ألحقوووووووا الفحل الكايف ياراعين المزاين

[عآشق آلودآعين]

بسم الله الرحمـــــن الرحيــــــــــــم


السلام عليكم ورحمه الله وبركاته
اولا اذكروا الله
اسم الفحل : شرهان
السن : ثني
الاصل : من ابل صحن غنيم بن شويه من جهه الابو القريني
الحد : 20 مليون
الموقع:بالقرب من محافظه عفيف
الشروط:الاول -انه منتج وله انتاج وموجود . الثاني -انه مشروط وعلى الذمه .
للجادين واصحاب النظر وخاصتا اكبر ملاك الابل الشعل تحديدا
*يرجى رجاء خاص لا يتصل الا زبون صامل ومن له رغبه في الشراء
*يشرط مالك الفحل شرهان على من يقدره الله ويشتريه ان لم ينتج عنده يرجعه وياخذ دبل دراهمه اللي دفعها
للاتصال على مالك الفحل / عبدالعزيز العطاوي 0500103191
http://www.m5zn.com/uploads/2010/10/27/photo/1027101010080hlte14m2xdl8wjqd.jpg
http://www.m5zn.com/uploads/2010/10/27/photo/102710101030gnhbnrbzsor3w2hlvl.jpg

[مجاهيم]

مساك الله بالخير
مهوب جودي؟...

[ساحووق]

ماشاء الله

لكن عطنا صور الانتاااااج لاهنت؟

[راعي عجله]

والله القيمه غاليه بقوهـ وبعيرك ماهوب راعي القيمه هاذي
وعذرني على الكلام هذاء

[قزيزالنعام]

مبروك البعير اخوي وطيب وبوه بعير بن غنيم مشري من بن منيخر العجمي بمليون وخمسه مائه وهو على بعير القريني وفاز الاول في مزاين الصياهد وقلطوه على الامير سلطان بن عبد العزيز ورد فيه 4مليون وامه جوديه من القواليط الظفير والبعير هذا شكل ابوه 100فل100 وان شالله يجيب الى فيها بركه

[راعي حريات]

ماشاء الله، الله يبارك لراعيه وانشاء الله يلاقي الي يدفع قيمة بعير :(

[هولان]

نبي صور لبناته

[جرح _الرياض]

نبي صور لبناته نبي صور لبناته

[الاشقر99]

عشرين مليون ولا عشرين الف ):

[الميل1]

20 مليون - الله يرزقك
بس حدث العاقل بمالا يعقل فان صدق فلا عقل له

[الميل1]

لو ان قيمته 20 مليون
ماشفت حبل النايلون ناشبن بيديه

[faaahode]

اهااا انا من اليوم جالس افكر بالقيمه ماني متخيلها قلت يمكن غلطان بس كلام الاخوان اكدلي 20 ممليون هذا بعير ولاكتلت ذهب اتكلم بما هو معقول بعيرك مايسواها خلك واقعي يخوي وش انتاجه وعلامن بيع وبأي مزاين شارك وفاز0000000000000000000000000 ؟؟؟؟؟؟

[عاشق الجهامه]

ياخوان وش فيكم الرجال بعيره عنده وكلن يحد حلاله على مايبي
ياخوان انا عندي ناقه مجهم حادها مليون طبعن هي ماتعدى 20000 لكن انا ابيها كذا الللي يبي يشتري يشتري والا الشبك محلها ياخوان ...... لاتاخذها في خاطرك ياراعي البعير
اعجبني رد اخوووووي الميل 1 ههههههههههههههههههههههه

[عآشق آلودآعين]

انتاجه موجود وبأذن الله انزل صور له وثاني شي اللي ماله فالابل او داخل يقول كلام ماله داعي رجاء لا يعلق واهم شي ذكر الله

[العابر2222]

ماشاء الله تبارك الله

[عآشق آلودآعين]

راعي الحلال للاسف رفض تنزيل صوره لانتاجه وقال اللي صامل يجي ويشوف البعير وبناته .
والرجال حاده <20> مليون اللي قد القيمه هذي يتواصل معه غير كذا لو يوفر اتصاله او ردوده افضل .

