بعزك والله يعينني على فاتورة الماء الجايه الظاهر قيمتها 500 ريال من كثر خرخرة هالمطارة :)

[خيال الغلبا]

انا رحت للسنيدي واخذت ام خيشه وربصتها
وعند استخدامها ملأتها بالماء .....زوماهي الا نصف ساعة ولم اجد فيها قطرة ماء
صارت تسورب وتقطر اللين خلصت

[عاشق الجبل]

المشكلة أنهم بهالطريقة يضحكون على الناس


الله حسيبهم

[توونا]

جربت كل المطارات الموجوده حاليا بالاسواق وكلها ماتنفع الااني توصلت لطريقه حلوه وهي جركن ماء عشره لتر ثم احضر خيشه رز20 كيلو فاضيه كنك مفصلها عليه تفصيل وتلبس الجركن وتقص من فوق شوي ثم تخيطها بطريقتك من اعلى وان كان في سله رش شوي ماء على الخيشه او اذا جلست بموقع مكشاتك رش ماء وحطه بذرا السياره واشرب ماء بارد نسبيا يغنيك عن المطارات ولكم تحياتي0

[أبـ [مطلق] ـو]

نفس طريقتي أخوي توونا ..

وهاذا أزين حل الوقت هاذا

.

[عاشق الجبل]

تسلم ياتوونا :)

[الكايف2]

السلام عليكم ورحمة الله وبركاته حياكم الله على ها الاقتراحات ولكن انا جربت مطارت الهيبى بس لبستها خيشتين رزعشره كيلو وطلعت ثلاجه اما مطارت السنيدى حسبهم الله منخل او احسن اشوى وان لقيتوا الهدلق لا تنسونا

[بـران]

مطارة الهدلق ؟؟؟؟؟
انقطعت بعد الأزمة أزمة الخليج و لم تعد تصدر من 14 سنة
يعني عساك تلقاها عند شايب في ديرة صغيرة مرررررررة ولا أحد فيها يحب الطلعات

[عاشق الأشهب]

بالنسبة لمطارة أم شراع هي أحسن مطارة في المسك ولكن لا تبرد الماء أبد لأنها عازلة للهواء أما السنيدي جربتها هي ممتازة لكن صغيرة شوي وعلاج تهريبها أنك تعبيه وتمسك خط وكل ماقضت عبه مايمديك تاصل للمدينة اللي أنت مسافر له ألا وهي ماسكة والان عندي الهيبي صح أول ماشريتها أتعبتني ولكن بعد الخط ضبت وطلعت ولا أحلى منها ومويتها أبر شيء.

[برق نجد]

افضل مطارة شراع
هي مفصلة من قماش ياباني رقم 9
وهذا القماش منقطع من السوق ولا يوجد الا عند محل الحمود اللي في الغرابي
وتراه شراع قطني نوعا ما يعني انواع البرودة :d

[خيال الغلبا]

برق نجد هل جربتها
واين يوجد محل المحمود

[عاشق الجبل]

الأخ : الكايف2 ( كاني لقيتها أبشر بعزك )


الأخ : بران ( خلاص جانا الشتاء ويبي يغنينا الله عنها الصيف الجاي بنوع جيد )



الأخ : عاشق الأشهب ( مثل الهدلق ماتلقى وأنا أخوك ... لكن الهيبي أزين من السنيدي )



تسلم يابرق نجد على هالمعلومه


الأخ : خيال الغلبا ... الغرابي في الرياض

[محبس]

لاهنت أخوي صوعان

الظاهر نبي نرجع لأيام الأجداد ( قربه أو بدره )

[عاشق النفد]

ياشباب فيه

قربة تصدر من الكويت

ما دري هي عملية ولا لا
؟؟؟؟؟؟؟؟؟؟؟؟؟؟؟

[المغترب9]

اللي يبي مطارة الهدلق موجوده والمانيه اصليه وسعرها 80ريال

[المغرم]

السلام عليكم ورحمة الله

أنا شريت مطارة الهدلق المانيه وارد الكويت وكيلها في السعوديه العضاض

قبل يومين 1433/8/18

من عند برق الحيا تقريباً سعرها 59 ريال

والآن هي تحت التجربه منقعها بمويه من يومين

وان شاء الله انها تضبط

[برودباند]

فيه وحده عند السنيدي كويتيه بس ماني متأكد هي الهدلق او لا

[رفيع المقام]

ياشباب طيب اللي مكتوب عليها الهدلق الكويت
لكن موب مكتوب عليها قرماني .
هل هي الهدلق الاصليه والا لا ؟

[هبوب الشمااال]

مامثل القربه بس

[العاصي777]

الهدلق وارد الكويت اشوفها عندنا في الديرة نطل بس ما حصل وجربتة وشايفها عن كم محل وابشوفها لكم اذا موجودة الى الان اذا احد حاب اشريها له اورسلها يبشر بس ترا مالي دخل اذا هربت الماء انا ما بعد جربتها

[نجيدي]

اللي يبي مطارة الهدلق موجوده والمانيه اصليه وسعرها 80ريال

الله يسامحك يالمغترب 80 حته وحده..!!
مطارة الهدلق الألمانية موجودة عند المرباع أمس شايفة بــ 35 ريال..!!

[محمد971]

السلام عليكم ورحمة الله وبركاته
اخوي عاشق الجبل اذا تبي مطارة الهدلق تحصلها على طريق الشرقيه يعني بالمحطات حقات الطريق الشرقي يبدا من جمرك الخفجي على وجهك وانت متجه جنوب لحد ماتوصل جمارك البطحاء الامارات انا شريتها من محطة سلوي الي قبل تدخل جمرك قطر وحصلتها بكثره ولكن تندمة اني ماكثرة خذيت وحده ولها الان اكثر من ثلاث اشهر وانا اعبيها ماشاء الله بارده ومن احسن مايكون

[الحوطه]

انا حصلتها عند السنيدي وارد الهدلق المانيه ٣٥ ريال وتحت التجربه

[الشنه]

اللي يبي القر به تظبط وتلزم الما
يعبيها فل ويجيب له سطل كبير ويعبيه مويه وينقع القربه فيه وهي مليانه
ويغير مويتها كم مره في اليوم يفرغها ويعبيها من جديد ويغير موية السطل بعد

ويستمر على هالحاله من اسبوعين الى ثلاثه اسابيع


بالنسبه للقربه الشراع (الهدلق ما يحتاج ) اذا عد 3 اسابيع وما ظبطت يخلط سكر ومويه
ويصبه في القربه وتظبط ان شاء الله




والقرب عموما افضلها قربة الجلد
ولا بد المويه فيها على طول مب تفضيها اسبوع واذا جيت تطلع البر تعبيها
خلها معلقه ووالها بالمويه

[قيس 2]

يصرااااااحه انا جربت الكويتيه ممتازه
بس ترا يوم تشتري مطاره جديده لازم تملاها ما وسكر يوم او يومين وتزبط

[دحبوش]

السلام عليكم ورحمه الله
الاخوه الاعزاء مطاره الهدلق الاصلي الالمانبه موجوده وكيلها العضاض شارع البطحا بعد كبري البطحا وانت باتجاه الجنوب على يدك اليمين مركز سلمان التجاري الدور الثاني الجهه الشماليه .