للفائدة أيهما أفضل بنزين95/91

[تميم الشموخ]

السلام عليكم
نطرح بين يديكم هذأ الموضوع
وهو بخصوص تعبئة وقود السيارة بـ95/91
أيهما أفضل من ناحية العزم والصرف وسلامة المحرك
ارجو من جميع أخواني الكرام التفضل بأبداء وجهة نظرهم
ولكم الشكر والتقدير

[المريكبات]

الله موضوعك جميل مفيد جدا جدا تسلم لي ...

انا اقولك اللي سمعته ولا ادري والله

يقولون الـ 91 الاخضر ممتاز ويصلح للسيارات اللي ماتخاف عليها يعني مثلا قل اللي موديلها من 2000 وتحت

والـ 95 الاحمر ممتاز جدا وهذا اذا عندك سياره تحافظ عليها وماتبي يجيها مشاكل بالبخاخات مثلا فهذا الانسب



انا عندي فورد 2008 ماركيز كنت اعبيه 91 اخضر اول ماشريته والحين اعبيه 95 الاحمر والله يستر




بس اهم شي موب على كيف الواحد اذا طقت براسه يغير

لازم يصفر التانكي وبعدين يغيره ولا يحاول يغيره دايم خلاص مره وحده وبس

[تميم الشموخ]

أخي(المريكبات)
أشكرك على أثرائك للموضوع ننتظر المزيد من الأخوان

[تميم الشموخ]

88888888888

[ابو عبود565]

سلام عليكم
والله انا استخدم 95 لإن الأخضر حق مواطير كهرب ودبابات
لاكن للسياره مايصلح
حتى عزم الموتر يخف مع البنزين الاخضر

[gm2009]

اعتقد ان حسب المكينه وش تقبل

[اخو خويه]

انا معي لاندكروزر 2009
أول مره اذكر عبيته 95
ويوم قريت الكتالوج لقيت ان بانزين السياره الخاص لهالمحرك 91 اوكتين
وفيه استكر على باب التانكي من داخل مكتوب عليه 95
قلت اليابانيين أدرى بسياراتهم من الوكاله عندنا
مالك بالطويله عبيت 91 وضعف عزم الموتر
أول من يوم تدعس يفز الموتر ويوم حطيت 91 ماش تردى
قلت ارجع على 95 أحسن
ومن يومها الى الان وانا اعبي 95 والسياره ماشيه مضبوط

اتمنى إني افدتك بتجربتي

[تميم الشموخ]

أخواني الأعزاء
ابو عبود565
gm2009
اخو خويه
يعطيكم الف عافية
ننتظر المزيد من الأفادة
شكر لكم

[مربط القعاسي]

هايلكس 2006 غمارتين دبل في البدايه كنت اعبي 91 وبعد فترة يعني تقريب سته شهور تزيد شوي لا حضت صوت طقطقه في المكينه وهي ير واضحه وميكانيكيا تسمي لقلقه في المكين وهي متى تطلع اذا دعست بقوه والسيارة مهديه وكانت بنمرة ضعيفه شوي او اذا لفيت بالثالث تجي اللقلقه وقبل كان معي باث فاندي وكذالك طلعت نفس اللقلقه فيه وبعد تغير الى 95 راحت اللقلقة اما بالنسبه للعزم والصرفيه ماهنا فرق شاسع لا كن 95 افضل

هذا والله اعلم

[حبران والمسمى]

كان معي كراون فكتوريا واعبي 91 ومع الوقت طلع صوت مثل اللي يقول اخونا مربط القعاسي ورحت لمكانيكي وسمعته الصوت قال موترك استعمال امريكي وتعبي اخضر قلت ايه قال هذا الصوت منه
قلت فيه مضره قال ابد
وثلاث سنوات كديت الموتر كد ومد وبعته والحمدالله ما جاه شي
وانت شف المكتوب بالكاتلوج وامش معه

[تميم الشموخ]

أخواني الأكارم
مربط القعاسي
حبران والمسمى
شكر لكما
ننتظر المزيد من المشاركات

[المريكبات]

تصدق عاد ياخوي مربط القعاسي اللقلقه اللي تقولها كانت ماهي موجوده عندي يوم كنت اعبي بنزين 91