[Hch]

البعير كفوو وفيه شبه من ابوه كثير لكن انت تقول البعير سنه ثني يعني اضرب العام مايمديك تشوف انتاجه اذا اضرب وهو جذع وقليل مايعشر البعير الجذع الا اذا كان عليه حالن قوي وبعير حاله عايدي بعدين وحده ولاثنتين اذا اعشر وهو مايثبت الانتاج مثل ماقالو الاخوان ماهو بعير العشرين مليون تدري ليه ماجابها اطلق بعير اشعل ماوصل السوم عليه 5 مليون للأن اهل الصنف في الشعل ماهم من كبار الهوامير ملاكها قليله وكلهم عندهم فحول شعل كفو للأن الفحول الشعل المنتجه كثيره على سبيل المثال خروفاان والبياضي والقريني والغيثي وبعارين العجمان خالد بن سعود وسعود ابن حثلين كثيرين اللي فحولهم الشعل منتجه حتى لوبعيرك منتج كل انتاجه مثل جلاده مراح ياصل هالقيمه اذا كان انتاجه مثل جلاده ذاك الحين بياصل للخمسه مليون او السبعه مليون اما العشرين مليون اتمنى والله اني صادق اتمنى ان شااالله يجيبلك مية مليون بس انت تستخف بعقولنا اسمحلي يوم تقول زي كذا حنى اهل ابل محنا ناس مانعرف لكن ابي اقولك مقارنات علشان تستوعب كلام اذا مافهمت وللي يبي يستفيد لو ان بعيرك اوضح منتج ميه ميه وانتاجه مثل تمام والباتل بقولك يستاهل اصلا مراح يكون معك وقت تجي تعلن في المنتديات يجونك الريجيل للين ياخذونه .
واذا كان املح يعني مجهم اقولك صح العشرين مليون فيه المنتج منها قليل لكن انت تكلم عن لون قليل اهله وقليل الشرايه فيه علشان كذاا بقولك شي بعيرك اطيب انتاجه من ابو جلاده بعيرك اطيب انتاجه من خروفان ابوبكار ابن قشعان اطيب انتاج من البياضي بعير ابن حجنه بينتج مثل مدمره
هاذولا كل الفحول اللي عديتها لك المنتجه معروفه بناتهم ماوصلت هاسعر وانت جايب لي ثني تقول اشرط عليك انتاجه ومشيوف انتاجه بعيرك حبته صغيره وله مردفه متقدم سنامه شوي ذيله طويل الشعره واللون ماهو المطلوب ....انا يوم اقول كذاا والله لمصلحتك علشان ابين لك وللكل عزيز علي بهالمنتدى علشان الناس ماتستخف فيك مثل الكلام اللي في الردود واهم مافي المنتدى المصداقيه واذا راحت المصداقيه الله يخلف.

عموما الله يوفقك ويرزقك بشي الطيب وبالملاييين وينولك اللي في مرادك .

أبـــــــــــــو مشــــــــــــاري

[صلف المهب]

ياخي احترم عقول الناس ...

وش اللي سوم 20 مليون !!!

[عآشق آلودآعين]

مكتوب حد وانا اخوك والا معاد تشوف واذا ما اعجبك الموضوع اطلع ووفر التعليق اللي ماله داعي لانه يقلل من الشخص اللي امامك لو طلب راعيه 50 مليون منت ملزوم تصدق .

[عآشق آلودآعين]

منتظر راعي النظر

[عزوتي وايل]

البعير كفوو وفيه شبه من ابوه كثير لكن انت تقول البعير سنه ثني يعني اضرب العام مايمديك تشوف انتاجه اذا اضرب وهو جذع وقليل مايعشر البعير الجذع الا اذا كان عليه حالن قوي وبعير حاله عايدي بعدين وحده ولاثنتين اذا اعشر وهو مايثبت الانتاج مثل ماقالو الاخوان ماهو بعير العشرين مليون تدري ليه ماجابها اطلق بعير اشعل ماوصل السوم عليه 5 مليون للأن اهل الصنف في الشعل ماهم من كبار الهوامير ملاكها قليله وكلهم عندهم فحول شعل كفو للأن الفحول الشعل المنتجه كثيره على سبيل المثال خروفاان والبياضي والقريني والغيثي وبعارين العجمان خالد بن سعود وسعود ابن حثلين كثيرين اللي فحولهم الشعل منتجه حتى لوبعيرك منتج كل انتاجه مثل جلاده مراح ياصل هالقيمه اذا كان انتاجه مثل جلاده ذاك الحين بياصل للخمسه مليون او السبعه مليون اما العشرين مليون اتمنى والله اني صادق اتمنى ان شااالله يجيبلك مية مليون بس انت تستخف بعقولنا اسمحلي يوم تقول زي كذا حنى اهل ابل محنا ناس مانعرف لكن ابي اقولك مقارنات علشان تستوعب كلام اذا مافهمت وللي يبي يستفيد لو ان بعيرك اوضح منتج ميه ميه وانتاجه مثل تمام والباتل بقولك يستاهل اصلا مراح يكون معك وقت تجي تعلن في المنتديات يجونك الريجيل للين ياخذونه .

