الفناتير..

[النوخذة 03]

بسم الله الرحمن الرحيم ..
اخواني المكشاتية ارجو منكم توصيف مكان الصيد الطيب في الفناتير ..
حيث اني انوي القيام برحلة اليها..
علما اني من سكان الخبر ..
امل التوصيف من بداية الطريق..
وكما عهدناكم نشامى وشقردية ..
لكم التحية

[نمط]

السلام عليكم

الفناتير اول كنا نحدق عند الحلقة الكبيرة بس الآن الكرنيش فيه تعديلات وجاها القص

والمكان الثاني في وجه كودو , ولقبل شهر انا زايرها

والموقع فيه هوامير بس احيانا يبي لك تمد على مسافة 300 متر
عشان تتجنب الصغير شوي
وموسم القبقب بلوة ما يمدي الجيمة تواصل

أنصحك تبعد شمال شوي بيكون الصيد أطيب والشواطئ أنظف

منيفة او تناجيب او السفانية او عمودة او النقورية او الصدوي
بالتوفيق

[شنوان]

مرحبا اخي
ونت جاي على طريق الدمام الجبيل توصل الجبيل المدخل الاول الي يوديك للقاعده البحريه لا تنزل معه خلك مواصل الين يجيك بعدها بحوالي عشره كيلو بتجيك لوحه مكتوب عليها الاحياء السكنيه خش معها وخلك مواصل لا تلف لا يمين ولا يسار الين تجيك مبنى الهيئه الملكيه على اليمين فيه كبري خلك معها وبتجيك الكليه على يدك اليسار وخلك مواصل بتشوف البحر يمينك وحي الخليج يسارك خلك مواصل بعد حي الخليج بأشاره لف يمين وخلك تبرا للبحر @ من هنا يبدأ كورنيش الفناتير ورح الى اخر الكورنيش بتشوف لنج خشب اي سفينه منظر على الكورنيش وتعداها وبتشوف عماير تبنى على يدك اليسار خش يمكين بتشوف قاعده للدفاع الجوي خش عليها وقبل البوابه خش يمين ووقف السياره وانزل داخل البحر على رجلك وقت ما تكون المايه ثبر اي جزر والان تصير جزر وقت الضهر يعني عندك تغريبأ اربع ساعات او اكثر واذا شفت البحر بدا يمد اجلس بعدها ساعه ثمأ اطلع لا تسغي عليك المايه وتورط داخل شوي مو كثيروانت وحسب خبرتك في المكان اختار مكان زين وشف السبيطي والشعم والقرقفان @ والله يوفقك اخي

[مقدام 1]

انصحك بالصيد في شواطئ مردومه خلف مخيمات الشركات وخصوصا المنطقه اللي خلف مخيم سابك جيده للشعوم والسبيطي

[accentkool]

ماشاء الله الاخوووووووووووووان ماقصرو بالاجابة

[Multi صياد]

لا تروح الفناتير هذي الفترة لانها مسكرة للصيانة بالذات في اماكن الصيد الحلوة

[A B D U L L A H]

ماشاء الله الآخوان آفادوك

وآهل الجبيل فيهم الخير والبركهـ إن شاء الله

نتمنى لك صيد طيب ووقت ممتع هناك

[nasser a]

الفناتير في مكان حلوو الي قالك عليه الاخ الي مقابل كودو

بالتوفيق لك

[النتاوي]

افادوك الشباب بالعلم الغانم

وزود بعض النصايح .. مجانا .. ههههه

[النوخذة 03]

الله يعطيكم العافية ..يالنشامى ..
اخوي نمط ..شنوان
عاجز عن شكركم ..
بس المكان يصلح للغزول.؟

[نمط]

لغزول ممنوعة عندنا في شواطئ الشرقية , وحتى السالية بعضهم يمنعوها
والفناتير ما تصلح لغزول لانها منطقة عميقة
ولغزول تنفع لمناطق ضحلة , أو أماكن العمق فيها متدرج

يمكن الموقع اللي وصفه لك الاخ نشوان ينفع لغزول بما ان الحداق فيه خباط فهو ضحل

اما الأماكن اللي ما بعد الفناتير فأغلها تنفع لغزول مثل منيفة والنقورية لأنها شواطئ متدرجة
لكن يبي لك واسطة