بالماركيز حقي موديله 2008 ويوم قبل شهر من الان غيرت الى 95 تصدق انها طلعت لي ووسوست الحين

بس الحين تجي وتروح صارت خفيفه

لكن ماعليه دام انها ماتضر الموتر هذا اهم شي

[تميم الشموخ]

صباح الخير
نرجو من الجميع اتحافنا بتجاربهم
وشكراً

[عبون الجواء]

من ناحيتي انا كنت اعبي 91 تقول عزم الموتر مات واستفسر عند المكنيكينن الخبراء في السيارات و سعوديين بعد في الرياض والقصيم قال عب 95 وشف عزم الموتر
وبصراحة يا خوى 95 افضل من 91 بكثير طبعا السيارة باترول 2007م
تقبل احترامي وتقدير ابو عبدالله

[تميم الشموخ]

أخوي
عبون الجواء
شكراً للأفادة
بوركت

[kaaaatm]

والله من وجهة نظري ما فيه فرق

السيارة 2001م لاندكروزر

وأنا لي فتره على الـ 95 بس ما شفت شيء يذكر

وكلهم يمشون الموتر 600 كيلو بالضبط في حال عدم المداعس :)

[مغلي]

انا اعبي 91
والعزم طبيعي جدا
وغيرت الى 95 لمدة شهر ولا حسيت بفرق ابدا ابدا
بعد كذا
رجعت للاخضر 91
.
.
يوكن 2002
.
.
91-95
مجرد اكتان فقط ... يعني لازم تعرف انت كم نسبة الضغط بالمحرك 1:9 او 1:10 تعبي 91
اما اذا كان الضغط للمحرك 1:11 واكثر تعبي 95

[العاذر]

اللقلقه من الديلكو يبي وزن هذي وحده

95 هو الافضل بلا منازع

[سيل الجرير]

انا اشوف ان 95 افضل كثير

[تميم الشموخ]

الأخوة الأكارم

kaaaatm

مغلي
العاذر

سيل الجرير

شكر لكم

[ابوحميد122]

91 ... بلا مناااااااااااااااااااااااااازع

[حسين السبيعي]

انااشوف 95 افضل وشكراً للجميع وخصوصاً صاحب الموضوع

[جيب هدد 06]

المعرووووف عندنا 95 صح.....

95 عزم و 91 رخص

وحسب المكينة مثال:الكامري+الددتسن مكينتها 2400=91

يعني من 2400 سي سي وتحت 91

لاكن 2700 زي الهايلكس اكيد 95

السيارات الصغار العملية 91

هذا اللي انا اعرفه من مدير شركة نفط بتااع المحطاات

ارجو اني افدتك

تحيااتي

[تميم الشموخ]

الأكارم
ابوحميد122
حسين السبيعي
جيب هدد 06
شكر لكم

[abusalmaan]

سيارتي FJ 2009 كنت اعبيها 91 وكانت تشرب شرب غير طبيعي

يعني يالله التانكي يكمل معي 3 ايام داخل المدينة وبعدين غيرت على 95

ولاحظت فارق كبير يكاد يصل التوفير الى النص اما العزم فلم الاحض شي

وللعلم فان بعض السيارات يؤثر في العزم وبعضها يؤثر في التوفير فليست سواء

مع اجمل تحية - ابو سلمان

[عبد الله 99]

الوالد معه فورد 2004 و من طلع 91 وهو يعبي و لله الحمد انه يكدها كد الى انه قبل اسبوعين بدة المكيينه تطقطق بصوت واضح اذا كانت السياره واقفه و بالـ D و بعدها صارت قومة السياره ثقيله يوم وديته الوكاله لقو البخخات معدومه و تكلف مبلغ و قدره و انقز للصناعيه عند شلنجر و غير البخخات و صلح بها الى ان قال امين و كلفة 6 الآف ريال و الحمد لله على كل حآل عشان كذا قلبنا البيت كله 95 ادفع 15 هلله ولا ادفع 6الاف
تقبل مروري

[alrhyl2000]

ضيعتوني ماندري منهو الصحيح منكم
نبي كلام علمي ياجماعه مهو خرابيطكم اللي تشتت الواحد

[فياض الربيع]

ضيعتوني ماندري منهو الصحيح منكم


نبي كلام علمي ياجماعه مهو خرابيطكم اللي تشتت الواحد


لا احد يضيعك ولا تهتم اسأل نفسك سؤال

ليه 95 اغلى من 91

مثل ماقال محمد عبده الزين غالي لكن الازين اغلى

وانا اقول 95:good2: وكلها فرق 6 ريال

[المهستر33]

انا عندي كامري 2007 وحطيت 91 لمده اربع سنوات كانت السيارة ميت عزمها ورجعت على 95 ماشاء الله تفز وعزمها قوي..........