واذا كان املح يعني مجهم اقولك صح العشرين مليون فيه المنتج منها قليل لكن انت تكلم عن لون قليل اهله وقليل الشرايه فيه علشان كذاا بقولك شي بعيرك اطيب انتاجه من ابو جلاده بعيرك اطيب انتاجه من خروفان ابوبكار ابن قشعان اطيب انتاج من البياضي بعير ابن حجنه بينتج مثل مدمره
هاذولا كل الفحول اللي عديتها لك المنتجه معروفه بناتهم ماوصلت هاسعر وانت جايب لي ثني تقول اشرط عليك انتاجه ومشيوف انتاجه بعيرك حبته صغيره وله مردفه متقدم سنامه شوي ذيله طويل الشعره واللون ماهو المطلوب ....انا يوم اقول كذاا والله لمصلحتك علشان ابين لك وللكل عزيز علي بهالمنتدى علشان الناس ماتستخف فيك مثل الكلام اللي في الردود واهم مافي المنتدى المصداقيه واذا راحت المصداقيه الله يخلف.


عموما الله يوفقك ويرزقك بشي الطيب وبالملاييين وينولك اللي في مرادك .



أبـــــــــــــو مشــــــــــــاري



:good: ماشاء الله عليك

[أسير المساري]

اذا بغيت اشتري هالبعير ب20 مليون بروح لهيف واشري بـمليون ونص بعير خيار بدون قصور في بعيرك يالطيب

[عاقر الحصان]

والله لو انه على شارعين

[abo mhmd]

اقول يالحبيب غديك مستخير وموهون عن بيعته البيعر بعير المليار .......
ال20مليون وين بتوديها

[البرفسر]

الله يرزق الجميع

[ابو مفلح]

يا أخوان وشفيكم على الرجال ( الرجال ما قال عشرين مليون ريال يمكن ليره أوبيزه)

[الهرم]

الله يرزقنا وياك من واسع فضله

[فنجال شاهي]

ويستمر مسلسل غسيل الاموال !!!!

[الحارثى محمد]

أتوقع بالكاد يجيب 20000 الف
البعير فيه سر باكستانى

[ABU SALEM]

من حكم في ماله ما ظلم
الله يرزقنا وياك من فضله
الاخوان الاعزاء الرجال عارض حلاله بسعره من راسه ما اتوقع فيها شي كون انه طلب سعر غالي
ادعوا له ان الله يرزقه والا تفرجوا والا قولوا كلمه طيبه التحطيم ما هو زين وانتوا متوقع منكم الخير الي عنده انتقاد والا شي يرسله للرجال على الخاص اتوقع افضل
ولكم تحياتي

[هدد9999]

اقول 20 مليون عشرين مليوون .

والله فيه بعارين وصلة 13 و 21 . في المغاتير . ما فية شي غريب

(( يا اخوان ترا الاسعار غلات )) مو مثل اول . 2000 3000 . هههههههههههههههههههههه

[الطلحاني]

عندي ددسن موديل 89 ، تاخذها رأس برأس .. ههههههه

[عآشق آلودآعين]

لا اله الا الله محمد رسول الله

[عناز الحره]

يازين من طخ هالبعير وراعيه واااااااقف دارى 20 مليون ميزانية دوله كامله

[torrjom]

والله لو انه على شارعين



بعيرك يستاهل

وانت تستاهل

والله يجيب لك الرزق

حلوووووه عاقر

على شارعين :D

شكل الاراضي جيبه لك الغم

كل الوووووووووووود

[راعي العشاير]

من حكم في ماله ما ظلم
الله يرزقنا وياك من فضله
الاخوان الاعزاء الرجال عارض حلاله بسعره من راسه ما اتوقع فيها شي كون انه طلب سعر غالي
ادعوا له ان الله يرزقه والا تفرجوا والا قولوا كلمه طيبه التحطيم ما هو زين وانتوا متوقع منكم الخير الي عنده انتقاد والا شي يرسله للرجال على الخاص اتوقع افضل
ولكم تحياتي


جزاااااااك الله خير اخي الكريم
هذا كلام العاقل

[فتى التويم]

ان شاء الله يجيب القيمة اللي يبيها راعيه

بس 20 مليون!!!!!!

اتوقع بيصير عانس عنده:)