تم شراء فتك 2009 لكن مهنا خبرة بالنيسان

[سابربن فلاح]

السلام عليكم ورحمة الله

كل عام وانتم بخير بمناسبة اقتراب عيد الاضحى المبارك.

حبيت استفسر من اهل الخبرة في النيسان الفتك حيث اني اشتريت فتك 2009 جديد
قير عادي لكن لاحظت عليه بعض الاشياء ارجو الافادة عنها :
1- اذا كانت السيارة في حالة الوقوف وقمت بلف الطارة وتريد المشي تجد السيارة لاتجاوب صح وتجد فيها بطي وزحف على الخط حتى تعدل الطارة بعكس السيارات الاخرى
هل هذا الامر طبيعي ام خطأ مصنعي ؟
2- قرقعه في باب السائق اذا نزلت البر حتى اني شكيت ان الباب مفتوح ولم يغلق بطريقة صحيحة وما الحل في هذه الحالة ؟
اما بقية الامور فالحمد لله الموتر عزمه طيب ومريح في البر والخط.

[4*4]

شغلة الطاره مكسوره يثقل الموتر ركب فرار وتروح هذا عمود الدبل ,, وقرقعة الباب حق السواق طبيعيه حتى لاجيت تصكه تحسه يحك ,, سمكري ممتاز وفاهم يركب لك نحاسات في مفصلات الباب تنهي هالشغله والنحاسات تفصل في المخرطه على شكل ورده تقريبا بس مخروطيه
الله يطعمك خيره ويعديك شره ولاعليك من هرج الي يذمون

[أطلال نجد]

وعليكم السلام ورحمة الله وبركاته

ما شاء الله ..

أحسنت الأختيار , مبروك إن شاء الله

[سيف العاطفي]

سلام عليكم
مبرووك الموتر ويعطيك خييره ويكفييك شره
ثانيا:مشكلة الباب الله والعالم اذا مهب اللي قالها اخوي 4*4 فتراه ذراع الدريشه شيك عليه
واختيار موفق
استفسار:
*اخوي سابر شلون استخدام الموتر هل هو جيد تنصح فيه خص على الخط خفيف اوفيه عيوب ناوي على واحد
ببيع 97
وسلامتك

[سابربن فلاح]

الله يبارك فيكم جميعا
الله لا تعمينا بصراحة ما توقعت , طلعت السيارة من المعرض وكان الدبل شغال , كلمت واحد من الشباب عن
ثقل السيارة في اللفات عرف الحل على طول وقال هذا من الدبل وفعلا فكيت الدبل وصار ما شاء الله تقول كامري
لكن هل ممشاي على الموتر والدبل شغال يضر ( مشيت 150 كم ) السرعة من 100 وأقل
يا اخوان من يخبر لي سمكري ممتاز عشان صوت الباب ( الرياض)
الموتر استخدامه طيب وراكد في الخط ما شاء الله .
ابن العم العاطفي , شف معرض نجد ( شريته منهم ب128 ألف كاش )
لاهنتوا جميعا
وفي المرة القادمة بقولكم عن استخدامه في النفود .

[ولد وايل..]

هههههههههههههه الله يصلحك

الحمد لله ع السلامه وإن شاء الله ما تأثر الموتر...

بالنسبه للباب ترى طبيعي ولا هو معين بسيارة وحده يمكن مسمار مرتخي ويطقطق ولا شي ساقط بمجرى الباب ..


الله يوفقك ويطعمك خيره ويكفيك شرها...

[ملقاط بن جمر]

على البركة إن شاء الله ..

الله يعطيك من خيره ويكفيك من شره ..

[مقلع الرمث]

ماشاء الله

الله يطعمك من خيره ويكفيك شره

حلوه امشغل الدبل

ماعليك عادي الباترول يتحمل ولو تشغله وتمشي عليه اكثر الوضع عادي

مع العلم اني كان معي باترول اسلقه وكنت بالسريع وقت نزول الامطار اشغل الدبل

وانا امشي سرعات عاليه

لكن سؤالي

سيارتي رقم واحد ولا اثنين؟

[ابن علوان]

ماشاء الله تبارك الله يعطيك خيره ويكفيك شره
عز الله الموتر الطيب وربي اللي وفقك تشتريه
بتشوف ان شاء الله قدراته في البر وتتاكد ان قرارك كان سليم
والف الف الف مبروك

[باترول 4500]

الله يبارك فيكم جميعا
الله لا تعمينا بصراحة ما توقعت , طلعت السيارة من المعرض وكان الدبل شغال , كلمت واحد من الشباب عن
ثقل السيارة في اللفات عرف الحل على طول وقال هذا من الدبل وفعلا فكيت الدبل وصار ما شاء الله تقول كامري
لكن هل ممشاي على الموتر والدبل شغال يضر ( مشيت 150 كم ) السرعة من 100 وأقل هههههههههههههههههههه