[تميم الشموخ]

تحياتي للجميع

[المعرقب]

والله انا عندي باترول مديل 97 متعود ماعبيه الى 95 وجربت 91 قااام يتفتف ويدخن ورجعت 95
وجهت نضري ومجربها 95 افضل

[يعنني مهندس]

من خلال تجربه
91 السياره ميتعدى طبلونها 170

[زيدالتميمي]

يالبناخي عب بانزين أخضر والفرق الي بينه وبين الأحمر مع مرور السنين ترك تطق به سيارة جديدة

[القارا]

السلام عليكم ورحمة الله وبركاته وبعد .........
أنا قرأ عن هذا الموضوع كثيرا وحبيت أفيد الاخوة، وحبيت أنبه على شي قبل أن أشرع في الموضوع وهو أن العنوان غير ملاقي وكان المفترض أن العنوان يكون أيهما أفضل لسيارتك.
طبعاً تختلف السيارت في البنزين الأفضل لها وهذا الإختلاف مبني على عدة عوامل:
أولا: ضعط بستم المكينه، فالسيارات التي يكون ضغط البستم فيها عالي - أغلب السيارات اليابانية - يكون البنزين الأفضل لها 95 لأنه ما يحترق بسرعة مع حرارة السلندر والبساتم وعلى العكس إذا كان ضعط البستم منخفض - أغلب السيارات الأمريكية - يكون الأفضل 91، طبعا ليش ظغط البستم عالي في السيارات اليابانية ومنخفظ في الأمريكية هذا موضوع ثاني يحتاج شرح .
ثانياً: كون السيارة جديدة أو قديمة والمكينه لك عليها، فالسيارات التي تكون قديمة يكون فيها فراغات في السلندر أو قطع حديد بارزة في البستم تكون علية الحرارة وتأدي إلى حرق بنزين 91 قبل أن تعطي شمعة الاشعال (البوجي) الشرارة مما يؤدي إلى حدوث صرعة في المكينه أو صوت طقطقة وعليه فإنها تحتاج بنزين 95 لأن ما يحترق بسرعة وإن كان ضغط البستم منخفض، على عكس السيارة الجديدة والنظيفة طبعا هذا إذا كان ظغط البستم فيها منخفض.
ثالثا: كون السيارة فيها طبة حفز ثلاثي، وهي طبة في بداية ماصورة الكنداسة مما يلي المكينة بعد القزوز بشوي مثل التي في الكامري والفكسار، فهذه السيارات تحتاج بنزين 95 حتى لا يحترق الباقي منه داخل جهاز الحفز الثلاثي.
هذا الذي يحضرني عن الموضوع والخلاصة إن ال91 يحترق في درجة حرارة أقل من 95 وليس كما يظن البعض أنه ما يطول في السيارة.
ولكم خالص شكري

[hamdy94]

مشكور اخى بس ما فهمت الاحمر وله الاخضر؟

[كموص]

95 يحافظ على جلود البلوف ويزيتها والأكتين المرتفع يعطي السيارة عزم وقوة دون التسبب في أصدار أصوات في المكينة (البلوف) ...

