***(( اللى عنده خبره في أستخدام أكستيرما 2))***

[المرابط]

السلام عليكم ورحمة الله وبركاته


شريت قبل فتره أكستيرما2


وأهديتها على أخوى بحكم أنه راعي


صيد أكثر منى


وبعد فتره رجعها لى وقال جربت التشكات كلها


طبعا الشوزن جديده بكرتونها وتشكاتها كامله


وقال تعبتنى وضيعت الصيد على


وماتناسبنى ورجع على شوزن كسر أم حبه


وقال والله أنها أبرك منها


وقالى وهو زعلان بعها أو خلها عندك


مع العلم أن لم يستخدمها ألا أقل من دسته


وأنا راعي صيد خفيف بحكم هوايتى الخفيفه


للصيد ولاكن قررت أن أبقيها عندى


لأنى شاريها غاليه بعد أستشارتكم في المنتدي


ولا راح أفرط فيها بس أبغى أشوف وش المشكله بالظبط


وأحلها لأنى واثق بمميزات الأكستيرما 2


ممكن ياشباب أحد يشرح لنا


التشوكات عن تجربه بالأرقام


وش اللي تسوق أكثر واللى تنتشر أكثر


وش الرقم اللى يصلح لأغلب الأستخدامات


ومعلومات أكثر عن كيفية أستخدامها

[4*4]

بندق صيد للمحترفين واخوك رميه على قده ومتعود على ام حبه من عشره متر وجاي
هذا التفسير في نظري

[خادم الربع]

وانا اخوك الامر واااضح جدا

من المعروف ان ام حبه تهفي يعني تنزل تحت فيكون التصويب بالماصوره

اما ام خمس بجميع انواعها ففيها زمه خفيفه يعني تحط النيشان في رجل الطير

طبعا اذا اختلفت البندق على اليد لا زم تتعود عليها اقل شي 4 او 5 طلعات

عشان تزبطها لزم على اخوك وخله يجرب وما عليك والله معاد يفكها

والسلاااام:cool:

[النو]

البندق طيبه بس خله يرمي بركاده شوي وخله يرمي ب تشوك رقم 2 ورصاص 7.5 32
ويشوف الفرق بعدين والله من جد البندق تسوق وهذا اللي مخلي الصيد يضيع على اخووك


خله يجرب اللي قلته ويرمي بعيد من 20 متر وفوق
والله ما عاد يتركها
انا معي اكستريما 2 30 انش
اول ماشريتها هبلتبي لين عرفت ان الرمي مهوب مد واظغط الزناد
خله يركد ويشووف

[ابو سفيان]

مثل ما قالو الاخوان يمكن ان الرجال متعود على ان يصيد قرب او انه يحب ان تكون الحبه في الصيده لكن على شان يرتاح
خله يبتعد عن الصيده واخذ راحته ويستخدم تشك رقم 2
وابتعد عن الصيده يعني لا يرميها من قريب يعني مسافة 30 متر يقدر يصيبها ان اراد بالحبه يصيد والبندق الاكستريما تزم وكل ما زمت البندق كل ما كان ادائها افضل
ومو شرط فشك معين

[ناصرأبونواف]

أخي أنا عندي اختها ولن اقبل بغيرها وجد ت بها مميزات لاتوجد بأي بندق اخرى بعد تجربة غيرها
وأنصحك بالتالي
1ـ عند توجيه البندق على الصيد ضع في بالك أن الحلبي سوف يطيح قبل الصيد بحوالي مترين وبعد الصيد عشر مترتقريبآ
2ـ ضع النيشان على أول الصيد سوف تمسح جميع ما يأتي خلفه وما يأتي أمامه بمترين فقط
3ـ لا ترمي إلآ بتشك رقم 2
4ـ عند الرمي تأكد بأن كعب البندق موضوع على كتف الرامي بالشكل الصحيح وغير مائل ولا تشد البندق على الكتف بقوه لتستفيد من خدمة الكيك اف بالشكل الصحيح
5ـ تأكد من نوعية الفشك وحجم الحلبي وقوة الضغط وما يتناسب مع نوعية الصيد
جرب وسوف تدعيلي بإذن الله

[ابو محمد 50]

الاكستريما ما تبي كلام بس فيه خطأ بالرمايه اتوقع او من التشك المستخدم وشفت له مرامي بالطيار خيال

[مسافر وحداني]

والله وانا اخوك معي مثلها اذا رميت طيار اركب رقم واحد لانه يسوووووووووووووق بالمره
واذا وافقت طيور موقعه خلك بعيييييد مرررررره عنها وعطها النار وشوف ايش راح يصير
قسم بالله ان تتلذذ فيها
1 للسوق ( خصوصاً طيار ) والله يجيك على راسه بس خلها تسبقه يعني قدم البندق
2 سوق شوي
3 فرش وسوق بسيط
4 تفرش شوي
5 تفرش مررره
لا تركب التشوكات وشوف نثر الحلبي

[المرابط]

أشكر جميع الأخوان اللى شاركو بردودهم

ونقل خبرتهم وتجاربهم

وما أقول ألا جزاكم الله خير

ان شاء الله أجربها في أقرب طلعه