إن شاء الله مافيه ضرر دامك ماتعديت 100

جاء الشتاء نبيك تطلع بنا للدهناء على الفتك :D

الله يطعمك من خيره ويكفيك شره

[يريور عيمان]

ههههه
لا يالغالي لا تحاتي الباترول معروف بصلابته و قوته
و بالبركة اخوي و تستاهل الخير

[الكاسر205]

على البركة إن شاء الله

الله يعطيك من خيره ويكفيك من شره

[سابربن فلاح]

اشهد انكم شقردية وهذا معروف عن اهل البر واهل الجيوب .
جلست اكثر من شهر ابحث عن جيب تايوتا , ما حصلت , شفت الباجيرو 2010 فل بغيت اشتريه
سبحان الله صلينا المغرب في المعرض وناوي اعطيه العربون قال لي خويي صل ركعتين استخارة
وبعد ما صليت حسيت مالي رغبه في الباجيروا
رحت ثاني يوم الا وشوف ( طير شلوى ) الفتك اللولوي قلت لنفسي توكلنا على الله ومن بكرة وانا مطلعه من المعرض
مع العلم انه مهوب في بالي لكن تفاجأت من كثر الي يمدحونه , آخرهم ولد خالي من الكويت بالصدفة وده يبيع
التاهو ويشري فتك فل كامل وجلس يمدح فيه خاصة قوة القير ويقول هو اقوى قير في الجيوب كلها ماشاء الله
اخوكم قرب على التقاعد المبكر واشتريت بيت في شمال الرياض ب100 كم وتعرفون النفود حولنا قلت لازم اشري قير عادي احسن خاصة اذا رحت للمخيم وجاء الربيع
واتمنى تشرفونا بزيارتكم وهذي هي قصتي مع الفتك واشكركم جميعا الله يعطيكم العافية .

[سابربن فلاح]

يا اخوان كم يسوى فتك فل كامل 2007
ولد خالي يدور له فتك نظيف
لاهنتوا يالنشاما وسعيكم محفوظ

[المسافر]

ما شاء الله الله يعطيك خيره ويكفيك شره
اخي لا تنس تضع يدك على الكبوت وتقول كما ورد
عن عمر بن شعيب عن جده قال‏:‏ قال رسول الله صلى الله عليه وسلم‏:‏ ‏(‏إذا إشترى أحدكم الجارية أو الغلام أو الدابة فليأخذ ناصيته وليقل‏:‏ اللهم إني أسألك خيره وخير ما جبل عليه وأعوذ بك من شره وشر ما جبل عليه وإذا إشترى بعيراً فليأخذ بذروة سنامه وليقل مثل ذلك‏)‏
لان هذا من سنة النبي صلى الله عليه وسلم

اخي هل يوجد عند المعرض جديد آخر وما هو نوعه
واذا امكن رقم المعرض

[ابوعبدالله 32]

الف مبروك
نفس موتري وحصل معي بعض المشاكل
لكن انا ابي انصحك نصيحه فيه الكتاوت فوق الفيوزات لونها ازرق
رح للوكاله وخلهم يغيرونها لك اويلحمونها لاني تبهذلت منها وخاصة الكتاوت اذا جاه غبار يجيم ولا يوصل كهرباء لطرنبة البنزين

[البرتقالي]

ما شاء الله سيارة معتبره
الله يعطيك خيرها ويكفيك شرها

[الادعج]

بخصوص صوت الباب ..
وبما اني مالك باترول سابق <<<أحس انها على وزن لواء متقاعد
فالحل عندي وانا ابو هندي ..
والموضوع مايحتاج ورشه وسمكره ومن هالكلام ..لكن الموضوع راح يكلفك مبلغ وقدره(1 ريال عربي سعودي فقط لاغير) والطريقه كالتالي:
تروح للبقاله اللي جنب بيتكم وتقوله عطن ^^شطرطون اسود ^^قيمته ريال واحد بس^الله يديم الرخص^..بعدها تروح وتفتح باب الفتك الخلفي ..تلاحظ فيه حلقتين على شكل حرف ^ U^ وحده فوق ووحده تحت ..بعد كذا تلفهم بالشطرطون الاسود كلهم الثنتين لفتين او لفتين ونص ..بس ارجع واقول بس ..لانه لو زودت ^كأنك يابو زيد ماغزيت^ ..مع العلم انك تلف الحلقه كامله ... مو جزء وتخلي جزء يعني اذا كان لونها فضي اول تخليها اسود >>>^بالعربي تلفها كلها دار ما دار^ <<اتمنى انكم فهمتوني ..بعد كذا سكر الباب ^تحس تسكيره الباب بعدها صارت ثقيله..لكن بعد كذا تصير عااادي^..وتروح وتدق سلف وتؤكل على الله ..وهذا وجهي ان سمعت صوت الباب مره ثانيه .
مجربها بنفسي >>>^يعني مااقول فلان سواها^
وان صار فيه صوت احذفوا معرفي

[سابربن فلاح]

هههههههههههه
انا اقصد باب السايق وليس الخلفي
هل نتبع معه نفس الطريقة
++++++++
رد على الاخ الكريم بالنسبة للمعرض ما ادري هل عندهم او لا
لكن لو تسال في الشفا بتحصل ان شاء الله .