[العضيلي]

سيارتي بليزر إل تي موديل 2004 .. من يوم شريتها في 2005 ما أعبيها إلا بنزين 95 المهم قبل سبعة أشهر في "عز الحر " قام يتفتف وتجيه رعده .. غيرت البواجي .. زبط شوي ..إلا أنها رجعت .. شكيت في طرمبة البنزين ..لكن بحكم غلاها" 1400 ريال" بديت بالصفاية "70 ريال " وغيرتها .. وبعدها حصل شيئين .. الرعدة والتفتفة راحت والشيء الثاني الصفاية تطلع بنزين لونه أسود .. المهم اشار علي الميكانيكي "وياليته ما عطاني رايه "..أن أغير البنزين لأن إستهلاك الأخضر كثير والأحمر يطول في توانكي المحطات ويتوسخ .. أخذت برايه وغيرت البنزين من 95 إلى 91 .. مشت الأمور إلى بعد رمضان .. وبعدها .. ولعت اللمبة الصفراء في الطبلون "صورة مكينة " وصارت رعدة رهيبة في السيارة حتى أنه بيطفي .. لفينا يمين يسار .. غيرت فلتر الهواء الداخل للمكينة "60ريال " فكيت الثروتر ونظفته ببخاخ GM بعد فصل البطارية .. راحت الرعدة وطفت اللمبة .. لكن بعدها بيوم رجعت الأمور إلى حالها أشتغلت اللمبة والسيارة جاها رعاش وتفتفة عجيبة والهواء يرتفع وينزل ..المهم أخيراً ذكرني حبيبي وعديلي اخوي أبو فارس بسالفة البنزين .. فرجعت البنزين إلى 95 ولله الحمد بعدها بساعات طفت اللمبة ورجعل لي موتري كما العهد الأول ولي الآن حوالي أسبوعين والأمور زينة والله يتممها على خير .. هذه مشاركتي وتجربتي والمعذرة على الإطالة ..

[فارس الشمال33]

كانت عني طابريس 96 اذا عبيت 91 ومشيت يضعف العزم وتجي

ريحة البنزين عندي في الغماره

بعدها قررت 95 وبس

[صاروخ الغطغط]

انا معي دادسن 2004 بخاخ مع الخط السريع اعبي اخضر اذا كنت مسافر ارخصلي واذا طلعت بر يفتر عزم الموتر مع التغريس اما الاحمر علاج التغريس

[حروف و حتوف]

السلام عليكم

عندي جمس دينالي 2006 اعبي 91 من شريته من الوكاله

اثبت عليه او اغير

في انتظار الرد

في حفظ الله

[حروف و حتوف]

السلام عليكم

عندي جمس دينالي 2006 اعبي 91 من شريته من الوكاله

اثبت عليه او اغير

في انتظار الرد

في حفظ الله

السلام عليكم

وين النشاما يالربع الله يجزاكم خير

[جنرال المدينه]

حاب أستفسر ،،
هل يصلح للكبليتر بنزين 91 والا 95

[ديم غياظ]

اخوي تبي الراحة والكلام الي يجمد على الشارب عب 95 وخل الكلام الفاضي

واذ تبي المشاكل والبخخات ووجع الراس عب 91 وانت حر

لاكن النصيحة 95 افضل بنسبة 99% عن 91

وانا كل سياراتي استخدم 95 سوا قديم او جديد

والتغيير من نوع الى نوع على طول خطر

لاكن اذ كنت مظطر تدريجي خلط لظرورة القصوى

بتوفيق

حائـــــــــــــــل

[مجنون عسل]

يا جماعه لي سنتين ولله الحمد موتري 2006 اعبي اخضر ولا شفت اي مشاكل
انا اقول الاخضر اقل قوة من الاحمر لكن الاخضر اذا انت تمشي بركاده بإذن الله ما عليه اي ضرر
شوف سيارات آرمكو ما تعبي الا اخضر ولا به عندهم اي مشاكل ولكم اهل الخبره راح يفيدونك يا بطل
تقبل فائق احترامي وتقديري

[شحرور الدهنا]

تجربتي مع ال91 كانت كالتالي :صوت المكينه زاد وخاصه صوت البلوف تسمعلها طقطقه اول ماتشغل والصرفيه اكثر وعزم الموتر ضعف شي بيييييط واستخدمت هذا البنزين من يوم نزل الى قبل تقريبا 5 شهور وبعدها غيرته

ولاكن مع ال95 كانت كالتالي: صفاوه بصوت المكينه وصفاوه اثناء الدعسه والعزم اقوى شي بسيييييييييط والصرفيه قلت شي بسييط والفرق طلع 7 ريال

التجربه كانت عل هوندا اكورد وتقبلو مروري

[شحرور الدهنا]

واللي يستخدم اخضر ماراح يحس بالفرق لين يغير الى الاحمر