يالربع فزعتكم انا ماعرف شي بالمكانيكا او الكهرب

[عاشق الماركيز]

السلام عليكم ورحمة الله وبركاته
يالربع الماركيز اليوم الصبح طلعت عليه وقفت عند بقاله المهم دقيت ريوس وطفا والموتر فيه رجفه بهذلني تكفون علموني من وش تراني عليمي ولاودي اوديها للورش علشان مايلعبون علي لاان الموتر ماشالله نضيف الي معيبه الرجفه والطفيه فقط بالريوس

[عاشق الماركيز]

ولارد معقوله محد يعرف

[sarab88]

النفظه طال عمرك قصدك انك اذا عشقت الدي ينفظ هذا يكووون كراسي عنك لكن طفيت الموتر اتوقع الله والعالم كهرب اوحساس وتقبل مرووري

[عاشق الماركيز]

يطولي بعمرك يعني افهم من كلامك انه شغله بسيطه

[sarab88]

والله ان شاء الله حط القير على الدي وشف وخلك ضاغط على الفرامل وشف ينفظ والا لا وناظركراسي المكينه والقير بيوضح عليها مايبيلها شي والله يوفقك وتقبل تحياتي

[عاشق الماركيز]

الله يجزاك خير ويبيض وجهك

[رفيع المقآم]

هلا بك يالغالي شيك على الكويلات
اذا انت مغسل المكينه بماء وصابون
او المكينه جايها ماء ترى الكويلات انتهت

[تناهيت]

اسمعني وناخوك


كراسي المكينه وووو الخ ما فيها الا العافيه


موترك مشكلته احد الأمرين
1-منظم الهواء وقيمته 90-120 اصلي وكاله (موتر كرفت )وموقعه خلف المكينه تحت الغطاء بالضبط جهه الغمارة
2-أوعندك أكثر من كويل متعطله لنه لو كويل واحد ما تطفى السيارة منه (الكويل هو سلك البوجي بديل لنظام الديلكو القديم )قيمة الكويل 80-90 ريال على حسب راعي المحل وكانت بــ60 ريال لاكن للأسف تلاعبوا وكل كويل يغيرونه لك بــ20 ريال بالكثير ولا تنسى تغير البواجي على الدرب طقم بــ70 ريال موتركرفت
في اسعرها لأنها استهلاكيه


هل يدق سلف على طول او يطول معك .......<ان كانه يطول ما يدق هذي دلا له على ان منظم الهواء عطلان ويطفى الموتر منه
على العموم مشكلتك طبيعيه واستهلاكيه في نفس الوقت يعني هالأشياء لازم تغير كل 60 الف كيلو تقريبا


تحيات ي

[النبع الصافي]

تناهيت 100%

[YUKON_GMC]

إذا مايطفي الا بالريوس ... فــــــ ماعمرها مرت علي ولا اقدر افيدك ..

لكن لو الموتر صار اشتغال مكينته ماهي صافي وصار يبي يطفي او يطفي بمجرد تحطه باي نمره ويتفتف

عادة يكون السبب حساس او منظم الهواء اللي فوق قربة الهواء قيمته حول 350 ريال ... لكن اسهل حل افحص الموتر كمبيوتر ويقولك العطل بدون تغير اشياء صالحه ولايصلح معك

[بساط احمدي]

نفس مشكلتي كانت بالفورد الله يذكرها بالخير

شف وانا خوك ان كانك بالرياض او من الشرق علمني ... تجي لمي بالبيت او اجي لمك مافيه مشكله

واشوف لك المشكله وهل هي نفس المشكله اللي كانت عندي ولا لا .... لاني صعب اكتب حل مشكلتك ما راح تفهمني

المهم ان كانك قريب فقلي اعطيك جوالي وتسير علي وتراه فزعه لا اكثر ولا اقل ... لا تقول هذا يبي دراهم ههههه

[عاشق الماركيز]

يعطيكم العافيه وبيض الله وجيهكم ومعرفة الرجال ياخوي بساط الي مثلك وشرواك تجاره وابشر باقرب وقت ارسلك رقمي الله يعطيك العافيه لان ملكتي الاسبوع الجاي الله يحفضك ومشغول والله

[YUKON_GMC]

^^^
مبروك ... منك المال ومنها العيال والله الله بفحص السياره وتجهيزها زين لاتفشلك وتطفي قدام بيت انسابك خخخخخ

مثل ماصار معي يوم احترق علي كتاوت الديلكو بكابرس موديل 84 على وقته نهار العرس :D

[بساط احمدي]

ألــــــف ألــــف مـبـارك
ألــــــف ألــــف مـبـارك
ألــــــف ألــــف مـبـارك
ألــــــف ألــــف مـبـارك
ألــــــف ألــــف مـبـارك
ألــــــف ألــــف مـبـارك
ألــــــف ألــــف مـبـارك
ألــــــف ألــــف مـبـارك

.......................