[سابربن فلاح]

ابو عبدالله الله يجزاك خير
يعني الوكالة ما عندها مانع من تغيير الكتاوت (مجانا )؟
يعني بركبون واحد ثاني ؟

[ابوعبدالله 32]

هلا ابوفلاح
انت حاول مع الوكاله اواشتر واحد احتياط

[يريور عيمان]

ما يحتاج تغير الكتاوت
لان المديلات فوق 2008 تم حل المشكلة فيها
تقدر تعاين الكتاوت اذا شفت لونه ازرق فهذا كتاوت يحتاج تغير اما اذا كان لونه اخضر فهذا الكتاوت عليه من الشركة و نسخة جديدة و ما يحتاج تغير

[اول وتالي]

اولاً ماشاء الله تبارك الله
الله يطعمك خيره ويكفيك شره

ثانيا انا عندي اخوه تماتيك ومشيت عليه اكثر من 4000 كم مع العلم اني سافرت عليه مكه
سؤالي/ هل اشيك عليه في الوكاله مع اني لم اشيك عليه على 1000كم لاني كنت متردد في الذهاب الى الوكاله (زحمه - وعدم مصداقيه) بالعربي وكاله زفت.
ارجو من الشباب الافاده وشكراً للجميع.

[Hwer]

ماشاء الله
الله يعطيك من خيره ويكفيك شره
وشلون موتر جديد ويقربع الباب ياخي رجعه لهم وانتبه لايكون مصدوم عندهم ومسمكر

[راعي النياسين]

اخوي الموتر شاريه جديد اذا جديد انتبه ارجع للمعرض وقله له السالفه واذا مانفع رح للوكاله لانه يعتبر على الضمان

ااما ااذا كنت شاريه مستعمل هذا شي طبيعي ويمكن تكون مسامير مرتخيه فقط لاغير


اما اختيارك للموتر ماشاء الله موتر لايعلى عليه والله يعطيك خيره ويكفيك شره

والممشى على الدبل مايضره ان شاء الله الباترول افضل مابه الدبل والدفرنسات والقير والمكينه <<< وش خليت خخخخخ

لالا موتر يستاهل قيمته وتتهنى فيه يارب

[abofial]

الله يعطيك خيره ويكفيك شره

[ABU SALEM]

كم سعر الجديد يا شباب

[العاذر]

مايصير تمشي على السياره والدبل شغال ,, وش لون ماشفت لمبة الدبل شغاله ؟؟؟


انتبه ونا اخوك ترى تسبب انقلاب للسياره مثل ماقال اخونا ابو عبدالعزيز في موضع سابق لي

وترى الاطفال يمكن يعبثون في عصا الدبل خلك فطين مستقبلا قبل لاتحرك السياره شيك ,

تحياتي لك ,

[S 106]

الله يطـعمك من خيـره ويكفيك شـره
إختيـار مـوفق :)

[ابوعبدالله 32]

ما يحتاج تغير الكتاوت
لان المديلات فوق 2008 تم حل المشكلة فيها
تقدر تعاين الكتاوت اذا شفت لونه ازرق فهذا كتاوت يحتاج تغير اما اذا كان لونه اخضر فهذا الكتاوت عليه من الشركة و نسخة جديدة و ما يحتاج تغير

صادق اخوي يريور
انا اللي معي 2009 والكتاوت اللي فيه لونه ازرق واللي شريته لونه اخضر اللي لونه ازرق هو اللي خرب معي

[ابوصالح77]

هههههههههههههه الله يصلحك

الحمد لله ع السلامه وإن شاء الله ما تأثر الموتر...

بالنسبه للباب ترى طبيعي ولا هو معين بسيارة وحده يمكن مسمار مرتخي ويطقطق ولا شي ساقط بمجرى الباب ..


الله يوفقك ويطعمك خيره ويكفيك شرها...
:good2::good2::good2::good2::good2::good2:
الله يطرح فيه البركة
أهم شيء لا يلعبون بالمفصلات والموتر جديد

[سابربن فلاح]

الله يجزاكم خير جميعا .
وش المفصلات ؟ هل تقصد الي في الابواب ؟
شي غريب " يعني اذا شفت الكتاوت ازرق " اروح للوكالة يركبون اخضر
يا اخواني السيارة جديدة من معرض نجد , وقربعة الباب اذا نزلت بر وضربت مطب او بطناج ( رقله )
اذا مشى الموتر 1000كم وش الوكالة بيسون ؟ هل يغيرون زيت فقط ؟
وما افضل زيت ؟
الله يوفقكم يا حبي لكم .