والله فرحت وكأن اللي يبي يتملك اخوي

الله يجمع بينكم ما جمع بخير ويبعد عنكم كل شر عائن او حاسد

واعتبرني اخوك الصغير ولا تستحي وانا خوك ... تبي رقمي عطيتك اياه وانا خوك ولا انتظر رقمك اللي تامر به

[YUKON_GMC]

^^^^

كفو ياذيبان ... بس عاد وحنا مالنا نصيب من خبرتك ...؟؟

قولنا ولوبأختصار وش المشكله وكيف صلحتها خلنا نستفيد يمكن تصادف وتصير معنا وقتها وين نلقاك ...:D

[بساط احمدي]

^^^^^^

ههههههههههههههههههههههههههه يا حبي لك . . . ههههههههههههههههههههههه الله يسعدك

والله وانا خوك سر المهنه >>>> وششششششش عنده هههههه

لكن والله يا انا بتعب على شان اوصف وافهم لاني حتى ان كتبت لك وحتى كذلك لو اكلمك جوال ما تاصل المعلومه هههههههه

يبيله شغل >>>>>>>> وشششششش عنده بعد ههههههههه

[عاشق الماركيز]

الله يبارك فيكم ويجزاكم خير انشالله بنشوف لها حل قبل الملكه والله يكتب الي فيه الخير

[بساط احمدي]

لا يصير لك ما صار لي بس هههههههههههههههههههههههههههههههه

هاك اليوم وكان لي اقل من شهر متزوج ...... المهم ومير اني ادخل على شارع بالروابي وبديت الاحظ ان نور الموتر بدا يضعف

قلت بقلبي وششششششششش السالفه الله يستررررررر بس مهووووب وقته ابببببببببد

المهم شويات ولا الموتر طفى ... ههههههههههههههههههههههههههههههههه عاد دور وجهي

تدري وش قلت هههههههههههههههههههه قلت للمدام اعووووووووذ بالله الناس ما تخلي احد بس تبصبص ولا تذكر الله لا شافت شي زين اعوووووووذ بالله

والله وادق على عديلي وقلت له تعال خذ المدام ووده عند اخته وخلن اشوف المصيبه اللي انا به هههههههههههههههههه

[YUKON_GMC]

^^^
ماعليك أنت بالرياض التكاسي والليموزينات كثر الحصى .. لكن البلاء اللي في منطقه مايشاف الليموزين فيها من شهر

,اذا خرب موترك الله يعينك تدقها كعابي .. لأن حتى الناس مايقفون لك ..؟!! وبأعتقادهم اللي يمشي على رجليه فيه بلى اما راعي مخدرات والا ارهابي ..هههههه

[دل البحار]

مبروووووووووك يا عريس على الطاعه رزقكم الله طاعته ورزقكم الذريه الصالحه
سيارتك يمكن تبي العرس تبيلها ورشة تغير وتهندم أفضل لك أفحصها لدى مختص معروف ببلدك وأجزع عليها بالفلوس وربك يسهل الامور عاد لو تشيك على طرمبة البنزين ترى ما يطفي الفورد الا من طرمبة البزين

[خوفا وطمعا]

السلام عليكم ورحمة الله

اخوي اذا ما ظهر لك شي واضح صوت او زيت سو فحص كمبيوتر افضلك ان شاء الله راح يبين كل شي

انا معي كابريس وتغير علي ضغط المكينة وتغييرات القير اختلفت والسيارة بثقل وظهرت لمبه لونها برتقالي
رحت للورش قالوا لي عادي لا تشيل هم شي بسيط هذي حساسات لسياره كامل على اي شي تطلع رحت ولاني مطمن
فسويت لها فحص طلع ان حساسات القير 1و2 يبي لها تغيير وغيرتها قيمتها 100 ريال الوحده
والحمدلله السيارة انشط من اول واهدا